31 C
Phnom Penh

ពេល​កំណត់​កន្លង​ផុត តែ​គ្មាន​ការ​បណ្តេញ​ចេញ​នៅ​តំបន់​ទឹក​ធ្លាក់​ទេ

ដោយ ឌឹ ខេមបូឌា ដេលី

បទវិភាគ

កាលពី​ថ្ងៃ​អង្គារ អាជ្ញាធរ​ក្រុង​ព្រះសីហនុ​បាន​ទុក​ពេល​កំណត់​ឲ្យ​កន្លង​ផុត​ទៅ​ ដែល​គេ​បាន​បញ្ជា​ឲ្យ​ក្រុម​គ្រួសារ​ប្រជាពលរដ្ឋ ចាកចេញ​ពី​ដី​រដ្ឋ ដែល​ពួកគាត់​កំពុង​រស់​នៅ ប៉ុន្តែ​បាន​ព្រមាន​ពលរដ្ឋ​ទាំង​នោះ​ថា ត្រូវ​ចាកចេញ​ដោយ​ស្ម័គ្រ​ចិត្ត បើ​ពុំ​នោះ​ទេ​នឹង​ប្រឈម​នឹង​ការ​បណ្តេញ​ចេញ​ទាំង​បង្ខំ។

ពួកគេ​និយាយ​ថា ផ្ទះ​ខ្ទម​ប្រហែល​៤០​ទើប​សង់​ថ្មីៗ​ក្នុង​ចំណោម​ផ្ទះ​ខ្ទម​៩៩​ផ្សេងទៀត​ដែល​មាន​នៅ​តំបន់​ទឹក​ធ្លាក់​ក្បាលឆាយ​ស្រាប់ នៅ​ជាយ​ក្រុង ហើយដែល​ផ្ទះ​ទាំង​អស់​គឺ​សុទ្ធ​តែ​សង់​ខុស​ច្បាប់។

លោក ឈិត សុផាត ចៅ​សង្កាត់១ បាន​និយាយ​កាលពី​ថ្ងៃ​អង្គារ​ថា ក្រុម​មន្ត្រី​សង្កាត់​បាន​ចែកចាយ​ជា​លើក​ដំបូង នូវ​សេចក្តី​ជូន​ដំណឹង​ថ្ងៃ​ទី​៣​ខែ​វិច្ឆិកា ដែល​ចុះ​ហត្ថលេខា​ដោយ​លោក ចិន សារិន អភិបាលក្រុង​ព្រះសីហនុ បញ្ជា​ឲ្យ​គ្រួសារ​ទាំងអស់​ដែល​មកចូល​រស់នៅ​ក្នុង​តំបន់​នោះ​ក្រោយ​ថ្ងៃទី​២៥​ខែ​មិថុនា ត្រូវរុះរើ​ផ្ទះ​របស់​ខ្លួន​ចេញ​នៅ​ត្រឹម​ថ្ងៃ​អង្គារ​នេះ។

លោក​បាន​និយាយ​ថា “យើង​បាន​ផ្សព្វផ្សាយ​ព័ត៌មាន​នេះ​ដើម្បី​រំឭក​ម្ចាស់​ផ្ទះ២៨​ខ្នង​នោះ​ឲ្យ​រើ​ផ្ទះ​ចេញ​ដោយ​ខ្លួន​ឯង។ ប្រសិនបើ​មិន​រើ​ចេញ​ទេ…​អាជ្ញាធរ​នឹង​រុះរើ​ផ្ទះ​ទាំង​នោះ”។ លោក សុផាត បាន​បដិសេធ​មិន​ប្រាប់​ថា ពេលណា​អាជ្ញាធរ​នឹង​ចាត់​វិធានការ​ទេ។

កាលពី​ថ្ងៃ​ច័ន្ទ ប៉ូលិស​ប្រដាប់​អាវុធ កម្លាំង​រាជអាវុធហត្ថ ទាហាន និង​មន្ត្រី​រដ្ឋបាល​ព្រៃ​ឈើ​រាប់​សិប​នាក់ បាន​បោះ​ជំរំ​នៅ​ជិត​កន្លែង​ទឹក​ធ្លាក់​នោះ រារាំង​កំុ​ឲ្យ​មាន​ការសាងសង់​ខុស​ច្បាប់​ទៀត។

ការ​មកដល់​របស់​មន្ត្រី​ទាំង​នេះ​បាន​កើត​មាន​ឡើង​បន្ទាប់ពី​អាជ្ញាធរ​បាន​បំផ្លាញ​ផ្ទះ​៨​ខ្នង​កាលពី​ថ្ងៃ​ទី​១​ខែ​វិច្ឆិកា បណ្តាល​ឲ្យ​ប្រជាពលរដ្ឋ​តវ៉ា​ដោយ​បិទ​ផ្លូវ​ជាតិ​លេខ​៤។

អ្នកស្រី ខាត លីដា អាយុ ២៩​ឆ្នាំ ជា​អ្នក​ភូមិ​ដែល​ផ្ទះ​របស់​គាត់​ស្ថិត​ក្នុង​ចំណោម​ផ្ទះ​៨​ខ្នង​ត្រូវ​គេ​បំផ្លាញ​ចោល​នោះ បាន​និយាយ​ថា សហគមន៍​នេះ​បាន​ត្រៀម​តវ៉ា​ប្រឆាំង​នឹង​ការ​បណ្តេញ​ចេញ​ណាមួយ​ដែល​នឹង​កើត​ឡើង។

អ្នកស្រី លីដា បាន​និយាយ​ថា “ប្រសិនបើ​អាជ្ញាធរ​រុះរើ​ផ្ទះ​របស់​យើង ប្រជាជន​របស់​យើង​នឹង​តវ៉ា​តប​ត​វិញ​ជា​មិន​ខាន”។ អ្នកស្រី​បាន​អះអាង​ថា អ្នកស្រី​បាន​ទិញ​ដី​ឡូតិ៍​នោះ​នៅ​ឆ្នាំ​២០១១​ពី​ប្រជាជន​មុន។

​លោក ស៊្រុន ស៊្រួន អភិបាល​រង​ខេត្ត​ព្រះសីហនុ ដែល​បាន​ដឹកនាំ​កម្លាំង​ចម្រុះ​ទៅ​កាន់​តំបន់​នោះ​កាលពី​ថ្ងៃ​ច័ន្ទ បាន​និយាយ​កាលពី​ថ្ងៃ​អង្គារ​ថា លោក​សង្ឃឹម​ថា ប្រជាពលរដ្ឋ​នឹង​រើ​លំនៅ​ចេញ​ដោយ​ស្ម័គ្រ​ចិត្ត ប៉ុន្តែ​បាន​សង្កត់​បញ្ជាក់​ថា អាជ្ញាធរ​នឹង​ប្រើ​កម្លាំង ប្រសិនបើ​ចាំបាច់។

លោក​បាន​និយាយ​ថា​ លោក​បារម្ភ​ថា សហគមន៍​ដែល​កំពុង​រីក​ធំ​នៅ​ក្បាលឆាយ នឹង​បង្ក​ជា​ការ​គំរាម​កំហែង​ដល់​កន្លែង​ទឹក​ធ្លាក់​នោះ ដែល​ជា​ប្រភព​ទឹកសាប​ដ៏​សំខាន់​មួយ​សម្រាប់​តំបន់​នៅ​ជុំ​វិញ។ លោក​បាន​និយាយ​បន្ថែម​ថា “តំបន់​នេះ​សំខាន់​ណាស់​ចំពោះ​ការ​រស់​នៅ​ប្រចាំ​ថ្ងៃ​របស់​ប្រជាពលរដ្ឋ​ទាំងអស់​នៅ​ខេត្ត​ព្រះ​សីហនុ”៕មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស