សាលាដំបូងរាជធានីភ្នំពេញគ្រោងបើកសវនាជំនុំជម្រះរឿងក្តី លោក សួន សេរី រដ្ឋា អ្នកប្រឆាំងដែលបាននិរទេសខ្លួន នៅថ្ងៃទី២៥ ខែវិច្ឆិកា បន្ទាប់ពីផ្អាកសវនាការកាលពីខែកញ្ញាដើម្បីអនុញ្ញាតឲ្យព្រះតេជគុណ លួន សុវ៉ាត សកម្មជនជាព្រះសង្ឃ និងជាសហចុងចោទនិមន្តទៅក្រៅប្រទេស។
លោក សួន សេរីរដ្ឋា និងព្រះតេជគុណ លួន សុវ៉ាត ត្រូវបានចោទប្រកាន់ពីបទញុះញង់ឲ្យប្រព្រឹត្តបទឧក្រិដ្ឋ ដោយមានគម្រោងវាយប្រហារ និងរំខានដល់ការបោះឆ្នោតជាតិកាលពីឆ្នាំមុនពាក់ព័ន្ធនឹងព្រឹត្តិការណ៍ចំនួនពីរដែលបានរៀបចំអំឡុងការបោះឆ្នោត ទី១គឺចែកអាវយឺតជំរុញឲ្យប្រជាពលរដ្ឋកុំទៅបោះឆ្នោត និងមួយទៀតចែកផ្កាដល់នគរបាលនិងទាហាន។
លោក សេរីរដ្ឋា បានទទួលស្គាល់ថា លោកបានរៀបចំព្រឹត្តិការណ៍ទាំងពីរនេះពីបរទេស មែន ប៉ុន្តែបានបដិសេធថា មិនបានចែកអាវយឺត ឬផ្កាដែលត្រូវបានចាត់ទុកថា ជាបទឧក្រិដ្ឋឡើយ។
ព្រះតេជគុណ លួន សុវ៉ាត មានសង្ឃដីកាថា ព្រះអង្គបានជួបជាមួយលោក សេរីរដ្ឋា ម្តងនៅសហរដ្ឋអាមេរិក ប៉ុន្តែ បដិសេធថា ព្រះអង្គមិនបានដើរតួនាទីសំខាន់នៅក្នុងផែនការរបស់លោក ឬក្រុមរបស់លោក គឺចលនាអំណាចពលរដ្ឋខ្មែរឡើយ។
លោក មាស ច័ន្ទពិសិដ្ឋ ព្រះរាជអាជ្ញារងអមសាលាដំបូងរាជធានីបានមានប្រសាសន៍ថា សវនាការត្រូវបានគ្រោងឡើងវិញនៅថ្ងៃទី២៥ ខែវិច្ឆិកា ។ លោកបានបដិសេធមិនធ្វើអត្ថាធិប្បាយបន្ថែមឡើយ។
លោក សេរីរដ្ឋា បដិសេធមិនចូលរួមសវនាការដោយអះអាងថា តុលាការនៅក្នុងប្រទេសកម្ពុជាពុករលួយបំផុតមិនអាចផ្តល់ការកាត់ក្ដីលោកឲ្យបានយុត្តិធម៌ឡើយ។ លោកបានចេញសេចក្ដីថ្លែងការណ៍មួយកាលពីថ្ងៃអង្គាសប្តាហ៍មុន ដោយអះអាងឡើងវិញពីបំណងរបស់លោកស្ថិតនៅក្រៅប្រទេសដដែល។
លោក សុក សំអឿន មេធាវីរបស់លោកបានមានប្រសាសន៍ថា លោកនឹងតំណាងកូនក្ដីរបស់លោកនៅសវនាការនោះ ប៉ុន្តែលោកមិនជឿថា លោក សេរីរដ្ឋា នឹងទទួលបានការកាត់ក្ដីយុត្តិធម៌ឡើយ។
លោកបានមានប្រសាសន៍ថា “ខ្ញុំមិនគិតថា ចៅក្រមអាចសម្រេចឲ្យពួកគាត់រួចផុតពីការចោទប្រកាន់ឡើយ។ ខ្ញុំមិនជឿជាក់ថា ចៅក្រមអាចធ្វើសេចក្ដីសម្រេចដោយសេរីឡើយ”។
ព្រះតេជគុណ លួន សុវ៉ាត បានមានសង្ឃដីកាថា ព្រះអង្គក៏មានគម្រោងចូលរួមសវនាការនោះផងដែរ។ ព្រះអង្គបានមានសង្ឃដីកាថា “អាត្មាដឹងថា តុលាការចោទប្រកាន់អាត្មាមិនត្រឹមត្រូវឡើយ ប៉ុន្តែអាត្មាត្រូវតែប្រាប់ពួកគេថា អាត្មាមិនបានធ្វើអ្វីខុសទេ”។
កាលពីខែកញ្ញា លោក សេរីរដ្ឋា បានបដិសេធថា ព្រះសង្ឃអង្គនេះមិនជាប់ពាក់ព័ន្ធនឹងការខិតខំប្រឹងរបស់លោក ដើម្បីចែកអាវយឺត និងផ្កាទេ ប៉ុន្តែលោកបានមានប្រសាសន៍ថា លោកបានគាំទ្រការនិមន្តរបស់ព្រះតេជគុណ លួន សុវ៉ាត មកសហរដ្ឋអាមេរិកកាលពីឆ្នាំ២០១១ និងបានជួយរៃអង្គាសបច្ច័យបានជិត៣០.០០០ដុល្លារសម្រាប់ការងារសិទ្ធិមនុស្សរបស់ព្រះសង្ឃអង្គនេះនៅក្នុងប្រទេសកម្ពុជា។
ព្រះតេជគុណ លួន សុវ៉ាត បានមានសង្ឃដីកាថា ព្រះអង្គមិនមានទំនាក់ទំនងហិរញ្ញវត្ថុណាមួយជាមួយលោក សេរីរដ្ឋា ទេ។
ព្រះតេជគុណបានមានសង្ឃដីកាថា អាត្មាមិនដែលទទួលបានបច្ច័យពីលោក សួន សេរីរដ្ឋាទេ សូម្បីតែមួយសេន។ អាត្មាគិតថា សេចក្ដីសម្រេចរបស់តុលាការក្នុងការចោទប្រកាន់មកលើអាត្មាគឺជារឿងនយោបាយ ហើយតុលាការទទួលបញ្ជាពីរដ្ឋាភិបាល”។
ព្រះតេជគុណ លួន សុវ៉ាត តែងធ្វើពិធីបែបព្រះពុទ្ធសាសនាច្រើនលើកច្រើនសាដែលអាជ្ញាធរមិនអនុញ្ញាតដើម្បីតស៊ូមតិតាងនាមប្រជាពលរដ្ឋក្រីក្រ ដែលមានវិវាទដីធ្លីជាមួយក្រុមហ៊ុនដែលមានទំនាក់ទំនងជាមួយរដ្ឋាភិបាល។ លោក សួន សេរីរដ្ឋា ត្រូវបានរដ្ឋាភិបាលចាត់ទុកថា ជាភេរវករដែលព្យាយាមញុះញង់ឲ្យមានចលនាបះបោរបែបអារ៉ាប់ស្ព្រីងប្រឆាំងលោកនាយករដ្ឋមន្ត្រី ហ៊ុន សែន៕ សារុន