36 C
Phnom Penh

អ្នកភូមិ​ដែល​មាន​កំហឹង​ជិះទូក​ដេញ​តាម​ចាប់​អ្នក​នេសាទជន​ជាតិ​វៀត​ណាម

ដោយ ឌឹ ខេមបូឌា ដេលី

បទវិភាគ

បន្ទាប់​ពី​ការ​ដេញ​តាម​ទូក​ក្នុង​ល្បឿន​យឺត​រយៈពេល​ពីរម៉ោង​តាម​ទន្លេ​មេគង្គ​នៅក្នុ​ង​ខេត្ត​កណ្តាល​កាល​ពី​ព្រឹក​ម្សិលមិញ អ្នក​ភូមិ​ដែល​មាន​កំហឹង​ប្រហែល​១០០នាក់​​ដែល​ដឹក​នាំ​ដោយ​មន្ត្រី​គណបក្ស​ប្រឆាំង​ក្នុង​មូល​ដ្ឋាន​ម្នាក់​បាន​ឃាត់ខ្លួន​ជន​ជាតិ​វៀត​ណាម​ប្រាំ​នាក់​ ដែល​ពួកគាត់និយាយ​ថា បាន​ប្រើ​បច្ចេកទេស​នេសាទខុស​ច្បាប់​រយៈពេល​បីខែកន្លង​មក​។

យោង​តាម​អាជ្ញា​ធរ​មូលដ្ឋាន​បាន​ឲ្យ​ដឹង​ថា បុរស​ជន​ជាតិ​វៀត​​ណាម​ទាំង​នេះ​ ដែល​អ្នកភូមិ​​បានប្រគល់​ឲ្យ​​មន្ត្រី​រដ្ឋបាល​ជល​ផល​​បន្ទាប់ពី​ចាប់ទូក​របស់​ពួកគេ​ ហើយ​បាន​ដុត​អួន​របស់​ពួកគេ​ចោលនោះ បន្ទាប់មក​ត្រូវ​បាន​ដោះ​លែង​វិញ។

លោក ម៉ឹក ជា ជំទប់ឃុំ​គគីរធំ​ ស្រុក​កៀន​ស្វាយមក​ពី​គណបក្ស​សង្គ្រោះ​ជាត​ិ​​ដែលបាន​យល់​​ព្រម​ជួយ​អ្នក​ភូមិ​ដេញតាម​អ្នក​នេសាទ​ជន​ជាត​ិ​វៀត​ណាម​នេះ​បាន​មាន​ប្រសាសន៍ថា “នៅ​ព្រឹកនេះ​បន្ទាប់ពីការ​ស៊ើបអង្កេត​រយៈពេលបីខែ អ្នក​ភូមិ​ប្រហែល​១០០នាក់​​បាន​សម្រេច​ឃាត់​ខ្លួន​អ្នក​នេសាទ​ខុស​ច្បាប់ទាំងនេះដោយ​ខ្លួន​ឯង​”។

លោក ម៉ឹក ជា​ បាន​មាន​ប្រសាសន៍ថា “ក្រុម​អ្នក​ភូមិ​ជិះ​ទូក​បីគ្រឿង​ដេញ​តាម​អ្នក​នេសាទ​ទាំង​នេះ ចំណែក​ឯ​អ្នក​ភូមិ​​ផ្សេង​ទៀត​​បាន​ដេញ​តាម​មាត់​ទន្លេ”។ លោក​បាន​បន្ថែម​ថា អ្នក​ដេញ​តាម​បាន​ដេញតាម​អ្នកនេសាទ​ជន​ជាតិ​វៀត​ណាម​ទាំង​នេះដែលមាន​ទូក​ពីរគ្រឿង​ចាប់​ពី​ម៉ោង​​៥ និង​៣០នាទីព្រឹក ដល់ម៉ោង​៧ និង​៣០នាទី​ព្រឹក។

លោក ម៉ឹក ជា បាន​មាន​ប្រសាសន៍ថា កាលពី​បីខែ​មុន អ្នក​ភូមិនៅក្នុង​ឃុំរបស់លោក​​បាន​ព្យាយាម​ចាប់​បុរស​ទាំង​នេះ​ដែល​គេ​ដឹង​ថា បាន​ប្រើ​ឧបករណ៍​ឆក់ត្រី និង​អួន​ក្រឡាល្អិត​​ ដោយ​គំរាម​កំហែង​ដល់​ចំនួន​ត្រី​នៅក្នុង​តំបន់។ លោក​បាន​មាន​ប្រសាសន៍ថា ទីបំផុត​នៅពេល​ពួកគាត់​ចាប់​ពួកគេ​បាន​កាលពី​ម្សិលមិញ ពួកគាត​់​បែរជា​សង្រាកចិត្ត​ទៅវិញ។

​លោក​បាន​ថ្លែង​ថា “នៅពេល​អ្នក​ភូមិ​ចាប់យក​អួន​របស់​ពួកគេ​ នគរបាល​បាន​ព្យាយាម​ឃាត់​ពួកគាត់​កុំ​ឲ្យ​ដុត​ចោល ប៉ុន្តែ​​ពួកគេខឹង​យ៉ាង​ខ្លាំងដែល​ពួកគាត់​បាន​ដុត​អួន​នោះ​ចោល”។ លោក​បាន​បន្ថែម​ថា អ្នក​នេសាទ​ជន​ជាតិ​វៀត​ណាម​ទាំង​នេះ​ត្រូវ​បាន​ប្រគល់ទៅ​ឲ្យ​​មន្ត្រី​ជល​ផល​ស្រុក ដែល​បន្ទាប់មក​បាន​ដោះលែង​ពួកគេ​ភ្លាម។ លោក​បាន​មាន​ប្រសាសន៍ថា “ខ្ញុំ​ខក​ចិត្ត​ណាស់ដែល​ការិយាល័យ​ជល​ផល​ស្រុក​បាន​ដោះ​លែង​​អ្នក​នេសាទ​ជន​ជាតិ​វៀត​ណាម​ដោយ​គ្មាន​ដាក់​ទោស​ទណ្ឌ​អ្វីសោះ”។

លោក រស់ ចន្ថា អធិការ​នគរបាល​ស្រុក​លើក​ដែក​បាន​អះ​អាង​ថា អ្នក​នេសាទ​ទាំង​នេះ​ត្រូវ​បាន​ដោះ​លែង​ហើយ។ ដោយ​សំដៅដល់​ប្រធាន​រដ្ឋបាល​ជល​ផល​នៅក្នុង​​ស្រុក​នេះ លោក ចន្ថា បាន​មាន​ប្រសា​សន៍ថា “​យើង​នៅ​កន្លែង​កើត​ហេតុ ប៉ុន្តែ​​ករណី​នេះ​គឺ​ជាការ​ទទួល​ខុសត្រូវ​របស់​លោក​មាស សាន់”។ លោក​បាន​បដិសេធ​​មិន​ធ្វើ​អត្ថាធិប្បាយ​បន្ថែម​ឡើយ។ លោក​ មាស សាន់​ មិន​អាច​ទាក់​ទង​បាន​ទេ។

លោក អូន ណា នាយ​ប៉ុស្តិ៍ឃុំ​កំពង់​ភ្នំ​បាន​មាន​ប្រសាសន៍ថា នៅពេល​លោក​ទទួល​បានព័ត៌មាន​ថា ក្រុម​អ្នក​ភូមិ​​បាន​ឃាត់​ខ្លួន​​​ជន​ជាតិ​វៀត​ណាម​ទាំង​នេះ លោក​បាន​បញ្ជូន​កូន​ចៅ​របស់លោក​ទៅ​ដល់​កន្លែង​ដើម្បី​រក្សាសណ្តាប់ធ្នាប់។ លោក​បានមាន​ប្រសាសន៍ថា “នគរបាល​របស់​យើង​ត្រូវ​ការ​ពារ​អ្នកនេសាទ​ទាំងនេះ។ យើង​បារម្ភ​ថា អ្នកភូមិ​នឹង​វាយ​ពួកគេ​​​ចំពោះ​អ្វី​ដែល​ពួក​គេ​បាន​ធ្វើ”៕សារុន

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស