33 C
Phnom Penh

កម្មករ​សំណង់​ចំនួន​ប្រាំមួយ​នាក់​ និង​អ្នក​គ្រប់​គ្រង​ម្នាក់​ត្រូវ​ឃុំខ្លួន​​ជុំវិញ​ការ​ស្លាប់​​ស្ត្រីម្នាក់​

ដោយ ឌឹ ខេមបូឌា ដេលី

បទវិភាគ

​នគរ​បាល​បាន​ឲ្យ​ដឹង​ថា កម្មករ​សំណង់​ចំនួន​ប្រាំមួយ​នាក់ និង​អ្នក​គ្រប់​គ្រង​ក្រុម​ហ៊ុន​ម្នាក់​​ត្រូវ​នគរ​បាល​ឃាត់​ខ្លួន​យក​មក​សាកសួរ បន្ទាប់ពី​ស្ត្រី​ម្នាក់​បាន​ស្លាប់​ក្នុង​រាជ​ធានី​ភ្នំពេញ​កាលពី​ថ្ងៃ​អាទិត្យ​ ដោយ​កំណាត់​ដែក​ដែល​ធ្លាក់​ពី​​ជាន់​ទី១២​នៃ​ការដ្ឋាន​សាង​សង់​មួយ​ ខណៈ​ជន​រងគ្រោះរូប​នេះ​ជិះម៉ូតូ​ឆ្លង​កាត់​។

អ្នកស្រី ប៊ុត វណ្ណី អាយុ​៤២​ឆ្នាំ កំពុង​ជិះម៉ូតូ​ជាមួយ​កូនប្រុស​​ និង​គូដណ្ដឹង​​របស់​កូនប្រុស​អ្នកស្រី​​​ត្រឡប់​ពី​ទិញ​របស់​របរ​សម្រាប់​ពិធី​​មង្គលការ​របស់​កូនប្រុស​គាត់​ នៅ​​ពេល​នោះ​គាត់​​ត្រូវ​​កំណាត់​ដែក​ប្រវែង​២ម៉ែត្រ​ធ្លាក់​មក​ចំក្បាល។ ​កំណាត់​ដែក​នេះ​ធ្លាក់​ពី​​អគារ​ខុនដូ​មួយ​ ដែលជា​ផ្នែក​នៃ​គម្រោង​អភិវឌ្ឍន៍​ក្រុង​អូឡាំព្យា​ ជា​គម្រោង​អភិវឌ្ឍមួយ​ ដែល​កំពុង​សាង​សង់​ដោយ​​ក្រុម​ហ៊ុន​វិនិយោគទុន​អាណិកជន​កម្ពុជា​ (OCIC) ក្បែរ​ពហុកីឡាដ្ឋាន​​អូឡាំពិក​។

កាលពី​ម្សិលមិញ ឧត្ដមសេនីយ៍ត្រី ជួន ណារិន ​ស្នង​ការ​រង​នគរ​បាល​រាជ​ធានី​ភ្នំពេញ​បាន​ឲ្យ​ដឹង​ថា កម្មករ​ចំនួន​ប្រាំមួយ​នាក់ និង​អ្នក​គ្រប់​គ្រង​ម្នាក់​ដែល​ទទួល​បន្ទុក​​ការ​សាង​សង់​អគារ​នេះ​ត្រូវ​បាន​ចាប់​ខ្លួន​នៅ​ចន្លោះ​ល្ងាច​ថ្ងៃ​អាទិត្យ និង​ព្រឹក​ថ្ងៃ​ច័ន្ទ ហើយ​កំពុង​​ត្រូវ​បាន​ឃុំ​ខ្លួន​ដើម្បី​សាកសួរ​​នៅ​អធិការដ្ឋាន​នគរ​បាល​​ខណ្ឌ​៧មករា។

លោក​បាន​មាន​ប្រសាសន៍​ថា “យើង​បាន​ឃាត់​ខ្លួន​មនុស្ស​ទាំង​អស់​ចំនួន​ប្រាំពីរ​នាក់ ​មាន​ដូច​ជា កម្មករ​សំណង់ និង​អ្នក​គ្រប់​គ្រង​ ព្រោះ​​យើង​ត្រូវ​តែ​រក​ឲ្យឃើញ​ពីមូលហេតុ​​ថា តើ​ហេតុ​អ្វី​បាន​ជា​កំណាត់​ដែក​នេះ​ធ្លាក់​ពី​លើ​អគារ​”។ លោក​បាន​បន្ថែម​ថា ​អ្នក​ស៊ើបអង្កេត​បាន​ទៅ​​តំបន់​អភិវឌ្ឍន៍​ក្រុង​អូឡាំព្យា​នេះកាលពី​ម្សិលមិញ ដើម្បី​ត្រួត​ពិនិត្យ​តំបន់​នេះ​។

ឧត្ដមសេនីយ៍ឯក ជួន សុវណ្ណ ស្នង​ការ​នគរ​បាល​រាជ​ធានី​ភ្នំពេញ​​បាន​ឲ្យ​ដឹង​ថា លោក​មិន​អាច​ប្រាប់​ពី​អត្តសញ្ញាណ​ជនដែល​ត្រូវ​បាន​ឃាត់​ខ្លួន​យក​មក​សាកសួរ​នោះ​ទេ ព្រោះ​ថា នគរ​បាល​​នៅ​មិន​ទាន់​កំណត់​​មូលហេតុ​នៃ​គ្រោះ​ថ្នាក់​នេះ និងថា​តើ​​នរណា​ជា​អ្នក​ជា​អ្នកទទួល​ខុស​ត្រូវ​នៅ​ឡើយ​​ទេ​។

លោក​បាន​មាន​ប្រសាសន៍​ថា “យើង​មិន​អាច​​​ប្រាប់​ពី​អត្តសញ្ញាណ​​នរណា​ម្នាក់​ ព្រោះ​យើង​មិនទាន់​ដឹង​ថា តើ​នរណា​ដែល​យើង​ត្រូវ​ទទួល​ខុស​ត្រូវ​​នៅ​ឡើយ​ទេ ប៉ុន្តែ​យើង​កំពុង​តែ​ប្រមូលភ័ស្តុ​តាង​ក្នុង​ករណី​នេះ​ហើយ ហើយ​បន្ទាប់ពី​សាកសួរ​ពួកគេ​យើង​នឹង​ដឹង”។

នៅ​ពេល​និយាយ​តាម​ទូរស័ព្ទ​ខណៈ​កំពុង​ត្រូវ​បាន​ឃុំ​ខ្លួន​នៅ​អធិការដ្ឋាន​នគរ​បាល​ខណ្ឌ​​​​​ លោក កែវ ចាន់ អ្នក​គ្រប់​គ្រង​អគារ​នេះ​បាន​លើក​ឡើង​ថា មេធាវី​តំណាង​ក្រុម​ហ៊ុន ​OCIC​ បាន​​ទៅ​អធិការដ្ឋាន​នគរ​បាល​ខណ្ឌ​​ដើម្បីពិភាក្សា​​ពាក់​ព័ន្ធ​នឹង​ការ​ផ្ដល់​សំណង​ជំងឺ​ចិត្ត​ដល់​គ្រួសារ​របស់​អ្នកស្រី វណ្ណី ហើយ។

លោក ចាន់ ​ដែល​ធ្វើ​ការ​ឲ្យ​​ក្រុម​ហ៊ុន​ Cana Sino Construction ដែល​មើល​ការ​ខុស​ត្រូវ​លើ​ការ​សាង​សង់​នៅ​តំបន់​អភិវឌ្ឍន៍​ក្រុង​អូឡាំព្យា​នេះ​​បាន​មាន​ប្រសាសន៍​ថា “មេធាវី​របស់​ក្រុម​ហ៊ុន​កាណាឌីយ៉ា​បាន​​ទៅ​ជួប​ជាមួយ​នគរ​បាល​ខណ្ឌ​ហើយ ដើម្បី​ចាប់​ផ្ដើម​ការ​ចរចា​”។

ក្រុម​ហ៊ុន​ OCIC​ គឺ​ជា​ក្រុម​ហ៊ុន​មេ​នៃ​ធនាគារ​កាណាឌីយ៉ា​រហូត​ដល់​ឆ្នាំ​២០០៧​ ហើយ​ក្រុម​ហ៊ុន​ទាំង​ពីរ​នេះ​​មាន​​កូនហ៊ុន​ជា​ច្រើន​។

លោក ទូច សំណាង​ អ្នក​គ្រប់គ្រង​គម្រោង​របស់​ក្រុម​ហ៊ុន​ OCIC ​នេះ​បាន​លើក​ឡើង​ថា លោក​ជាប់​រវល់​ហើយ​មិន​អា​ចធ្វើ​អត្ថាធិប្បាយ​បាន​ទេ​។

លោក ម៉ៅ វាសនា កូនប្រុស​របស់​អ្នកស្រី វណ្ណី ​បាន​ឲ្យ​ដឹង​កាលពីម្សិលមិញ​ថា គ្រួសារ​របស់​គាត់​ត្រូវ​តែ​ឲ្យ​ក្រុម​ហ៊ុន​ OCIC​ ​ជា​អ្នក​ទទួល​ខុស​ត្រូវ​ចំពោះការ​ស្លាប់​របស់​ម្ដាយ​គាត់​ ប៉ុន្តែ​ថា តំណាង​ក្រុម​ហ៊ុន​នៅ​មិន​​ទាន់​ទាក់​ទង​មក​គាត់​នៅ​ឡើយ​ទេ​។

លោក ម៉ៅ វាសនា អាយុ​២៧​ឆ្នាំ ដែល​​ជា​អ្នក​ឌុប​ម្ដាយ​របស់​ខ្លួន​នៅពេល​គ្រោះ​ថ្នាក់​​កើត​ឡើង​បាន​និយាយ​ថា “គ្មាន​នរណា​ម្នាក់​មកពី​ក្រុម​ហ៊ុន​នេះ​បាន​មក​ជួប​ខ្ញុំឡើយ។ ប៉ុន្តែ​ខ្ញុំ​ត្រូវ​តែ​ឲ្យ​ពួកគេ​ទទួល​ខុស​ត្រូវ​ចំពោះ​អាយុ​ជីវិត​ម្ដាយ​ខ្ញុំ ហើយ​នៅ​ពេល​យើង​ជួប​គ្នា​ខ្ញុំ​នឹង​​ទារ​សំណង​ជំងឺ​ចិត្ត​១០០.០០០​ដុល្លារ​”។

លោក គៀត ច័ន្ទថារិទ្ធ អ្នក​នាំពាក្យ​នគរ​បាល​ជាតិ​បាន​​ឲ្យ​ដឹង​កាលពី​ម្សិលមិញ​ថា ក្រុម​ហ៊ុន​ OCIC ​នឹង​មិន​ត្រូវ​អនុញ្ញាត​ឲ្យ​ដោះ​ស្រាយ​​ករណី​​នេះ​នៅ​​ក្រៅ​ប្រព័ន្ធ​តុលាការ​ឡើយ ព្រោះ​ថា ការ​ធ្វើ​ដូច្នោះ​​វា​ជា​​គំរូ​​អាក្រក់​នៃ​ការ​​រំលោភ​បទដ្ឋាន​សុវត្ថិភាព​។

លោក​បាន​មាន​ប្រសាសន៍​ថា “ក្រុម​ហ៊ុន​សំណង់​ និង​កម្មករ​របស់​ខ្លួន​គួរ​តែ​ទទួល​ខុស​ត្រូវ​ចំពោះ​គ្រោះ​ថ្នាក់​នេះ ហើយ​បើ​យោង​តាម​ថ្នាក់​លើ​របស់​ខ្ញុំ​ពួកគេ​នឹង​មិន​ត្រូវ​បាន​អនុញ្ញាត​ឲ្យ​ចរចា​ឡើយ​ ហេតុដូច្នេះ​ករណី​នេះ​នឹង​ត្រូវ​បញ្ជូន​ទៅ​តុលាការ​។ គ្រោះ​ថ្នាក់​នេះ​​បាន​កើត​ឡើង​ដោយ​សារ​សំណង់​លយ​ចេញ​មក​ផ្លូវ​សាធារណៈ​ ហេតុដូច្នេះ​នេះ​គឺ​ជា​មេរៀន​មួយ​សម្រាប់​ក្រុម​ហ៊ុន​អភិវឌ្ឍន៍​ផ្សេងៗ​ទៀត​”។

ប្រទេស​កម្ពុជា​កំពុង​ស្ថិត​ក្នុង​ដំណាក់​កាល​មួយ​ដែល​ការ​សាង​សង់​កំពង់​កើន​ឡើង​ខ្លាំង​ ប៉ុន្តែ​​ច្បាប់​នៃ​ការ​សាង​សង់​នៅតែ​​មិន​ទាន់​ឈាន​ដល់​បទដ្ឋាន​ពិភព​លោក​នៅ​ឡើយ​ទេ។

គេ​មិន​អាច​ទាក់​ទង​នរណា​​ម្នាក់​នៅ​ក្រសួង​រៀបចំ​ដែន​ដី នគរូបនីយកម្ម និង​សំណង់​បាន​ឡើយ​កាលពី​ម្សិលមិញ ប៉ុន្តែ​នៅ​ក្នុង​សន្និសីទ​មួយ​កាលពី​ខែ​តុលា លោក ភឿង សុភៀន រដ្ឋលេខាធិការ​នៅ​ក្រសួង​នេះ​បាន​លើក​ឡើង​ថា ច្បាប់​ដែល​នឹង​កំណត់​ឲ្យ​ក្រុម​ហ៊ុន​សំណង់​​​ទទួល​ខុស​ត្រូវ​ចំពោះ​ហេតុការណ៍​ដែល​​កើត​ឡើង​ដោយ​សារ​ការ​សាង​សង់​នឹង​ត្រូវ​​​ធ្វើ​សេចក្ដី​ព្រាង​​នៅ​ត្រឹម​ដំណាច់​ឆ្នាំ​ក្រោយ​៕ ស៊ុយឈាង​ (រាយការណ៍​បន្ថែម​ដោយ Simon Henderson)​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស