យោងតាមអ្នកដែលពាក់ព័ន្ធនៅក្នុងការពិភាក្សាអំពីប្រាក់ខែគោលបានឲ្យដឹងថា ក្រុមមេដឹកនាំសហជីព ម្ចាស់រោងចក្រ និងតំណាងរដ្ឋាភិបាល ដែលធ្វើការលើការពិភាក្សាអំពីប្រាក់ខែគោលថ្មីនៅក្នុងវិស័យកាត់ដេរនឹងមកជួបប្រជុំគ្នានៅថ្ងៃនេះ ដើម្បីបោះឆ្នោតលើសេចក្ដីសម្រេចចុងក្រោយមួយ។
តំណាងចំនួនប្រាំបួនរូបដែលមកពីសហជីព រោងចក្រ និងរដ្ឋាភិបាល ត្រូវបានដាក់ឲ្យធ្វើការរួមគ្នានៅក្នុងខែនេះ ដើម្បីជួយគណៈកម្មាធិការប្រឹក្សាការងារនៅក្នុងការកំណត់ប្រាក់ខែគោលថ្មី ដែលនឹងត្រូវចូលជាធរមាននៅខែមករា និងដែលភាគីទាំងអស់អាចទទួលយកបាន។
លោក ជួន មុំថុល ប្រធានសហព័ន្ធសហជីពកម្ពុជាបានលើកឡើងថា ក្រុមការងារនឹងជួបប្រជុំគ្នានៅក្រសួងការងារនៅព្រឹកនេះក្នុងគោលបំណងឈានទៅរកការឯកភាពគ្នាមួយ។ សហជីពភាគច្រើនចង់ឲ្យមានការដំឡើងប្រាក់ខែគោលដល់១៤០ដុល្លារក្នុងមួយខែ ដែលសព្វថ្ងៃត្រឹមតែ១០០ដុល្លារនោះ។
លោក មុំថុល បានមានប្រសាសន៍ថា “យើងនឹងជួបប្រជុំគ្នា ហើយព្យាយាមកំណត់ចំនួនមួយ ហើយប្រសិនបើមិនអាចកំណត់បានទេនោះ យើងនឹងបោះឆ្នោតសម្ងាត់ដើម្បីទទួលបានចំនួនមួយដែលយើងនឹងបញ្ជូនទៅគណៈកម្មាធិការប្រឹក្សាការងារ”។ គេរំពឹងថា ក្រសួងការងានឹងធ្វើសេចក្ដីសម្រេចចុងក្រោយមួយស្ដីពីប្រាក់ខែគោលថ្មីនៅខែក្រោយ។
លោក ប៉ាវ ស៊ីណា ប្រធានសហព័ន្ធសហជីពយុវជនឯករាជ្យ បានលើកឡើងថា តំណាងទាំងអស់នឹងចុះហត្ថលេខាលើរបាយការណ៍មួយ ដែលលម្អិតអំពីទស្សនរបស់ភាគីនីមួយៗស្ដីពីប្រាក់ខែគោលមុនពេលបោះឆ្នោត។
លោកបានអះអាងថា វាមាន “សម្ពាធយ៉ាងខ្លាំង” លើតំណាងរោងចក្រក្នុងការបោះឆ្នោតដើម្បីដំឡើងប្រាក់ខែគោលឲ្យដល់១២០ដុល្លារ ពោលគឺវាលើស១០ដុល្លារពីប្រាក់ខែគោលដែលសមាគមរោងចក្រកាត់ដេរនៅកម្ពុជា (GMAC) បានស្នើឡើង បន្ទាប់ពីការសិក្សាមួយរបស់រដ្ឋាភិបាលបានបង្ហាញថា បន្ទាត់ភាពក្រីក្រនៅក្នុងរាជធានីភ្នំពេញ គឺ១២០ដុល្លារនោះ។
លោក ស៊ីណា បានមានប្រសាសន៍ថា ” ពួកគេគ្មានជម្រើសទេ ព្រោះវាយោងតាមការសិក្សារបស់រដ្ឋាភិបាល។ ហេតុដូច្នេះ ពួកគេត្រូវតែគោរពតាមការសិក្សានេះ”។ ប៉ុន្តែនៅពេលត្រូវបានសាកសួរថា តើ GMAC នឹងពិចារណាដើម្បីផ្លាស់ប្ដូរជំហររបស់ខ្លួនដែរឬទេទាក់ទិននឹងការកំណត់នេះ លោក កែន លូ អគ្គលេខាធិការ GMAC បានឆ្លើយតបថា ” ទេ ទាល់តែប្រាក់ខែគោល [១១០ដុល្លារ] ទើបជាកម្រិតមួយដែលយើងអាចរ៉ាប់រងបាន”។
លោកស្រី យ៉ាង សុភ័ណ្ឌ ប្រធានសហព័ន្ធសហជីពមិត្តភាពកម្មករ បានលើកឡើងថា សហជីពរបស់លោកស្រីនឹងធ្វើការទាមទារតែម្នាក់ឯង ដើម្បីឲ្យមានការដំឡើងប្រាក់ខែគោលដល់១៧៧ដុល្លារ ជាចំនួនមួយដែលសហជីពបានគាំទ្រអំឡុងពេលចរចាអំពីប្រាក់ខែគោលថ្មី ដែលចាប់ផ្ដើមកាលពីដើមឆ្នាំនេះ។ លោកស្រីបានមានប្រសាសន៍ថា ” យើងនឹងបន្តទាមទារដំឡើងប្រាក់ខែឲ្យដល់១៧៧ដុល្លារ ព្រោះថា កម្មករមិនព្រមទទួលយកប្រាក់ខែចំនួន១១០ដុល្លារនោះទេ”។ គេមិនអាចទាក់ទងលោក ហេង សួរ អ្នកនាំពាក្យក្រសួងការងារដើម្បីសុំការធ្វើអត្ថាធិប្បាយបានឡើយ៕ ស៊ុយឈាង
(រាយការណ៍បន្ថែមដោយ Holly Robertson)