តំណាងអ្នកភូមិជនជាតិភាគតិចព្នង២៧៣គ្រួសារ មកពីខេត្តមណ្ឌលគិរីបានដាក់ញត្តិទៅខុទ្ទកាល័យលោកនាយករដ្ឋមន្ត្រី ហ៊ុន សែន ស្វះស្វែងឲ្យមានការលុបចោលដីសម្បទានសេដ្ឋកិច្ច ដែលពួកគាត់លើកឡើងថា បានរំលោភយកដីដូនតារបស់ខ្លួន។
រដ្ឋាភិបាលបានផ្ដល់ដីសម្បទានទំហំ៧២៨ហិកតាដល់ក្រុមហ៊ុន Villa Development កាលពីឆ្នាំ២០១១ ដើម្បីធ្វើចម្ការកៅស៊ូនៅក្នុងក្រុងសែនមនោរម្យ។
ទោះជាយ៉ាងណា អ្នកភូមិមូលដ្ឋានបានត្អូញត្អែរថា ក្រុមហ៊ុននេះកំពុងកាប់ដើមជ័រទឹក និងព្រៃដ៏ពិសិដ្ឋរបស់ខ្លួនលើដីទំហំរាប់រយហិកតានៅក្រៅតំបន់សម្បទានរបស់ក្រុមហ៊ុននេះក្នុងសង្កាត់សុខដុម។
បន្ទាប់ពីដាក់ញត្តិទៅខុទ្ទកាល័យលោក ហ៊ុន សែន តំណាងអ្នកភូមិប្រាំនាក់បាននិយាយទៅកាន់ប្រព័ន្ធផ្សព្វផ្សាយនៅការិយាល័យរបស់អង្គការសិទ្ធិមនុស្សអាដហុកក្នុងរាជធានីភ្នំពេញ។
លោក ប្លឹក ម៉ល អាយុ៧៤ឆ្នាំបាននិយាយថា ក្រុមហ៊ុន Villa Development បានកាប់ដើមជ័រទឹក៣៧ដើមរបស់គ្រួសារលោកកាលពីបីឆ្នាំមុន ដោយផ្តល់ប្រាក់សំណងពី៥ទៅ៧,៥០ដុល្លារប៉ុណ្ណោះក្នុងមួយដើមជាអ្វីដែលលោកគិតថា ជាសំណងមិនគ្រប់គ្រាន់ឡើយ។
លោកបាននិយាយថា លោកចង់ឲ្យក្រុមហ៊ុនផ្ដល់ប្រាក់ឲ្យខ្ញុំ១.០០០.០០០រៀលក្នុងមួយដើម ពីព្រោះជីវភាពរបស់គ្រួសារខ្ញុំពឹងផ្អែកលើដើមជ័រទឹក និងអនុផលព្រៃឈើផ្សេងៗ។ ប៉ុន្តែឥឡូវនេះដើមឈើទាំងនេះអស់រលីងហើយ ហើយដីសហគមន៍ក៏ត្រូវក្រុមហ៊ុននេះរានអស់ដែរ ដូច្នេះតើគ្រួសាររបស់ខ្ញុំទៅរស់នៅឯណាទៅ?”។
លោក ប្លឹក ម៉ល និងអ្នកស្រី ខ្វឿង ទុំ អាយុ៤២ឆ្នាំជាតំណាងដូចលោកដែរនោះបាននិយាយថា សហគមន៍របស់ខ្លួនមានជីវភាពសមរម្យដោយការប្រមូលជ័រទឹក និងអនុផលព្រៃឈើផ្សេងៗរហូតដល់ឆ្នាំ២០១១។
អ្នកស្រី ទុំ បានរំឭកអនុស្សាវរីយ៍កាលពីកុមារភាពដ៏សប្បាយរីករាយពីការជិះដំរីចូលទៅក្នុងព្រៃសហគមន៍ជាមួយឪពុករបស់គាត់ដើម្បីប្រមូលជ័រទឹក។ ប៉ុន្តែតាំងពីឆ្នាំ២០១១មក ក្រុមហ៊ុន Villa Development បានកាប់ដើមជ័រទឹករបស់គ្រួសារអ្នកស្រីជាង៤០០ដើម។ អ្នកស្រីបាននិយាយថា ” ខ្ញុំអស់សង្ឃឹមរលីងនៅពេលក្រុមហ៊ុនរារាំងខ្ញុំមិនឲ្យចូលទៅក្នុងព្រៃដើម្បីប្រមូលជ័រទឹក”។
លោក ធន សារាយ ប្រធានអង្គការសិទ្ធិមនុស្សអាដហុកបានមានប្រសាសន៍ថា លោកជឿថា ក្រុមហ៊ុន Villa Development គឺជាក្រុមហ៊ុនវៀតណាម ប៉ុន្តែលោកមិនច្បាស់ពីម្ចាស់ក្រុមហ៊ុននេះឡើយ។ លោកបានមានប្រសាសន៍ថា ” សម្បទាននេះគួរត្រូវដកហូតវិញ ពីព្រោះក្រុមហ៊ុនបានរំលោភសិទ្ធិរបស់អ្នកភូមិជនជាតិដើមភាគតិចជាប្រព័ន្ធតែម្ដង។
គេមិនមានព័ត៌មានសម្រាប់ទាក់ទងក្រុមហ៊ុន Villa Development ឡើយ។ ទោះជាយ៉ាងណា នៅពេលទាក់ទងសុំការអត្ថាធិប្បាយពីការអះអាងរបស់អ្នកភូមិកាលពីម្សិលមិញ លោក យឹម លុច អភិបាលរងខេត្តបានបង្ហើបឲ្យដឹងថា ប្រពន្ធរបស់លោកជាម្ចាស់ក្រុមហ៊ុននេះ។ លោកបានមានប្រសាសន៍ថា “ដីនេះជារបស់ប្រពន្ធខ្ញុំ ហើយប្រពន្ធរបស់ខ្ញុំមិនមែនជាជនជាតិវៀតណាមទេ” ហើយលោកបានពន្យល់ថា រហូតមកទល់ពេលនេះក្រុមហ៊ុនបានដាំដើមកៅស៊ូលើដីសម្បទានបាន៣៨១ហិកតាហើយ។ លោកបានបន្ថែមថា “ក្រុមហ៊ុនធ្វើការអភិវឌ្ឍបានយ៉ាងល្អតាមគោលនយោបាយរដ្ឋាភិបាល មិនដូចការចោទប្រកាន់របស់ក្រុមអ្នកភូមិទេ”៕ សារុន