អាជ្ញាធរបាននិយាយកាលពីម្សិលមិញថា ក្មេងប្រុសជំទង់ម្នាក់ត្រូវបានចាប់ខ្លួនក្នុងខេត្តកំពង់ឆ្នាំងកាលពីថ្ងៃសៅរ៍ពីបទរំលោភ ហើយសម្លាប់ស្ត្រីវិកលចរិតម្នាក់ ចំណែកឯបុរសបីនាក់ទៀតត្រូវបានចាប់ខ្លួនក្នុងថ្ងៃតែមួយក្នុងខេត្តកំពង់ចាម ពីបទរំលោភបូក និងសម្លាប់ស្ត្រីម្នាក់។
យោងតាមលោក ប៉ុល វុទ្ធី ស្នងការរងនគរបាលខេត្តបានឲ្យដឹងថា នៅក្នុងខេត្តកំពង់ឆ្នាំង នគរបាលរកឃើញសាកសព ជុំ កុសល អាយុ៣៤ឆ្នាំកាលពីព្រឹកថ្ងៃសៅរ៍ នៅក្នុងឃុំជ្រៃបាក់ ស្រុករលាប្អៀ។ នៅថ្ងៃនោះពួកគេបានចាប់ខ្លួនក្មេងប្រុសអាយុ១៧ឆ្នាំម្នាក់ ដែលសង្ស័យថា បានរំលោភជនរងគ្រោះ ហើយបានយកខ្សែក្រវាត់វាយជនរងគ្រោះ និងរឹតកនាងរហូតដល់ស្លាប់ ហើយទុកសាកសពរបស់នាងដេកផ្កាប់មុខនៅក្នុងថ្លុកទឹកដ៏ធំមួយ។
លោកបានមានប្រសាសន៍ថា ” សាកសពមានស្នាមជំា ហើយយើងសន្និដ្ឋានថា ជនរងគ្រោះត្រូវបានធ្វើទារុណកម្ម និងរំលោភ។ ជនសង្ស័យសារភាពថា បានរំលោភ ធ្វើទារុណកម្ម និងសម្លាប់នាង”។
លោក វុទ្ធី បានមានប្រសាសន៍ថា ជនចាប់រំលោភត្រូវបាននគរបាលសាកសួរ ហើយនឹងត្រូវបញ្ជូនទៅសាលាដំបូងខេត្តនៅថ្ងៃនេះ ដើម្បីប្រឈមនឹងការចោទប្រកាន់។
លោក សំ សុខា នាយប៉ុស្តិ៍ឃុំបានមានប្រសាសន៍ថា ជនរងគ្រោះមានជំងឺសរសៃប្រសាទធ្ងន់ធ្ងរបន្ទាប់ពីបងប្អូនស្រីរបស់គាត់ស្លាប់កាលពី៤ឆ្នាំមុន ហើយនៅពេលបងប្អូនស្រីនោះស្លាប់នាងពឹងផ្អែកលើការសូមទាន។
លោក សុខា បានមានប្រសាសន៍ថា ជនសង្ស័យទំនងជាស្រវឹងស្រាកាលពីយប់ថ្ងៃសុក្រ នៅពេលជននេះឃើញជនរងគ្រោះដើរនៅតាមផ្លូវ។ លោកបានមានប្រសាសន៍ថា ” ជននោះស្រវឹងស្រាយ៉ាងខ្លាំង ហើយគាត់ឃើញថា វាជាឱកាសស្ងាត់ ដូច្នេះជននេះបានឆ្លៀតឱកាសរំលោភនាងតែម្ដង”។
លោក ហេង វុទ្ធី អធិការនគរបាលស្រុកបានមានប្រសាសន៍ថា ជនរងគ្រោះរូបនេះឈ្មោះ សុខ គឹមស្រ៊ូ អាយុ២២ឆ្នាំ ត្រូវបានគេប្រទះឃើញអារកសម្លាប់ក្នុងវាលស្រែមួយស្ថិតក្នុងឃុំត្រពាំងគរ ស្រុកជើងព្រៃ កាលពីថ្ងៃទី២៤ ខែតុលា។ លោក វុទ្ធី បានមានប្រសាសន៍ថា ” ជនចាប់រំលោភប្រហែលជាស្គាល់ជនរងគ្រោះ”។
យោងតាមលោក ម៉ែន ប៊ុនរិទ្ធ មេបញ្ជាការរងកងរាជអាវុធហត្ថខេត្តបានឲ្យដឹងថា បន្ទាប់ពីការស៊ើបអង្កេតរយៈពេលប្រហែល១សប្ដាហ៍ កងរាជអាវុធហត្ថបានចាប់ខ្លួនជនសង្ស័យបីនាក់កាលពីថ្ងៃសៅរ៍ ហើយបច្ចុប្បន្ននេះកំពុងសាកសួរពួកគេ ដែលលោកបានមានប្រសាសន៍ថា លោកមិនអាចប្រាប់ឈ្មោះ ឬអាយុជនចាប់រំលោះបានទេ ពីព្រោះលោកមិនមានព័ត៌មាននៅក្នុងដៃឡើយ។
យោងតាមលោក អំ សំអាត អ្នកគ្រប់គ្រងបច្ចេកទេសរបស់អង្គការសិទ្ធិមនុស្សលីកាដូបានឲ្យដឹងថា អង្គការសិទ្ធិមនុស្សលីកាដូបានកត់ត្រាករណីរំលោភសម្លាប់ចំនួន១៤ករណីរហូតមកទល់ពេលនេះនៅឆ្នាំនេះនៅក្នុងខេត្តចំនួន១៤ដែលខ្លួនបានឃ្លាំមើលគឺកើនឡើង១១ករណីអំឡុងរយៈពេលដូចគ្នានេះកាលពីឆ្នាំមុន៕ សារុន