ទីភ្នាក់ងារអភិវឌ្ឍន៍បារាំង (AFD) បានបញ្ជាក់ឲ្យដឹងកាលពីថ្ងៃពុធថា ខ្លួននឹងចុះហត្ថលេខាលើកិច្ចព្រមព្រៀងឥណទានមានទឹកប្រាក់សរុប៦លានដុល្លារ ជាមួយគ្រឹះស្ថានមីក្រូហិរញ្ញវត្ថុ (MFI) ចំនួន៣ ដើម្បីជួយគ្រួសារប្រជាពលរដ្ឋនៅជនបទអាចទិញផ្ទាំងកញ្ចក់ស្រូបពន្លឺព្រះអាទិត្យនិងអគ្គិសនី។
លោក ទុង សុខលីម មន្ត្រីព័ត៌មានរបស់ទីភ្នាក់ងារអភិវឌ្ឍន៍បារាំងបានឲ្យដឹងតាមរយៈអីុម៉េលកាលពីថ្ងៃពុធថា ទីភ្នាក់ងារអភិវឌ្ឍន៍បារាំងនឹងផ្តល់ឥណទានដល់គ្រឹះស្ថានមីក្រូហិញ្ញវត្ថុក្រេឌីត គ្រឹះស្ថានធនាគារភូមិ និង វីហ្សិនហ្វាន់ ដើម្បីធ្វើជាប្រាក់កម្ចីមានការប្រាក់ទាបសម្រាប់ផ្តល់ដល់ប្រជាពលរដ្ឋជនបទ២៥.០០០គ្រួសារនៅទូទាំងប្រទេសកម្ពុជា។ លោកបានបន្ថែមឲ្យដឹងទៀតថា កិច្ចព្រមព្រៀងនេះគ្រោងនឹងចុះហត្ថលេខានៅរសៀលថ្ងៃសុក្រនេះ។
លោក អង់ដ្រេ ពូអីុឡេ ឌូប្លេ នាយកទីភ្នាក់ងារអភិវឌ្ឍន៍បារាំងបានមានប្រសាសន៍នៅឯពិធីតាំងពិព័រណ៍ផលិតផលក្នុងរាជធានីភ្នំពេញកាលពីសប្តាហ៍មុនថា “យើងកំពុងធ្វើការជាមួយគ្រឹះស្ថានមីក្រូហិរញ្ញវត្ថុចំនួន៣ ដើម្បីអាចផ្តល់កម្ចីដល់ពួកគេ ហើយបន្ទាប់មកប្រជាពលរដ្ឋខ្មែរអាចខ្ចីប្រាក់ពីគ្រឹះស្ថានទាំង៣ ដើម្បីទិញផ្ទាំងកញ្ចក់ស្រូបពន្លឺព្រះអាទិត្យ និងអគ្គិសនី”។
លោក ព្រាប ពិសិដ្ឋ ប្រធានប្រតិបត្តិការជាន់ខ្ពស់នៅគ្រឹះស្ថានមីក្រូហិរញ្ញវត្ថុវីហ្សិនហ្វាន់ បានមានប្រសាសន៍កាលពីថ្ងៃពុធថា ទីភ្នាក់ងារអភិវឌ្ឍន៍បារាំងនឹងយកការប្រាក់ចន្លោះពី២ទៅ៤,៥ភាគរយក្នុងមួយឆ្នាំពីស្ថាប័នទាំងបី ហើយវីហ្សិនហ្វាន់នឹងយកការប្រាក់ប្រចាំខែអតិបរមា២,៥ភាគរយពីអ្នកទទួលកម្ចី។
លោក ពិសិដ្ឋ បានមានប្រសាសន៍ថា “ប្រជាពលរដ្ឋដែលមានលក្ខណៈសម្បត្តិសមនឹងទទួលកម្ចី ចាំបាច់ត្រូវមានអាជីវកម្ម ឬមុខរបរត្រឹមត្រូវ”៕មានិត