គណៈកម្មការសិទ្ធិមនុស្សរដ្ឋសភាបានចាប់ផ្ដើមជួបជាលក្ខណៈបុគ្គលជាមួយអ្នកភូមិដែលជាប់ពាក់ព័ន្ធក្នុងវិវាទដីធ្លីដ៏អូសបន្លាយមួយនៅក្នុងខេត្តកំពង់ឆ្នាំង ដែលធ្វើឲ្យមានការព្រួយបារម្ភថា ដំណើរការនេះអាចបង្ខំឲ្យគ្រួសារមួយចំនួនទទួលយកកញ្ចប់សំណងមិនគ្រប់គ្រាន់។
រយៈពេល១២ឆ្នាំចុងក្រោយនេះ គ្រួសារជាច្រើនមកពីភូមិឡពាង ក្នុងខេត្តកំពង់ឆ្នាំង មានវិវាទដីធ្លីជាមួយក្រុមហ៊ុន KDC International របស់អ្នកស្រី ជា ខេង ភរិយាលោក ស៊ុយ សែម រដ្ឋមន្ត្រីក្រសួងរ៉ែ និងថាមពល ជុំវិញដីទំហំ១៤៥ហិកតា។
កាលពីម្សិលមិញលោក អេង ឆៃអា៊ង ប្រធានគណៈកម្មការសិទ្ធិមនុស្ស និងជាសមាជិកសភាគណបក្សសង្គ្រោះជាតិបានជួបជាមួយអ្នកភូមិប្រាំមួយគ្រួសារនៅក្នុងរាជធានីភ្នំពេញ ជាចំណាត់ការដែលអ្នកស្រី អ៊ុំ សុភី តំណាងអ្នកភូមិឡពាងដែលនិយាយឥតសំចៃបានលើកឡើងនោះ បានបង្ហាញពីគោលបំណងមិនល្អរបស់គណៈកម្មការនេះ។
អ្នកស្រី សុភី បាននិយាយថា “គណៈកម្មការនេះព្យាយាមបំបែកសហគមន៍របស់យើង ពីព្រោះពួកគេបានទាក់ទង និងបានជួបជាមួយក្រុមអ្នកភូមិដោយសម្ងាត់ ហើយមិនបានជូនដំណឹងដល់ខ្ញុំក្នុងនាមជាតំណាងអ្នកភូមិទេ”។
ការចោទប្រកាន់របស់អ្នកស្រីកើតឡើងបន្ទាប់ពីអ្នកភូមិ៣៨គ្រួសារបានយល់ព្រមទទួលយកសំណងពីក្រុមហ៊ុន KDC កាលពីខែមីនា បន្ទាប់ពីការបង្កើតគណៈកម្មការពិសេសមួយដែលមានភារកិច្ចដោះស្រាយវិវាទបុគ្គល។ ក្នុងចំណោមអ្នកភូមិទាំងនោះ អ្នកភូមិ២៣គ្រួសារបានបន្តដាក់ពាក្យបណ្ដឹងទៅតុលាការ ដើម្បីព្យាយាមលែងទទួលស្គាល់កិច្ចព្រមព្រៀងនេះ ដោយលើកឡើងថា ពួកគាត់ត្រូវបានធ្វើដោយការបង្ខិតបង្ខំ។
លោក អេង ឆៃអ៊ាង បានបដិសេធការចោទប្រកាន់របស់អ្នកស្រី សុភី ដោយលើកឡើងថា លោកគ្រាន់តែទៅជួបអ្នកភូមិទាំងនេះលក្ខណៈបុគ្គលដើម្បីចង់ដឹងពីការទាមទាររបស់ពួកគាត់តែប៉ុណ្ណោះ ដោយអ្នកភូមិ១៦គ្រួសារមិនទាន់ទទួលយកសំណងណាមួយពីក្រុមហ៊ុន KDC នៅឡើយ។
លោកបានមានប្រសាសន៍ថា “ខ្ញុំមិនមែនមកពីក្រុមហ៊ុនទេ ហើយខ្ញុំក៏គ្មានបំណងអាក្រក់ដែរ ពីព្រោះខ្ញុំបើកចំហក្នុងការជួបជាមួយអ្នកភូមិគ្រប់គ្រួសារទាំងអស់ដើម្បីខ្ញុំអាចស្វែងយល់ពីតម្រូវការរបស់ពួកគាត់ ដោយសារពួកគាត់ម្នាក់ៗពេញចិត្តជម្រើសផ្សេងៗគ្នា”។
អ្នកស្រី ស៊ុំ ថុន អាយុ៦២ឆ្នាំដែលបានចោទក្រុមហ៊ុន KDC ថាបានរំលោភយកដីរបស់គាត់ទំហំ៣ហិកតា នៅក្នុងឃុំតាជេសបានជួបជាមួយលោក អេង ឆៃអ៊ាង កាលពីម្សិលមិញ ជាអ្វីដែលគាត់លើកឡើងថា ជាបរិយាកាសដ៏រាក់ទាក់។
អ្នកស្រីបាននិយាយថា “បរិយាកាសខុសគ្នាទាំងស្រុង។ យើងស្ថិតនៅក្រោមការគាបសង្កត់នៅពេលជួបជាមួយអ្នកស្រី ជា ខេង ឲ្យទទួលយកប្រាក់សំណងតិចតួច ដោយលើកឡើងថា យើងមិនមានក្រដាសស្នាមដើម្បីបង្ហាញពីកម្មសិទ្ធិលើដីនេះ”។
អ្នកស្រី ថុន ដែលបានច្រានចោលសំណើផ្ដល់ប្រាក់សំណង៦លានរៀលពីក្រុមហ៊ុននេះកាលពីដើមឆ្នាំនេះ បាននិយាយថា អ្នកស្រីកំពុងជំរុញឲ្យមានកិច្ចព្រមព្រៀងដោះដូរដី ដែលក្នុងនោះអ្នកស្រីនឹងដោះដូរដីដែលមានវិវាទនេះជាមួយដីនៅជាប់គ្នានោះ។
អ្នកស្រី កុល វណ្ណា អាយុ៥៦ឆ្នាំដែលបានទាមទារប្រាក់សំណង២០.០០០ដុល្លារសម្រាប់ដីរបស់គាត់ ទំហំមួយហិកតាក្នុងចំណោមដីទំហំ៤ហិកតាដែលគាត់បានបាត់បង់នោះ ក៏បានលើកឡើងនៅក្នុងជំនួបកាលពីម្សិលមិញផងដែរ។ អ្នកស្រីបានបន្ថែមថា “យើងកាន់តែចាស់ណាស់ទៅហើយ ហើយយើងនឿយហត់ដោយធ្វើការតវ៉ានៅតាមផ្លូវ ឬតស៊ូនៅតុលាការណាស់ ប៉ុន្តែយើងនៅតែទាមទារសំណងសមរម្យដដែល”៕ សារុន