34.8 C
Phnom Penh

សហព័ន្ធ​​​សហជីព​​​អន្តរ​​​ជាតិ​​​​​​លើក​​​ឡើង​​​ថា ប្រាក់​​​ខែ​​​គោល​​​ថ្មី​​​នៅ​​​មាន​​​ចំនួន​​​ទាប​​​​​​ខ្លាំង​​​ណាស់​​​

ដោយ ឌឹ ខេមបូឌា ដេលី

បទវិភាគ

សហព័ន្ធ​​​សហជីព​​​អន្តរ​​​ជាតិ​​​ចំនួន​​​បី​​​បាន​​​ចេញ​​​មក​​​ប្រឆាំង​​​នឹង​​​សេចក្តី​​​សម្រេច​​​របស់​​​រដ្ឋាភិបាល​​​កាល​​​ពី​​​ថ្ងៃ​​​ពុធ ដែល​​​ដំឡើង​​​ប្រាក់​​​ខែ​​​គោល​​​ថ្មី​​​សម្រាប់​​​កម្មករ​​​រោង​​​ចក្រ​​​នៅ​​​កម្ពុជា​​​ពី​​​១០០​​​ដុល្លារ​​​ដល់​​​១២៨​​​ដុល្លារ​​​នោះ​​​។

សហជីព​​​ក្នុង​​​ស្រុក​​​នៅ​​​មិន​​​ទាន់​​​សម្រេច​​​ថា តើ​​​ត្រូវ​​​ទទួលយក​​​ការ​​​ដំឡើង​​​ប្រាក់​​​ខែ​​​គោល​​​ថ្មី​​​​​​នេះ​​​ ឬ​​​ត្រូវ​​​ត្រឡប់​​​ទៅ​​​ធ្វើ​​​កូដ​​​កម្ម​​​វិញ​​​ ឬ​​​យ៉ាង​​​ណា​​​នោះ​​​ឡើយ​​​ ប៉ុន្តែ បាន​​​​​​ច្រាន​​​ចោល​​​ការ​​​ព្រមាន​​​ចុង​​​ក្រោយ​​​ពី​​​រោង​​​ចក្រ​​​ដែល​​​ថា ការ​​​ដំឡើង​​​ប្រាក់​​​ខែ​​​គោល​​​​​​ថ្មី​​​នេះ​​​នឹង​​​បង្ខំ​​​ឲ្យ​​​រោង​​​ចក្រ​​​ភាគ​​​ច្រើន​​​បិទទ្វារ​​​ ហើយ​​​ធ្វើ​​​ឲ្យ​​​បាត់​​​បង់​​​ការ​​​ងារ​​​រាប់​​​មឺុន​​​នោះ​​​។

ក្រសួង​​​ការងារ​​​បាន​​​ប្រកាស​​​អំពី​​​ប្រាក់​​​ខែ​​​គោល​​​ថ្មី​​​កាល​​​ពី​​​រសៀល​​​ថ្ងៃ​​​ពុធ ដែល​​​​​​ត្រូវ​​​បាន​​​ដំឡើង​​​ចំនួន​​​ប្រាំ​​​ដុល្លារ ពី​​​លើ​​​ប្រាក់​​​ខែ​​​គោល​​​​​​ចំនួន​​​១២៣ដុល្លារ ដែល​​​គណៈកម្មាធិការ​​​ប្រឹក្សា​​​ការ​​​ងារ​​​បាន​​​កំណត់​​​នៅ​​​ក្នុង​​​ការ​​​បោះ​​​ឆ្នោត​​​សម្ងាត់​​​មួយ​​​នា​​​ព្រឹក​​​នោះ​​​។ ក្នុង​​​ចំណោម​​​សមាជិក​​​ទាំង​​​២៨​​​រូប​​​របស់​​​គណៈកម្មាធិការ​​​នេះ​​​ ដែល​​​មាន​​​១៤​​​រូប​​​មក​​​ពី​​​​​​រដ្ឋាភិបាល​​​ ​​​ប្រាំពីរ​​​រូប​​​មក​​​ពី​​​​​​សហជីព​​​ និង​​​ប្រាំពីរ​​​ូប​​​ទៀត​​​មក​​​ពី​​​រោង​​​ចក្រ​​​នោះ គឺ​​​មាន​​​តែ​​​សមាជិក​​​​​​ពីរ​​​រូប​​​ប៉ុណ្ណោះ​​​​​​​​​​​​​​​​​​​​​បាន​​​បោះ​​​​​​ឆ្នោត​​​គាំទ្រ​​​ប្រាក់​​​ខែ​​​គោល​​​១៤០​​​ដុល្លារ​​​ដែល​​​សហជីព​​​កំពុង​​​ទាម​​​ទារ​​​។

នៅ​​​ក្នុង​​​សេចក្តី​​​ថ្លែង​​​ការណ៍​​​រួម​​​មួយ បន្ទាប់​​​ពី​​​សេចក្តី​​​ប្រកាស​​​នៃ​​​ការ​​​ដំឡើង​​​ប្រាក់​​​ខែ​​​គោល​​​ថ្មី​​​ ​​​សហជីព​​​អន្តរ​​​ជាតិ​​​ចំនួន​​​បី​​​ដែល​​​មាន​​​ដូច​​​ជា​​​ សហជីព​​​ IndustriALL សហជីព​​​UNI Global Union និង សហជីព​​​ International Trade Union Confederation បាន​​​លើក​​​ឡើង​​​ថា សេច​​​ក្តី​​​សម្រេច​​​របស់​​​ក្រសួង​​​ការ​​​ងារ​​​ “បង្ហាញ​​​ឲ្យ​​​ឃើញ​​​ពី​​​ការ​​​ខ្ជះ​​​ខ្ជាយ​​​ឱកាស​​​មួយ​​​ផ្សេង​​​ទៀត​​​”។

លោក​​​ Jyrki Raina អគ្គលេខាធិការ​​​សហជីព​​​ Industri ALL បាន​​​មាន​​​ប្រសាសន៍​​​ថា “ប្រាក់​​​ខែ​​​គឺ​​​មិន​​​មែន​​​គ្រាន់​​​តែ​​​ចាំ​​​បាច់​​​សម្រាប់​​​កម្មករ​​​ដើម្បី​​​រស់​​​នៅ​​​ដោយ​​​ភាព​​​ថ្លៃ​​​ថ្នូរ​​​នោះ​​​ទេ ប៉ុន្តែ វា​​​ក៏​​​ចាំ​​​បាច់​​​សម្រាប់​​​ការ​​​ធ្វើ​​​ឲ្យ​​​ឧស្សាហកម្ម​​​កាត់​​​ដេរ​​​មាន​​​និរន្តរភាព​​​ផង​​​ដែរ។ ហេតុ​​​ដូច្នេះ​​​ហើយ​​​ ទើប​​​ក្រុមហ៊ុន​​​សម្លៀក​​​បំពាក់​​​​​​​​​អន្តរ​​​ជាតិ​​​យីហោ​​​ល្បីៗ​​​ដែល​​​នាំ​​​មុខ​​​គេ​​​បាន​​​បង្ហាញ​​​ការ​​​គាំទ្រ​​​របស់​​​ខ្លួន​​​ចំពោះ​​​ប្រាក់​​​ខែ​​​គោល​​​ដ៏​​​សម​​​រម្យ​​​មួយ​​​”។

អំឡុង​​​ការ​​​ចរចា​​​​​​ដ៏​​​តាន​​​តឹង​​​មុន​​​សេចក្តី​​​សម្រេច​​​លើ​​​ការ​​​ដំឡើង​​​ប្រាក់​​​ខែ​​​គោល​​​នៅ​​​សប្តាហ៍​ ​​​នេះ​​​ក្រុមហ៊ុន​​​សម្លៀក​​​បំពាក់​​​យីហោ​​​ល្បីៗ​​​បំផុត​​​មួយ​​​ចំនួន​​​ដែល​​​សព្វ​​​ថ្ងៃ​​​បញ្ជា​​​ទិញ​​​សម្លៀក​​​ពាក់​​​​​​មាន​​​ប្រភព​​​ចេញ​​​ពី​​​ប្រទេស​​​កម្ពុជា​​​​​​បាន​​​សន្យា​​​ផ្តល់​​​តម្លៃ​​​ខ្ពស់​​​ជាង​​​មុន​​​សម្រាប់​​​ការ​​​បញ្ជា​​​ទិញ​​​របស់​​​ខ្លួន ដើម្បី​​​ជួយ​​​រោង​​​​​​ចក្រ​​​មានលទ្ធភាព​​​ដំឡើង​​​ប្រាក់​​​ខែ​​​ជូន​​​កម្មករ​​​។

លោក Riana បាន​​​មាន​​​ប្រសាសន៍​​​បន្ត​​​ថា “យើង​​​​​​​​​ចង់​​​​​​ឲ្យ​​​ក្រុមហ៊ុន​​​សម្លៀក​​​បំពាក់​​​យីហោ​​​ល្បីៗ​​​រក្សា​​​ការសន្យា​​​របស់​​​ខ្លួន ហើយ​​​យើង​​​នឹង​​​បន្ត​​​ធ្វើ​​​ការ​​​ងារ​​​ជា​​​មួយ​​​ពួ​​​កគេ​​​លើ​​​យន្ត​​​ការ​​​មួយ​​​ដែល​​​នឹង​​​ដំឡើង​​​ប្រាក់​​​ខែ​​​សម្រាប់​​​កម្មករ​​​នៅ​​​ក្នុង​​​រោង​​​ចក្រ​​​​​​ដែល​​​ផ្គត់​​​ផ្គង់​​​សម្លៀក​​​បំពាក់​​​នានា​​​”។

ប៉ុន្តែ សមាគម​​​រោង​​​ចក្រ​​​កាត់​​​ដេរ​​​នៅ​​​កម្ពុជា (GMAC) ដែល​​​តំណាង​​​ឲ្យ​​​រោង​​​ចក្រ​​​ភាគ​​​ច្រើន​​​បាន​​​លើក​​​ឡើង​​​ថា វា​​​នៅ​​​មិន​​​ទាន់​​​​​​​​អាច​​​ធ្វើ​​​ឲ្យ​​​មាន​​​ការ​​​ផ្លាស់​​​ប្តូរ​​​អ្វី​​​បាន​​​នៅ​​​ឡើយ​​​ទេ​​​ ព្រោះ​​​ការសន្យា​​​នេះ​​​​​​ត្រូវ​​​បាន​​​ធ្វើ​​​ឡើង​​​តែ​​​ពីអ្នក​​​បញ្ជាទិញ​​​អន្តរ​​​ជាតិ​​​មួយ​​​ចំនួន​​​តូច​​​​​ប៉ុណ្ណោះ​​​។​​​ហើយ​​​បន្ទាប់​​​ពី​​​​​​ក្រសួង​​​ការងារ​​​ប្រកាស​​​អំពី​​​ប្រាក់​​​ខែ​​​គោល​​​ថ្មី​​​កាល​​​ពី​​​ថ្ងៃ​​​ពុធ  GMAC បាន​​​ព្រមាន​​​ថា សមាជិក​​​របស់​​​ខ្លួន​​​ភាគ ច្រើន​​​ឥឡូវ​​​នេះ​​​កំពុង​​​ស្ថិត​​​ក្នុង​​​ដំណាក់​​​កាល​​​ដ៏ធ្ងន់​​​ធ្ងរ​​​មួយ​​​ដែល​​​អាច​​​នឹង​​​បិទ​​​ទ្វារ​​​។

លោក ណាង សុធី ​​​តំណាង​​​រោង​​​ចក្រ​​​មួយ​​​​​​បាន​​​លើក​​​ឡើង​​​ថា ប្រាក់​​​ខែ​​​គោល​​​ថ្មី​​​អាច​​​ធ្វើ​​​ឲ្យ​​​រោង​​​ចក្រ​​​ប្រហែល​​​៥០​​​នឹង​​​ដក​​​ខ្លួន​​​ចេញ​​​ពី​​​ប្រទេស​​​កម្ពុជា ដោយ​​​នឹង​​​ធ្វើ​​​ឲ្យ​​​បាត់​​​បង់​​​ការ​​​ងារ​​​យ៉ាង​​​តិច​​​៥០.០០០។

ឧស្សាហកម្ម​​​កាត់​​​ដេរ​​​ទាំង​​​មូល​​​បាន​​​ផ្តល់​​​ការ​​​ងារ​​​ឲ្យ​​​ពល​​​រដ្ឋ​​​កម្ពុជា​​​ប្រមាណ​​​ជាង​​​៦០០.០០០​​​នាក់​​​ ដែល​​​​​​​​​ភាគ​​​ច្រើន​​​ជា​​​ស្ត្រី​​​វ័យ​​​ក្មេង​​​។

GMAC បាន​​​លើក​​​ឡើង​​​ទៀត​​​ថា ដោយ​​​រួម​​​មាន​​​ទាំង​​​ប្រាក់​​​​​​រង្វាន់​​​​​​ព​​​ី​​​រោង​​​ចក្រ​​​បន្ថែម​​​ផង​​​នោះ​​​ប្រាក់​​​ខែ​​​គោល​​​ថ្មី​​​នេះ​​​នឹង​​​អាច​​​កើន​​​ឡើង​​​ដល់​​​១៤៥​​​ដុល្លារ​​​ក្នុង​​​មួយ​​​ខែ​​​ ដោយ​​​វា​​​ស្រប​​​តាម​​​ប្រាក់​​​ខែ​​​ខ្ពស់​​​បំផុត​​​នៅ​​​ប្រទេស​​​វៀតណាម​​​ ជា​​​ទី​​​ដែល​​​កម្មករ​​​រោង​​​ចក្រ​​​កាត់​​​ដេរ​​​មាន​​​ផលិតភាព​​​ការ​​​ងារ​​​ខ្ពស់​​​ជាង​​​ឆ្ងាយ​​​ណាស់​​​​​​​​​។

ទោះ​​​ជា​​​យ៉ាង​​​ណា កាល​​​ពី​​​ខែ​​​តុលា លោក កែន លូ អគ្គលេខាធិការ​​​ GMAC បាន​​​លើក​​​ឡើង​​​ថា ប្រាក់ខែ​​​ដែល​​​អាច​​​ប្រកួត​​​ប្រជែង​​​ជាមួយ​​​​​​ប្រទេស​​​វៀត​​​ណាម​​​បាន​​​គឺ ១៤៩​​​ដុល្លារ ប៉ុន្តែ ប្រាក់​​​ខែ​​​ខ្ពស់​​​បំផុត​​​ដែល​​​រោង​​​ចក្រ​​​នៅ​​​កម្ពុជា​​​អាច​​​រ៉ាប់រង​​​បាន​​​នោះ​​​​​​គឺ​​​១៣២​​​ដុល្លារ ដោយ​​​វា​​​លើស​​​ចំនួន​​​បួន​​​ដុល្លារ​​​ពី​​​ប្រាក់​​​ខែ​​​ដែល​​​ក្រសួង​​​បាន​​​កំណត់​​​។​​​

នៅ​​​ក្នុង​​​ករណី​​​ផ្សេង​​​ទៀត​​​ សហជីព​​​ដែល​​​កំពុង​​​ទាម​​​ទារ​​​ឲ្យ​​​ដំឡើង​​​ប្រាក់​​​ខែ​​​គោល​​​ថ្មី​​​ដល់​​​​​​១៤០​​​ដុល្លារ ឬ​​​ក៏​​​ខ្ពស់​​​ជាង​​​នេះ បាន​​​លើក​​​ឡើង​​​ថា ការ​​​និយាយ​​​ថា​​​រោង​​​ចក្រ​​​ភាគ​​​ច្រើន​​​អាច​​​នឹង​​​បិទទ្វារ​​​នោះ គឺ​​​គ្រាន់​​​តែ​​​ជា​​​ការ​​​បន្លាច​​​មួយ​​​ពី​​​រោង​​​ចក្រ​​​ដើម្បី​​​ធ្វើ​​​ឲ្យ​​​ខ្លួន​​​​​​នៅ​​​តែ​​​អាច​​​ទទួល​​​បាន​​​ប្រាក់​​​ចំណេញ​​​ច្រើន​​​ដដែល​​​ប៉ុណ្ណោះ​​​។

លោក ជា​​​ មុនី ប្រធាន​​​សហជីព​​​សេរីកម្ម​​ករ​​​​​​បាន​​​មាន​​​ប្រសាសន៍​​​ថា “ទោះ​​​បី​​​ជា​​​ប្រាក់​​​ខែគោល​​​ត្រូវ​​​បាន​​​ដំឡើង​​​ដល់​​​២០០​​​ដុល្លារ​​​ក៏​​​ដោយ​​​ ក៏​​​រោង​​​ចក្រ​​​ធំៗ​​​ទាំង​​​នេះ​​​នឹង​​​មិន​​​បិទទ្វារ​​ដែរ​​​។ មាន​​​តែ​​​រោង​​​ចក្រ​​​តូច​​​ៗ​​​ ដែល​​​គ្មាន​​​អាជ្ញាប័ណ្ណ​​​ប៉ុណ្ណោះ​​​នឹង​​​បិទទ្វារ​​​នោះ”។

លោក ប៉ាវ ស៊ីណា ប្រធាន​​​សហព័ន្ធ​​​សហជីព​​​ចលនា​​​កម្មករ​​​បាន​​​ច្រាន​​​ចោល​​​ការ​​​ព្រមាន​​​របស់​​​ GMAC ដោយ​​​លើក​​​ឡើង​​​ថា នេះ​​​គ្រាន់​​​តែ​​​ជា “លេស” ដើម្បី​​​ព្យាយាម​​​ធ្វើ​​​ឲ្យ​​​ប្រាក់​​​ខែ​​​គោល​​​នៅ​​​តែ​​​ទាប​​​ដដែល​​​ប៉ុណ្ណោះ​​​។

ខណៈ​​​​​​មាន​​​តែ​​​សមាជិក​​​ពីរ​​​រូប​​​​​​របស់​​​គណៈកម្មាធិការ​​​ប្រឹក្សា​​​ការ​​​ងារ​​​បោះ​​​ឆ្នោត​​​គាំទ្រ​​​ការ​​​ទាម​​​ទារ​​​​​​ដំឡើង​​​​​​ប្រាក់​​​ខែ​​​គោល​​​ឲ្យ​​​ដល់​​​១៤០​​​ដុល្លារ​​​កាល​​​ពី​​​ថ្ងៃ​​​ពុធ​​​នោះ លោក​​​ ជា​​​ មុនី​​​ និង​​​លោក ប៉ាវ ស៊ីណា បាន​​​លើក​​​ឡើង​​​ថា ការ​​​ដំឡើង​​​ប្រាក់​​​ខែ​​​គោល​​​ថ្មី​​​ត្រឹម​​​តែ​​​១២៨​​​ដុល្លារ​​​នេះ​​​គឺ​​​វា​​​នៅ​​​មាន​​​​​​ចំនួន​​​ទាប​​​ខ្លាំង​​​ណាស់​​​ ហើយ​​​ថា ខ្លួន​​​នឹង​​​ជួប​​​ជា​​​មួយ​​​សមាជិក​​​ខ្លួន​​​នៅ​​​ប៉ុន្មាន​​​ថ្ងៃ​​​ខាង​​​មុខ​​​នេះ​​​​​​មុន​​​ពេល​​​សម្រេច​​​ថា តើ​​​ត្រូវ​​​ទទួល​​​យក​​​ប្រាក់​​​ខែ​​​គោល​​​ថ្មី​​​នេះ​​​ ឬ​​​អំពាវ​​​នាវ​​​ឲ្យ​​​មាន​​​​​​ការ​​​ធ្វើ​​​កូដ​​​កម្ម​​​ និង​​​ការ​​​តវ៉ា​​​បន្ត​​​ទៀត​​​ ដើម្បី​​​ទាម​​​ទារ​​​ឲ្យ​​​មាន​​​ការ​​​ដំឡើង​​​ប្រាក់​​​ខែ​​​លើស​​​ពី​​​នេះ​​​ ឬ​​​យ៉ាង​​​ណា​​​។

លោក​​​ ប៉ាវ ស៊ីណា ក៏​​​បាន​​​លើក​​​ឡើង​​​ផង​​​ដែរ​​​ថា លោក​​​ព្រួយ​​​បារម្ភ​​​ខ្លាច​​​ក្រែង​​​ ម្ចាស់​​​ផ្ទះ​​​នៅ ជុំ​​​វិញ​​​រោង​​​ចក្រ​​​នឹង​​​ដំឡើង​​​ថ្លៃ​​​ឈ្នួល​​​​​​ផ្ទះ​​​​​​​​​របស់​​​ពួក​​​គាត់ ជា​​​មួយ​​​នឹង​​​ថ្លៃទឹក​​​ ភ្លើង​​​ផង​​​ដែរ​​​ នៅ​​​ពេល​​​​​​ប្រាក់​​​ខែ​​​គោល​​​ថ្មី​​​នឹង​​​ចូល​​​ជា​​​ធរមាន​​​នៅ​​​ខែ​​​មករា​​​នោះ​​​ ព្រោះ​​​ថា ពួក​​​​​​គាត់​​​តែង​​​តែ​​​ធ្វើ​​​ដូច្នេះ​​​ជា​​​រៀង​​​រាល់​​​លើក​​​។

លោក​​​បាន​​​មាន​​​ប្រសាសន៍​​​ថា “ប្រាក់​​​ខែ​​​១២៨​​​ដុល្លារ​​​នេះ​​​មិន​​​ទាន់​​​​​​ស្រប​​​តាម​​​តម្រូវ​​​ការ​​​របស់​​​កម្មករ​​​យើង​​​នៅ​​​ឡើង​​​ទេ​​​។ យើង​​​នឹង​​​សួរ​​​កម្មករ​​​របស់​​​យើង​​​នៅ​​​ក្នុង​​​រោង​​ចក្រ​​​ថា តើ​​​ប្រាក់​​​ខែ​​​នេះ​​​អាច​​​ទទួល​​​យក​​​បាន​​​ ឬ​​​ក៏​​​អត់​​​។ ប្រសិនបើ​​​ពួក​​​គេ​​​មិន​​​ទទួល​​​យក​​​ទេ​​​ សហជីព​​​របស់​​​យើង​​​នឹង​​​សម្រេច​​​ធ្វើ​​​តាម​​​អ្វី​​​ដែល​​​ពួក​​​គាត់​​​ស្នើ​​​ឡើង”៕ស៊ុយឈាង​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស