31 C
Phnom Penh

ជនជាតិ​អាមេរិក​រំលោភ​កុមារ​ត្រូវ​ចាប់​ខ្លួន​បាន​នៅ​ខេត្ត​ក្រចេះ

ដោយ ឌឹ ខេមបូឌា ដេលី

បទវិភាគ

យោងតាម​មន្ត្រី​នគរបាល​និង​មន្ត្រី​ស្ថានទូត​អាមេរិក​ឲ្យ​ដឹង​ថា ទាហាន​ពលបាលត្រី​អាមេរិក​ ម៉ៃឃើល ហារីស (Michael Harris) ដែល​បាន​រត់​គេច​ខ្លួន​ក្នុង​ប្រទេស​កម្ពុជា​អស់​រយៈ​ពេល​២​សប្តាស៍​កន្លង​មក​នេះ ត្រូវ​បាន​ចាប់​ខ្លួន​កាលពី​ព្រឹក​ថ្ងៃ​អង្គារ​នៅ​ខេត្ត​ក្រចេះ ហើយ​នឹង​ត្រូវ​និរទេស​ទៅ​អាមេរិក​វិញ ដើម្បី​ប្រឈម​មុខ​នឹង​ការ​ចោទ​ជាង​៤០​ករណី​ពី​បទ​មាន​រូបភាព​អាសអាភាស​កុមារ និង​ពី​បទ​រំលោភ​កុមារ។

គេ​គិត​ថា បុរស​អាយុ​៣៤​ឆ្នាំ​រូប​នេះ​កំពុង​ពួន​សម្ងំ​ក្នុង​ក្រុង​ភ្នំពេញ បន្ទាប់ពី​រត់​ភៀស​ខ្លួន​ពី​ក្រុង​ព្រះ​សីហនុ ដែល​កាលពី​ដើម​ខែ​នេះ គេ​បាន​ដឹង​ថា គាត់​កំពុង​ធ្វើ​ការ​ជា​អ្នក​បង្ហាត់​ឆ្កែ​ ដោយ​កែ​ឈ្មោះ​ថាMichael Dobbs វិញ។ កងទ័ព​អាមេរិក​បាន​បញ្ជាក់​ថា ជន​នេះ​បាន​ធ្វើ​ដំណើរ​មក​ប្រទេស​កម្ពុជា​កាលពី​ថ្ងៃ​ទី​១៧​ខែ​មករា បន្ទាប់ពី​មិន​បាន​ឡើង​តុលាការ​នៅ​ក្រុង​អ័រឡិនដូ រដ្ឋ​ផ្លរីដា។

លោក អ៊ុក ហៃសិលា ប្រធាន​នាយក​ដ្ឋាន​ស៊ើបអង្កេត និង​អនុវត្ត​នីតិវិធី​នៃ​អគ្គនាយក​ដ្ឋាន​អន្តោប្រវេសន៍​​នៅ​ក្រសួង​មហាផ្ទៃ​បាន​មាន​ប្រសាសន៍​ថា “ជន​សង្ស័យ​ជនជាតិ​អាមេរិក​រូប​នេះ​ត្រូវ​នគរបាល​ខេត្ត​ក្រចេះ​ចាប់​ខ្លួន​បាន​កាលពី​ព្រឹក​ថ្ងៃ​អង្គារ ពេល​កំពុង​បើក​ម៉ូតូ​ម៉ាក ហុងដា រីបែល ដោយ​មាន​វ៉ាលីស​ជាមួយ​ផង ដែល​ធ្វើ​ឲ្យ​គេ​អាច​សន្និដ្ឋាន​បាន​ថា គាត់​មាន​បំណង​គេច​ខ្លួន​ទៅ​ខេត្ត​ផ្សេងទៀត”។

លោក ជេ រ៉ាម៉ាន អ្នក​នាំពាក្យ​ស្ថានទូត​អាមេរិក​បាន​បញ្ជាក់​ថា បុរស​មាន​​ដើម​កំណើត​នៅ​រដ្ឋ​អារីហ្សូណា​រូប​នេះ ស្ថិត​ក្នុង​ទីឃុំឃាំង​របស់​នគរបាល ប៉ុន្តែ​បាន​បង្វែរ​សំណួរ​ផ្សេងទៀត​ទាក់​ទិន​នឹង​ការ​និរទេស​ទៅ​អាជ្ញាធរ​កម្ពុជា។

លោក រ៉ាម៉ាន បាន​និយាយ​ថា “យើង​ពេញ​ចិត្ត​ណាស់​នឹង​ការ​ជួយ​ពី​អាជ្ញាធរ​កម្ពុជា​ក្នុង​ការ​តាម​ចាប់ ម៉ៃឃើល អិដវើដ ហារីស”។

យោងតាម​លោក ហៃសិលា ឲ្យ​ដឹង​ថា ក្នុង​ពេល​តាម​រក​ចាប់​ដែល​ផ្តោត​តែ​ក្នុង​ក្រុង​ភ្នំពេញ ដោយ​ប៉ូលិស​ដេញ​តាម​តម្រុយ​មិន​ច្បាស់លាស់​ជាច្រើន​ក្នុង​រាជធានី​អំឡុង​ពេល​សប្តាហ៍​មុន​នោះ អាជ្ញាធរ​ខេត្ត​និង​មន្ត្រី​ព្រំដែន​បាន​ប្រុង​ប្រយ័ត្ន​ខ្ពស់ និង​បាន​បញ្ជូន​រូបថត​លោក ហារីស ទៅ​គ្រប់​គោលដៅ។

លោក​បាន​និយាយ​ថា “ប៉ូលិស​ខេត្ត​ក្រចេះជឿ​ថា ពួកគេ​បាន​រកឃើញ​ជន​សង្ស័យ​នេះ​២​ថ្ងៃ​មក​ហើយ គាត់​ស្នាក់​នៅ​ក្នុង​ផ្ទះ​សំណាក់​មួយ​ក្នុង​ក្រុង​ក្រចេះ ហើយ​ពួកគេ​បាន​ចាប់​ផ្តើម​ឃ្លាំ​មើល​គាត់”។

“ព្រឹក​ម្សិលមិញ ជន​សង្ស័យ​រូប​នេះ​បាន​ចាក​ចេញ​ពី​ផ្ទះ​សំណាក់​តាម​ម៉ូតូ​របស់​គាត់ ហើយ​មន្ត្រី​ប៉ូលិស​ខេត្ត​១០​នាក់​បាន​តាម ក្រោយ​ម៉ោង​១០​បន្តិច ប៉ូលិស​បាន​ព័ទ្ធ​ម៉ូតូ​របស់​គាត់​និង​សុំ​ឲ្យ​គាត់​ឈប់”។

លោក ហៃសិលា បាន​និយាយ​ថា លោក ហារីស បាន​ឈប់​ម្ខាង​ផ្លូវ ប៉ុន្តែ​បន្ទាប់មក​គាត់​បាន​ព្យាយាម​រត់​គេច​ខ្លួន​តាម​ថ្មើរ​ជើង។ ប៉ុន្តែ គាត់​ទៅ​មិន​បាន​ឆ្ងាយ​ទេ ប៉ូលិស​ក៏​ចាប់​គាត់​បាន គាត់​បាន​អះអាង​ថា គាត់​មិន​មែន​ជា​មនុស្ស​ដែល​ប៉ូលិស​កំពុង​តាម​រក​នោះ​ទេ។

លោក ហៃសិលា បន្ថែម​ទៀតថា “ជន​សង្ស័យ​បាន​ស្រែក​ដាក់​ប៉ូលិស​កុំ​ឲ្យ​ចូល​ជិត​គាត់ ឬ​ប៉ះ​គាត់ និង​បាន​និយាយ​ថា គាត់​មិន​មែន​ជា​ជន​សង្ស័យ​ទេ។ គាត់​បាន​ទូរស័ព្ទ​ហៅ​មិត្ត​ភក្តិ​របស់​គាត់​នៅ​ក្រុង​ភ្នំពេញ ឲ្យ​និយាយ​ជាមួយ​ប៉ូលិស​ជា​ភាសា​ខ្មែរ ប៉ុន្តែ​មន្ត្រី​ប៉ូលិស​របស់​យើង​ចេះ​ភាសា​អង់គ្លេស និង​បាន​ឮ​គាត់​និយាយ​ថា ‘ម៉ៃឃើល ហារីស’ កំពុង​និយាយ”។

លោក ហៃសិលា បាន​ឲ្យ​ដឹង​ទៀត​ថា ចាប់តាំងពី​មាន​ការ​ស្វែងរកលោក ហារីស ប្រហែល​ពីរ​សប្តាហ៍​មក​នេះ អាជ្ញាធរ​បាន​តាម​រក​ដោយ​គ្មាន​ជំនួយ​ពី​ស្ថានទូត​អាមេរិក​ឡើយ។

លោក​និយាយ​ថា “យើង​មិន​បាន​សហប្រតិបត្តិការ​ជាមួយ​មន្ត្រី​អាមេរិក តាំងពី​ការ​ចាប់​ផ្តើម​ការ​ស៊ើប​អង្កេត​របស់​យើង​រហូត​ឈាន​ដល់​ការ​ចាប់​ខ្លួន​គាត់​បាន ហើយ​ឥឡូវ​នេះ​នឹង​ស្នើ​អាមេរិក​ឲ្យ​និរទេស​ជន​សង្ស័យ​រូប​នេះ​ចេញ”។

“ករណី​នេះ​ជា​ការ​ព្រមាន​មួយ​ថា ប្រទេស​កម្ពុជា​មិន​មែន​ជា​កន្លែង​ងាយស្រួល​សម្រាប់​ជន​រត់គេច​ខ្លួន​មក​ពួន​សម្ងំ​លាក់​ខ្លួន​ឡើយ”។

អ្នកស្រី ដេនីស ដាយ៉ា អតីត​ភរិយា​របស់​លោក ហារីស បាន​តាម​ដាន​អតីត​ប្តី​របស់​អ្នក​ស្រី​នៅ​ក្រុង​ព្រះ​សីហនុ កាលពី​ថ្ងៃ​ទី​១៤​ខែ​តុលា និង​បាន​ផ្តល់​ដំណឹង​ដល់​អាជ្ញាធរ​និង​សាធារណជន តាម​រយៈ​ហ្វេសប៊ុក​និង​តាម​អិុនធើណិត។ អ្នកស្រី​បាន​ផ្តល់​ប្រាក់​២.០០០​ដុល្លារ​ដល់​នរណា​ដែល​បាន​បញ្ជូន​លោក ហារីស ទៅ​ស្ថានទូត​អាមេរិក។

កាលពី​ថ្ងៃ​អង្គារ អ្នកស្រី​មាន​ជំនឿ​ថា ​គេ​ចាប់​ខ្លួន​អតីត​ប្តី​របស់​គាត់​ហើយ។ អ្នកស្រី​បាន​ឲ្យ​ដឹង​តាម​អីុម៉េល​ពី​ផ្ទះ​របស់​គាត់​នៅ​រដ្ឋ​ខេនថាឃី​ថា “ខ្ញុំ​រីករាយ​ដោយ​បាន​ទទួល​ដំណឹង​នៅ​ព្រឹក​នេះ​ថា ជនរត់​គេច​ខ្លួន ម៉ៃឃើល អិដវើដ ហារីស ត្រូវ​ចាប់​ខ្លួន​នៅ​ប្រទេស​កម្ពុជា ហើយ​កំពុង​រង់​ចាំ​ការ​និរទេស​ខ្លួន”។

“បណ្តា​ទីភ្នាក់ងារ​អនុវត្ត​ច្បាប់​របស់​យើង​ដែល​ចូលរួម​ក្នុង​ការ​តាម​រក​ចាប់​ខ្លួន​និងការ​ស៊ើប​អង្កេត​នេះ សមនឹង​ទទួល​បាន​ការ​ទទួល​ស្គាល់​បំផុត​របស់​យើង​ចំពោះ​ការ​យក​ចិត្តទុក​ដាក់​របស់​ពួកគេ​ក្នុង​ការ​បញ្ចប់​ការ​រត់​គេច​ខ្លួន​របស់ ម៉ៃឃើល ហារីស។ អរគុណ​ប្រទេស​កម្ពុជា!”៕មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស