32.1 C
Phnom Penh

​​​មន្ត្រី​​​នគរ​​​បាល​​​ព្រំដែន​​​ម្នាក់​​​ដែល​​​ជាប់​​​ចោទ​​​ពី​​​បទ​​​ចាប់​​រំលោភ​​​ក្មេង​​​ស្រី​​​​​​ ត្រូវ​​​បាន​​​ដោះ​​​លែង

ដោយ ឌឹ ខេមបូឌា ដេលី

បទវិភាគ

មន្ត្រី​​​តុលាការ​ម្នាក់​បាន​បញ្ជាក់​កាលពី​ម្សិលមិញ​ថា មន្ត្រី​នគរ​បាល​ព្រំដែន​ម្នាក់​ក្នុង​ខេត្ត​ឧត្ដរ​​​មាន​​​ជ័យ ដែល​ត្រូវ​បាន​ចោទ​ប្រកាន់​ពី​បទ​ចាប់​រំលោភ​ក្មេង​​​ស្រី​អាយុ​១៦​ឆ្នាំ​ម្នាក់​ បន្ទាប់​​ពី​ចាក់​​​សោ​​​នាង​ទុក​ក្នុង​បន្ទប់​ឃុំខ្លួន​រយៈ​ពេល​២៤​ម៉ោង​កាលពី​ខែ​កក្កដា​នោះ​ ត្រូវ​បាន​ដោះ​​​លែង​ពី​ពន្ធ​នា​​គារ​កាលពី​សប្ដាហ៍​មុន បន្ទាប់ពី​សាលា​ដំបូង​ខេត្ត​​បាន​សម្រេច​ផ្ដន្ទាទោស​គាត់​ពី​​​បទ​​​​ប្រើ​អំពើ​ហិង្សា​ដោយ​ចេតនា។

ក្រុម​គ្រួសារ​ក្មេង​​​ស្រី​ជំទង់​ដែល​នគរ​​បាល​មូលដ្ឋាន​អះ​​​អាង​ថា ត្រូវ​បាន​ចាប់​រំលោភ​ និង​វាយ​ដំ​យ៉ាង​ធ្ងន់ធ្ងរ​​​អំឡុង​ការ​ចាប់​បង្ខាំង​នាង​ទុក​រយៈ​ពេល​មួយថ្ងៃ​នោះ ​បាន​​​ទទួល​​​ស្គាល់​​​ថា ពួក​គាត់​បាន​ទទួល​ប្រាក់​៥.០០០ដុល្លារ​ពី​មន្ត្រី​នគរ​បាល​រូប​នេះ​ជា​ថ្នូរ​នឹង​ការ​ដក​ពាក្យ​បណ្ដឹង​ ប៉ុន្តែ​មិន​ដែល​គិត​ថា តុលាការ​នឹង​ដោះលែង​រូប​គាត់​ឡើយ​ ដោយ​សារ​តែ​​ភាព​ធ្ងន់ធ្ងរ​នៃ​បទ​​​ល្មើស​​​នេះ​។

លោក ឡេង សារ៉ាន់ អាយុ​៣៦​ឆ្នាំ​ជា​មន្ត្រី​នគរ​បាល​ដែល​បម្រើ​ការ​នៅ​ប៉ុស្តិ៍​ត្រួត​ពិនិត្យ​ភ្នំ​ត្បាល់​នៅ​តាម​ព្រំដែន​ថៃ​ស្ថិត​ក្នុង​ស្រុក​អន្លង់វែង ត្រូវ​បាន​ចាប់​ខ្លួន​កាលពី​ថ្ងៃ​ទី​១៦ ខែ​កក្កដា និង​ត្រូវ​បាន​ចោទ​ប្រកាន់​ពី​បទ​ចាប់​រំលោភ។

លោក ផេង ភួត នាយ​​​ប៉ុស្តិ៍​ឃុំ​​​ត្រពាំង​តាវ បាន​មាន​ប្រសាសន៍​នៅ​ពេល​នោះ​ថា “ជន​សង្ស័យ​រូប​នេះ​បាន​ដាល់​ជន​​​រងគ្រោះ​​​រហូត​នាង​សន្លប់ ហើយ​បន្ទាប់​មក​ជន​​​នេះ​បាន​ចាប់​រំលោភ​នាង​”។

ប៉ុន្តែ​កាលពី​ម្សិលមិញ លោក កូយ កាន់​​​យ៉ា ព្រះរាជ​អាជ្ញា​អម​សាលា​ដំបូង​ខេត្ត​បាន​មាន​ប្រសាសន៍​ថា ​កាលពី​សប្ដាហ៍​មុន​​​តុលាការ​បាន​សម្រេច​ផ្ដន្ទាទោស​លោក​ សារ៉ាន់ ពី​​​បទ​ប្រើ​អំពើ​ហិង្សា​ដោយ​ចេតនា​ជាជាង​ការ​ចាប់​រំលោភ​ ហើយ​​បាន​ព្យួរ​ទោស​រយៈ​ពេល​បី​​​ឆ្នាំ​របស់​​​គាត់​​​មក​​ជា​បទ​ល្មើស​តូចតាច​។ ពីរ​ថ្ងៃ​ក្រោយ​មក​ លោក សារ៉ាន់​ បាន​ដើរ​ហើរ​ដោយ​សេរី​បន្ទាប់ពី​អនុវត្ត​ទោស​ជាប់​ពន្ធ​នា​​​គារ​មិន​ដល់​៤ខែ​ផង​។

