29 C
Phnom Penh

​​​​​​មន្ត្រី​​​​​​ជាន់​​​ខ្ពស់បង្ហាញ​​​ពី​​​ជំហរ​​​​​​​​​បក្ស​​​​​ប្រជា​​​ជន​​​​​​នៅ​​​ក្នុង​​​ការ​​​ចរចា​​​​​ជុំ​​​វិញ​​​ការ​​​ធ្វើ​​​កំណែ​​​ទម្រង់​​​ដែល​​​ជាប់​​​គាំង

ដោយ ឌឹ ខេមបូឌា ដេលី

បទវិភាគ

កាល​​​ពី​​​យប់​​​ថ្ងៃ​​​ច័ន្ទ​សប្តាហ៍មុន​ មន្ត្រី​​​ជាន់​​​ខ្ពស់​​​មួយ​​​រូប​​​​​របស់​​​គណ​​​បក្ស​​​ប្រជាជន​​​កម្ពុជា ​​​បាន​​​បង្ហាញ​​​ពី​​​​​​ជំហរ​​​​​​​​របស់​​​គណ​​​បក្ស​​​កាន់​​​អំណាច​​​នេះនៅ​​​ក្នុង​​​​​ការ​​​ចរចាដែលជា​​ប់​​​គាំង​​​របស់​​​ខ្លួន​​​ជា​​​មួយ​​​​​​គណ​​​បក្ស​​​សង្គ្រោះ​​​ជាតិ​​​ ជុំ​​​វិញ​​​ការ​​​បង្កើត​​​គណៈ​​កម្មាធិការ​​​ជាតិរៀប​​​ចំ​​​ការ​​​​​​បោះ​​​ឆ្នោត (គ.ជ.ប.) ​​​ថ្មី​​​ដែលមាន​​​សមាសភាព​​​ពីរ​​​គណ​​​បក្ស​​​ចូល​​​រួម។

​​​កាល​​​ពី​​​ខែ​​សីហា លោក សម រង្ស៊ី ប្រធាន​​​គណ​​​បក្ស​​​​​​ប្រឆាំង​​​​​​ បាន​​​ដឹក​​​នាំ​​​តំណាង​​​រាស្ត្រ​​​ទាំង​​​៥៥​​​រូប​​​របស់​​​លោក​​​​​​ដើម្បី​​​ចរចា​​​បញ្ចប់​​​ការ​​​ធ្វើ​​​ពហិការ​​​មិន​​​ចូល​​​សភារបស់​​​ខ្លួន​​​​​​កាល​​​ពី​​​ខែ​​​សីហា​​​ ជា​​​ថ្នូរ​​​នឹង​​​ការ​​​សន្យា​​​​ពី​​​គណ​​​បក្ស​​​ប្រជា​​​ជន​​​កម្ពុជា ​​​​​​ថា​​​នឹង​​​ធ្វើ​​​កំណែ​​​ទម្រង់​​​ គ.ជ.ប. ដែល​​​គណ​​​បក្ស​​​សង្គ្រោះ​​​ជាតិ​​​​​​ចោទ​​​​​​ប្រកាន់​​​ថា​​​​​​បាន​​​រៀប​​​ចំ​​​​​លទ្ធ​​​ផល​​​​​បោះ​​​ឆ្នោត​​​​​​ទុក​​​ជាមុន​​​សម្រាប់​​​គណ​​​បក្ស​​​កាន់​​​អំណាច។

​​​ក្រុម​​​ការ​​​ងារ​​​មួយដែល​​​មាន​​​សមាសភាព​​​មក​​​ពី​​​គណ​​​បក្ស​​​​​​ទាំង​​​ពីរ បាន​​​ជួប​​​ចរចា​​​គ្នា​​​​​​ប្រចាំ​​​​​​សប្តាហ៍​​​ដើម្បី​​​​​​គ្រោង​​​រៀប​​​ចំ​​​​​​សេច​​​ក្តី​​​លម្អិត​​​នៃ​​​ការ​​​ធ្វើ​​​កំណែ​​​ទម្រង់ ប៉ុន្តែ​​​បាន​​​​​​​បញ្ចប់​​​ជំនួប​​​ចរចា​​​​​​​​​នេះ​​​កាល​​​ពី​​​ថ្ងៃ​​​ទី​​​២៦ ខែ​​​តុលា ហើយបាន​​​លើក​​ឡើង​​​ថា ​​​មាន​​​តែ​​​មេដឹក​​​នាំ​​​​​​​បក្ស​​​​​ប៉ុណ្ណោះដែល​​​អាច​​​ដោះ​​​ស្រាយ​​​​​​​​​​​​​វិវាទដែល​​​នៅ​​​សេសសល់​​​​​ចំនួន​​ពីរ​​​បាន។

គណ​​​បក្ស​​​ប្រជា​​​ជន​​​កម្ពុជា​​​ទាម​​​ទារ​​​ថា សមា​​​ជិក​​ គ.ជ.ប. ​​​មិ​​ន​​​ត្រូវបាន​​​អនុញ្ញាត​​​ឲ្យ​​​​​​កាន់​​​​​​​លិខិត​​​ឆ្លង​​​ដែន​​​បរទេស​​​ឡើយ ហើយ​​​អគ្គលេខា​​​​​នៃស្ថាប័ន​​​នេះ​​​ត្រូវ​​​​​​​​មាន​​​បទ​​​ពិសោធខាង​​​រៀប​​​ចំ​​​ការ​​​​​​បោះ​​​ឆ្នោតយ៉ាង​​​ហោច​​​ណាស់៥​​​ឆ្នាំ។ គណ​​​បក្ស​​​​​​សង្គ្រោះ​​​ជាតិ​​​​​​បាន​​​ជំទាស់​​​​​​នឹង​​​​​​​​សំណើ​​​ទាំង​​​ពីរ​​​នេះ។

កាល​​​ពី​​​យប់​​​ថ្ងៃ​​​ច័ន្ទដដែរលោក ​​​ព្រំុ សុខា ​​​សមា​​​ជិក​​​​​​មួយ​​​​​របស់​​​គណ​​​បក្ស​​​ប្រជា​​​ជន​​​កម្ពុជា ដែល​​​បាន​​​​​​ចូល​​​រួម​​​នៅ​​​ក្នុង​​​ការ​​​ចរចា​​​ថ្មីៗ​​​​​​នេះ បានបង្ហាញ​​​វត្តមាន​​​នៅ​​​ស្ថានីយ​​​វិទ្យុ​​​អាស៊ី​​​សេរី ដើម្បី​​​លើក​​​​​ឡើង​​​ពី​​​ករណី​​​នេះ​​​ជួស​​​មុខ​​​ឲ្យ​​​គណ​​​បក្ស​​​ប្រជា​​ជន​​​កម្ពុជា។ លោក​​​​​បានមាន​​​ប្រសាសន៍​​​ថា វា​​​ជា​​​រឿង​​​សម​​​ហេតុ​​​ផល​​​​​​​​​​ក្នុង​​​ការ​​​តម្រូវ​​​ឲ្យ​​​មន្ត្រី​​​​​​​​​មាន​​​សញ្ជាតិ​​​កម្ពុជា តែ​​​មួយ​​​​​​ដើម្បី​​​ធានា​​​​​​​​​​​​នូវ​​​ភាព​​​ស្មោះ​​​ត្រង់។​ លោក​​​មាន​​​ប្រសាសន៍​​​ថា “អ្វី​​​ដែល​​​សំខាន់​​​គឺថា នៅពេល​​​​​​យើង​​​ដាក់​​​​​​កំហិត​​​​​​​​បញ្ហា​​​​​​​​នេះ សួរ​​​ថា ‘តើ​​​នេះ​​វា​​​ខុស​​​​​​​​​​​​​ស្តង់ដារ​​​​​​នៅ​​​ក្នុង​​​​​បណ្តា​​​ប្រទេស​​​ផ្សេង​​​ទៀត? ទេ គេ​​​ទទួល​​​ស្គាល់​​​សញ្ជាតិពីរ ប៉ុន្តែ​​​​​​គេ​​​​ដាក់​​​លក្ខ​​ខណ្ឌ​​​លើ​​​មេដឹក​​​នាំ​​​ ជា​​​ពិសេស​​​មេដឹកនាំ​​​នយោបាយ​​​កំពូលៗ។ ​​បើ​​​យើង​​​ចង់​​​ឲ្យ​​​​​​ គ.ជ.ប. ឯក​​​រាជ​​​ និង​​​អព្យា​​​ក្រឹត ពួកគេ​​​អាច​​​បោះ​​​បង់​​​ចោល​​​បានដែរ [​​​លិខិត​​​ឆ្លង​​​ដែន​​​បរទេស​​​របស់​​​ពួកគេ]”។

គ.ជ.ប. ដែល​​​ធ្វើ​​​កំណែ​​​ទម្រង់​​​ថ្មី គ្រោ​​​ងនឹង​​​ចូល​​​ជំនួស ​​​គ.ជ.ប. បច្ចុប្បន្ន បន្ទាប់​​​ពី​​​ការ​​​ចរចា​​​ចប់​​​សព្វ​​​គ្រប់។​​ ស្ថាប័ន​​​​​​រៀប​​​ចំ​​​ការ​​​បោះ​​​ឆ្នោត​​​នេះ​​​នឹង​​​មាន​​​​​​​​សមាស​​​ភាព​​​សមាជិក​​​​​៤​​​រូប​​​មក​​​ពី​​​គណ​​​​​​បក្ស​​​ប្រជាជន​​​កម្ពុជា ៤​​​រូបមក​​​ពី​​​គណបក្ស​​​សង្គ្រោះ​​​ជាតិ ​​​ហើយ​​​សមា​​​ជិក​​​ទី​​​៩​​​ដែល​​​​​​ជា​​​សមាជិក​​​ចុង​​​ក្រោយ​​​​​​ត្រូវ​​​​​​​​​បាន​​​ជ្រើស​​​រើស​​​ដោយ​​​គណ​​​​​​បក្ស​​​ទាំង​​​ពីរ។

លោក​​​ សម រង្ស៊ី បាន​​​​​មាន​​​​​​ប្រសាសន៍​​​ថា លោកមើល​​​មិន​​​​​​ឃើញ​​​​​​ហេតុ​​​ផល​​​ដែល​​​​​ត្រូវ​​​ដាក់​​​​​​ការ​​​រឹត​​​បន្តឹង​​​ផ្នែក​​​សញ្ជាតិ​​លើ​​​ គ.ជ.ប​​​.ថ្មីឡើយ។​​​លោក​​​លើក​​​ឡើង​​​ទៀត​​​ថា “​​​​​​វា​​​ជា​​​​​​​​​បញ្ហា​​​គោល​​​ការណ៍ និង​​​ភាព​​​ស៊ី​​​សង្វាក់​​​គ្នា ពីព្រោះ​​​នៅ​​​កម្ពុជា ​​​គ្មាន​​​ច្បាប់​​​​​​បែប​​​នេះទេ”។

លោក​​​ សម រង្ស៊ី ដែល​​​មាន​​​​​​សញ្ជាតិ​​​ពីរ​​​ បាន​​​​​​មាន​​​​​​ប្រសាសន៍​​​ទៀត​​​ថា “​​​ចាប់​​​ពី​​​ថ្នាក់​​​កំពូ យើង​​​​​មាន​​​ព្រះ​​​មហាក្សត្រដែល​​​មាន​​​សញ្ជាតិ​​​ពីរ សមា​​​ជិករដ្ឋ​​​សភា និង​​​សមា​​​ជិក​​​ព្រឹទ្ធ​​​សភា ពួក​​​គេ​​​ជា​​​ច្រើន​​​​​​មាន​​​សញ្ជាតិពីរ​​​ ហើយ​​​​​​រដ្ឋ​​​មន្ត្រី​​​​​​ក្នុង​​​ជួរ​​​រដ្ឋាភិបាល និង​​​​​​រដ្ឋ​​​លេខាធិការ​​​​​ក៏​​​មាន​​​សញ្ជាតិ​​​ពីរដែរ​​​”។

ប្រធាន​​​គណ​​​បក្ស​​​សង្គ្រោះ​​​ជាតិ​រូប​​​នេះ​​​បាន​​​​​មាន​​​ប្រសាសន៍​​​ថា លោក​​​​​​​​ក៏​​​ព្រួយ​​​បារម្ភ​​​ដែរ​​​ចំពោះ​​​ការ​​​ទាម​​​ទារ​​​របស់​​​គណ​​​បក្ស​​​ប្រជាជន​​​កម្ពុជា ​​​ដែល​​​​​តម្រូវ​​​​​​ឲ្យ​​​អគ្គលេខាធិការ និង​​​អគ្គលេខាធិការ​​​រង​​​គ.ជ.ប. មាន​​​​​​បទ​​​ពិសោធ​​​​​​ខាង​​​រៀប​​​ចំ​​​ការ​​​បោះ​​​ឆ្នោត​​​យ៉ាងហោច​​​ណាស់​​​៥​​​ឆ្នាំ​​ និង​​​ឲ្យ​​​រក្សា​​​ទុក​មន្ត្រី​​​​​​​​ថ្នាក់​​​ក្រោម​​របស់ ​​​គ.ជ.ប.​​ បច្ចុប្បន្នឲ្យ​​​នៅ​​​ដដែល។

លោក​​ សម រង្ស៊ី បាន​លើក​​​ឡើង​​​​​​ទៀត​​​ថា ​​​”ដើម្បី​​​មាន​​​បទ​​​ពិសោធ​​​៥​​​ឆ្នាំ​​​​​​នៅ​​​ក្នុង​​​ គ.ជ.ប. ទាល់​​​តែ​​​យើងជា​​​មន្ត្រី​​​ គ.ជ.ប. ពេល​​​បច្ចុប្បន្ន ហើយ​​​យើង​​​ដឹង​​​ថា មន្ត្រី​​​​​​គ.ជ.ប. បច្ចុប្បន្ន​​​​​​​​​​​​មាន​​​ទំនាក់​​​ទំនង​​​ជា​​​មួយ​​​គណបក្ស​​​ប្រជាជន​​​កម្ពុជា​​​ បើ​​​មិ​​ន​​​ច្រើន​​​ក៏តិច​​​ដែរ​​​”។

លោក ព្រំ​​ុ​ សុខា បាន​​​​​​មាន​​​​​​ប្រសាសន៍​​​កាលពី​​​ថ្ងៃ​អង្គា​សប្តាហ៍​មុនថា លោក​​​ សម រង្ស៊ី និយាយ​​​ត្រូវ​​​ដែល​​​លើក​​​ឡើង​​​ថា សំណើ​​​រឹត​​​បន្តឹង​​ពល​​​រដ្ឋ​​​ដែល​​​មាន​​​សញ្ជាតិ​​​ពីរ​​​គឺ​​​ជារឿង​​​ថ្មី ប៉ុន្តែ​​​រដ្ឋាភិបាល​​​​​​ត្រូវ​​​តែ​​​ចាប់​​​ផ្ដើម​​​ពី​​​ចំណុច​​​ណាមួយ​​​ទៅ។ លោក​​​មាន​​​ប្រសាសន៍​​​ទៀត​​​ថា “វា​​​ជា​​​ពេល​​​ដែល​​​ត្រូវ​​​ធ្វើ​​​​​​ឲ្យ​​​ប្រាកដ​​​ថា មាន​​​លក្ខខណ្ឌ​​​មួយ​​​ចំនួន​​​ដែល​​​អ្នក​​​នយោបាយ​​​ និង​​​អ្នក​​​រដ្ឋការ​​​ជាន់​​​ខ្ពស់​​​ដូច​​​ជា​​​នៅ​​​ក្នុង​​​ គ.ជ.ប. ជា​​​ដើម​​​ ត្រូវ​​​​​មាន​​​សញ្ជាតិ​​​តែ​​​មួយ​​​”។

​​​​​កាល​​​ពី​​​មុន​​​ រដ្ឋាភិបាល​​​បាន​​​​​​លើក​​​ឡើង​​​ថា ខ្លួន​​​កំពុង​​​ពិចារណា​​​ការ​​​​​​ធ្វើ​​​ឲ្យ​​​អ្នក​​​មាន​​​សញ្ជាតិ​​​ពីរ​​​មិន​​​អាច​​​ធ្វើ​​​ជា​​​នាយក​​​រដ្ឋមន្ត្រី​​​បាន​​​។ ចំណុច​​​ជាប់​​​គាំង​​​មួយ​​​ទៀត​​​នៅ​​​ក្នុង​​​ការ​​​ចរចា​​​ គឺ​​​ការ​​​ទទូច​​​របស់​​​គណបក្ស​​​ប្រជា​​​ជន​​​កម្ពុជា ​​​​​​​​​តម្រូវ​​​ឲ្យ​​​សមាជិក​​​​​​ក្រុមប្រឹក្សា​​​ភិបាល​​​ទាំង​​​អស់​​​របស់​​​ គ.ជ.ប. ត្រូវ​​​មាន​​​សញ្ញាបត្រ​​​ច្បាប់ សេដ្ឋកិច្ច ឬអក្សរ​​​សាស្ត្រ។

កាលពី​​ថ្ងៃ​អង្គា​ដដែរលោក ព្រំុ សុខា បាន​​​បង្ហាញ​​​ថា គណបក្ស​​​ប្រជា​​​ជន​​​កម្ពុជា​​​​​​មាន​​​ឆន្ទៈ​ចរចា​​​លើ​​​ចំណុច​​​នេះ។ លោក​​​បាន​​​មាន​​​ប្រសាសន៍​​​ទៀត​​​ថា “វា​​​គួរ​​​តែ​​​បើក​​​ទូលាយ​​​។ អំឡុង​​​ពេល​​​ចរចា ​​​ខ្ញុំ​​​ថែម​​​ទាំង​​​បាន​​​និយាយ​​​ទៀត​​​ថា សញ្ញាបត្រ​​​មាន​​​តម្លៃ​​​ស្មើ។ ជឿ​​​លើ​​​ខ្ញុំ​​​ចុះ ពួកគេ​​​ [គណបក្ស​​​សង្គ្រោះ​​​ជាតិ​​​] អាច​​​ជជែក​​​គ្នា និង​​​ចរចា​​​ ហើយ​​​សម្រុះ​​​សម្រួល​​​គ្នា​​​បា​​ន​​​ពី​​​បញ្ហា​​​នេះ”។

ពេល​​​​​​នេះការ​​​ចរចា​​​ជុំវិញ​​​ការ​​​បង្កើត​​​ គ.ជ.ប. ថ្មី ​ធ្វើ​​​ឡើង​​​រវាង​​​លោក សម រង្ស៊ី និង​​​លោក​​​នាយក​​​រដ្ឋមន្ត្រី ហ៊ុន សែន ដែល​​​បាន​​​ជួបចរចា​​​គ្នា​​​ជា​​​លក្ខណៈ​​​ឯកជន​​​​​​​​​​​​នៅ​​​រដ្ឋសភា​​​កាលពី​​​​​​ថ្ងៃ​​​ច័ន្ទ ប៉ុន្តែ​​​​​មិន​​​អាច​​​​​​ស្វែង​​​​​​រក​​​ដំណោះ​​​ស្រាយ​​​បាន​​​​​​ទេ៕ សុខុម​​​​​​​​​​​​​​​​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស