កាលពីម្សិលមិញ លោក ហ៊ុន សែន បានក្រាលកម្រាលព្រំក្រហមចាំទទួលស្វាគមន៍នាយឧត្ដមសេនីយ៍ ប្រាយុទ្ធ ចាន់អូចា នាយករដ្ឋមន្ត្រីថៃ នៅពេលមេដឹកនាំថៃរូបនេះធ្វើទស្សនកិច្ចផ្លូវរដ្ឋជាលើកដំបូងមកកាន់កម្ពុជាក្រោយធ្វើរដ្ឋប្រហារយោធាដណ្ដើមអំណាចកាលពីខែឧសភា។
លោក ហ៊ុន សែន ដែលចងសម្ពន្ធមិត្តជាយូរមកហើយជាមួយអតីតនាយករដ្ឋមន្ត្រីថៃ ថាក់ស៊ីន ស៊ីណាវ៉ាត្រា ដែលលោកស្រី យីងឡាក់ ស៊ីណាវ៉ាត្រា ប្អូនស្រីរបស់លោកត្រូវបានទម្លាក់ចេញពីអំណាចនៅក្នុងរដ្ឋប្រហារយោធាកាលពីខែឧសភានោះ បានស្វាគមន៍យ៉ាងកក់ក្ដៅចំពោះអតីតមេកងទ័ពរូបនេះទៅកាន់វិមានសន្តិភាពដែលជាការិយាល័យរបស់លោក។
ក្រោយពីពិធីផ្លូវការ និងការជួបពិភាក្សាជាលក្ខណៈឯកជនកាលពីរសៀលម្សិលមិញ មេដឹកនាំទាំងពីរត្រូវធ្វើសន្និសីទកាសែតរួមគ្នា ប៉ុន្តែបានលុបចោលវិញដោយគ្មានការបកស្រាយ។
លោក អៀង សុផាល្លែត ជំនួយការផ្ទាល់របស់លោក ហ៊ុន សែន គឺជាអ្នកនិយាយទៅកាន់ប្រព័ន្ធផ្សព្វផ្សាយជំនួសវិញ ដោយសង្កត់ធ្ងន់ថា ការពិភាក្សានេះមានបំណងពង្រឹងកិច្ចសហប្រតិបត្តិការរវាងប្រទេសជិតខាងទាំងពីរ ” សម្រាប់ផលប្រយោជន៍ទៅវិញទៅមក”។ លោកមានប្រសាសន៍ថា “មេដឹកនាំទាំងពីរបានចាត់ទុកវាជាដំណើរទស្សនកិច្ចប្រវត្តិសាស្ត្រ ហើយដំណើរទស្សនកិច្ចប្រវត្តិសាស្ត្រនេះ គឺដើម្បីបង្កើនកិច្ចសហប្រតិបត្តិការ ដើម្បីពង្រឹងកិច្ចសហប្រតិបត្តិការ”។
ដូចការគ្រោងទុក លោក ហ៊ុន សែន និងលោក ប្រាយុទ្ធ ចាន់អូចា ក៏បានចុះអនុស្សរណៈនៃការយោគយល់ (MOU) ចំនួនបីផងដែរ ដោយសន្យាធ្វើកិច្ចសហប្រតិបត្តិការលើវិស័យទេសចរណ៍ ការលុបបំបាត់អំពើជួញដូរមនុស្ស និងការតភ្ជាប់ផ្លូវដែករវាងកម្ពុជា និងថៃ។
លោក ហ៊ុន សែន បានស្នើឲ្យមានការដោះស្រាយរាល់វិវាទតាមរយៈ ” ការចរចាជាលក្ខណៈមិត្តភាព” ហើយបានអំពាវនាវសុំឲ្យមានកិច្ចប្រឹងប្រែងរួមគ្នាដើម្បីវាស់វែងព្រំដែនរវាងប្រទេសជិតខាងទាំងពីរឲ្យបានត្រឹមត្រូវ។
លោក អៀង សុផាល្លែត បានដកស្រងប្រសាសន៍របស់លោក ហ៊ុន សែន ដូច្នេះថា ”កុំបណ្ដោយឲ្យបញ្ហាមួយដែលមិនទាន់ដោះស្រាយ ឬបញ្ហាមួយដែលកើតឡើង រាំងស្ទះដល់កិច្ចសហប្រតិបត្តិការលើគ្របវិស័យ ហើយកុំឲ្យបញ្ហាមួយរាលដាលទៅបញ្ហាផ្សេងទៀត”។
លោក ហ៊ុន សែន ក៏បានស្នើឲ្យគណៈប្រតិភូថៃ ធ្វើតាមការសន្យារបស់រដ្ឋាភិបាលមុនរបស់ខ្លួនដែលលើកឡើងថា នឹងបង្កើតគណៈកម្មការមួយដើម្បីគ្រប់គ្រងការល្បាតព្រំដែនរួម ហើយស៊ើបអង្កេតករណីបាញ់សម្លាប់ប្រជាពលរដ្ឋខ្មែរ ដែលឆ្លងដែនខុសច្បាប់ចូលទៅកាប់ឈើប្រណីត។
លោក អៀង សុផាល្លែត បានប្រាប់ក្រុមអ្នកយកព័ត៌មានថា លោក ប្រាយុទ្ធ ចាន់អូចា បានមានប្រសាសន៍ថា ប្រទេសទាំងពីរគួរតែ ” បំភ្លេចជម្លោះចាស់ចោល” ដើម្បីពង្រឹងទំនាក់ទំនងបន្ថែមនៅពេលអនាគត ហើយបានសង្កត់ធ្ងន់ពីបំណងរបស់លោកដែលចង់ពង្រឹងទំនាក់ទំនងផ្នែកសេដ្ឋកិច្ច។ លោក អៀង សុផាល្លែត បានមានប្រសាសន៍ថា ពាណិជ្ជកម្មទ្វេភាគីរវាងប្រទេសទាំងពីរមានទំហំទឹកប្រាក់៤,៥៥ពាន់លានដុល្លារកាលពីឆ្នាំមុន។
លោកបានលើកឡើងបន្តទៀតថា ” ថៃមានបំណងបង្កើតតំបន់សេដ្ឋកិច្ចពិសេសតាមបណ្ដោយព្រំដែន។ ឯកឧត្ដមបានស្នើឲ្យភាគីកម្ពុជាបង្កើតគណៈកម្មការមួយដើម្បីពិភាក្សាអំពីការបង្កើតតំបន់សេដ្ឋកិច្ចពិសេស”។
តំបន់សេដ្ឋកិច្ចពិសេសដែលត្រូវបានស្នើឡើងនេះ នឹងមានទីតាំងស្ថិតក្នុងខេត្តត្រាត និងខេត្តស្រះកែវរបស់ថៃ នេះបើយោងតាមលោក កុយ គួង អ្នកនាំពាក្យក្រសួងការបរទេសដែលបានថ្លែងទៅកាន់ក្រុមអ្នកយកព័ត៌មានបន្ទាប់ពីជំនួបដាច់ដោយឡែកមួយកាលពីម្សិលមិញរវាងលោក ហោ ណាំហុង រដ្ឋមន្ត្រីក្រសួងការបរទេស និងសមភាគីថៃរបស់លោក គឺឧត្ដមសេនីយ៍ តាណាសាក់ ប៉ាទីម៉ាប្រាកន។
លោក កុយ គួង បានមានប្រសាសន៍ថា លោក តាណាសាក់ ប៉ាទីម៉ាប្រាកន បានលើកឡើងពីផែនការមួយដើម្បីទាក់ទាញរោងចក្រទៅកាន់តំបន់នោះ ដែលអាចទាញយកអត្ថប្រយោជន៍ពីកម្លាំងពលកម្មកម្ពុជាដែលថោកជាងនៅថៃ។
អ្នកនាំាពាក្យរូបនេះក៏បានបន្តច្រានចោលសំណើរបស់លោក ប្រាយុទ្ធ ចាន់អូចា ដែលត្រូវបានចុះផ្សាយនៅក្នុងកាសែតបាងកកប៉ុស្តិ៍កាលពីម្សិលមិញ ដែលនឹងអនុញ្ញាតឲ្យភ្ញៀវទេសចរចូលទស្សនាប្រាសាទព្រះវិហារតាមច្រកប្រទេសថៃ។ ការឆ្លងដែននៅចំណុចប្រាសាទព្រះវិហារត្រូវបានបិទចាប់តាំងពីឆ្នាំ២០០៨មក ដែលនៅពេលនោះភាពតានតឹងបានផ្ទុះឡើងរវាងប្រទេសទាំងពីរជុំវិញទឹកដីមានវិវាទនៅជិតប្រាសាទនេះ។
លោក កុយ គួង បានមានប្រសាសន៍ទៀតថា ” ខ្ញុំគិតថា ភ្ញៀវទេសចរជាច្រើនបានទៅទស្សនាប្រាសាទព្រះវិហារពីខាងកម្ពុជា ពីព្រោះមានផ្លូវល្អ និងមានសណ្ឋាគារប្រណីតៗ។ តាមទស្សនរបស់ខ្ញុំយល់ឃើញថា ភ្ញៀវទេសចរមិនចាំបាច់ចូលទស្សនាពីខាងថៃទេ”។
លោក អៀង សុផាល្លែត ដែលជាជំនួយការរបស់នាយករដ្ឋមន្ត្រី បានមានប្រសាសន៍ថា លោក ហ៊ុន សែន និងលោក ប្រាយុទ្ធ ចាន់អូចា មិនទាន់បានពិភាក្សាលើចំណុចជាក់លាក់ណាមួយស្ដីពីកិច្ចសហប្រតិបត្តិការលើវិស័យទេសចរណ៍នៅឡើយទេ។
លោក ប្រាយុទ្ធ ចាន់អូចា ក៏ទទួលបានការអនុញ្ញាតឲ្យចូលជួបសវនាការគាល់ព្រះមហាក្សត្រ នរោត្តម សីហមុនី ផងដែរកាលពីល្ងាចម្សិលមិញ ហើយដំណើរទស្សនកិច្ចផ្លូវរដ្ឋរបស់លោកនឹងបញ្ចប់នៅថ្ងៃនេះ៕ សុខុម (រាយការណ៍បន្ថែមដោយ Holly Robertson)