33 C
Phnom Penh

គណបក្ស​ប្រជាជន​កម្ពុជា​រអាក់​រអួល​ក្នុង​ការ​បោះ​ឆ្នោត​ក្នុង​សភា

ដោយ ឌឹ ខេមបូឌា ដេលី

បទវិភាគ

កាលពី​ថ្ងៃ​ច័ន្ទ អតីត​រដ្ឋលេខាធិការ​ក្រសួង​យុត្តិធម៌​សឹងតែ​មិន​ទទួល​បាន​អាសនៈ​នៅក្នុង​ឧត្តម​ក្រុមប្រឹក្សា​នៃ​អង្គ​ចៅក្រម បន្ទាប់ពី​គណបក្ស​ប្រជាជន​កម្ពុជា​កំពុង​កាន់​អំណាច​មិន​មាន​វត្តមាន​នៃ​សមាជិក​សភា​ភាគច្រើន​នៅ​សភា​ជាតិ។assembly

ចៅក្រម​ចូល​និវត្តន៍ អិុត រ៉ាឌី ជា​បេក្ខជន​ម្នាក់​ក្នុង​ចំណោម​៥​នាក់​ត្រូវ​ឈរ​ឈ្មោះ​សម្រាប់​តំណែង​ទំនេរ​នៅ​ក្រុម​ប្រឹក្សា​នេះ ដែល​មាន​ភារកិច្ច​រក្សា​ឯករាជ្យ​ភាព​របស់​តុលាការ​ប្រទេស​កម្ពុជា និង​ធានាឲ្យ​មាន​ការ​ប្រព្រឹត្ត​ទៅ​ដោយ​ត្រឹមត្រូវ​របស់​តុលាការ​នេះ។ ចៅក្រម រ៉ាឌី ជា​បេក្ខជន​ដែល​ពេញ​ចិត្ត​របស់​គណបក្ស​ប្រជាជន។

ក្នុងការ​បោះ​ឆ្នោត​នៅ​ឆ្នាំ​មុន គណបក្ស​ប្រជាជន​កម្ពុជា​ទទួល​បាន​៦៨​អាសនៈ ហើយ​គណបក្ស​សង្គ្រោះ​ជាតិ​ទទួល​បាន​៥៥​អាសនៈ។ ទោះជា​យ៉ាង​នេះ​ក្តី នៅ​ពេល​បោះ​ឆ្នោត​កាលពី​ថ្ងៃ​ច័ន្ទ លោក រ៉ាឌី ទទួល​បាន​តែ៦០​សំឡេង​ប៉ុណ្ណោះ​ក្នុង​សភា​ដែល​មាន​១២៣​អាសនៈ ដោយ​មួយ​សំឡេង​”បដិសេធ” ៤៤​សំឡេង​មិន​បាន​ការ ហើយ​សមាជិក​សភា​១៨​រូប​អវត្តមាន។

សន្លឹក​ឆ្នោត​មិន​បាន​ការ​ចំនួន​៤១​ជា​សន្លឹក​ឆ្នោតគ្មាន​គូស​អ្វី​សោះ​របស់​សមាជិក​គណបក្ស​សង្គ្រោះ​ជាតិ ដែល​បាន​តវ៉ា​ដំណើរការ​ជ្រើសរើស​បេក្ខជន​ទាំង​៥រូប ក្នុង​ដំណើរការ​នោះ​ពួកគេ​មិន​មាន​ការ​ចូលរួម​ទេ។

លោក ហេង សំរិន ប្រធាន​សភា​ជាតិ​បាន​មាន​ប្រសាសន៍​ថា “យោងតាម​លទ្ធផល​បោះ​ឆ្នោត​ដែល​ទទួល​បាន​នៅ​ពេល​នេះ ខ្ញុំ​សូម​ប្រកាស​ថា អស់​លោក គឺ​បេក្ខជន​ទាំង​៥​រូប​មិនជាប់​ឆ្នោត​ទេ”។

មួយ​ម៉ោង​ក្រោយ​មក សមាជិក​សភា​បាន​ត្រឡប់​មក​សភា​វិញ​រួម​ទាំង​សមាជិក​សភា​គណបក្ស​ប្រជាជន​កម្ពុជា​៣​នាក់​ដែល​មុន​នេះ​បាន​អវត្តមាន ប៉ុន្តែ​គ្មាន​វត្តមាន​សមាជិក​សភា​ម្នាក់​ខាង​គណបក្ស​សង្គ្រោះ​ជាតិ​ដែល​បាន​ចាកចេញ​ពី​សភា។

នៅ​ទី​បញ្ចប់ ក្នុង​ការ​បោះ​ឆ្នោត​ជុំ​ទី២ លោក រ៉ាឌី បាន​ជាប់​ឆ្នោត​នៅ​ឧត្តម​ក្រុមប្រឹក្សា​នៃ​អង្គ​ចៅក្រម ដោយ​ទទួល​បាន​៦៦​សំឡេង​គាំទ្រ មួយ​សំឡេង​ប្រឆាំង និង​៤០​សំឡេង​មិន​បាន​ការ។

លោកស្រី​​​ មូរ សុខហួរ ប្រធាន​កិច្ច​ការ​សាធារណៈ​របស់​គណបក្ស​សង្គ្រោះ​ជាតិ​បាន​មាន​ប្រសាសន៍​ថា សមាជិក​សភា​៤១​រូប​ក្នុង​ចំណោម​៥៥​រូប​របស់​គណបក្ស​ដំបូង​ឡើយ​មាន​វត្តមាន​ក្នុង​សភា។ លោក ស៊ុន ឆ័យ ប្រធាន​ក្រុម​អ្នកតំណាង​គណ​បក្ស​សង្គ្រោះ​ជាតិ​​​បាន​មាន​ប្រសាសន៍​ថា លោក​បាន​ចាកចេញ​នៅ​កណ្តាល​ទី​ពីព្រោះ​លោក​ជាប់​រវល់​នឹង​កិច្ចការ​ផ្សេង​ទៀត។

លោក សម រង្ស៊ី ប្រធាន​គណបក្ស​សង្គ្រោះ​ជាតិ​បាន​មាន​ប្រសាសន៍​ថា គណៈប្រតិភូ​បក្ស​ប្រឆាំង​បាន​​បោះ​ឆ្នោត​ដោយ​ឥត​គូស​ក្នុង​ការ​បោះ​ឆ្នោត​ទាំង​២​លើក។ លោក​បាន​មាន​ប្រសាសន៍​ថា “យើង​មិន​បាន​ចូលរួម​ក្នុង​ការ​បង្ហាញ​វត្តមាន​ណា​មួយ​ទេ ពីព្រោះ យើង​ស្ថិត​នៅ​ក្រៅ​ដំណើរ​ការ​តាំងពី​ចាប់​ផ្តើម​មក​ម៉្លេះ”។

លោក សម រង្ស៊ី បាន​ជួប​ជាមួយ​លោក​នាយក​រដ្ឋ​មន្ត្រី ហ៊ុន សែន បន្ទាប់ពី​ការ​ប្រជុំ​សភា ហើយ​បាន​មាន​ប្រសាសន៍​ថា ពួកគាត់​បាន​ពិភាក្សា​គ្នា​អំពី​ការ​ប្តូរ​វិធាន​ផ្ទៃ​ក្នុង​របស់​សភា ព្រម​ទាំង​គណៈកម្មការ​បោះ​ឆ្នោត​ថ្មី​ផង​ដែរ ដែល​កិច្ចការ​ទាំង​២​នេះ​ត្រូវ​បាន​សន្យា​ជា​ផ្នែក​មួយ​នៃ​កិច្ច​ព្រមព្រៀង​ខែ​កក្កដា ដែល​នាំ​ឲ្យ​គណបក្ស​សង្គ្រោះ​ជាតិ​បញ្ចប់​ការ​ធ្វើ​ពហិការ​​មិន​ចូល​សភា​របស់​ខ្លួន​រយៈ​ពេល​១០​ខែ។

ក្រោយពី​ការ​ចរចា​ជាច្រើន​ខែ​​ឈាន​ដល់​កិច្ច​ព្រមព្រៀង គណបក្ស​ទាំង២​នៅតែ​ខ្វែង​គំនិត​គ្នា​ទាក់ទិន​នឹង​គុណវុឌ្ឍិ​ចាំបាច់​សម្រាប់​អគ្គលេខា​ធិការ​នៃ​គណៈកម្មការ​រៀបចំ​ការ​បោះ​ឆ្នោត។

លោក សម រង្ស៊ី មាន​ប្រសាសន៍​ថា “ចាប់តាំង​ពី​ក្រុម​ការងារ​របស់​បក្ស​ទាំង​២​បាន​ព្យាយាម​ធ្វើ​កិច្ចការ​នេះ ហើយ​នៅ​មាន​ការ​ខ្វែង​គំនិត​គ្នា​ដោយ​អន្លើ លោក ហ៊ុន សែន និង​ខ្ញុំ បាន​ព្យាយាម​បញ្ចប់​ការ​ខ្វែង​គំនិត​គ្នា​នេះ”៕មានិត
(រាយការណ៍​បន្ថែម​ដោយ AlexWillemyns)

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស