28 C
Phnom Penh

ស្នងការ​នគរ​បាល​លើក​ឡើង​ថា រាជធានី​ត្រូវ​បាន​រៀបចំ​រួច​ជា​ស្រេច​សម្រាប់​ពិធី​បុណ្យ​អុំទូក​

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ លោក ជួន សុវណ្ណ ស្នង​ការ​នគរ​បាល​រាជធានីភ្នំពេញ ​បាន​រៀបចំ​កិច្ច​ប្រជុំ​មួយ​ជាមួយ​មន្ត្រី​ជាន់​ខ្ពស់​ដើម្បី​ដាក់​ចេញ​នូវ​ផែន​ការ​រក្សា​សន្តិសុខ​នៅ​ក្នុង​រាជ​ធានី​សម្រាប់​ពិធី​បុណ្យ​អុំទូក​រយៈ​ពេល​បីថ្ងៃ​ ដែល​នឹង​ចាប់​ផ្ដើម​នៅ​ថ្ងៃ​ពុធ​។

​ពេល​ថ្លែង​ទៅ​កាន់​សមាជិក​នៃ​នគរ​បាល​រាជ​ធានី នគរ​បាល​ព្រហ្មទណ្ឌ នគរ​បាល​ចរាចរ និង​នាយកដ្ឋាន​ពន្លត់​អគ្គិភ័យ ឧត្ដមសេនីយ៍ឯក ជួន សុវណ្ណ បាន​លើកឡើង​​​ថា ​ទីបំផុត​រាជ​ធានី​ភ្នំពេញ​​ត្រូវ​បាន​រៀបចំ​ដើម្បី​​​ប្រារព្ធ​ឡើង​វិញនូវពិធី​បុណ្យ​អុំទូក​​​ ដែល​គេ​បាន​លុប​ចោល​អស់​រយៈ​ពេល​៣​ឆ្នាំ​កន្លង​មក​ហើយ បន្ទាប់ពី​ការ​ផ្អើល​រត់ជាន់​គ្នា​ដ៏​រន្ធត់មួយ​នៅ​លើ​ស្ពាន​កោះ​ពេជ្រ ដោយ​បណ្ដាល​ឲ្យ​មនុស្ស​ជាង​៣៥០​នាក់​បាត់​បង់ជីវិត​កាលពី​ឆ្នាំ​២០១០។

ឧត្ដមសេនីយ៍ឯក ជួន សុវណ្ណ បាន​មាន​ប្រសាសន៍​ថា “ឆ្នាំ​នេះ យើង​អាច​ចាប់​ផ្ដើម​ពិធី​បុណ្យ​អុំទូក​ឡើង​វិញ​ហើយ។ ភាព​តាន​​តឹង​ផ្នែក​នយោបាយ​បាន​ធូរស្រាល​​ ហើយ​ពលរដ្ឋ​កំពុង​រស់​នៅ​ក្នុង​ភាព​ចម្រុង​ចម្រើន។ សន្តិសុខ​នៅ​ក្នុង​រាជ​ធានី​គឺ​ប្រសើរ​ជាង​មុន​ ហេតុ​ដូច្នេះ​ យើង​ជឿ​ជាក់​ថា នឹង​មាន​មនុស្ស​ជា​ច្រើន​មក​ចូល​រួម​នៅ​ក្នុង​ពិធី​បុណ្យ​នេះ”។ លោក​បាន​បន្ថែម​ថា កង​កម្លាំង​ប្រមាណ​៥.០០០​នាក់ នឹង​ការ​ពារ​សន្តិសុខ​នៅ​ក្នុង​រាជ​ធានី​អំឡុង​ពិធី​បុណ្យ​នេះ​។

​ឧត្ដម​សេនីយ៍ឯក ជួន សុវណ្ណ បាន​លើក​ឡើង​ទៀត​ថា ការ​ចាត់វិធាន​ការ​ដើម្បី​ចៀសវាង​កុំ​ឲ្យ​មាន​​ការ​ផ្អើល​រត់ជាន់គ្នា​ដូច​កាលពី​ឆ្នាំ​២០១០​កើត​ឡើង​ម្ដង​ទៀត​​នឹង​ជា​វិធាន​ការដ៏​សំខាន់​ដើម្បី​រក្សា​សន្តិសុខ​នៅ​ក្នុង​រាជ​ធានី​។

លោក​បាន​លើក​ឡើង​បន្ថែម​ថា នគរ​បាល​ និង​អាជ្ញាធរ​ផ្សេងៗ​ទៀត​នឹង​ផ្ដោត​លើ​ការ​ការ​ពារ​កុំ​ឲ្យ​មាន​ចោរ​លូក​ហោប៉ៅ កុំ​ឲ្យ​មាន​ការ​កក​ស្ទះចរាចរណ៍ និង​រក្សា​សណ្ដាប់ធ្នាប់​នៅ​ទីតាំង​កម្សាន្ត​ដែល​មាន​មនុស្ស​ច្រើន​ ព្រមទាំង​​ការ​គំរាម​កំហែង​​ពី​ការ​ធ្វើ​បាតុកម្ម​ផង​ដែរ​។

លោក​បាន​មាន​ប្រសាសន៍​បន្ត​ថា “វា​អាច​នឹង​មាន​ជន​​ឆ្លៀត​ឱកាស​នេះ​​បង្ក​ភាព​ចលាចល​ផ្នែក​នយោបាយ​ ដោយ​ធ្វើ​ការ​តវ៉ា​ឬធ្វើ​កូដកម្ម​ ហើយ​ថា វា​អាច​មាន​ផល​ប៉ះពាល់​ដល់​សណ្ដាប់ធ្នាប់​សាធារណៈ និង​សន្តិសុខ​ជាតិ”។

កាលពី​ថ្ងៃ​ម្សិលមិញ​ដែរ​នោះ លោក សៅ សុខា មេបញ្ជាការ​កង​រាជ​អាវុធ​ហត្ថ​លើ​ផ្ទៃ​ប្រទេស​​បានជួប​ជាមួយ​លោក នេត សាវឿន អគ្គស្នង​ការ​នគរ​បាលជាតិ និង​លោក ប៉ា សុជាតិវង្ស អភិបាល​រាជធានី​ភ្នំពេញ ដើម្បី​សម្រេច​ជា​ចុង​ក្រោយ​លើ​ផែន​ការ​រក្សា​សន្តិសុខ​សម្រាប់​ពិធី​បុណ្យ​នេះ​។

បន្ទាប់ពី​ការ​ជួប​ប្រជុំ​នោះ ឧត្ដមសេនីយ៍​ត្រី ខេង ទីតូ អ្នក​នាំពាក្យ​កង​រាជ​អាវុធ​ហត្ថ​បាន​ឲ្យ​ដឹង​ថា ​មន្ត្រី​របស់​លោក​ប្រមាណ​៣.០០០​នាក់​ នឹង​ល្បាត​ក្នុងរាជ​ធានី​ភ្នំពេញ​ក្នុង​រយៈ​ពេល​បីថ្ងៃ​នៃ​ពិធី​បុណ្យ​នេះ​។

ឧត្ដមសេនីយ៍​ត្រី ខេង ទីតូ ​បាន​មាន​ប្រសាសន៍​ថា “យើង​បាន​ត្រៀម​កង​កម្លាំង​របស់​យើង​រួច​ហើយ​​ ដោយ​រួម​មាន​ទាំង​កង​កម្លាំង​​ដោះ​ស្រាយ​ហេតុការណ៍​បន្ទាន់​របស់​យើង​ផង​ដែរ ដើម្បី​ឆ្លើយ​តប​នៅ​ពេល​មាន​​ឧបទ្ទវហេតុ​ណាមួយ​។ វា​នឹង​មិន​មាន​ឧបទ្ទវហេតុ​ដូច​នៅ​កោះពេជ្រ​ម្ដង​ទៀត​ឡើយ​។ នោះ​គឺ​ជា​មេរៀន​​​​​សម្រាប់​អាជ្ញាធរ​” ៕ ស៊ុយឈាង​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស