មន្ត្រីនគរបាលម្នាក់បាននិយាយកាលពីម្សិលមិញថា បុរសមួយក្រុមប្រដាប់ដោយកាំភ្លើងខ្លីនិងដាវ បានវាយប្រហារអ្នកជិះម៉ូតូពីរនាក់ ខណៈដែលពួកគេបានបើកកាត់ស្ពានព្រះមុនីវង្សនៅក្នុងរាជធានីភ្នំពេញកាលពីរសៀលថ្ងៃសៅរ៍។
យោងតាមអធិការរងនគរបាលខណ្ឌច្បារអំពៅបានឲ្យដឹងថា ការវាយប្រហារនេះបានកើតឡើងនៅម៉ោងប្រហែល៥និង២០នាទីល្ងាច ខណៈដែល រស់ សំបូរ អាយុ២១ឆ្នាំ និងហ៊ុយ ប៊ុនឃាង អាយុ២២ឆ្នាំ កំពុងបើកម៉ូតូកាត់ស្ពាននេះពីខណ្ឌមានជ័យទៅខណ្ឌច្បារអំពៅ។
មន្ត្រីនគរបាលម្នាក់ ដែលសុំមិនប្រាប់ឈ្មោះពីព្រោះចៅហ្វាយរបស់លោកបានណែនាំលោកកុំឲ្យប្រាប់ឈ្មោះដល់អ្នកកាសែត ហើយផ្តល់ព័ត៌មានមានកម្រិតតែប៉ុណ្ណោះអំពីករណីនេះ បានមានប្រសាសន៍ថា បុរសប្រាំ ឬប្រាំមួយនាក់បានបាញ់ទៅលើជនរងគ្រោះ បន្ទាប់មកបានយកដាវរបស់ខ្លួនកាប់លើម៉ូតូរបស់ជនរងគ្រោះទៀត។
មន្ត្រីរូបនេះបានឲ្យដឹងថា ឈ្មោះ សំបូរ និង ប៊ុនឃាង អាចរត់គេចខ្លួនរួចដោយលោតចុះពីស្ពានទៅលើផ្ទះមួយចំនួននៅខាងក្រោម។ លោកបានមានប្រសាសន៍ថា “ម៉ូតូរបស់ពួកគេត្រូវជនសង្ស័យទាំងនោះយកដាវកាប់ត្រូវពីរឬបីកន្លែង”។ មន្ត្រីរូបនេះបានបន្ថែមថា ជនសង្ស័យទាំងអស់ ដែលនៅមិនទាន់ស្គាល់អត្តសញ្ញាណនៅឡើយនោះបានរត់គេចខ្លួនបាត់។
ដោយធូរស្រាលពីមុខរបួសដោយគ្រាប់កាំភ្លើងត្រង់ស្មារបស់ខ្លួន និងជើងនៅមន្ទីរពេទ្យកាល់ម៉ែតកាលពីម្សិលមិញ ប៊ុនឃាង បាននិយាយថា គាត់មិនដឹងថា ហេតុអ្វីបានជាគេចង់ធ្វើបាបគាត់នោះឡើយ។ គាត់បាននិយាយថា “មិត្តភក្តិរបស់ខ្ញុំ និងខ្ញុំមិនដែលមានជម្លោះជាមួយនរណាម្នាក់ទេពីមុនមក។ ហើយខ្ញុំមើលមិនឃើញអ្នកវាយប្រហារនោះទេ ពីព្រោះពួកគេនៅពីក្រោយពួកយើង ហើយខ្ញុំមិនបានងាកមើលពួកគេទេ”។
ប៊ុនឃាង បាននិយាយថា លោក និងលោក សំបូរ បានធ្វើដំណើរតាមផ្លូវទៅហូបអាហារពេលល្ងាចនៅភោជនីយដ្ឋានមួយ ស្រាប់តែដំបូងជនសង្ស័យទាំងនោះបានបាញ់ សំបូរ ចំដៃបណ្តាលឲ្យបាត់បង់ម្ចាស់ការពេលកំពុងបើកម៉ូតូ។ លោកបាននិយាយថា “បន្ទាប់ពីយើងត្រូវបានបាញ់មក ម៉ូតូបានដួល។ យើងបានលោតចុះពីស្ពាន ហើយខ្ញុំបានរត់ចូលទៅក្នុងផ្ទះរបស់អ្នកភូមិដើម្បីរក្សាជីវិត”។ សំបូរ បាននិយាយថា ខ្លួនមិនដឹងថា ហេតុអ្វីបានគេបាញ់ខ្លួននោះឡើយ ហើយបានបដិសេធមិននិយាយបន្ថែមទេ៕សារុន