40.5 C
Phnom Penh

រដ្ឋមន្ត្រី​ក្រសួង​ឧស្សាហកម្ម និង​សិប្បកម្ម​លើក​ឡើង​ថា សភា​ពាណិជ្ជកម្ម​កម្ពុជា​ត្រូវ​ខិត​ខំ​​ប្រឹង​ប្រែង​បន្ថែម​ទៀត​

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ​ ក្រសួង​​ឧស្សាហកម្ម​ និង​សិប្បកម្ម​​បាន​ឲ្យ​ដឹង​ថា ​សភា​ពាណិជ្ជកម្ម​កម្ពុជា​​ជា​ស្ថាប័ន​បញ្ចុះ​បញ្ចូល​វិស័យ​ឯកជន​ដ៏សំខាន់​បំផុត​នៅ​ក្នុង​ប្រទេស​​កម្ពុជា​គួរ​តែ​ខិត​ខំ​ប្រឹង​ប្រែង​​បន្ថែម​ទៀត​សម្រាប់​សហគ្រិន​​នៅ​ក្នុង​ប្រទេស​។

លោក ចម ប្រសិទ្ធ រដ្ឋមន្ត្រី​ក្រសួង​​ឧស្សាហកម្ម និង​សិប្បកម្ម​បាន​និយាយ​បន្ទាប់ពី​ការ​បោះ​ឆ្នោត​ជ្រើស​រើស​ប្រធាន​សម្ព័ន្ធ​សមាគម​សហគ្រាស​ធន់​តូច និង​មធ្យម​នៅ​កម្ពុជា​ ជា​ស្ថាប័ន​ដែល​ធ្វើ​ការ​ងារ​យ៉ាង​ជិតស្និទ្ធ​ជាមួយ​ក្រសួង​របស់​លោក។

បន្ទាប់ពី​​ត្រូវ​បាន​ប្រកាស​ថា លោកឧកញ៉ា តែ តាំងប៉ ​បានឈ្នះ​​​​​ឆ្នោត​ជា​ប្រធាន​សម្ព័ន្ធ​​​​សមាគម​សហគ្រាសធន់​តូច និង​មធ្យម​នៅ​កម្ពុជា​ម្ដង​ទៀត​នោះ លោក ចម ប្រសិទ្ធ ​បាន​ប្រាប់​អ្នក​ចូល​រួម​ប្រហែល​២០០​នាក់​ថា សភា​ពាណិជ្ជកម្ម​កម្ពុជា​ដែល​ដឹកនាំ​ដោយ​អ្នក​ឧកញ៉ា គិត ម៉េង គួរ​តែ​ខិត​ខំ​បន្ថែម​ទៀត​ដើម្បី​អភិវឌ្ឍ​សហគ្រាសធន់​តូច និង​មធ្យម​នៅ​កម្ពុជា​។

លោក ចម ប្រសិទ្ធ បាន​មាន​ប្រសាសន៍​ថា “និយាយ​ឲ្យ​ស្មោះ​ត្រង់​ទៅ​​ ទោះបី​ជា​សភា​ពាណិជ្ជកម្ម​កម្ពុជា​មាន​ធនធាន​ច្រើន​ក៏ដោយ ក៏​ស្ថាប័ន​នេះ​​មិន​បាន​ផ្ដល់​ការ​បណ្ដុះ​បណ្ដាល​ខ្លាំង​ដល់​សមាជិក​របស់​ខ្លួន​ដែរ​។ សម្ព័ន្ធ​សមាគម​សហគ្រាសធន់​តូច និង​មធ្យម​នៅ​កម្ពុជា​មាន​​ធនធាន​តិច​តួច​ក៏ពិត​មែន​ ប៉ុន្តែ​​ស្ថាប័ន​​នេះ​បាន​ខិត​ខំ​យ៉ាង​ខ្លាំង​ដើម្បី​ផ្ដល់​ការ​បណ្ដុះ​បណ្ដាល​ដល់​សមាជិក​របស់​ខ្លួន​”។

លោក ចម ប្រសិទ្ធ ដែល​ធ្លាប់​ជា​រដ្ឋមន្ត្រី​ក្រសួង​ពាណិជ្ជកម្ម​មុន​​ពេល​លោក​ត្រូវ​បាន​​ជំនួស​តំណែង​ដោយ​លោក ស៊ុន ចាន់ថុល កាលពី​ឆ្នាំ​មុន​​បាន​លើក​ឡើង​ទៀត​ថា ចាប់​តាំង​​ពី​ឆ្នាំ​២០១០​មក សម្ព័ន្ធ​សមាគម​សហគ្រាសធន់តូច និង​មធ្យម​នៅ​កម្ពុជា​​ ​បាន​ធ្វើ​ឲ្យ​មាន​កំណើន​កើន​ឡើង​​ថេរ​ ដោយ​ជួយ​សហគ្រាស​ធន់តូច និង​មធ្យម​អភិវឌ្ឍទូទាំង​ប្រទេស​កម្ពុជា​ គឺ​វាផ្ទុយ​ទៅ​នឹង​សម្ព័ន្ធ​ និង​សមាគម​ពាណិជ្ជកម្ម​ផ្សេៗ​ទៀត​។

លោក​បាន​មាន​ប្រសាសន៍​បន្ថែម​ថា ” ពី​មុន សម្ព័ន្ធ​សមាគម​សហគ្រាស​ធន់​តូច និង​មធ្យម​នៅ​កម្ពុជា​បម្រើ​​តែ​សហគ្រាស​ខ្នាត​ធំ​ប៉ុណ្ណោះ​ ប៉ុន្តែ​ឥឡូវ​​ស្ថាប័ន​នេះ​ចាំបាច់​ត្រូវ​តែ​បម្រើ​សហគ្រាស​ធន់តូច និង​មធ្យម​នៅ​​គ្រប់​វិស័យ​ទាំង​អស់​”។

នៅ​ពេល​ទាក់​ទង​តាម​ទូរស័ព្ទ​កាលពី​ម្សិលមិញ លោក គិត ម៉េង ប្រធាន​សភា​ពាណិជ្ជកម្ម​កម្ពុជា​ និង​ជា​ប្រធាន​ក្រុម​ហ៊ុន​រ៉ូយ៉ាល់​គ្រុប បាន​បដិសេធ​មិន​ធ្វើ​អត្ថាធិប្បាយ​​លើ​ការ​លើក​ឡើង​របស់​លោក ចម ប្រសិទ្ធ ឡើយ​។

តែ​ទោះ​ជាយ៉ាង​ណា លោក ងួន ម៉េងតិច អគ្គនាយក​សភា​ពាណិជ្ជកម្ម​​កម្ពុជា​នេះ​​បាន​លើក​ឡើង​ថា ភាព​ពិត​ជាក់​ស្ដែង​នៃ​ការ​អះអាង​របស់​លោក ចម ប្រសិទ្ធ ត្រូវ​បាន​លើក​យក​មក​​ពិភាក្សា​ដេញ​ដោល​។ លោក ងួន ម៉េងតិច ​បាន​មាន​ប្រសាសន៍​ថា ” វា​គ្រាន់​តែ​ជា​គំនិត​ផ្ទាល់​ខ្លួន​របស់​គាត់​ប៉ុណ្ណោះ យើង​មិន​ចាំបាច់​បង្ហាញ​ពី​សមិទ្ធផល​​ដែល​យើង​​ទទួល​បាន​​នោះ​ទេ​។ សាធារណជន​អាច​វាយ​តម្លៃ​ដោយ​ខ្លួន​ឯង​បានពីអ្វី​ដែល​ស្ថាប័ន​​នីមួយ​ៗ​បានធ្វើ​”។

លោក​​បាន​បន្ថែម​ថា សម្ព័ន្ធ​សមាគម​សហគ្រាស​ធន់​តូច និង​មធ្យម​​នៅ​កម្ពុជា​ពិត​ជា​ត្រូវ​ការ​សភា​ពាណិជ្ជកម្ម​ ព្រោះ​ស្ថាប័ន​នេះ​មាន​​ឥទ្ធិពល​​​ខ្លាំង​​ក្នុង​ចំណោម​សមាគម​ពាណិជ្ជកម្ម​ក្នុង​ប្រទេស​កម្ពុជា​។ លោក​បាន​មាន​ប្រសាសន៍​បន្ថែម​ថា ” បើ​គ្មាន​សភា​ពាណិជ្ជកម្ម​ទេ​នោះ សម្ព័ន្ធ​សមាគម​សហគ្រាស​ធន់​តូច និង​មធ្យម​នៅ​កម្ពុជា​មិន​អាច​​បំពេញ​តួនាទី​របស់​ខ្លួន​​ប្រកប​ដោយ​​ប្រសិទ្ធ​ភាព​បាន​​ទេ​​”។

លោក ចម ប្រសិទ្ធ បាន​មាន​ប្រសាសន៍​អំឡុង​ពេល​ថ្លែង​សុន្ទរកថា​កាលពី​ម្សិលមិញ​ថា សហគ្រាស​ធន់​តូច និង​មធ្យម​នៅ​កម្ពុជា​មាន​ចន្លោះពី​៧០.០០០​ដល់​៨០.០០០​។

បន្ទាប់ពី​ជាប់​ឆ្នោត​ជា​ប្រធាន​ម្ដង​ទៀត​ លោក តែ តាំង​ប៉ បាន​​ឲ្យ​ដឹង​ថា លោក​នឹង​បន្ត​ផ្ដោត​លើ​​ការ​បង្កើន​ការ​ប្រកួត​ប្រជែង​គ្នា​។ លោក​បាន​មាន​ប្រសាសន៍​ថា ” ខ្ញុំ​នឹង​ខំ​ធ្វើ​ការ​​ឲ្យ​បាន​ខ្លាំង​ដើម្បី​​អភិវឌ្ឍ​សហគ្រាស​ធន់តូច និង​មធ្យម​នៅ​កម្ពុជា​ជា​ពិសេស ហេតុដូច្នេះ ​ពួកគេ​អាច​ប្រកួត​ប្រជែង​ជាមួយ​​សហគ្រាស​​​ផ្សេងៗ​ទៀត​លើ​ឆាក​អន្តរជាតិ​បាន​ នៅ​ពេល​សហគមន៍​សេដ្ឋកិច្ច​អាស៊ាន​បើក​នៅ​ឆ្នាំ​២០១៥​”៕ ស៊ុយឈាង​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស