នៅក្នុងឆ្នាំកន្លងទៅ កញ្ញា សន សៀវមីុ បានចំណាយពេលភាគច្រើនដើម្បីត្រៀមខ្លួនសម្រាប់ការប្រកួតកីឡាអាស៊ីហ្គេមនៅក្នុងប្រទេសកូរ៉េខាងត្បូង ដែលជាលទ្ធផល នាងដណ្តើមបានមេដាយមាសដំបូងមិនធ្លាប់មានសម្រាប់កម្ពុជាកាលពីដើមខែនេះ ។ ប៉ុន្តែ ទន្ទឹមនឹងនេះ នាងក៏បានលួចហ្វឹកហាត់សម្រាប់ទម្រង់នៃការប្រកួតមួយទៀតផងដែរ។
លោក ទូច ណារ៉ុថ ប្រធាននាយកដ្ឋានអង្គរក្សនៃក្រសួងមហាផ្ទៃ បានមានប្រសាសន៍កាលពីម្សិលមិញថា កាលពីបីខែមុន តារាក្បាច់គុនតេក្វាន់ដូវ័យ១៩ឆ្នាំរូបនេះបានស្ថិតក្នុងចំណោមបេក្ខជនថ្មីចំនួន១០០នាក់ដែលត្រូវបានជ្រើសរើសឲ្យចូលបម្រើការនៅក្នុងអង្គភាពអង្គរក្សពិសេសនៃក្រសួងនេះ ដែលត្រូវធ្វើការហ្វឹកហាត់រយៈពេលពីរឆ្នាំ។
លោក ទូច ណារ៉ុថ បានបញ្ជាក់ថា អង្គភាពនេះជ្រើសរើសអ្នកដែលធ្លាប់ហាត់ក្បាច់គុន ហើយជ្រើសរើសបានប្រាំពីរនាក់ ដែលសុទ្ធតែមានប្រវត្តិខ្លាំងខាងក្បាច់គុនតេក្វាន់ដូ ឬការ៉ាត់តេ ក្នុងនោះរួមមានទាំងកញ្ញា សន ដាវីន និងយុវជន សន អេលីត ដែលត្រូវជាបងប្អូនបង្កើតរបស់កញ្ញា សន សៀវមីុ ផងដែរ។
លោកបានមានប្រសាសន៍ទៀតថា “យើងមិនចាំបាច់បង្ហាត់ពួកគេច្រើនទេ ពីព្រោះពួកគេមានបទពិសោធខាងក្បាច់គុនស្រាប់ ហើយពួកគេថែមទាំងអាចបង្ហាត់នគរបាលផ្សេងទៀតបានទៀតផង។ ប្រសិនបើយើងមានបួនប្រាំនាក់ដូចនាង ពួកគេអាចបង្ហាត់នគរបាលបាន៩៥នាក់ផ្សេងទៀត”។
លោកបានមានប្រសាសន៍ថា បន្ទាប់ពីការហ្វឹកហាត់រយៈពេលពីរឆ្នាំ សមាជិកនៃអង្គភាពអង្គរក្សត្រូវបានចាត់តាំងឲ្យការពារសុវត្ថិភាពជូនមន្ត្រីជាន់ខ្ពស់ និងគណៈប្រតិភូអន្តរជាតិ។ លោកបានលើកឡើងបន្តថា “កម្ពស់របស់នាងគឺសំខាន់ណាស់ ពីព្រោះយើងត្រូវការពារមន្ត្រីជាន់ខ្ពស់”។
កញ្ញា សន សៀវមីុ ដែលបានវិលត្រឡប់មកប្រទេសកម្ពុជាវិញក្នុងនាមជាវីរនារីតំណាងឲ្យជាតិទាំងមូល ក្រោយពីទទួលបានមេដាយមាសនៅក្នុងការប្រកួតក្បាច់គុនតេក្វាន់ដូផ្នែកនារីទម្ងន់ក្រោម៧៣គីឡូក្រាមនៅក្នុងទីក្រុងអីុនឆុន (Incheon) បាននិយាយថា ជំនាញក្បាច់គុនតេក្វាន់ដូរបស់នាងបានជួយដល់នាងនៅក្នុងការហ្វឹកហាត់ធ្វើជាអង្គរក្ស។
កញ្ញា សន សៀវមីុ កម្ពស់១,៨ម៉ែត្រ ដែលខ្ពស់ជាងបុរសកម្ពុជាភាគច្រើនបាននិយាយទៀតថា “វាធម្មតាទេសម្រាប់ខ្ញុំ ពីព្រោះខ្ញុំមានបទពិសោធខាងក្បាច់គុន ហើយវាមិនខុសប្លែកគ្នាខ្លាំងទេ”។
ក្នុងចំណោមអត្តពលិកក្បាច់គុនលេចធ្លោ មិនមែនមានតែបងប្អូនបង្កើតត្រកូល សន នោះទេ ដែលត្រូវបានជ្រើសរើសចូលក្នុងអង្គភាពនេះ។ ឌុន សម្ផស្ស ជាម្ចាស់ខ្សែក្រវ៉ាត់ខ្មៅផ្នែកក្បាច់គុនការ៉ាត់តេ ដែលបានចូលរួមប្រកួតនៅក្នុងព្រឹត្តិការណ៍កីឡាស៊ីហ្គេម២០១៣នៅក្នុងប្រទេសភូមា ក៏បានក្លាយជាអង្គរក្សដែរ។
លោក ឌុន សម្ផស្ស បាននិយាយថា “យើងហ្វឹកហាត់បួនប្រាំថ្ងៃក្នុងមួយសប្តាហ៍នៅនាយកដ្ឋានអង្គរក្សនៃក្រសួងមហាផ្ទៃ។ យើងហ្វឹកហាត់ពីរបៀបរត់ដើម្បីការពារភ្ញៀវ និងដើម្បីបង្កើតកម្លាំងរាងកាយរបស់យើង”។
ទន្ទឹមនឹងការហ្វឹកហាត់ផ្នែករាងកាយ អង្គភាពនេះក៏ទទួលហ្វឹកហាត់ខាងកាន់កាំភ្លើងផងដែរ។ អ្នកស្រី សួន ចន្ធី ដែលត្រូវជាម្តាយរបស់បងប្អូនត្រកូល សន បាននិយាយថា ដំបូងឡើយអ្នកស្រីមានការព្រួយបារម្ភអំពីកូនស្រីប្រើប្រាស់កាំភ្លើង ប៉ុន្តែ ពេលនេះអ្នកស្រីកាន់តែមានចំណាប់អារម្មណ៍លើរឿងនេះ។
អ្នកស្រី សួន ចន្ធី ដែលបានចិញ្ចឹមកញ្ញា សន សៀវមីុ និងបងប្អូនបង្កើតចំនួនប្រាំនាក់របស់នាងរហូតដល់ធំពេញវ័យនៅក្នុងខណ្ឌឫស្សីកែវ រាជធានីភ្នំពេញ បាននិយាយទៀតថា “ខ្ញុំមានការព្រួយបារម្ភចំពោះនាងនៅពេលឈានដល់ការកាន់កាំភ្លើង ប៉ុន្តែ ខ្ញុំក៏ចង់ឲ្យកូនស្រីរបស់ខ្ញុំមានការងារជាមន្ត្រីសាធារណៈដែរ នៅពេលនាងចាស់ទៅ និងមិនអាចលេងកីឡាបាន”។
ទោះបីជាអ្នកស្រីទទួលស្វាគមន៍ចំពោះការជ្រើសរើសកូនស្រីរបស់ខ្លួនចូលបម្រើការនៅក្នុងអង្គភាពអង្គរក្សក្តី ក៏អ្នកស្រីនៅតែមានការព្រួយបារម្ភថា កញ្ញា សន សៀវមីុ នឹងជួបការពិបាកក្នុងការលៃពេលវេលាសម្រាប់ហាត់ក្បាច់គុនតេក្វាន់ដូ ការហ្វឹកហាត់ធ្វើជាអង្គរក្ស និងការសិក្សារបស់នាង។
លោកនាយករដ្ឋមន្ត្រី ហ៊ុន សែន បានសម្រេចឲ្យកញ្ញា សន សៀវមីុ ជាប់ដោយស្វ័យប្រវត្តិនៅក្នុងការប្រឡងថ្នាក់ទី១២ បន្ទាប់ពីនាងដណ្តើមបានមេដាយមាសជូនជាតិ។ នាងមានបំណងសិក្សាមុខវិជ្ជាច្បាប់ ប៉ុន្តែ នាងមិនទាន់សម្រេចចិត្តថាត្រូវជ្រើសរើសសាកលវិទ្យាល័យណាមួយនៅឡើយទេ។
អ្នកស្រី សួន ចន្ធី ម្តាយរបស់នាងបាននិយាយថា “ខ្ញុំព្រួយបារម្ភ ពីព្រោះនាងនឹងត្រូវខិតខំយ៉ាងខ្លាំង ប៉ុន្តែ ខ្ញុំក៏សប្បាយចិត្តដែរ ពីព្រោះខ្ញុំមិនដែលគិតថា គ្រួសាររបស់ខ្ញុំមានដូចថ្ងៃនេះទេ”។
លោក ទូច ណារ៉ុថ បានមានប្រសាសន៍ថា កាលវិភាគមមាញឹករបស់កញ្ញា សន សៀវមីុ នឹងត្រូវបានសម្របសម្រួល អំឡុងការហ្វឹកហាត់ការហ្វឹកហាត់របស់នាងធ្វើជាអង្គរក្ស។ លោកមានប្រសាសន៍ទៀតថា “យើងនឹងផ្តល់ពេលឲ្យនាងរៀនសូត្រ និងហាត់តេក្វាន់ដូ ពីព្រោះនាងត្រូវត្រៀមខ្លួនសម្រាប់ការប្រកួតកីឡាអូឡាំពិកនៅប្រេស៊ីល ក្នុងពេលពីរឆ្នាំទៀត”៕សុខុម