នគរបាលមូលដ្ឋានបានឲ្យដឹងថា បុរសអាយុ១៨ឆ្នាំម្នាក់បានរងរបួសធ្ងន់កាលពីថ្ងៃសៅរ៍ នៅពេលម៉ូតូរបស់ខ្លួនបានបុកជាមួយរថយន្តរបស់ស្នងការរងនគរបាលខេត្តប៉ៃលិន។
យោងតាមលោក ឃ្លោក សាឡាន នាយនគរបាលចរាចរខេត្តបានឲ្យដឹងថា លោក នី ប៊ុនធឿន បានបើកម៉ូតូរបស់ខ្លួនឌុបឪពុករបស់ខ្លួន និងអ្នកជិតខាងម្នាក់នៅកៅអីខាងក្រោយកាត់ក្រុងប៉ៃលិន ស្រាប់តែបុកជាមួយរថយន្តតូយ៉ូតាកាមរីមួយគ្រឿង ដែលបើកបរដោយលោក ផា ធា ស្នងការរងនគរបាលក្នុងទិសដៅបញ្ច្រាសគ្នា។
លោក សាឡាន បានមានប្រសាសន៍ថា ” លោក ប៊ុនធឿន បានរងរបួសធ្ងន់ ហើយឥឡូវនេះកំពុងសម្រាកព្យាបាលនៅមន្ទីរពេទ្យខេត្ត បន្ទាប់ពីម៉ូតូរបស់លោកបានបុកជាមួយរថយន្តរបស់ស្នងការរង”។
លោក សាឡាន បានមានប្រសាសន៍ថា នគរបាលនឹងឲ្យភាគីទាំងពីរមកជួបគ្នានៅថ្ងៃនេះដើម្បីចរចាក្រៅប្រព័ន្ធតុលាការជុំវិញគ្រោះថ្នាក់ចរាចរណ៍នេះ។ លោកបានមានប្រសាសន៍ថា ” យើងចង់ដោះស្រាយបញ្ហានេះក្រៅប្រព័ន្ធតុលាការ ពីព្រោះវាជាបញ្ហាតូចតាចតែប៉ុណ្ណោះ”។
លោក ហែម សូនី ជាឪពុករបស់លោក ប៊ុនធឿន ដែលបានរួចផុតពីគ្រោះថ្នាក់នោះដោយគ្មានរងរបួស ចំណែកអ្នករួមដំណើរម្នាក់ទៀតឈ្មោះ តាំង រ័ត្ន អាយុ១៧ឆ្នាំបានរងរបួសស្រាល។ លោក សូនី បាននិយាយថា វាជាកំហុសរបស់អ្នកបើកបររថយន្តដែលបានបើកចេញពីគន្លងផ្លូវរបស់ខ្លួនដើម្បីគេចជង្ហុក ហើយបានបុកម៉ូតូតែម្ដង។
លោកបានមានប្រសាសន៍ថា ស្នងការរងនគរបាលបានបើករថយន្តរបស់ខ្លួនគេចពីជង្ហុកនៅផ្នែករបស់ខ្លួន ហើយបានបុកម៉ូតូកូនប្រុសរបស់ខ្ញុំ”។
លោក គង់ សំណាង មេឃុំអូតាវ៉ៃ ដែលគ្រោះថ្នាក់ចរាចរណ៍បានកើតឡើងបានបញ្ជាក់ពីហេតុការណ៍នេះ។ លោកបានមានប្រសាសន៍ថា ” រថយន្តនេះត្រូវបានបន្ទោស ពីព្រោះវាបើកចូលទៅក្នុងផ្នែកខាងឆ្វេងរបស់ម៉ូតូ”។
ប៉ុន្តែលោក ផា ធា បានមានប្រសាសន៍ថា ការពិតគឺលោក ប៊ុនធឿន ដែលបានបើកបុករថយន្តរបស់លោកនោះ។ លោកបានមានប្រសាសន៍ថា ” យើងមិនចង់ឲ្យមានគ្រោះថ្នាក់ចរាចរណ៍ទេ ប៉ុន្តែអ្នកបើកបរម៉ូតូទេដែលបានព្យាយាមបើកគេចពីជង្ហុកដ៏ធំទៅរកផ្លូវល្អ នៅពេលដែលគាត់បុករថយន្តរបស់ខ្ញុំ”។ លោកបានបន្ថែមថា ” យើងមានគម្រោងធ្វើការចរចានៅថ្ងៃស្អែក។ ខ្ញុំនឹងបង់សំណងប្រសិនបើអាជ្ញាធររកឃើញថា ខ្ញុំមានកំហុស”៕ សារុន