31 C
Phnom Penh

អត្តពលិក​កម្ពុជា​នឹង​ទៅ​ចូល​រួម​ក្នុង​ការ​ប្រកួត​កីឡា​លើ​ឆ្នេរ​ខ្សាច់​អាស៊ី​លើក​ទី៤​នៅ​ក្នុង​ប្រទេស​ថៃ​

ដោយ ឌឹ ខេមបូឌា ដេលី

បទវិភាគ

អត្តពលិក​​កម្ពុជា​ចំនួន​ប្រាំបី​នាក់​​នឹង​ធ្វើ​​ដំណើរ​ទៅ​កោះ​ភូកេត ក្នុង​ប្រទេស​ថៃ​នៅ​សប្ដាហ៍​នេះ​​ ដើម្បី​ចូល​រួម​​ការ​ប្រកួត​កីឡា​លើ​ឆ្នេរ​ខ្សាច់​អាស៊ីលើក​ទី​៤​ដែល​នឹង​ចាប់​ផ្ដើម​នៅ​ថ្ងៃ​សុក្រ។​

លោក វ៉ាត ចំរើន អគ្គលេខាធិការ​​គណៈកម្មាធិការ​ជាតិ​អូឡាំពិក​កម្ពុជា​បាន​ឲ្យ​ដឹង​កាលពី​ម្សិលមិញ​ថា គណៈកម្មការ​ជាតិ​អូឡាំពិក​កម្ពុជា​បាន​ជ្រើស​រើស​អត្តពលិក​ ដើម្បី​ប្រកួត​ក្នុង​វិញ្ញាសា​​ចំបាប់​លើ​ឆ្នេរ​ខ្សាច់ បាល់​ទះលើ​ឆ្នេរ​ខ្សាច់ និង​ វិញ្្ាសារ​ Food-Volleyball លើ​ឆ្នេរ​ខ្សាច់​នៅ​ក្នុង​ព្រឹត្តិការណ៍​ធ្វើ​ឡើង​ពីរ​ឆ្នាំ​ម្ដង​ ដែល​មាន​កីឡាករ​​មកពី​ប្រទេស​ចំនួន​៤៥​ចូល​រួម។

​លោក ចំរើន បាន​មាន​ប្រសាសន៍​ថា “មាន​អត្តពលិក​ខ្លាំង​ៗ​មកពី​ប្រទេស​ផ្សេងៗ​ ដូច​ជា​ប្រទេស​អុីរ៉ង់​ជាដើម​ ហើយ​ប្រទេស​កម្ពុជា​មិន​ដែល​ឈ្នះ​ក្នុង​ការ​ប្រកួត​នេះ​​ទេ​ពីមុន​មក​។ ទោះ​ជា​យ៉ាង​ណា យើង​មាន​សង្ឃឹម​ខ្លាំង​ក្នុង​វិញ្ញាសា​កីឡា​ចំបាប់ ព្រោះ​យើង​បាន​ជ្រើស​រើស​កីឡាករ​មួយ​ចំនួន​ដែល​ធ្លាប់​ឈ្នះ​មេដាយ​នៅ​ក្នុង​ការ​ប្រកួត​ស៊ីហ្គេម​”។

ទោះ​ជា​យ៉ាង​ណា លោក ធិន វិចិត្រ អគ្គលេខាធិការ​​សហព័ន្ធ​​ចំបាប់​កម្ពុជា និង​ជា​គ្រូបង្វឹក​នៃ​ក្រុម​ចំបាប់​លើ​ឆ្នេរ​ខ្សាច់​​មាន​ជំនឿ​ចិត្ត​តិច​តួច​។

លោក​បាន​មាន​ប្រសាសន៍​ទាក់​ទិន​នឹង​កីឡាករ​ចំបាប់​ចំនួន​បួន​នាក់ ដែល​នឹង​តំណាង​ឲ្យ​ប្រទេស​កម្ពុជា​ថា “យើង​គ្មាន​ពេល​វេលា​គ្រប់​គ្រាន់​ដើម្បី​​ហ្វឹក​ហាត់​​​នៅ​លើ​ឆ្នេរ​ខ្សាច់​​ឲ្យ​បាន​ត្រឹម​ត្រូវ​ឡើយ​ ហើយ​ពួកគេ​បាន​ហ្វឹក​ហាត់​​នៅ​កន្លែង​តារាង​បាល់​ទះ​ ហើយ​ខ្សាច់​​គឺ​វា​ខុស​គ្នា​ពី​ខ្សាច់​នៅ​លើ​ឆ្នេរ”។ លោក​បាន​បន្ថែម​ថា “ខ្ញុំ​មិន​សូវ​សង្ឃឹម​ថា យើង​នឹង​ឈ្នះ​មេដាយ​នោះ​​ទេ”។

ហើយ​ទោះបី​ជា​ធ្លាប់​ឈ្នះ​មេដាយ​សំរឹទ្ធិ​​ក្នុង​ទីក្រុង​បាងកក​កាលពី​ឆ្នាំ​២០០៧​ក៏ដោយ តែ​កីឡាករ​ចំបាប់​ឈ្មោះ ចាប លឿន អាយុ​៣២​ឆ្នាំ​បាន​លើក​ឡើង​ថា លោក​​​នៅ​មិន​ទាន់​មាន​ជំនឿចិត្ត​អំពី​ឱកាស​ឈ្នះ​នៅ​លើ​កោះ​ភូកេត​នៅ​ឡើយ​ទេ។

លោក​បាន​និយាយ​ថា “​ខ្ញុំ​មិន​បាន​ហ្វឹក​ហាត់​នៅលើ​ខ្សាច់​​ឲ្យ​បាន​ជាប់​លាប់​ទេ ព្រោះ​នៅ​ក្នុង​ប្រទេស​កម្ពុជា​គ្មាន​កន្លែង​ច្រើន​សម្រាប់​ការ​ហ្វឹក​ហាត់​នោះ​​ទេ”។ លោក​បាន​​ពន្យល់​ថា ​លោក​បាន​ត្រៀម​ខ្លួន​​នឹង​ហ្វឹក​ហាត់​សម្រាប់​ការ​ប្រកួត​ដែល​នឹង​មក​ដល់​ក្នុង​ពេល​ឆាប់ៗ​នៅ​លើ​ខ្សាច់​ក្នុង​តារាង​បាល់​ទះ​នៅ​ពហុកីឡាដ្ឋាន​ជាតិ​អូឡាំពិក​ក្នុង​រាជ​ធានី​ភ្នំពេញ​។

ការ​ប្រកួត​កីឡា​លើ​ឆ្នេរ​ខ្សាច់​អាស៊ី​ ដែល​ត្រូវ​បាន​ធ្វើ​ឡើង​ជា​លើក​ចុង​ក្រោយ​ក្នុង​ទីក្រុង​​ Haiyang ប្រទេស​ចិន​ឆ្នាំ​២០១២​បាន​ប្រព្រឹត្ត​ឡើង​រហូត​ដល់​ថ្ងៃ​ទី​២៤​ ខែ​វិច្ឆិកា៕ ស៊ុយឈាង​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស