មេដឹកនាំប្រាំរូបក្នុងចំណោមមេដឹកនាំសហជីពប្រាំមួយរូប ដែលជាប់ចោទពីបទមានសកម្មភាពដែលនាំឲ្យមានទោសព្រហ្មទណ្ឌអំឡុងកូដកម្មកម្មករកាត់ដេរ និងបាតុកម្មទូទាំងប្រទេសកាលពីខែធ្នូ និងខែមករា ឥឡូវនេះស្ថិតនៅក្រោមការឃ្លាំមើលរបស់តុលាការ បន្ទាប់ពីមេដឹកនាំពីររូបទៀតបានបង្ហាញមុខនៅតុលាការក្រុងភ្នំពេញកាលពីថ្ងៃសុក្រ។
លោក រ៉ុង ឈុន ប្រធានសហព័ន្ធសហជីពកម្ពុជា និងអ្នកស្រី យ៉ាង សុភ័ណ ប្រធានសម្ព័ន្ធសហជីពកម្ពុជា ឥឡូវនេះ ដូចសហការីរបស់ខ្លួនដែរ ត្រូវគេហាមមិនឲ្យជួបជុំជាមួយមេដឹកនាំសហជីពផ្សេងទៀត ឬចូលរួមការប្រមូលផ្ដុំជាសាធារណៈណាមួយ រហូតដល់ពួកគេត្រូវជំនុំជម្រះពីបទប្រើអំពើហិង្សាដោយចេតនា បំផ្លាញទ្រព្យសម្បត្តិ និងបិទផ្លូវ។
ការចោទប្រកាន់ទាក់ទិននឹងអំពើហិង្សាដែលបានផ្ទុះអំឡុងកូដកម្មទូទាំងប្រទេសនៅផ្លូវវេងស្រេង កណ្ដាលតំបន់ឧស្សាហកម្ម ក្នុងខណ្ឌពោធិ៍សែនជ័យ ពេលដែលអ្នកតវ៉ាគប់ដុំថ្មត្រូវបានបង្ក្រាបយ៉ាងហិង្សាពីសំណាក់កម្លាំងកងរាជអាវុធហត្ថ ដែលបានបាញ់ស្លាប់កម្មករប្រាំនាក់ និងធ្វើឲ្យរបួសរាប់សិបនាក់ទៀត។
ទាំងលោក រ៉ុង ឈុន ទាំងអ្នកស្រី សុភ័ណ រួមជាមួយមេដឹកនាំសហជីពផ្សេងទៀតដូចជា លោក អាត់ ធន់ លោក ជា មុនី និងលោក ប៉ាវ ស៊ីណា កំពុងស្ថិតនៅក្រោមការឃ្លាំមើលរបស់តុលាការនោះ បដិសេធថា មិនបានមានវត្តមានពេលដែលអំពើហិង្សាបានផ្ទុះឡើង ឬគាំទ្រអំពើហិង្សានោះឡើយ។
បន្ទាប់ពីចេញពីការសាកសួរជាង១ម៉ោង លោក រ៉ុង ឈុន បានប្រាប់អ្នកយកព័ត៌មានថា លោក និងមេដឹកនាំសហជីពផ្សេងទៀតនឹង “បន្តបេសកកម្មរបស់ខ្លួន” ក្នុងការគាំទ្រសិទ្ធិរបស់កម្មករ។ លោកបាននិយាយថា ” នៅពេលពួកគេដកសិទ្ធិរបស់យើងដូចនេះ តើយើងអាចការពារសមាជិករបស់យើងយ៉ាងម៉េចកើត? វាដូចជាដាក់យើងក្នុងគុក គឺគុកឥតជញ្ជាំងអ៊ីចឹង”។
នៅពេលទាក់ទងតាមទូរស័ព្ទ អ្នកស្រី សុភ័ណ បានបញ្ជាក់ថា អ្នកស្រីក៏ត្រូវគេដាក់ឲ្យស្ថិតនៅក្រោមការឃ្លាំមើលរបស់តុលាការដែរ។ អ្នកស្រីបាននិយាយថា ” បើទោះជាពួកគេរឹតបន្តឹងសេរីភាព និងសិទ្ធិរបស់យើងក៏ដោយ ក៏យើងមិនខ្លាចឡើយ ហើយនឹងបន្តការតវ៉ាដើម្បីការពារផលប្រយោជន៍សមាជិករបស់យើង និងការពារកម្មករទាំងអស់”។
កូដកម្មទូទាំងប្រទេស ដែលបានធ្វើឲ្យវិស័យកាត់ដេរជាប់គាំង ត្រូវបានធ្វើឡើងដើម្បីតវ៉ានឹងអ្វីដែលសហជីពហៅថា ការដំឡើងប្រាក់មិនគ្រប់គ្រាន់លើប្រាក់ខែគោល។ រដ្ឋាភិបាលគ្រោងនឹងប្រកាសការដំឡើងប្រាក់បន្ថែមលើប្រាក់ខែ១០០ដុល្លារ នៅខែវិច្ឆិកា ដែលនឹងចូលជាធរមាននៅខែមករា។
ក្នុងការចរចានៅសប្ដាហ៍មុននេះ សហជីពបានជំរុញដើម្បីបានប្រាក់ខែអប្បបរមា១៤០ដុល្លារ រីឯភាគីរោងចក្របានបដិសេធមិនកែប្រែពីតួលេខ១១០ដុល្លារ។ រដ្ឋាភិបាលនិយាយថា ប្រាក់ខែគួរទទួលបានយ៉ាងហោចណាស់១២០ដុល្លារក្នុងមួយខែ ដែលស្ថិតនៅក្នុងបន្ទាត់ក្រីក្រក្នុងក្រុងភ្នំពេញ៕ មានិត