38 C
Phnom Penh

នគរបាល​អះអាង​ថា​ក្រុម​ប្រឆាំង​រដ្ឋាភិបាល​ជ្រើស​រើស​ទ័ព​ផ្ទាល់​ខ្លួន

ដោយ ឌឹ ខេមបូឌា ដេលី

បទវិភាគ

លោក គៀត ច័ន្ទថារិទ្ធ អ្នក​នាំពាក្យ​អគ្គស្នង​ការដ្ឋាន​នគរ​បាល​ជាតិ​​​បាន​ឲ្យ​ដឹង​កាលពី​ថ្ងៃ​អាទិត្យ​​ថា ​រណសិរ្ស​រំដោះ​ជាតិ​ខ្មែរ (KNLF) ជា​ក្រុម​តស៊ូ​មតិ​នយោបាយ​ដែល​ប្រឆាំង​លោក​នាយក​រដ្ឋ​មន្ត្រី ហ៊ុន សែន និង​គណបក្ស​ប្រជាជន​កម្ពុជា​កំពុង​កាន់​អំណាច​ កំពុង​ហ្វឹកហាត់​កងទ័ព​សម្ងាត់ មាន​ភេរវករ​ប្រដាប់​អាវុធ​រាប់រយ​នាក់ ក្នុង​បំណង​ផ្តួល​រំលំ​រដ្ឋាភិបាល។

ការ​អធិប្បាយ​របស់​អ្នក​នាំពាក្យ​រូប​នេះ​អំឡុង​សន្និសីទ​នៅ​ស្នងការដ្ឋាន​នគរបាល​ជាតិ​ក្នុង​ក្រុង​ភ្នំពេញ​កាលពី​ព្រឹក​ថ្ងៃ​អាទិត្យ ធ្វើ​ឡើង​បន្ទាប់ពី​មាន​ការ​ចាប់​ខ្លួន​សមាជិក​រណសិរ្ស​រំដោះ​ជាតិ​ខ្មែរ​១០​នាក់​កាលពី​ខែ​មុន​ពី​បទ​ញុះញង់​ឲ្យ​មាន​អំពើ​ហិង្សា។ សេចក្តី​ថ្លែងការណ៍​ប៉ូលិស​បាន​ចេញ​នៅ​ពេល​​នោះ​បាន​ឲ្យ​ដឹង​ថា ក្រុម​ប្រឆាំង​នេះ​កំពុង​”ហ្វឹកហាត់​កម្លាំង​ភេរវករ​ដើម្បី​ដាក់​គ្រឿង​ផ្ទុះ​ជា​សម្ងាត់​នៅជិត​ព្រំដែន​ថៃ” និង​” ​ផ្តួល​រំលំ​រដ្ឋាភិបាល​តាម​រយៈ​ការ​ប្រើ​កម្លាំង​ប្រដាប់​អាវុធ​ខុស​ច្បាប់​នេះ”។

ឧត្ដម​សេនីយ៍ឯក គៀត ច័ន្ទថារិទ្ធ បាន​ប្រាប់​អ្នក​យក​ព័ត៌មាន​កាលពី​ថ្ងៃ​អាទិត្យ​ថា “យើង​មាន​ភ័ស្តុតាង​ឯកសារ​ដែល​រឹបអូស​បាន​ដើម្បី​បញ្ជាក់​ថា ពួកគេ​មាន​កម្លាំង​ប្រដាប់​អាវុធ​រាប់រយ​នាក់​ ហើយ​យើង​ជឿ​ថា ពួកគេ​កំពុង​លាក់​ខ្លួន​ក្នុង​ប្រទេស​នេះ”។

លោក​បាន​មាន​ប្រសាសន៍​ទៀតថា ក្នុង​ចំណោម​ភ័ស្តុតាង​ដាក់​បន្ទុក​លើ​បុរស​ទាំង​១០​នាក់​ដែល​ចាប់​ខ្លួន​កាលពី​ថ្ងៃ​ទី​២២​និង​២៣​ខែ​តុលា គឺ​ឯកសារ​មួយ ចេញ​ដោយ​លោក សម សេរី ប្រធាន​រណសិរ្ស​រំដោះ​ជាតិ​ខ្មែរ និងស្នាម​មេដៃ​របស់​ជន​សង្ស័យ ដែល​ប្រកាស​ពី​ការ​បង្កើត​កងទ័ព​ឧទ្ទាម និង​ក្រសួង​ការពារ​ជាតិ​របស់​ខ្លួន​ផ្ទាល់។

អ្នក​នាំពាក្យ​រូបនេះ​បាន​ឲ្យ​ដឹង​ថា “យើង​បាន​សាកសួរ​ជន​សង្ស័យ​ទាំង​នោះ ហើយ​ពួកគេ​បាន​សារភាព​ថា ពួកគេ​បាន​ជ្រើស​រើស​កម្លាំង​ប្រដាប់​អាវុធ ហើយ​ពួកគេ​ក៏​បាន​ទទួល​ការ​ហ្វឹកហ្វឺន​នៅ​ព្រំដែន​ខ្មែរ-ថៃ​ដែរ” ហើយ​បុរស​ទាំង​នោះ​បាន​សារភាព​ថា​បាន​បញ្ចុះ​បញ្ចូល​ពលករ​ចំណាក​ស្រុក ព្រះសង្ឃ និង​និស្សិត​ដែល​សិក្សា​នៅ​ប្រទេស​ថៃ ឲ្យ​ធ្វើ​ជា​កម្លាំង។

ឧត្ដម​សេនីយ៍ឯក គៀត ច័ន្ទថារិទ្ធ បាន​មាន​ប្រសាសន៍​ថា ប៉ូលិស​ក៏​បាន​ទទួល​លិខិត៤៦១​ច្បាប់ ដែល​បញ្ជាក់ពី​គោល​បំណង​របស់​រណសិរ្ស​រំដោះ​ជាតិ​ខ្មែរ ញុះញង់​ឲ្យ​ពលរដ្ឋ​ងើប​ឡើង​ប្រឆាំង​រដ្ឋាភិបាល និង​បាន​ចោទ​ក្រុម​នេះ​ពី​បទ​ព្យាយាម “កែប្រែ​ប្រវត្តិសាស្ត្រ” ដោយ​ការ​ចែក​ចាយ​ស៊ីឌី​និង​សៀវភៅ មាន​ចំណង​ជើង​ថា “រំលើង​ឫសគល់​៧​មករា” ដែល​រិះគន់​រដ្ឋាភិបាល ព្រះមហាក្សត្រ នរោត្តម សីហមុនី និង​ព្រះ​រតនកោដ្ឋ នរោត្តម សីហនុ។

លោន​បាន​ឲ្យ​ដឹង​ទៀត​ថា អាជ្ញាធរ​ក៏​មាន​ឯកសារ​បញ្ជាក់​ថា រណសិរ្ស​រំដោះ​ជាតិ​ខ្មែរ​នេះ​គឺ​កើត​ចេញ​ពី​ចលនា​ក្បាល​ខ្លា ជា​អង្គការ​ភេរវកម្ម​មួយ​ផ្សេង​ទៀត ហើយ​បាន​ចោទ​ក្រុម​ទាំង​ពីរ​ ថា​នៅ​ពីក្រោយ​ផែនការ​ដាក់​គ្រាប់​បែក២​លើក​ដោយ​ឡែក​ពី​គ្នា​ក្នុង​ក្រុង​ភ្នំពេញ​កាលពី​ឆ្នាំ២០០៧​និង​២០០៩។ សមាជិក​៤​នាក់​របស់​ចលនា​ក្បាល​ខ្លា​ត្រូវ​បាន​ផ្តន្ទា​ទោស​ដាក់​ពន្ធនាគារ​ពី​២០​ឆ្នាំ​ដល់​២៨​ឆ្នាំ​ចំពោះ​ករណី​នៅ​ឆ្នាំ​២០០៩ ដែល​ក្នុង​ហេតុការណ៍​នោះ គេ​បាន​រក​ឃើញ​គ្រឿង​ផ្ទុះ​នៅ​ខាងក្រៅ​អគារ​ទីស្តីការ​គណៈ​រដ្ឋ​មន្ត្រី និង​ស្ថានីយ​ទូរទស្សន៍​ប៉ុស្តិ៍​លេខ៣។

ឧត្ដម​សេនីយ៍​ឯក គៀត ច័ន្ទថារិទ្ធ បាន​ឲ្យ​ដឹង​ថា ប៉ូលិស​កំពុង​ព្យាយាម​ស្វែង​រក​និង​បោស​សម្អាត​សមាជិក​រណសិរ្ស​រំដោះ​ជាតិ​ខ្មែរ​ក្នុង​ប្រទេស​កម្ពុជា។ លោក​បាន​បន្ថែម​ថា “យើង​កំពុង​ផ្តោត​លើ​ពួកគេ និង​ស្វែង​រក​ចាប់​ខ្លួន​ពួកគេ​នៅ​ឡើយ”។

នៅ​ពេល​ទាក់ទង​កាលពី​ថ្ងៃ​សុក្រ លោក សេរី ដែល​បាន​បដិសេធ​ការ​ចោទ​ប្រកាន់​មុន​នេះ​ដោយ​ប៉ូលិស ដែល​ថា​លោក​ជា​សមាជិក​នៃ​ចលនា​ក្បាលខ្លា ប៉ុន្តែ​បាន​ទទួល​ស្គាល់​ថា ខ្លួន​ធ្លាប់​ជា​មិត្តភក្តិ​ជិតស្និទ្ធ​ជាមួយ​មេដឹកនាំ​ក្រុម​នេះ គឺ​លោក សម ឯក នោះ បាន​និយាយ​ថា លោក​មិន​បាន​ពាក់ព័ន្ធ​ក្នុង​ការ​ដាក់​គ្រាប់​បែក​នៅ​ឆ្នាំ​២០០៩​ ដែល​លោក​និយាយ​ថា​ត្រូវ​បាន​រដ្ឋាភិបាល​ប្រឌិត​ឡើង​នោះ​ទេ។

លោក សេរី បាន​ឲ្យ​ដឹង​តាម​រយៈ​សារអេឡិចត្រូនិក​ពី​ប្រទេស​ដាណាម៉ាក ដែល​លោក​កំពុង​រស់នៅ​និរទេស​ដោយ​ខ្លួន​ឯង ដើម្បី​គេចពី​ការ​ចាប់​ខ្លួន​ពី​សំណាក់​អាជ្ញាធរ​ថា “ខ្ញុំ​សូម​បដិសេធ…ដែល​ថា ខ្ញុំ​នៅ​ពីក្រោយ​ការ​ដាក់​គ្រាប់បែក​ក្នុង​ឆ្នាំ​២០០៩។ ខ្ញុំ​មិន​ដែល​ប្រើ​អំពើ​ហិង្សា​ម្តងណា​ឡើយ”។

លោក​បាន​និយាយ​ថា “ខ្ញុំ​គិត​ថា នេះ​ជា​គម្រោង​​របស់​រដ្ឋាភិបាល​ក្នុង​ការ​ប្រឌិត​រឿង​នេះ​ឡើង​ដើម្បី​ចាប់​ខ្លួន​ខ្ញុំ គឺ​រដ្ឋាភិបាល​ខ្លួន​ឯង​ដែល​បាន​ដាក់​គ្រាប់បែក​ក្នុង​បំណង​ទម្លាក់​កំហុស​លើ​រណសិរ្ស​រំដោះ​ជាតិ​ខ្មែរ និង​ចាប់​ខ្លួន​យើង”។

សមាជិក​រណសិរ្ស​រំដោះ​ជាតិ​ខ្មែរ​១៣​នាក់​ត្រូវ​បាន​កាត់​ទោស​ឲ្យ​ជាប់​ពន្ធនាគារ​ពី​៥​ឆ្នាំ​ដល់​៩​ឆ្នាំ​កាលពី​ខែ​មេសា ពី​បទ​មាន​គម្រោង​ផ្តួល​រំលំ​រដ្ឋាភិបាល គឺ​ជា​អ្វី​ដែល​គេ​យល់​ឃើញ​ទូទៅ​ថា ជា​សាលក្រម​មាន​លក្ខណៈ​នយោបាយ ដែល​ផ្អែកលើ​ភ័ស្តុតាង​បន្តិច​បន្តួច​ស្តួច​ស្តើង​ប៉ុណ្ណោះ៕មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស