26 C
Phnom Penh

អ្នក​ជួលផ្ទះ​ក្រីក្រ​ក្នុងក្រុង​ជា ‘ប្រជាជន​ត្រូវ​គេ​បំភ្លេចចោល’

ដោយ ឌឹ ខេមបូឌា ដេលី

បទវិភាគ

នៅ​ពេល​ដែល​ អ្នកស្រី​ ហៃ ប៊ុននី ​ចាកចេញ​ពី​ផ្ទះ​របស់​អ្នកស្រី​នៅ​ខេត្ត​ព្រៃវែង​ប្រហែល​៥​ឆ្នាំ​កន្លង​ទៅ​នេះ ដើម្បី​ស្វែង​រក​ការងារ​ធ្វើ​នៅ​ក្រុង​ភ្នំពេញ អ្នកស្រីមិន​រំពឹងថា ធ្លាក់​ខ្លួន​​មក​រស់​នៅ​ក្នុង​ផ្ទះ​ខ្ទម​ស័ង្កសី​តូច​ ព័ទ្ធ​ជុំវិញ​ដោយ​លំនៅ​សឹង​តែ​ដូចគ្នា​រាប់សិប​ផ្ទះ​ស្កេក​ស្កះ នៅ​លើ​ដី​ឡូតិ៍​តែ​មួយ​កន្លែងដូច្នេះ​ទេ។

អ្នក​លក់​លៀស​អាយុ​៣៦​ឆ្នាំ​រូបនេះ​រស់​នៅ​ក្នុង​ផ្ទះ​ជួល​ជាមួយ​ឪពុក​ម្តាយ​ ប្តី និង​កូន​ស្រី​អាយុ​១០​ឆ្នាំ​របស់​អ្នកស្រី ​ក្នុង​ខណ្ឌ​ចម្ការ​មន​ក្រុង​ភ្នំពេញ។ អ្នកស្រី​បាន​និយាយ​ថា មាន​បង្គន់​ប្រើ​ប្រាស់​តែ​ចំនួន​៣​ប៉ុណ្ណោះ​សម្រាប់​ប្រជាជន​៥០​គ្រួសារ ដែល​រស់នៅ​លើ​កន្លែង​ចោល​សំរាម​នេះ។

អ្នកស្រី​ ប៊ុននី បាន​និយាយ​នៅ​ខាង​ក្រៅ​ផ្ទះ​របស់​អ្នក​ស្រី​កាលពី​ថ្ងៃ​ព្រហស្បតិ៍​ថា “​ខ្ញុំ​មិន​ចូល​ចិត្ត​ស្ថានភាព​រស់​នៅ​នៅ​ទី​នេះ​ទេ ប៉ុន្តែនៅ​ខេត្ត​ខ្ញុំ​គ្មាន​ការងារ​ធ្វើទេ ហើយ​នៅ​ទី​នេះ ខ្ញុំ​មាន​ឱកាស​ឲ្យ​កូន​របស់​ខ្ញុំ​បាន​រៀន​សូត្រ”។

អ្នកស្រី​បាន​និយាយ​ថា ការ​ត្រូវ​គេ​បណ្តេញ​ចេញ​ដែល​អាច​កើត​មាន​ឡើង ជា​អំរែក​ដ៏​ធ្ងន់​លើ​អ្នក​ស្រី ត្បិតអី អ្នកស្រី​មិន​មាន​លិខិត​ព្រមព្រៀង​ជួល​ផ្ទះ​ទេ។ អ្នកស្រី​ធ្លាប់​ត្រូវ​បាន​គេ​បង្ខំ​ឲ្យ​ចេញ​ពី​ផ្ទះ​ជួល​ពីមុន​តាម​តែ​ចិត្ត​ម្ចាស់​ផ្ទះ​ម្តង​រួច​មក​ហើយ។

អ្នកស្រី​បាន​ឲ្យ​ដឹង​ថា “ខ្ញុំ​ព្រួយ​បារម្ភ​ខ្លាច​ក្រែង​រឿង​នេះ​កើត​ឡើង​ជាថ្មី​ទៀត​ណាស់ ពីព្រោះ វា​នឹង​បង្ក​ការ​លំបាក​ច្រើន​ដល់​យើង ប្រសិនបើ​យើង​ត្រូវ​រើ​ចេញ​ទៀត​នោះ ជាពិសេស ប្រសិនបើ​នៅ​ឆ្ងាយ​ពី​សាលារៀន​របស់​កូន​ស្រី​របស់​ខ្ញុំ”។

សមាគមធាង​ត្នោត (STT) ​ជា​អង្គការ​មិនមែន​រដ្ឋាភិបាល និយាយ​ថា អ្នក​ជួល​ផ្ទះ​ដូចជា​អ្នកស្រី ប៊ុននី អ៊ីចឹង ភាគច្រើន​ជា​ជន​ចំណាក​ស្រុក​មកពី​ខេត្ត​នានា​ ដែល​ធ្វើ​ការ​មាន​ប្រាក់​ចំណូល​តិច ហើយ​ជួល​ផ្ទះ​តូចៗ​នៅ​ប្រជ្រៀត​គ្នា នៅ​កន្លែង​កខ្វក់ រស់​នៅ​ប្រកប​ដោយ​គ្រោះថ្នាក់​ ប្រឈម​នឹង​រយៈ​ពេល​រស់​នៅ​មិន​ទៀងទាត់ ស្ថានភាព​សុខភាព​អន់​ខ្សោយ និង​ការ​គំរាម​កំហែង​ដល់​សុវត្ថិភាព​របស់​ពួកគេ។

កាលពី​ថ្ងៃ​ព្រហ្បតិ៍ សមាគម​ធាងត្នោត​បាន​ចេញ​របាយការណ៍​មួយ​ស្តីពី​លទ្ធផល​នៃ​ការ​ចុះ​អង្កេត​ផ្ទះ​បែប​នេះ​១២៤​ខ្នង ដែល​មាន​ទំហំ​ជា​មធ្យម​១៣​ម៉ែត្រ​ក្រឡា ដែល​ផ្ទះ​ខ្លះ​មាន​មនុស្ស​ដេក​ដល់​ទៅ​១០​នាក់។

លោក អីុ សារ៉ុម នាយក​ប្រតិបត្តិ​សមាគម​ធាង​ត្នោត​ បាន​ឲ្យ​ដឹង​ក្នុង​របាយការណ៍​នោះ​ថា “ដោយ​ចំណាក​ស្រុក​មក​ក្រុង​ភ្នំពេញ​មាន​កាន់តែ​ច្រើន​ឡើង គឺ​ច្បាស់ណាស់​ថា តម្រូវ​ការ​សម្រាប់​ការ​នៅ​ផ្ទះ​ជួល​បណ្តោះ​អាសន្ន នា​ពេល​អនាគត​ប្រាកដជា​កើន​ឡើង​ជា​មិន​ខាន​ទេ”។

លោក​បាន​និយាយ​ថា “ស្ថានការណ៍​នេះគឺ​ពិបាក​សម្រាប់​អ្នក​ជួល​ផ្ទះ ព្រោះ​ជា​តម្រូវការ​បន្ទាន់​សម្រាប់​ការ​ស្នាក់​នៅ ដែល​ជា​ធម្មតា ពួកគេ​មិន​មាន​កិច្ច​ព្រមព្រៀង​ជា​ផ្លូវការ ​ជាមួយ​ម្ចាស់​ផ្ទះ​ ដែល​គេ​អាច​ដំឡើង​តម្លៃ​ជួល​ផ្ទះ​ស្រេចតែ​ចិត្ត​ពី​មួយ​ថ្ងៃ​ទៅ​មួយ​ថ្ងៃ”។

សមាគម​ធាង​ត្នោត​បាន​រក​ឃើញ​ថា តម្លៃ​ទឹក​និង​អគ្គិសនី​ខ្ពស់ ជា​ការ​លំបាក​មួយ​ថែម​ទៀត​ចំពោះ​អ្នក​ជួល​ផ្ទះ ហើយ​បាន​អំពាវនាវ​ឲ្យ​រដ្ឋាភិបាល​ជួយ​ក្នុង​បញ្ហា​នេះ។

របាយការណ៍​ដដែល​ហៅ​អ្នក​ជួល​ផ្ទះ​ក្រីក្រ​ក្នុងក្រុង​ជា “ក្រុម​ប្រជាជន​ត្រូវ​គេ​បំភ្លេច​ចោល” ដែល​មិន​មាន​​”ការ​និយាយ​ដល់”​ក្នុង​គោល​នយោបាយ​សិទ្ធិ​លំនៅ​ដ្ឋាន​របស់​រដ្ឋាភិបាល​ទេ។

គន្លឹះ​សំខាន់​ក្នុង​ចំណោម​គោល​នយោបាយ​ទាំង​នេះ គឺ សារាចរ​០៣ ដែល​ជា​យុទ្ធសាស្ត្រ​រដ្ឋាភិបាល​កាលពី​ឆ្នាំ ២០១០ ដើម្បី​បញ្ជូន​អ្នក​ដែល​រស់​នៅ​លើ​ដី​រដ្ឋ​ទៅ​កន្លែង​ថ្មី និង​គោល​នយោបាយ​លំនៅ​ដ្ឋាន​ជាតិ ដែល​ជា​អនុក្រឹត្យ​អនុម័ត​ដោយ​គណៈ​រដ្ឋមន្ត្រី​កាលពី​ខែ​ឧសភា ស្វះ​ស្វែង​ជួយ​ពលរដ្ឋ​ខ្មែរ​មាន​ចំណូល​តិច​និង​មធ្យម ឲ្យ​អាច​ទិញ​ផ្ទះ​ផ្ទាល់​ខ្លួន​បាន​។

ក្នុង​របាយការណ៍​របស់​ខ្លួន សមាគម​ធាងត្នោត​ផ្តល់​អនុសាសន៍​ឲ្យ​រដ្ឋាភិបាល​ចាប់​ប្រើ​ដំណោះ​ស្រាយ​លំនៅ​ដ្ឋាន​សាធារណៈ​សម្រាប់​អ្នក​ជួល​ផ្ទះ​ក្រីក្រ និង​បង្កើត​ស្តង់ដា​សំណង់​សម្រាប់​លំនៅ​ដ្ឋាន​ជួល​ថ្មីៗ។

របាយការណ៍​ក៏​អំពាវនាវ​ឲ្យ​អាជ្ញាធរ​មូលដ្ឋាន​អនុវត្ត​កិច្ចព្រមព្រៀង​រវាង​ម្ចាស់​ផ្ទះ​និង​អ្នក​ជួល ធានា​ឲ្យ​មាន​ការ​ប្រមូល​សំរាម​ទៀងទាត់​នៅ​តាម​លំនៅដ្ឋាន និង​ត្រួត​ពិនិត្យ​តម្លៃ​ទឹក​ភ្លើង​ជាដើម។

លោក សូ សុខ អគ្គ​នាយក​រង​នៃ​អគ្គ​នាយកដ្ឋាន​លំនៅ​ដ្ឋាន​ទើប​បង្កើត​ថ្មី​នៅ​ក្រសួង​គ្រប់​គ្រង​ដែនដី​និង​នគរូបនីយ​កម្ម បាន​មាន​ប្រសាសន៍​ថា​ គោល​នយោបាយ​សិទ្ធិ​លំនៅ​ដ្ឋាន​ជាតិ​បង្ហាញ​ការ​ប្តេជ្ញា​របស់​រដ្ឋាភិបាល​ក្នុង​ការ​ធ្វើ​ឲ្យ​ស្ថានភាព​រស់នៅ​សម្រាប់​អ្នក​ក្រីក្រ​ក្នុង​ទីក្រុង​ប្រសើរ​ឡើង។

ដោយ​បដិសេធ​មិន​អត្ថាធិប្បាយ​អំពី​អ្នក​ជួល​ផ្ទះ​នៅ​ក្រៅ​ក្រុង លោក​បាន​និយាយ​ថា “រដ្ឋាភិបាល​មាន​គោលដៅ​ដោះស្រាយ​បញ្ហា​លំនៅ​សម្រាប់​ពលរដ្ឋ​ក្រីក្រ និង​ពលរដ្ឋ​មាន​ចំណូល​តិច”។

លោក ជ្រៀង សុផាន់ អភិបាល​រង​រាជធានី​ភ្នំពេញ​បាន​មាន​ប្រសាសន៍​ថា មន្ត្រី​មូលដ្ឋាន​មិន​គួរ​អន្តរាគមន៍​ក្នុង​រឿង​ឯកជន​ទេ។ លោក​បាន​ឲ្យ​ដឹង​ទៀត​ថា “វាជា​ការ​ព្រមព្រៀង​រវាង​អ្នក​ជួល​និង​ម្ចាស់​ផ្ទះ។ ប្រសិនបើ​អ្នក​មិន​ពេញ​ចិត្ត អ្នក​អាច​ស្វែង​រក​កន្លែង​ផ្សេង​ទៀត​ដើម្បី​រស់​នៅ”៕មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស