ជាថ្មីម្ដងទៀត ចៅក្រមនៅសាលាក្ដីខ្មែរក្រហមបានបង្គាប់ឲ្យក្រុមមេធាវីការពារ នួន ជា និង ខៀវ សំផន បញ្ចប់ការធ្វើពហិការមិនចូលរួមសវនាការនាពេលបច្ចុប្បន្នរបស់ខ្លួន ដោយប្រាប់ឲ្យពួកគេបង្ហាញមុខនៅថ្ងៃបើកសវនាការបន្ទាប់ ដែលនឹងធ្វើឡើងនៅចុងខែនេះ ប្រសិនបើមិនដូច្នោះទេ ពួកគេត្រូវប្រឈម “វិធានការម៉ឺងម៉ាត់”។
តាមការណែនាំរបស់កូនក្ដីខ្លួន មេធាវីតំណាងឲ្យមេដឹកនាំខ្មែរក្រហមទាំងពីររូបនេះបានដើរចេញពីតុលាការកាលពីខែមុនក្នុងថ្ងៃបើកសវនាការដំបូងលើអង្គសេចក្ដីនៅដំណាក់កាលទី២នៃសវនាការផ្ដន្ទាទោសពួកគេពីបទឧក្រិដ្ឋកម្មសង្គ្រាម និងប្រល័យពូជសាសន៍។
នួន ជា និយាយថា ចៅក្រមដែលកាត់ទោសលោក និង ខៀវ សំផន នៅដំណាក់កាលទី១នៃសវនាការជំនុំជម្រះ មានភាពលម្អៀងយ៉ាងខ្លាំង ហើយចង់ឲ្យតុលាការដកចៅក្រមទាំងនោះចេញ។ ខៀវ សំផន និយាយថា លោកមិនអាចការពារខ្លួននៅក្នុងដំណាក់កាលទី២នៃសវនាការជំនុំជម្រះ ហើយប្ដឹងទាស់ការកាត់ទោសលោកនៅក្នុងដំណាក់កាលទី១ក្នុងពេលតែមួយបានទេ ហើយលោកចង់ឲ្យពន្យារពេលសវនាការបច្ចុប្បន្ន។
នៅក្នុងសេចក្ដីសម្រេចមួយចុះថ្ងៃសុក្រ និងចេញដោយតុលាការកាលពីម្សិលមិញ អង្គជំនុំជម្រះនៃសាលាក្ដីនេះបានច្រានចោលការទាញហេតុផលទាំងពីរ។ សេចក្ដីសម្រេចនេះបានបង្គាប់ឲ្យក្រុមមេធាវីការពារក្ដីបង្ហាញមុខចូលរួមក្នុងសវនាការនៅថ្ងៃទី១៧ ខែវិច្ឆិកា ហើយបានបន្ថែមថា អង្គជំនុំជម្រះ “នឹងចាត់វិធានការម៉ឺងម៉ាត់ ប្រសិនបើមិនគោរពតាមសេចក្ដីបង្គាប់ឲ្យបង្ហាញមុខនៅក្នុងតុលាការ”។
ចៅក្រមមិនបានបញ្ជាក់ថានឹងចាត់វិធានការអ្វីឲ្យប្រាកដនោះទេ។ នៅក្នុងសំណើសុំទៅអង្គជំនុំជម្រះកាលពីខែមុន ព្រះរាជអាជ្ញាបានស្នើឲ្យចាត់តាំងមេធាវីថ្មីសម្រាប់តំណាងឲ្យចុងចោទ ប្រសិនបើមេធាវីការពារបច្ចុប្បន្នរបស់ពួកគេបន្តធ្វើពហិការមិនចូលរួមក្នុងសវនាការទៀត។
លោក គង់ សំអុន ជាមេធាវីមួយរូបតំណាងឲ្យ ខៀវ សំផន បានមានប្រសាសន៍ថា ការបង្គាប់ចុងក្រោយរបស់អង្គជំនុំជម្រះនេះមិនបានធ្វើឲ្យកូនក្ដីរបស់លោកកែប្រែចិត្តឡើយចំពោះការធ្វើពហិការ។ លោកមានប្រសាសន៍ទៀតថា “យើងនឹងមិនចូលរួមសវនាការទេ។ យើងជឿថា យើងមានជំហររឹងមាំអាចការពារតំណែងរបស់យើងបាន។ ប្រសិនបើតុលាការចង់បំពានអំណាចរបស់ខ្លួន តុលាការអាចធ្វើអ្វីក៏បានតាមចិត្តចង់”។
លោក វីកទ័រ កូប៉េ (Victor Koppe) មេធាវីតំណាងឲ្យ នួន ជា បានមានប្រសាសន៍ថា ក្រុមមេធាវីការពារនឹងមិនបញ្ចប់ការធ្វើពហិការសវនាការឡើយ ប៉ុន្តែនឹងពិចារណាមើលនៅពេលអង្គចៅក្រមពិសេសរបស់សាលាក្ដីនេះសម្រេចគាំទ្រសំណើសុំដកចៅក្រមទាំងនេះចេញមិនឲ្យលើសពីសប្ដាហ៍ក្រោយ។
អង្គចៅក្រមពិសេសគឺជាអង្គចៅក្រមដែលតុលាការកោះប្រជុំជាពិសេស ដើម្បីពិចារណាសំណើរបស់ នួន ជា សុំដកចៅក្រម។ អង្គជំនុំជម្រះមិនអាចសម្រេចលើសំណើនេះបានទេ ពីព្រោះ នួន ជា កំពុងព្យាយាមស្វះស្វែងសុំឲ្យដកចៅក្រមបួនរូបរបស់ខ្លួនចេញ។
លោក វីកទ័រ កូប៉េ បានចាត់ទុកសេចក្ដីសម្រេចចុងក្រោយនេះរបស់អង្គជំនុំជម្រះថា “មានគុណវិបត្តិខ្លាំង”។ លោកបានមានប្រសាសន៍ទៀតថា ” វាមិនបានលើកឡើងពីអង្គហេតុដែលអង្គជំនុំជម្រះមិនអាចរង់ចាំសេចក្ដីសម្រេចរបស់អង្គចៅក្រមពិសេសលើញត្តិសុំដកចៅក្រមរបស់យើងនោះទេ។ ញត្តិនេះបានលើកឡើងពីបញ្ហាច្បាប់មូលដ្ឋានគ្រឹះជាច្រើន ហើយការរង់ចាំគឺជារឿងសមរម្យដែលត្រូវធ្វើ”៕ សុខុម