អ្នក​​​រុញ​​​ទេះ​​​លក់​​​គុយទាវ​​​ពីរ​​​នាក់​​​រង​​​របួស​​​​​​បន្ទាប់​​​ពី​​​ត្រូវ​​​រថយន្ត​​​បុក ហើយ​​​រត់​​​​​​

នគរបាល​​​បាន​​​និយាយ​​​កាល​​​ពី​​​ម្សិល​​​មិញ​​​ថា ជន​​​ជាតិ​​​វៀត​​​ណាម​​​ពីរ​​​នាក់​​​បាន​​​រង​​​របួស​​​ធ្ងន់​​​កាល​​​ពី​​​យប់​​​ថ្ងៃ​​​ច័ន្ទ​​​ បន្ទាប់ពី​​​អ្នក​​​បើក​​​បរ​​​ស្រវឹង​​​ស្រា​​​ម្នាក់​​​បាន​​​បើក​​​រថ​​​យន្ត​​​បុក​​​រទេះ​​​លក់​​​គុយ​​​ទាវ​​​តាម​​​ចិញ្ចើម​​​ផ្លូវ​​​ស្ថិត​​​នៅ​​​មហាវិថី​​​ព្រះ​​​មុនីវង្ស​​​​​​ ក្នុង​​​រាជ​​​ធានី​​​ភ្នំពេញ​​​ ហើយ​​​បាន​​​​​​រត់​​​គេច​​​ពី​​​កន្លែង​​​កើត​​​ហេតុ​​​​​​ មុន​​​ពេល​​​ទៅ​​​បុក​​​បង្គោល​​​ភ្លើង​​​ចម្ងាយ​​​មួយ​​​គីឡូម៉ែត្រ។

យោង​​​តាម​​​លោក សែម គន្ធា នាយ​​​រង​​​នគរបាល​​​ចរាចរ​​​រាជ​​​ធានី​​​បាន​​​ឲ្យ​​​ដឹង​​​ថា រថយន្ត Range Rover ដែល​​​គ្មាន​​​ស្លាក​​​លេខ បើក​​​បរ​​​ដោយ​​​បុរស​​​ម្នាក់​​​ និង​​​ស្ត្រី​​​រួម​​​ដំណើ​​​រ​​​បួន​​​នាក់​​​ទៀត​​​​​​ បាន​​​បើក​​​យ៉ាង​​​លឿន​​​កាត់តាម​​​​​​ខណ្ឌ​​​ដូន​​​ពេញ​​​នៅ​​​ម៉ោង​​​ប្រហែល​​​១១​​​យប់ ស្រាប់តែ​​​បាន​​​រេ​​​ចង្កូត​​​ទៅ​​​បុក​​​មនុស្ស​​​ពីរ​​​នាក់ និង​​​រទេះ​​​រុញ​​​របស់​​​ពួកគេ​​​។

លោក​​​បាន​​​បន្ថែម​​​ថា សាច់​​​ញាត​​ិ​​​​​​បាន​​​ប្រញាប់ប្រញាល់​​​បញ្ជូន​​​ម្ចាស់​​​រទេះ​​​ ឈ្មោះ ឡេ ដុង  ធួង អាយុ​​​៤១ឆ្នាំ និង​​​​​​ ធី ហួង អាយុ​​​២៨ឆ្នាំ​​​ទៅ​​​មន្ទីរពេទ្យ​​​កាល់​​​ម៉ែត​​​ដោយ​​​សារ​​​រង​​​របួស​​​ធ្ងន់។

លោក នឹម ផល្លា ត្រូវ​​​ជា​​​ប្តី​​​របស់​​​ ធី ហួង បាន​​​និយាយ​​​ថា គាត់​​​បាន​​​ជិះ​​​ម៉ូតូ​​​ដេញ​​​តាម​​​រថ​​​យន្ត​​​ទំនើប​​​នេះ​​​បន្ទាប់ពី​​​បង្ក​​​គ្រោះ​​​ថ្នាក់​​​ ហើយ​​​បាន​​​ឃើញ​​​អ្នក​​​បើ​​ក​​​បរ​​រថ​​​យន្ត​​​បើក​​​​​បុក​​​ម្តង​​​ទៀត  ហើយ​​​បាន​​​រត់​​​គេច​​​ខ្លួន​​​ដោយ​​​ថ្មើរ​​​ជើង​​​ជាមួយ​​​ស្ត្រី​​​ពីរ​​​នាក់​​​  ចំណែក​​​ស្ត្រី​​​ពីរ​​​នាក់​​​ទៀត​​​​​​មិន​​​បាន​​​រត់​​​ទៅ​​​ណា​​​ទេ​​​ ហើយ​​​នគរបាល​​​បាន​​​ឃាត់​​​ខ្លួន​​​ដើម្បី​​​សាកសួរ​​​រយៈពេល​​​ខ្លី​​​នៅកន្លែង​​​កើត​​​ហេតុ​​។

លោក ផល្លា បាន​​​និយាយ​​​ថា “ខ្ញុំ​​​បាន​​​សួរ​​​នគរបាល​​​ថា ហេតុ​​​អ្វី​​​បាន​​​ជា​​​ដោះលែង​​​ស្ត្រី​​​ពីរ​​​នាក់​​​នេះ ហើយ​​​ពួកគេ​​​បាន​​​ប្រាប់​​​ខ្ញុំថា ពួកគាត់មិន​​​ជាប់​​​ពាក់​​​ព័ន្ធនឹង​​​ករណី​​​នេះ​​​ទេ ពីព្រោះ​​​ពួក​​​គាត់​​​ទើប​​​តែ​​​បាន​​​ជួប​​​អ្នក​​​បើក​​​បរ​​​រថយន្ត​​​នេះ​​​នៅ​​​ Sky Club ដែល​​​ពួកគាត់​​​បាន​​​ទៅ​​​ផឹក​​​ស្រា​​​បៀរ​​​នៅ​​​ទីនោះ​​​តែ​​​ប៉ុណ្ណោះ”។ លោក គន្ធា បាន​​​បដិសេធ​​​ថា ស្ត្រី​​​ទាំង​​​ពីរ​​​នាក់​​​នេះ​​​មិនត្រូវ​​​បាន​​​សាក​​​សួរ​​​នៅ​​​កន្លែង​​​កើត​​​ហេតុទេ។

លោក ផល្លា បាន​​​និយាយ​​​ថា កាល​​​ពី​​​ម្សិលមិញ នគរបាល​​​បាន​​​ហៅ​​​គាត់​​​ជួប​​​នៅ​​​ទីស្នាក់ការ​​​នគរបាល​​​ចរាចរ​​​រាជ​​​ធានី ហើយ​​​ពិភាក្សា​​​ពី​​​សំណង​​​ជាមួយ​​​តំណាង​​​អ្នក​​​បើក​​​បរ​​​ ប៉ុន្តែ​​​លោក​​​បាន​​​បន្ថែម​​​ថា ​​​សាច់​​​ញាតិ​​​ផ្សេងទៀត​​​​​បាន​​​ទៅ​​​ជំនួស​​​ជន​​​រងគ្រោះ​​​។

លោក ថោង សុភិន នាយ​​​រង​​​ការិយាល័យ​​​ទទួលបន្ទុក​​​គ្រោះ​​​ថ្នាក់​​​ចរាចរណ៍​​​រាជ​​​ធានី​​​បាន​​​បញ្ជាក់​​​ថា មាន​​​ជំនួប​​​រវាង​​​តំណាង​​​​​​អ្នក​​​បើក​​​បរ​​​ និង​​​តំណាង​​​ជន​​​រងគ្រោះ ប៉ុន្តែ​​​លោក​​​មិន​​ស្គាល់​​​អត្ត​​​សញ្ញាណ​​​អ្នក​​​បើក​​​បរ​​​ឡើយ។

លោក សុភិន បាន​​​មាន​​​ប្រសាសន៍​​​ថា “​​​ខ្ញុំ​​​មិន​​​ស្គាល់​​​ម្ចាស់​​​រថ​​​យន្ត​​​ទេ ប៉ុន្តែ​​​តំណាង​​​ម្នាក់​​​​​​ត្រូវ​​​បាន​​​បញ្ជូន​​​ទៅ​​ជួប​​​ជាមួយ​​​ក្រុម​​​គ្រួសារ​​​ជន​​​រងគ្រោះ​​​នៅ​​​ការិយាល័យ​​​របស់​​​ខ្ញុំ ដើម្បី​​​ពិភាក្សា​​​ពី​​​បញ្ហា​​​សំណង​​​”។

លោក​​​បាន​​​បន្ថែម​​​ថា “ខ្ញុំ​​​មិន​​​ប្រាកដ​​​ថា តើ​​​អ្នក​​​បើក​​​បរ​​​នឹង​​​ប្រឈម​​​ការ​​​ចោទ​​​ប្រកាន់​​​ឬ​​​យ៉ាង​​​ណា​​​ឡើយ​​​បន្ទាប់ពី​​​បង់​​​សំណង​​​រួច  ពីព្រោះ​​​នេះ​​ជា​​​សេចក្តី​​​សម្រេច​​​របស់​​​ចៅហ្វាយនាយ​​​ខ្ញុំ”។

លោក អ៊ុំ សុផាណ្ណារិទ្ធ ប្អូន​​​ប្រុស​​​របស់​​​លោក ដុង ធួង​​​ ដែល​​​បាន​​​ចូល​​​រួម​​​ក្នុង​​​ជំនួប​​​កាលពី​​​ម្សិលមិញ បាន​​​និយាយ​​​ថា មិន​​​ទាន់​​​មាន​​​ការ​​​ព្រមព្រៀង​​​គ្នា​​​ទេ។ លោក​​បាន​​​និយាយ​​​ថា “តំណាង​​​រូប​​​នោះ​​​បាន​​​សួរ​​​ថា ខ្ញុំ​​​ចង់បាន​​​សំណង​​​ប៉ុន្មាន។ ខ្ញុំ​​​បាន​​​ប្រាប់​​​គាត់​​​ថា យើង​​​ត្រូវ​​​ការ​​​៣.០០០ដុល្លារ​​​ ប៉ុន្តែ​​​​​​តំណាង​​​រូប​​​នោះ​​​បាន​​​ប្រាប់​​​យើង​​​ថា គាត់​​​ត្រូវ​​​ពិនិត្យ​​​មើល​​​វិក្កយបត្រ​​​មន្ទីរ​​​ពេទ្យ​​​សិន​​​ ហើយ​​​គាត់​​​នឹង​​ឲ្យ​​​ពួក​​​យើង​​​ដឹង​​​នៅ​​​ពេល​​​ក្រោយ”៕សារុន