យោងតាមនាយកប្រតិបត្តិនៃក្រុមហ៊ុនបុត្រសម្ព័ន្ធរបស់ក្រុមហ៊ុនមេមួយនៅក្នុងទីក្រុងហុងកុងបានឲ្យដឹងថា ក្រុមហ៊ុនមួយនៅក្នុងទីក្រុងហុងកុងកំពុងសង្ឃឹមថា នឹងទាក់ទាញចំណែកទីផ្សារដ៏ធំនៃទីផ្សារឆ្នោតឡូតូនៅក្នុងប្រទេសកម្ពុជា ដោយបើកកន្លែងលក់ឆ្នោតនៅក្នុងរាជធានីភ្នំពេញ និងទូទាំងប្រទេសនៅខែក្រោយ។
យោងតាមលោក Phillip Wongនាយកប្រតិបត្តិក្រុមហ៊ុន Cambodian Mark 6 បានឲ្យដឹងថា ក្រុមហ៊ុន EGame Solutions ជាក្រុមហ៊ុនមេនៃក្រុមហ៊ុន Cambodian Mark 6 បានបង្កើតការិយាល័យមួយនៅក្នុងរាជធានីភ្នំពេញកាលពីដើមឆ្នាំនេះដោយប្រើយីហោ CM6 ហើយសព្វថ្ងៃកំពុងតែបង្កើតការិយាល័យ និងកន្លែងលក់ឆ្នោតមួយនៅតាមបណ្ដោយមហាវិថីព្រះសីហនុ ដែលនឹងបើកនៅដំណាច់ឆ្នាំនេះ។
លោក Wong បានលើកឡើងថា ក្រុមហ៊ុន CM6 ត្រូវបានផ្ដល់អាជ្ញាប័ណ្ណឲ្យធ្វើប្រតិបត្តិការដោយក្រសួងសេដ្ឋកិច្ច និងហិរញ្ញវត្ថុ ហើយនឹងបើកសាខាផ្សេងទៀតនៅក្នុងខេត្តសៀមរាប និងខេត្តបាត់ដំបងបន្ទាប់ពីបើកការិយាល័យមេរបស់ខ្លួននៅក្នុងរាជធានីភ្នំពេញរួច។
លោក Wong បានលើកឡើងបន្ថែមថា ក្រុមហ៊ុននេះគ្រោងនឹងលក់ឆ្នោតឡូតូរបស់ខ្លួននៅតាមកន្លែងលក់រាយប្រមាណ១.០០០កន្លែងនៅទូទាំងប្រទេស។ លោកបានបន្ថែមថា ក្រុមហ៊ុន CM6 ក៏នឹងបង់ពន្ធយ៉ាងទៀងទាត់ឲ្យរដ្ឋាភិបាលផងដែរ។
លោកបានមានប្រសាសន៍ថា “រឿងសំខាន់នោះគឺ ពលរដ្ឋគ្រប់គ្នានឹងទិញឆ្នោតឡូតូ ហេតុដូច្នេះក្រុមហ៊ុនអាចបង់ពន្ធយ៉ាងច្រើនជូនរដ្ឋាភិបាលបាន។ ជាការពិតការកើនឡើងនៃប្រាក់ចំណូលសម្រាប់រដ្ឋាភិបាលគឺជារឿងល្អ”។
លោក រស់ ភិរម្យ អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ បានបញ្ជាក់ថា ក្រុមហ៊ុន CM6 ត្រូវបានផ្ដល់អាជ្ញាប័ណ្ណឲ្យធ្វើប្រតិបត្តិការ ប៉ុន្តែលោកបានគូសបញ្ជាក់ថា ក្រុមហ៊ុនភាគច្រើនដែលវិនិយោគនៅក្នុងទីផ្សារឆ្នោតឡូតូនៅក្នុងប្រទេសកម្ពុជាបានក្ស័យធន។
លោក ភិរម្យ បានមានប្រសាសន៍ថា ” នៅពេលចាប់ផ្ដើម ប្រហែលជាក្នុងឆ្នាំ២០០៥ មានក្រុមហ៊ុនប្រហែលពី៤០ទៅ៥០។ ប៉ុន្តែក្រុមហ៊ុនទាំងនេះបានក្ស័យធនម្ដងមួយៗ ដោយសារជំនួញនេះមានការរីកចម្រើនយឺតពេក។ ឥឡូវនេះ មានក្រុមហ៊ុនត្រឹមតែប្រាំប៉ុណ្ណោះ។ ប្រហែលជាពលរដ្ឋខ្មែរមិនចូលចិត្តលេងឆ្នោតឡូតូ ឬក៏អ្វីដូចនេះហើយមើលទៅ”។
អ្នកនាំពាក្យរូបនេះក៏បានលើកឡើងដែរថា លោកមិនសូវជារំពឹងប្រាក់ចំណូលពន្ធដែលបានពីក្រុមហ៊ុនថ្មីឡើយ។
លោកបានមានប្រសាសន៍ថា ” ក្រមហ៊ុនមួយចំនួនបានបង់ពន្ធតិចតួចណាស់។ ក្នុងចំណោមក្រុមហ៊ុនឆ្នោតឡូតូទាំងប្រាំនេះ ពួកគេបានបង់ពន្ធត្រឹមតែប្រហែល៥០លានរៀល [១២.៣០០ដុល្លារ] ប៉ុណ្ណោះ។ វាគឺជាជំនួញដ៏តូចខ្លាំងណាស់នៅក្នុងប្រទេសកម្ពុជា”។
លោក ស្រី ចន្ធី អ្នកវិភាគសេដ្ឋកិច្ចឯករាជ្យម្នាក់បានលើកឡើងថា ការលេងឆ្នោតភាគច្រើនគឺមានតែអ្នកក្រដែលចាក់តិចៗប៉ុណ្ណោះដែលលេង។ លោកបានមានប្រសាសន៍ថា “ហេតុផលនោះគឺថា ទី១ពួកគាត់មិនសូវជាចាប់អារម្មណ៍ខ្លាំងនោះទេ ហើយទី២ពួកគាត់គិតថា ពួកគាត់នឹងមិនឈ្នះអ្វីឡើយ”៕ ស៊ុយឈាង
(រាយការណ៍បន្ថែមដោយ កង សុធា)