នគរបាលប្រឆាំងគ្រឿងញៀនបានចាប់ខ្លួនជនជាតិនីហ្សេរីយ៉ាប្រាំបួននាក់កាលពីយប់ថ្ងៃអាទិត្យ នៅទីតាំងចំនួនបីផ្សេងគ្នាក្នុងរាជធានីភ្នំពេញពីបទរក្សាទុក និងចែកចាយគ្រឿងញៀន បន្ទាប់ពីនគរបាលសម្ងាត់បានទិញថ្នាំញៀនមេតំហ្វេតាមីន ទម្ងន់១០០ក្រាមពីបុរសម្នាក់ក្នុងចំណោមបុរសទាំងនោះ។
លោក អុិន សុង អនុប្រធាននាយកដ្ឋានប្រឆាំងគ្រឿងញៀននៃក្រសួងមហាផ្ទៃ បានមានប្រសាសន៍ថា នគរបាលសម្ងាត់ចាប់បានជនចែកចាយគ្រឿងញៀនម្នាក់នៅក្នុងសង្កាត់ផ្សារថ្មី២ ខណ្ឌដូនពេញ បន្ទាប់ពីព្រមព្រៀងទិញថ្នាំមេតំហ្វេតាមីនទម្ងន់១០០ក្រាមពីរូបគេក្នុងតម្លៃ២.៦០០ដុល្លារ។
លោកបានមានប្រសាសន៍ថា “បន្ទាប់ពីសួរចម្លើយជនសង្ស័យទី១រួច នគរបាលប្រឆាំងគ្រឿងញៀនរបស់យើងបានចុះទៅកាន់ផ្ទះជួលពីរទៀតក្នុងសង្កាត់ចោមចៅ ខណ្ឌពោធិ៍សែនជ័យ ដែលទីបំផុតនាំឲ្យយើងឈានដល់ការចាប់ខ្លួនបុរសជនជាតិនីហ្សេរីយ៉ាប្រាំបួននាក់”។
លោក យ៉េន បញ្ញារិទ្ធ ប្រធានការិយាល័យទី៩ស្តីទីនៃនគរបាលប្រឆាំងគ្រឿងញៀន បានមានប្រសាសន៍ថា ការឆ្មក់បង្ក្រាបគ្រឿងញៀននេះធ្វើឡើងដោយសារមានប្រតិបត្តិការរយៈពេលមួយខែ ដែលសម្រេចដោយសាលាដំបូងរាជធានីភ្នំពេញ ដើម្បីតាមដានសកម្មភាពរបស់ក្រុមជនជាតិនីហ្សេរីយ៉ានេះ។
លោកមានប្រសាសន៍ថា “បុរសទាំងនេះជាជនជាតិនីហ្សេរីយ៉ា ហើយពួកគេលក់គ្រឿងញៀនយ៉ាងសកម្មនៅទូទាំងរាជធានីនៅពេលយប់ និងពេលថ្ងៃ”។លោកបានបន្តថា មន្ត្រីមកពីអង្គភាពរបស់លោកបានបន្លំខ្លួនធ្វើជាអ្នកទិញដើម្បីចាប់ខ្លួនជនសង្ស័យទាំងនេះ។
លោកបានលើកឡើងបន្ថែមថា “យើងបានចំណាយពេលមួយខែឃ្លាំមើលសកម្មភាពរបស់ពួកគេ ហើយដោយមានការសម្រេចពីព្រះរាជអាជ្ញាអមសាលាដំបូងរាជធានី [ភ្នាក់ងារសម្ងាត់របស់យើង] ដំបូងឡើយបានទិញគ្រឿងញៀន ២០ក្រាមពីជនចែកចាយហើយបន្ទាប់មកបានព្រមព្រៀងទិញ១០០ក្រាមបន្ថែមទៀត”។
នៅពេលធ្វើការជួញដូរលើកទី២ នគរបាលបានស្ទុះទៅចាប់ខ្លួនជនសង្ស័យ ហើយជនសង្ស័យបាននាំនគរបាលទៅកាន់បុរីពិភពថ្មីក្នុងភូមិត្រពាំងថ្លឹង ដែលនៅទីនោះ នគរបាលបានចាប់ខ្លួនជនសង្ស័យប្រាំមួយនាក់ផ្សេងទៀត។ បុរសពីរនាក់ទៀតបានគេចខ្លួនជាមួយថ្នាំញៀន ប៉ុន្តែ ក្រោយមកត្រូវចាប់ខ្លួនបានដោយគ្មានគ្រឿងញៀននៅក្នុងដៃ បន្ទាប់ពីនគរបាលប្រទះឃើញពួកគេដើរលុយទឹកស្រែក្បែរនោះ។
លោក យ៉េន បញ្ញារិទ្ធ បានមានប្រសាសន៍ទៀតថា “ពេលនេះពួកគេកំពុងស្ថិតក្រោមការឃំុឃាំងរបស់យើង ហើយយើងកំពុងសួរចម្លើយពួកគេម្នាក់ម្តង ដើម្បីស្វែងរកមេរបស់ពួកគេ ពីព្រោះពួកគេមានស្នៀតជាច្រើនសម្រាប់លក់គ្រឿងញៀននៅទូទាំងរាជធានីភ្នំពេញ”។
លោក អាបាយ៉ូមី កូឡេដូយេ (Abayomi Koledoye) ប្រធានអង្គការ Nigeriansin Diaspora Organization នៅក្នុងប្រទេសកម្ពុជាបានមានប្រសាសន៍ថា លោកកំពុងរង់ចាំអាជ្ញាធរលាតត្រដាងព័ត៌មានស្តីពីអត្តសញ្ញាណរបស់ជនសង្ស័យទាំងនេះ ប៉ុន្តែ លោកបានព្រមានប្រឆាំងការបណ្តោយឲ្យមនុស្សមួយក្តាប់តូចធ្វើឲ្យអាម៉ាស់ដល់សហគមន៍ជនជាតិនីហ្សេរីយ៉ាទាំងមូលនៅកម្ពុជា ដែលពួកគេភាគច្រើនគោរពច្បាប់ និងរកស៊ីស្របច្បាប់។
លោកបានមានប្រសាសន៍ទៀតថា “នេះជាបញ្ហាធំសម្រាប់យើង ប៉ុន្តែ តើឲ្យយើងឃ្លាំមើលក្រុមនេះដោយរបៀបណា ប្រសិនបើពួកគេមិនត្រូវបានចាប់ខ្លួនដោយទីភ្នាក់ងារអនុវត្តន៍ច្បាប់ទេនោះ? ខ្ញុំសូមបន្តអំពាវនាវឲ្យស្ថាប័នប្រព័ន្ធផ្សព្វផ្សាយនានានិយាយជួសមុខឲ្យជនជាតិនីហ្សេរីយ៉ារស់នៅទីនេះ ដែលមានកេរ្តិ៍ឈ្មោះល្អ ហើយកុំសម្លឹងមើលមកយើងតាមក្រសែភ្នែករបស់មនុស្សមួយចំនួនតូច ដែលចង់មានបានឆាប់រហ័ស”៕សុខុម (រាយការណ៍បន្ថែមដោយ Simon Henderson)