កាលពីម្សិលមិញ សាលាដំបូងរាជធានីភ្នំពេញបានចោទប្រកាន់ជនជាតិនីហ្សេរីយ៉ាចំនួនប្រាំបីនាក់ពីបទជួញដូរគ្រឿងញៀន បន្ទាប់ពីពួកគេត្រូវបានចាប់ខ្លួននៅក្នុងរាជធានីភ្នំពេញកាលពីយប់ថ្ងៃអាទិត្យពីបទរក្សាទុក និងចែកចាយម៉ាទឹកកក ប៉ុន្តែ ការសាកសួរពួកគេនឹងបន្តទៀតខណៈនគរបាលកំពុងព្យាយាមកំណត់អត្តសញ្ញាណសមាជិកផ្សេងៗទៀតនៃក្រុមចែកចាយគ្រឿងញៀននេះ។
បុរសទាំងនេះត្រូវបានចាប់ខ្លួននៅទីតាំងចំនួនបីដាច់ដោយឡែកពីគ្នាក្នុងរាជធានីភ្នំពេញ បន្ទាប់ពីនគរបាលប្រឆាំងគ្រឿងញៀនសម្ងាត់បានរៀបផែនការ ដើម្បីទិញម៉ាទឹកកកទម្ងន់១០០ក្រាមពីបុរសម្នាក់ក្នុងចំណោមអ្នកចែកចាយគ្រឿងញៀនផ្សេងទៀតនៅកន្លែងមួយក្នុងខណ្ឌដូនពេញ។
លោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញបានឲ្យដឹងថា លោក បានចោទប្រកាន់ជនជាតិនីហ្សេរីយ៉ាទាំងនេះ ដែលរស់នៅក្នុងប្រទេសកម្ពុជាដោយខុសច្បាប់ពីបទជួញដូរគ្រឿងញៀនកាលពីព្រឹកម្សិលមិញ ហើយបានបញ្ជូនករណីនេះទៅឲ្យចៅក្រមសើុបសួរមួួយរូប។
វរសេនីយ៍ឯក យ៉េន បញ្ញារិទ្ធ ប្រធានការិយាល័យទី៩ស្តីទីនៃនគរបាលប្រឆាំងគ្រឿងញៀននៅក្រសួងមហាផ្ទៃ ដែលជាអ្នកដឹកនាំការបង្ក្រាបការជួញដូរគ្រឿងញៀននេះបានឲ្យដឹងថា ជនសង្ស័យនឹងត្រូវបញ្ជូនទៅតុលាការម្តងទៀតនៅថ្ងៃនេះ ដើម្បីឲ្យចៅក្រមសើុបសួរសាកសួរបន្ត ប៉ុន្តែ ថា បុរសទាំងនេះកំពុងឃុំខ្លួននៅកន្លែងឃុំខ្លួនរបស់នគរបាលនៅឡើយ ព្រោះនគរបាលកំពុងសាកសួរពួកគេបន្តទៀត។
វរសេនីយ៍ឯក បញ្ញារិទ្ធ បានមានប្រសាសន៍ថា “ពួកគេកំពុងស្ថិតក្រោមការគ្រប់គ្រងជាបណ្តោះអាសន្នរបស់ខ្ញុំនៅឡើយ ប៉ុន្តែ ពួកគេនឹងត្រូវបញ្ជូនទៅតុលាការនៅថ្ងៃនេះ”។
លោកបានបន្ថែមថា ការសាកសួរជនសង្ស័យបានធ្វើឲ្យនគរបាលឈានទៅរកការស្នើសុំដីកាចាប់ខ្លួនបន្ថែមដើម្បីចាប់ខ្លួនជនជាតិនីហ្សេរីយ៉ាយ៉ាងតិចពីរនាក់ផ្សេងទៀត ដែលនគរបាលជឿថា បាននាំចូលម៉ាទឹកកកទម្ងន់ពី២០ទៅ៣០គីឡូក្រាមពីតំបន់អាហ្វ្រិកមកកម្ពុជាក្នុងរយៈពេលប្រហែលបីឆ្នាំមកនេះ។ លោកបានមានប្រសាសន៍បន្ថែមថា “ក្រុមជួញដូរគ្រឿងញៀនជនជាតិនីហ្សេរីយ៉ានេះមានមេខ្លោងពីបីទៅប្រាំនាក់ ហើយមេខ្លោងនីមួយៗមានអ្នកលក់ថ្នាំឲ្យខ្លួនចាប់ពីប្រាំនាក់រហូតដល់ដប់នាក់។ យើងបានបញ្ជូនឯកសារទៅតុលាការរួចរាល់ហើយ ដើម្បីស្នើសុំដីកាចាប់ខ្លួនជនសង្ស័យដែលពាក់ព័ន្ធបន្ថែមទៀត”។
លោកបានបន្ថែមទៀតថា អ្នកសើុបអង្កេតបានរកឃើញកន្លែងលាក់ខ្លួនរបស់អ្នកជួញដូរ និងអ្នកលក់គ្រឿងញៀនចំនួនពីរនាក់ផ្សេងទៀត ប៉ុន្តែ ពួកគេបានគេចខ្លួននៅពេលមន្ត្រីនគរបាលរបស់យើងបានចុះទៅចាប់ខ្លួនពួកគេ មិនយូរប៉ុន្មានបន្ទាប់ពីចាប់ខ្លួនបុរសជនជាតិនីហ្សេរីយ៉ាផ្សេងៗទៀតកាលពីថ្ងៃអាទិត្យ។ លោកបានមានប្រសាសន៍ទៀតថា “យើងមានឈ្មោះ និងរូបថតពួកគេ ហើយស្គាល់ម្នាក់ក្នុងចំណោមពួកគេថា ជានរណាហើយ ហើយខ្ញុំជឿជាក់ថា យើងនឹងចាប់ខ្លួនពួកគេបាននៅក្នុងរយៈពេលប្រហែលមួយសប្តាហ៍ ឬ១០ថ្ងៃខាងមុខនេះ”។
បុរសជនជាតិនីហ្សេរីយ៉ាទី៩ ដែលត្រូវបានចាប់ខ្លួនកាលពីថ្ងៃអាទិត្យ និងដែលរស់នៅក្នុងប្រទេសកម្ពុជាដោយស្របច្បាប់ ហើយបានចុះកិច្ចសន្យាលេងបាល់ទាត់ឲ្យក្រុមបាល់ទាត់ ណាហ្គា ខប នោះត្រូវបានដោះលែងវិញបន្ទាប់ពីនគរបាលបានរកឃើញថា គាត់មិនជាប់ ពាក់ព័ន្ធនៅក្នុងក្រុមជួញដូរគ្រឿងញៀននេះ៕ស៊ុយឈាង