លោក​ កាន់យ៉ា បាន​មាន​ប្រសាសន៍​ថា ” យើង​បាន​លើក​លែង​ការ​ចោទ​ប្រកាន់​ពី​​​បទ​ចាប់​រំលោភ ពីព្រោះ​ជនរងគ្រោះ​ស្គាល់​គ្នា​​​ជាមួយ​​​ជនសង្ស័យ ហើយ​បាន​ព្រមព្រៀង​រួមភេទ​ជាមួយ​គាត់​ ហើយ​នាង​មាន​អាយុ​លើស​ពី​១៥​ឆ្នាំ”។

លោក​បាន​បន្ថែម​ថា តុលាការ​បាន​សម្រេច​ផ្ដន្ទាទោស​ពី​បទ​ប្រើ​អំពើ​ហិង្សា​ដោយ​ចេតនា​កាលពី​ថ្ងៃ​ទី​២៩ ខែ​តុលា ផ្អែក​លើ​ស្នាម​​​ជំា​លើ​​​រាង​​​កាយ​​​របស់​ក្មេង​​​ស្រី​រងគ្រោះ​បន្ទាប់ពី​ការ​ប្រព្រឹត្ត​បទ​ល្មើស​។

អ្នកស្រី ជាតិ ណា អាយុ​៥០​ឆ្នាំ​ត្រូវ​ជា​ម្ដាយ​ក្មេង​​​ស្រី​រងគ្រោះ​បាន​និយាយ​កាលពី​ម្សិល​​​មិញ​ថា បើ​ទោះ​ណា​​​ជា​គាត់​ព្រម​ទទួល​យក​ប្រាក់​ពី​ក្រុម​គ្រួសារ​​លោក សារ៉ាន់ ដក​ពាក្យ​បណ្ដឹង​ដែល​គាត់​បាន​ប្ដឹង​នៅ​តុលាការ​ពី​ដំបូង​ក៏ដោយ ក៏​​​គាត់​នៅ​តែ​រំពឹង​ថា តុលាការ​នឹង​នៅ​តែ​ធ្វើ​ការ​ចោទ​ប្រកាន់​​​ដដែល​។ អ្នកស្រី ណា បាន​និយាយ​ថា កាលពី​ខែ​មុន យើង​ទទួល​បាន​ប្រាក់​សំណង​ជំងឺ​ចិត្ត​​​ពី​ក្រុម​គ្រួសារ​ជនសង្ស័យ​ចំនួន​៥.០០០​ដុល្លារ​”។

អ្នកស្រី​បាន​និយាយ​ថា “ខ្ញុំ​មិន​ពេញ​​​ចិត្ត​ជាមួយ​​​សេចក្ដី​សម្រេច​របស់​តុលាការ​ទេ ហើយ​ខ្ញុំ​​បារម្ភ​ពី​សុវត្ថិភាព​ក្រុម​គ្រួសារ​របស់​ខ្ញុំ។ ប៉ុន្តែ​យើង​មិន​អាច​ដាក់​ពាក្យ​បណ្ដឹង​ផ្សេង​ទៀត​ប្ដឹង​​លោក​ សារ៉ាន់ បាន​ទេ​ ពីព្រោះ​ខ្ញុំ​មាន​ជំងឺ​ ហើយ​ក្រីក្រ​ ហើយ​យើង​មិន​អាច​ប្រឈម​មុខ​ជាមួយ​គាត់​បាន​ទេ​ ពីព្រោះ​គាត់​ជា​មន្ត្រី​នគរ​បាល​”។

លោក អំ សំអាត អ្នក​គ្រប់គ្រង​ផ្នែក​បច្ចេកទេស​នៅ​អង្គការ​សិទ្ធិមនុស្ស​លី​​​កា​​​ដូ​បាន​ចោទ​ប្រកាន់​តុលាការ​ថា បាន​រំលោភ​សិទ្ធិ​ជនរងគ្រោះ។ លោក​បាន​បន្ថែម​ថា “នេះ​គឺ​ជា​ការ​រំលោភ​សិទ្ធិ​​​មនុស្ស​​​ធ្ងន់​ធ្ងរ​ និង​ជា​ករណី​និ​​​ទណ្ឌ​​​ភាព ពីព្រោះ​ប្រសិន​បើ​ក្មេង​​​ស្រី​រងគ្រោះ​យល់​ព្រម​រួម​ភេទ​មែន​នោះ​ ហេតុអ្វី​បាន​ជា​នាង​ត្រូវ​វាយ​ដំ​​​ទៅ​​​វិញ?”៕ សារុន​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស