27 C
Phnom Penh

លោក នួន​ ជា​ និង​លោក ខៀវ សំផន​ ច្រាន​ចោល​សំណើ​ចា​ត់តាំង​មេធាវីថ្មី

ដោយ ឌឹ ខេមបូឌា ដេលី

បទវិភាគ

​មេធាវីការ​ពារ​​លោក នួន​ ជា និង​លោក ខៀវ សំផន ចុង​ចោទ​នៅ​សាលាក្ដី​ខ្មែរ​ក្រហម​កាលពី​ម្សិលមិញ​បាន​ច្រាន​ចោល​សំណើ​របស់​ព្រះរាជ​អាជ្ញាឲ្យ​តុលាការ​​ចាត់​តាំង​មេធាវី​ថ្មី​សម្រាប់​កូនក្ដី​របស់​ខ្លួន​ ។

ក្រុមមេធាវីការ​ពារ​ក្ដី​ទាំង​ពីរ​​ក្រុមបាន​ដើរ​ចេញពី​សវនាការ​ថ្ងៃ​ដំបូង​នៅ​ក្នុង​ការ​បើក​សវនាការ​ដំណាក់​កាលទី​២​កាលពី​ដើម​ខែ​នេះ​តាម​ការ​ណែនាំ​របស់​កូនក្ដី​ខ្លួន​។

លោក នួន ជា លើក​ឡើង​ថា ចៅក្រម​បួន​រូប​​នៅ​អង្គជំនុំជម្រះសាលាដំបូង​​ដែល​បាន​ផ្ដន្ទាទោស​លោក​អំឡុង​ដំណាក់​កាលទី​១​គឺ​មាន​ភាព​លម្អៀង​ ហើយ​លោក​ចង់​ឲ្យ​​រក​អ្នក​មក​ជំនួស​ពួកគេ។ លោក ខៀវ សំផន លើក​ឡើង​ថា មេធាវី​របស់​លោក​រវល​់​រៀបចំ​ប្ត​ឹង​ទាស់ពី​ការ​​ផ្ដន្ទាទោសរបស់លោក​​នៅ​ក្នុង​ដំណាក់​កាលទី​១ មិន​អាចមកការ​ពារ​រូប​លោក​​នៅ​ក្នុង​ដំណាក់​កាលទី​២​ដំណាលគ្នាបាន​ឡើយ​។

អំឡុង​កិច្ច​ប្រជុំរៀបចំ​សវនាការ​បិទទ្វារ​មួយ​កាលពី​ម្សិលមិញ លើក​ទី២​ចាប់​តាំង​ពី​មាន​ការ​ដើរ​ចេញ​មក​ តុលាការ​បាន​ពិភាក្សា​សំណើ​របស់​ព្រះរាជអាជ្ញាឲ្យ​អង្គជំនុំ​ជម្រះសាលាដំបូង​​​ចាត់​តាំង​មេធាវី​ថ្មី​ម្នាក់​សម្រាប់​ចុង​ចោទ​នីមួយៗ​ឲ្យធ្វើ​ជា​ “អ្នក​តំណាង​” ដើម្បី​តំណាង​ឲ្យ​ពួកគាត់​រហូត​ដល់​ក្រុម​មេធាវី​ការ​ពារ​របស់​ពួកគាត់​ដែល​មាន​ស្រាប់​នោះ​មក​ចូល​រួម​សវនាការ​ឡើង​វិញ​។

ព្រះរាជ​អាជ្ញាបាន​លើក​ឡើង​ពី​ករណី​របស់​ពួកគេនៅ​ក្នុង​លិខិត​មួយ​ផ្ញើជូន​អង្គជំនុំជម្រះ សាលាដំបូង​ចុះ​ថ្ងៃទី​២២ ខែ​តុលា។ ការ​តែង​តាំង​មេធាវី​តំណាង​នេះ គឺ​ជា​វិធានការ​បណ្ដោះ​អាសន្ន​ ដែល​អាច​ឲ្យ​សវនាការ​ប្រព្រឹត្ត​ទៅ​ដោយ​គ្មាន​ការ​រអាក់​រអួល ហេតុនេះ​ហើយ​វា​ជា​ការ​សំខាន់​ណាស់​ ដែល​មេធាវី​ដូចនេះត្រូវ​បាន​តែង​តាំង​ភ្លាមៗនោះ​”។

ព្រះរាជ​អាជ្ញាបាន​ស្នើ​ឲ្យ​ចៅក្រម​ចាត់​តាំង​ និង​រក្សា​ទុក​មេធាវី​ថ្មី​នេះ​​រហូត​ដល់​ពេល​​ដែល​មេធាវី​ការ​ពារ​ចុង​ចោទ​​ត្រឡប់មក​ចូល​រួ​ម​នៅ​ក្នុង​នីតិវិធី​ ឬ​លុះណាតែមេធាវី​នោះ​ត្រូវ​បាន​រារាំង​មិន​ឲ្យ​តំណាង​ចុង​ចោទ​ ដោយ​សារ​ការ​បន្ត​ប្រព្រឹត្ត​កំហុស​វិជ្ជាជីវៈ​”។

ចុង​ចោទ​ទាំងពីរ​រូប​​បាន​ច្រាន​ចោល​គំនិតនេះ។ ​​ បន្ទាប់​ពី​កិច្ច​ប្រជុំ​​កាលពី​ម្សិលមិញ ក្រុម​មេធាវី​លោក​ នួន ជា បាន​ចេញ​លិខិត​សរសេរ​ដោយ​ដៃ​​របស់កូនក្តីខ្លួន​ផ្ញើជូន​តុលាការ​កាលពី​ថ្ងៃ​ច័ន្ទ ជាមួយ​នឹង​ការ​បក​ប្រែ​ជា​ភាសា​អង់គ្លេស​។

លោក​ នួន ជា បាន​សរសេរ​ថា ” វា​ជា​ជំហរ​ដាច់ណាត់របស់​ខ្ញុំ​ គឺខ្ញុំ​នឹង​មិន​ទទួល​យក​មេធាវី​ថ្មី​ឡើយ ទោះ​ក្នុង​កាលៈទេសៈ​ណាក៏ដោយ”។ លោក​បាន​បន្ថែម​ថា លោក​នៅ​តែ​មាន​ជំនឿ​លើ​ក្រុម​មេធាវី​បច្ចុប្បន្ន​របស់​លោក​ដដែល។ ប្រសិន​បើ​តុលាការ​សម្រេច​ចា​ត់តាំង​មេធាវី​ថ្មី ខ្ញុំ​នឹង​មិន​ទទួល​យកពួកគេ ហើយ​ខ្ញុំ​មិន​ឡើង​តុលាការ​ឡើយ។ មាន​តែ​​ការ​ប្រើ​កម្លាំង​ទេទើប​អាច​ឲ្យ​ខ្ញុំ​ចូល​រួម​នៅ​ក្នុង​សវនាការ​បាន​”។

លោក គង់ សំអុន មេធាវី​ម្នាក់​​ក្នុង​ចំណោម​មេធាវី​របស់លោក ខៀវ សំផន ​បាន​មាន​ប្រសា​សន៍​​កាលពី​ម្សិលមិញ​ថា លោក​ និង​ក្រុម​របស់​លោក​ក៏​បាន​ច្រានចោលសំណើ​របស់​ព្រះ​រាជ​អាជ្ញាដែរ​”។

លោក​បាន​មាន​ប្រសាសន៍​ថា ” យើង​គិត​ថា វា​មិន​​​ចាំបាច់​ឡើយ ហើយ​យើង​គិត​ថា វា​ផ្ទុយ​នឹង​ក្រម​សីលធម៌​របស់​មេធាវី​។ លោក ខៀវ សំផន មាន​មេធាវី​រួច​ហើយ…ហើយ​តុលា​ការ​មិន​អាច​បង្ខំ​ឲ្យ​លោក​យក​មេធាវី​ថ្មីឡើយ​”។

លោក គង់ សំអុន បាន​មាន​ប្រសាសន៍​ថា កាលពី​ម្សិលមិញ​ចៅក្រម​មិនទាន់​សម្រេច​ថា តើ​ត្រូវ​ចាត​់តាំង​មេធាវី​ថ្មី​តាម​ការ​ស្នើ​សុំ​ឬយ៉ាង​ណា​នោះ​ឡើយ​។ ក្រុមមេធាវី​ការ​ពារ​ក្ត​ីទាំង​ពីរ​ក្រុម​ក៏​បាន​លើក​ឡើង​ផង​ដែរ​ថា កូនក្ដី​របស់​ខ្លួននៅ​តែ​​ណែនាំ​ពួកគាត់​កុំ​ឲ្យ​ចូល​រួម​សវនាការសំខាន់ណាមួយ​​ពាក់​ព័ន្ធ​​ករណី​នេះដដែល​៕ សារុន​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស