27 C
Phnom Penh

សាលាដំបូង​ខេត្ត​កំពង់​ចាម​ដោះលែង​​កម្មករ​ប្រាំនាក់ឲ្យ​នៅក្រៅ​ឃុំ​

ដោយ ឌឹ ខេមបូឌា ដេលី

បទវិភាគ

យោង​​​តាម​​​មេធាវី​​​បាន​​​ឲ្យ​​​ដ​​​ឹង​​​ថា កាល​​​ពីម្សិលមិញ សាលា​​​ដំបូង​​​ខេត្ត​​​កំពង់​​​ចាម​​​បាន​​​ដោះ​​​លែង​​​កម្មករ​​​រោង​​​ចក្រ​​​ប្រាំ​​​នាក់​​​ឲ្យ​​​នៅ​​​ក្រៅ​​​ឃុំ​​ ​​​រយៈ​​​ពេល​​​បី​​​សប្តាហ៍​​​ បន្ទាប់​​​ពី​​​ពួក​​​គេ​​​ត្រូវ​​​បាន​​​ចោទប្រកាន់​​​ពី​​​បទ​​​ញុះ​​​ញង់​​​ឲ្យ​​​មាន​​​ការ​​​ប្រើ​​​អំពើ​​​ហិង្សា​​​ និង​​​បំផ្លាញ​​​ទ្រព្យ​​​សម្បត្តិ​​​ អំឡុង​​​ការ​​​តវ៉ា​​​ដែល​​​បាន​​ក្លាយ​​​ជា​​​ហិង្សា​​​នៅ​​​រោង​​​ចក្រ​​​ស្បែក​​​ជើង Juhui កាល​​​ពី​​​ចុង​​​ខែ​​​មុន​​​។

ការ​​​ប៉ះ​​​ទង្គិច​​​គ្នា​​​នៅ​​​រោង​​​ចក្រ​​​ស្ថិត​​​ក្នុង​​​ស្រុក​​​ជើង​​​ព្រៃ​​​នេះបាន​​​កើត​​​ឡើង​​​កាល​​​ពី​​​ថ្ងៃ​​​ទី​​​២៥ ខែ​​​តុលា បន្ទាប់​​​ពី​​​មានការ​​​ធ្វើ​​​កូដ​​​កម្ម​​​រយៈ​​​ពេល​​​ជិត​​​ពីរ​​​ខែ​​​ជុំ​​​វិញ​​​ការ​​​ទាម​​​ទារ​​​ប្រាក់​​​ឧបត្ថម្ភ​​ និ​​​ងប្រាក់​​​កម្រៃ​​​ផ្សេង​​​ៗ​​​ទៀត ដែល​​​អំឡុង​​​ពេល​​​នោះ​​​ រោងចក្រ​​​​បាន​​​បញ្ឈប់​​​ការងារ​កម្មករ​​​ទាំង​៥.០០០នាក់​​​  ហើយ​​​បន្ទាប់​​​មក​​​បាន​​​ទទួល​​​យក​​​កម្មករ​​​៣.០០០នាក់​​​ឲ្យ​​​ចូល​​​ធ្វើ​​​ការ​​​វិញ​​​។

កម្មករ​​​ដែល​​​មិន​​​ត្រូវបានទទួល​​​យកឲ្យ​ចូលធ្វើការ​វិញ​​​​ចំនួន​​​២.០០០នាក់​​​បាន​​​អះ​​​អាង​​​ថា ពួក​​​​គេ​​​ស្ថិត​​​ក្នុង​​​បញ្ជី​​​ខ្មៅ​​​ដោយសារ​​​ពួក​​​គេ​​​ជា​​​សមាជិក​​​របស់​​​សម្ព័ន្ធ​​​សហជីព​​​ប្រជា​​​ធិបតេយ្យ​​​កម្មករ​​​កាត់​​​ដេរ​​​កម្ពុជា (ស៊ីខៅឌូ) ដែល​​​បាន​​​ដឹក​​​នាំ​​​កូដ​​​កម្ម​​​។

នៅ​​​ថ្ងៃ​​​នៃ​​​ការ​​​ប៉ះទង្គិច​​​គ្នា​​​នោះ​​​ កម្មករ​​​​១០​​​នាក់​​​ត្រូវ​​​បាន​​​ចាប់​​​ខ្លួន បន្ទាប់​​​ពី​​​នគរ​​​បាល​​​បាន​​​រក​​​ឃើញ​​​ដំបង ដាវ​​​សាម៉ូរ៉ៃ និង​​​ចំពាម​​​កៅស៊ូ​​​នៅ​​​កន្លែង​​​កើត​​​ហេតុ​​​ ជា​​​ភ័ស្តុ​​​តាង​​​នៃ​​​ការ​​​ញុះ​​​ញង់​​​​​ ប៉ុន្តែ កម្មករ​​​ប្រាំ​​​នាក់​​​ត្រូវ​​​បាន​​​ដោះ​​​លែង​​​វិញ​នៅ​​​ថ្ងៃ​បន្ទាប់​​​ ដោយសារ​​​ខ្វះ​​​ភ័ស្តុ​​​តាង។

សេចក្តីបង្គាប់​​​ឲ្យ​​​ដោះ​​​លែង​​​នៅ​​​ក្រៅ​​​ឃុំ​​​កាល​​​ពី​​​ម្សិល​​​មិញ ដែល​​​ចុះ​​​ហត្ថលេខា​​​ដោយ​​​លោក ប៉ុក សុវណ្ណមុនី ចៅ​​​ក្រម​​​សើុប​​​សួរ​​​លើក​​​ឡើង​​​ថា ព្រះ​​​រាជ​​​អាជ្ញា​​​យល់​​​ព្រម​​​ដោះ​​​លែង​​​មនុស្សប្រាំ​​​នាក់​​​ដែល​​​នៅ​​​សល់​​​ បន្ទាប់​​​ពី​​​មាន​​​សំណើ​​​ពី​​​លោក គឹម សុជាតិ​​​ មក​ពី​សហភាព​ការងារ​កម្ពុជា​ជា​​​មេធាវី​​​របស់​​​ពួក​​​គេ​​​។

សេចក្តី​​​បង្គាប់​​​នេះ​​​មាន​​​ខ្លឹម​​​សារ​​​ថា “តុលាការ​​​បាន​​​សម្រេច​​​ដោះ​​​លែង​​​ជន​​​ជាប់​​​ចោទ​​​ទាំង​​​ប្រាំ​​​នាក់​​​នេះ​​​ឲ្យ​​​នៅ​​​ក្រៅ​​​ឃុំ​​​ ដោយ​​​សារ​​​ការ​​​ដោះ​​​លែង​​​ពួក​​​គេ​​​មិន​​​ធ្វើ​​​ឲ្យ​​​ប៉ះពាល់​​ខ្លាំង​ដល់​​​និតីវិធី​​​ច្បាប់ទេ ប៉ុន្តែ ពួក​​​គេ​​​ត្រូវ​​​មក​​​បង្ហាញ​​​ខ្លួន​​​នៅ​​​តុលាការ​​​នៅ​​​ពេល​​​ត្រូវ​​​បាន​​​កោះ​​​ហៅ”។

អ្នក​​​ទាំង​​​ប្រាំ​​​នាក់​​​ដែល​​​ត្រូវ​​​បាន​​​ដោះ​​​លែង​​​គឺ​​​​ឈ្មោះ ឃុន សុខុម អាយុ​​​៣១​​​ឆ្នាំ មន្ត្រី​​​នៅ​​​ស៊ីខៅឌូ មុំ​​​ សារ៉ែម អាយុ​​​២៩​​​ឆ្នាំ កម្មករ​​​ដែល​​​ត្រូវ​​​បាន​​​បណ្តេញ​​​ចេញ និង​​​ជា​​​អតីត​​​តំណាង​​​សហជីព​​​នៅ​​​រោង​​​ចក្រ​​​នេះ​​​ បៀន សារីម អាយុ​​​៣៥​​​ឆ្នាំ​​​ ជា​​​​​​កម្មករ​​​ដែល​​​ត្រូវ​​​បាន​​​បណ្ដេញ​​​ចេញ​​​ម្នាក់​​​ទៀត និង​​​អ្នក​​​បើក​​​បរ​​​រថយន្ត​​​ពីរ​​​នាក់​​​ដែល​​​បាន​​​ដឹក​​​កម្មករ​​​ទៅ​​​រោង​​​ចក្រ គឺ​​​ឈ្មោះ នេត ពិសី អាយុ​​​២២​​​ឆ្នាំ និង​​​ កង​​​ សាវុធ អាយុ​​​២៤​​​ឆ្នាំ​​​។

លោក សុជាតិ​​​ បាន​​​មាន​​​ប្រសាសន៍​​​កាល​​​ពីម្សិលមិញ​​​ថា “ចៅ​​​ក្រម​​​សើុប​​​សួរ​​​បាន​​​ដោះ​​​លែង​​​កូន​​​ក្តី​​​របស់​​​ខ្ញុំ​​​នៅ​​រសៀលនេះ​​​ដោយ​​​​​​មាន​​​លក្ខខណ្ឌ​​​ថា អ្នក​​​ទាំង​​ប្រាំ​​​នាក់​​​នេះ​​​ត្រូវ​​​បង្ហាញ​​​ខ្លួន​​​នៅ​​​ពេល​​​ដែល​​​តុលាការ​​​ត្រូវ​​​ការ​​​ពួក​​​គេ”។

លោក សុខុម នៅ​​​ស៊ីខៅឌូ បាន​​​មាន​ប្រសាសន៍ថា សេចក្តី​​​សម្រេច​​​របស់​​​តុលាការ​​​ក្នុង​​​ការ​​​ដោះ​​​លែង​​​ពួកគេ​​​ឲ្យ​​​នៅ​​​ក្រៅ​​​ឃុំនេះ ​​​មិន​​​តំណាង​​​ឲ្យ​​​ភាព​​​យុត្តិធម៌​​​ទេ​​​។

លោក​​​បាន​​​មាន​​​ប្រសាសន៍​​​តាម​​​ទូរស័ព្ទ ខណៈ​​​ពេល​​​ចេញ​​​ពី​​​ពន្ធនាគារ​​​កាល​​​ពីម្សិលមិញ​​​ថា “ត្រឹមការ​​​ដោះ​​​លែង​​​ឲ្យ​​​នៅ​​​ក្រៅ​​​ឃុំ​​​មិន​​​យុត្តិធម៌​​​សម្រាប់​​​ខ្ញុំ​​​ ឬ​​​អ្នក​​​បួន​​​នាក់​​​ផ្សេង​​​ទៀត​​​ទេ។ អ្វី​​​ដែល​​​យុត្តិធម៌​​​គឺ​​​​​​តុលាការ​​​ត្រូវលើក​​​លែង​​​ការ​​​ចោទ​​​ប្រកាន់​​​មក​​​​​​លើ​​​ពួក​​​យើង ពីព្រោះ​​​យើង​​​មិន​​​មាន​​​ពិរុទ្ធ​​​ភាព​​​ដូច​​​អ្វីដែល​​​រោងចក្រ​​​​បាន​​​ចោទ​​​ប្រកាន់​​​មកលើ​ពួកយើង​​នោះ​​​ឡើយ​​​”៕សារុន​​​​​​​​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស