30 C
Phnom Penh

កាក​បាទ​ក្រហម​កម្ពុជា​ដោះ​ដូរ​ការ​ិយាល័យ​របស់ខ្លួន​ក្នុង​ក្រុង​​សៀម​រាប

ដោយ ឌឹ ខេមបូឌា ដេលី

បទវិភាគ

ក្រុម​មន្ត្រី​បានឲ្យ​ដឹង​កាលពី​ម្សិលមិញ​ថា ការិយាល័យ​កាក​បាទ​ក្រហម​កម្ពុជា​ខេត្ត​សៀម​រាប​បាន​ដោះ​ដូរដី​ជាមួយ​​ក្រុម​ហ៊ុន​ឯក​ជន​ ដោយ​ផ្លាស់ពី​កន្លែង​សំខាន់​ស្ថិត​នៅកណ្តាល​ក្រុង​​សៀម​រាប​​ទៅកាន់​ដីមួយ​ក្បាលដែលមាន​តម្លៃ​ថោក​ជាង ​ស្ថិត​នៅ​ចម្ងាយ​៨គីឡូម៉ែត្រ​ ហើយ​នៅ​ជាយ​ក្រុង។

លោក សុ៊ុំ សំអាន ដែល​ជា​ប្រធាន​ការិយាល័យ​​កាក​បាទ​ក្រហម​ខេត្ត​នេះ​បានមាន​ប្រសាសន៍ថា “យើង​បាន​ផ្លាស់​មក​ធ្វើការ​នៅ​កន្លែង​ថ្មី​នេះ​ប្រហែល​​បី​ខែ​មក​ហើយ”។

លោក​ សំអាន បាន​មាន​ប្រសាសន៍ថា កន្លែង​ថ្មីនេះ​ស្ថិត​នៅ​​ក្នុង​ភូមិ​ថ្នល់ សង្កាត​់​ស្រងែ ប្រហែល​៨គីឡូម៉ែត្រពី​កន្លែង​មុន​តាម​ដង​ស្ទឹង​សៀម​រាប។ លោក​បាន​មាន​ប្រសាសន៍ថា “​វា​ជា​ការ​ដោះ​ដូរដី ប៉ុន្តែ​ខ្ញុំមិន​អាច​ផ្តល់​ព័ត៌មាន​បន្ថែម​បានទេ។ កន្លែង​ថ្មីនេះ​គឺ​ជា​អគារ​កម្ពស់​បីជាន់ ធំជាង​ក​ន្លែង​ចាស់​ពីរដង”។ លោក សំអាន បាន​បដិសេធ​មិន​ចេញ​ឈ្មោះ​ក្រុមហ៊ុន​ដែលឥឡូវនេះ​កាន់កាប់​ទី​តាំង​កាក​បាទ​ក្រហម​ចាស់​ឡើយ។

កាលពី​ម្សិលមិញ លោក សុខ គឹមសេង សមាជិក​ក្រុម​ប្រឹក្សា​ខេត​្ត​គណបក្ស​សង្គ្រោះ​ជា​តិ​បាន​រិះ​រន់ចំពោះ​ចំណាត់​កា​រនេះ។

លោកបាន​មាន​ប្រសាសន៍ថា “​គេ​មិន​ទាន់ដឹង​ផ្លូវការ​ ថាតើ​​កន្លែង​នេះ​ត្រូវបាន​លក់ ឬ​គ្រាន់តែដោះដូរ​នោះឡើយ។ វា​ជា​រឿង​សម្ងាត​់តែម្តង ហើយ​​ចំណាត​់ការ​នេះ​ត្រូវ​បាន​ធ្វើ​ដោយ​គ្មាន​តម្លាភាព​ឡើយ”។

លោក គឹមសេង បាន​បន្ថែមថា “​តម្លៃ​ដី​នៅ​កន្លែង​ថ​្មី​គឺ​មិន​ដល់​៥០ដុល្លារ​ផង​ក្នុងមួយ​ម៉ែត្រក្រឡា ចំណែក​​កន្លែង​ចាស់​នៅក្នុង​ទី​ប្រជុំជន​ក្រុង​សៀម​រាបវិញ ​មាន​ត​ម្លៃ​ជាង​១.៥០០ដុល្លារ​ឯណោះ​ក្នុង​មួយ​ម៉ែត្រ​ក្រឡា”។

លោក​បាន​មាន​ប្រសាសន៍ថា លោក​នឹង​លើក​បញ្ហា​នេះ​នៅ​កិច្ច​ប្រជុំ​ក្រុម​ប្រឹក្សា​ខេត្ត​នៅ​ដើម​ខែ​ក្រោយ។ លោក​បាន​បន្ត​ថា “ប្រសិន​បើ​ខ្ញុំ​រក​ឃើញ​ភាព​មិន​ប្រក្រតី​ណាមួយ ខ្ញុំនឹង​រាយការ​ណ៍​ទៅ​អង្គ​ភាព​ប្រឆាំង​អំពើ​ពុក​រលួយ”។

លោក ឃឹម ប៊ុនសុង​ អភិបាល​ខេត្ត​​​មិន​អាច​ទាក់​ទង​បាន​ទេ​កាល​ពី​ម្សិលមិញ។ លោក​ស្រី​ ​ម៉ែន នារីសុភ័គ ប្រធាន​ផ្នែក​ទំនាក់​ទំនង​កាក​បាទ​ក្រហម​កម្ពុជា​​បាន​បដិសេធ​មិន​ធ្វើ​អត្ថា​ធិប្បាយទេ។

ការដោះដូរ​ដី​បាន​ក្លាយ​ជា​បញ្ហាទូទៅ​ទៅហើយ​នៅក្រោម​រដ្ឋាភិបាល​របស់លោកនាយក​រដ្ឋមន្ត្រី ហ៊ុន សែន​ ដែល​ភរិយា​របស់លោក គឺ​លោកស្រី ប៊ុន រ៉ានី ជា​ប្រធាន​កាក​បាទ​ក្រហម​កម្ពុជា។

ជារឿយ​ៗ ការ​ដោះ​ដូរដីពាក់​ព័ន្ធ​ក្រុមហ៊ុន​មាន​ខ្នង​​ក្រាស់ ទទួលបាន​អចលនទ្រព្យ​សំខាន់ៗ ជា​ថ្នូរ​នឹង​ការ​សាងសង់​ការិយាល័យថ្មី​ដល់​រដ្ឋាភិបាល​លើ​ដី​ដែល​មាន​​តម្លៃថោក​ជាងច្រើន​​ និងស្ថិត​នៅកន្លែង​​ឆ្ងាយ​ៗ៕សារុន

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស