40.3 C
Phnom Penh

តុលាការ​បដិ​សេធ​មិន​​​ដោះលែង​មន្ត្រី​គណបក្ស​សង្គ្រោះជាត​ិ​ម្នាក់ឲ្យ​នៅ​ក្រៅ​ឃុំ

ដោយ ឌឹ ខេមបូឌា ដេលី

បទវិភាគ

​មួយ​ថ្ងៃ​បន្ទាប់ពី​លោក មាជ សុវណ្ណារ៉ា មន្ត្រី​គណបក្ស​សង្គ្រោះជាតិ​ដ៏​សំខាន់​ម្នាក់​ត្រូវ​បាន​ចាប់​យក​ទៅឃុំខ្លួន​ក្នុង​ពន្ធនាគារ​ពីបទ​ជាប់​ពាក់​​ព័ន្ធ​ក្នុង​​ការ​ប៉ះទង្គិច​គ្នា​នៅ​ការ​តវ៉ា​មួយ​កាល​ពី​ថ្ងៃ​ទី​១៥ ខែ​កក្កដា​ នៅទីលាន​ប្រជា​​ធិបតេយ្យនោះ ​កាលពី​ម្សិលមិញ សាលា​ឧទ្ធរណ៍​បាន​បដិសេធ​សំណើ​សុំ​នៅ​ក្រៅ​ឃុំ​ដល់​​មន្ត្រី​គណបក្ស​ប្រឆាំង​ម្នាក់​ទៀត​ដែល​កំពុង​ជាប់​ពន្ធនាគារ​នៅ​ឡើយ ជុំវិញ​ការ​ប្រឈម​មុខ​ដាក់​គ្នា​នេះ​។

កាលពី​ថ្ងៃទី​២៩ ខែ​កញ្ញា លោក ស៊ុំ វុទ្ធី សមាជិក​ក្រុម​ប្រឹក្សា​គណបក្ស​ប្រឆាំង​​ខណ្ឌ​ច្បារ​អំពៅ​ រាជ​ធានី​​​ភ្នំពេញ​ក្លាយជា​មន្ត្រី​គណបក្ស​សង្គ្រោះ​ជាតិ​ទី១២ ដែល​ត្រូវ​បានចាប់​ខ្លួន​ជុំវិញ​ការ​ប្រើ​អំពើ​ហិង្សា​កាលពី​ខែ​កក្កដា ដែល​ក្នុង​នោះ​ក្រុម​​អ្នក​តវ៉ា​បាន​តបតទៅលើ​សន្តិ​សុខ​ដែល​ប្រដាប់​ដោយ​ដំបង ដែល​ត្រូវ​បាន​បញ្ជូន​​ឲ្យ​មក​បំបែក​ពួកគេ​។

សាលា​ដំបូង​រាជធានី​ភ្នំពេញ​បាន​បដិសេធ​មិន​ផ្ដល់​ឲ្យ​លោក​ វុទ្ធី នៅ​ក្រៅ​ឃុំទេ​កាលពី​ថ្ងៃ​ទី​៨ ខែ​តុលា បើទោះ​ណា​ជា​បាន​ដោះ​លែង​មន្ត្រីគណបក្ស​ប្រឆាំង​១១​រូប​ផ្សេងទៀត​បន្ទាប់​ពី​មាន​ការ​ព្រមព្រៀង​នយោបាយ​កាលពី​ថ្ងៃទី​២២ ខែ​កក្កដា រវាង​លោក​នាយក​រដ្ឋមន្ត្រី ហ៊ុន សែន និង​លោក សម រង្ស៊ី ប្រធាន​គណបក្ស​សង្គ្រោះជាតិ​ ដែល​បាន​ធ្វើ​ឲ្យ​គណបក្ស​ប្រឆាំង​នេះ​បញ្ចប់​ការ​ធ្វើ​ពហិការ​មិន​ចូល​ប្រជុំ​សភា​ក៏ដោយ។

មេធាវី សន សុដាឡែន តំណាង​របស់​លោក វុទ្ធី បាន​មាន​ប្រសាសន៍​ថា កាលពី​ម្សិលមិញ​លោក សេង ស៊ីវុត្ថា ចៅក្រម​ប្រធាន​ក្រុម​ប្រឹក្សាជំនុំជម្រះ​បាន​តម្កល់​សេចក្ដី​សម្រេច​របស់​សាលា​ដំបូង​រាជធានី​ ដោយសារ​តែ​ភាព​ធ្ងន់ធ្ងរ​ និង​បទ​ចោទ​ប្រកាន់​ជា​ច្រើន​មក​លើ​កូនក្ដី​របស់​គាត់។

មេធាវី សុដាឡែន បាន​មាន​ប្រសាសន៍​ថា “ចៅក្រម​ ស៊ីវុត្ថា សម្រេច​ឲ្យ​ចុង​ចោទ​រូប​នេះ​ជាប់​ឃុំ​ដដែល ពីព្រោះ​គាត់​ត្រូវ​បាន​ចោទ​ប្រកាន់​ជា​ច្រើន​ករណី​”។

មេធា​វីរូបនេះបាន​បន្ថែម​ថា “យើង​នឹង​ប្ដឹង​​ទាស់​ដើម្បីសុំ​នៅ​ក្រៅ​ឃុំ​ទៅ​តុលាការ​កំពូល ប៉ុន្តែ​ខ្ញុំ​មិនទាន់​ប្រាកដ​អំពី​កាល​បរិច្ឆេទ​នៅ​ឡើយ​ទេ ពីព្រោះ​យើង​នឹង​ពិភាក្សា​បញ្ហា​នេះ​ជាមួយ​មេធាវី​ផ្សេង​ទៀត​ដើម្បី​ទទួល​បាន​​ព័ត៌មាន​លម្អិត​បន្ថែម​”។

​ការ​ចោទ​ប្រកាន់​មក​លើ​លោក វុទ្ធី រួម​មាន​ការ​ចូល​រួម​ក្នុង​កុបកម្ម ការ​ប្រើ​អំពើ​ហិង្សា​ដោយ​ចេតនា​មាន​ស្ថានទម្ងន់ទោស​ និង​ការ​ប្រើ​អំពើ​ហិង្សាប្រឆាំង​មន្ត្រី​សាធារណៈ ជា​បទ​ល្មើស​ដែល​អាច​​​មានទោស​ជាប់​ពន្ធនាគារ​ពី​៧ឆ្នាំ​ដល់​១៥​ឆ្នាំ។

លោក អុឹម សុផាន ព្រះរាជ​អាជ្ញា​សាលា​ឧទ្ធរណ៍​បាន​បញ្ជាក់​ថា សំណើសុំនៅ​ក្រៅឃុំរបស់​លោក​ វុទ្ធី ត្រូវ​បាន​បដិសេធ​ ប៉ុន្តែ​លោក​បាន​បដិសេធ​មិន​ធ្វើអត្ថាធិប្បាយ​​បន្ថែម​ឡើយ។

ចៅ​ក្រម​ ស៊ីវុត្ថា បាន​បដិសេធ​មិន​ធ្វើ​អត្ថាធិប្បាយ​អំពី​រឿង​ក្តីនេះ​ទេ ដោយ​លើក​ឡើង​​ពី​កំណែ​ទម្រង់​មួយ​ក្នុង​ចំណោម​ច្បាប់​កំណែទម្រង់​បី​ទាក់​ទង​ប្រព័ន្ធតុលាការ​ដ៏ចម្រូង​ចម្រាស​ដែល​ត្រូវ​បាន​អនុម័តដោយ​រដ្ឋសភា ដែល​មាន​តែ​សមាជិក​គណបក្ស​ប្រជា​ជន​កម្ពុជា​ប៉ុណ្ណោះ​កាល​ពី​ខែ​ឧសភា។

លោក​បានមាន​ប្រសាសន៍​ថា “ខ្ញុំ​មិន​អាច​អត្ថាធិប្បាយ​បានទេ។ ផ្អែក​តាម​ច្បាប់​ថ្មី​ស្ដីពី​លក្ខន្តិកៈ​ចៅក្រម និងព្រះរាជអាជ្ញា​ យើង​ត្រូវ​សុំ​ការ​អនុញ្ញាត​ពី​ឧត្តម​ក្រុម​ប្រឹក្សា​នៃ​អង្គ​ចៅក្រម”។

ដោយចាក​ចេញពី​តុលាការ អ្នកស្រី ម៉ក់ ចាន់ ប្រពន្ធ​របស់​លោក វុទ្ធី បាន​ច្រាន់​ចោល​សេច​ក្ដី​សម្រេច​នេះ​​។ អ្នកស្រី​បាន​និយាយលាយឡំសំឡេង​យំ​ថា “វា​អយុត្តិ​ធម៌​ណាស់​…ខ្ញុំ​មិន​អាច​និយាយ​អ្វី​លើសពីនេះបាន​​ទេ​។ គាត់​ជា​មនុស្ស​ល្អ ហើយ​មិន​ដែល​ប្រព្រឹត្ត​អំពើ​អាក្រក់​​លើ​នរណា​ម្នាក់​ឡើយ​”៕ សារុន​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស