ក្រុមមន្ត្រីបានឲ្យដឹងថា រថយន្តធុនធ្ងន់ពីរគ្រឿងដែលដឹកឈើប្រណីតទម្ងន់៦០ម៉ែត្រគូប ត្រូវបានរឹបអូសកាលពីថ្ងៃសៅរ៍ បន្ទាប់ពីអ្នកបើកបរបានព្យាយាមបើកកាត់របាំងផ្លូវរបស់រដ្ឋបាលព្រៃឈើក្នុងខេត្តកំពង់ចាម។
លោក ទឹម សុខុម ប្រធានរដ្ឋបាលព្រៃឈើខេត្តបានមានប្រសាសន៍ថា អ្នកបើកបររថយន្តដែលរថយន្តនីមួយៗដឹកឈើធ្នង់ទម្ងន់៣០ម៉ែត្រគូបនោះបានបុករថយន្តពីរគ្រឿង ដែលមន្ត្រីរដ្ឋបាលព្រៃឈើប្រាំបួននាក់បានដាក់រាំងនៅតាមផ្លូវជាតិលេខ៧១ក្នុងស្រុកចម្ការលើ”។
លោក សុខុម បានមានប្រសាសន៍កាលពីម្សិលមិញថា ” រថយន្តធុនធំពីរគ្រឿងបានដឹកឈើប្រណីតពីខេត្តព្រះវិហារឆ្លងកាត់ខេត្តកំពង់ធំ ប៉ុន្តែរថយន្តទាំងនេះត្រូវបានចាប់តាមផ្លូវជាតិលេខ៧១ក្នុងស្រុកចម្ការលើ ដែលរត់ពន្ធឆ្លងកាត់ព្រំដែនវៀតណាម”។
លោក សុខុម បានពន្យល់ថា អ្នកបើកបររថយន្តធុនធំទាំងពីរគ្រឿងបានរត់គេចដោយថ្មើរជើង បន្ទាប់ពីពួកគេបានបើករថយន្តបុករបាំងផ្លូវ ហើយមិនបានព្យាយាមមកយករថយន្ត ឬរបស់របរមានតម្លៃរបស់ខ្លួនទេ។ លោកបានមានប្រសាសន៍ថា “អ្នកបើកបរបានបោះបង់រថយន្តរបស់ខ្លួន”។
លោក អុិត ដារ៉ា អធិការនគរបាលស្រុកចម្ការលើបានមានប្រសាសន៍ថា គ្រោះថ្នាក់នេះបានកើតឡើងនៅម៉ោងប្រហែល៨យប់ថ្ងៃសៅរ៍ ប៉ុន្តែបានមានប្រសាសន៍ថា កម្លាំងរបស់លោកប្រចាំការនៅកន្លែងបិទផ្លូវតែប៉ុណ្ណោះ ដើម្បីគាំទ្រដល់រដ្ឋបាលព្រៃឈើ ហើយមិនបានចូលរួមដោយផ្ទាល់ក្នុងការរឹបអូសរថយន្តធុនធំនោះទេ។
យោងតាមលោក សុខុម បានឲ្យដឹងថា មន្ត្រីរដ្ឋបាលព្រៃឈើជាមួយនឹងមន្ត្រីនគរបាលស្រុកបីរូបបានលោតចេញពីរថយន្ត មុនពេលរថយន្តនោះបានបុកគ្នា ហើយមានរបួសស្រាលតែប៉ុណ្ណោះ។
យោងតាមលោក សុខុម បានឲ្យដឹងថា លោក យ៉េន ម៉ៅ មន្ត្រីរដ្ឋបាលព្រៃឈើមួយរូបបានលោតចេញពីរថយន្តមុនពេលមានគ្រោះថ្នាក់។
លោក សុខុម បានមានប្រសាសន៍ថា ” លោក ម៉ៅ បានលោតចេញដើម្បីគេចខ្លួនពីរថយន្តទាន់ពេលវេលា។ ប្រសិនបើគាត់យឺតយ៉ាវក្នុងការលោតតែបន្តិច គាត់អាចរងរបួសធ្ងន់ ដោយរថយន្តធុនធំនោះបុករថយន្តរបស់យើង”។
មន្ត្រីរដ្ឋបាលព្រៃឈើរូបនេះបានមានប្រសាសន៍ថា ” រថយន្តធុនធំ និងឈើប្រណីតទម្ងន់៦០ម៉ែត្រគូប បច្ចុប្បន្ននេះកំពុងរក្សាទុកនៅខណ្ឌឫស្សីកែវ រាជធានីភ្នំពេញ។ លោកបានមានប្រសាសន៍ថា នៅពេលឆាប់ៗនេះអាជ្ញាធរនឹងចាប់ផ្ដើមធ្វើការស៊ើបអង្កេតរកអ្នកដែលបានដឹកឈើនោះ៕ សារុន