30 C
Phnom Penh

សកម្ម​ជន​​ព្រះសង្ឃត្រូវ​បាន​អនុញ្ញាត​ឲ្យ​គង់នៅ​វត្ត​នាគវ័ន្ត​វិញ

ដោយ ឌឹ ខេមបូឌា ដេលី

បទវិភាគ

ព្រះសង្ឃ​ដែល​មាន​សង្ឃ​ដីកា​ឥត​សំចៃ​​មួយ​​អង្គ​ដែលត្រូវបានទុក​ពេល​៤៨​ម៉ោង​​ឲ្យ​និមន្ត​ចេញ​ពី​វត្ត​មួយ​ក្នុង​រាជ​ធានី​ភ្នំពេញ​កាល​ពី​ថ្ងៃ​ព្រហស្បតិ៍​នោះ ត្រូវ​បាន​​អនុញ្ញាត​ឲ្យ​គង់​នៅ​វិញ​​ ប៉ុន្តែ​​ត្រូវ​បាន​ដក​តួនាទី​ជាមេកុដិ​​។

យោង​តាម​​ព្រះតេជគុណ ងិន ឃីម ព្រះចៅអធិការ​វត្ត​បាន​ឲ្យ​ដឹង​ថា ព្រះតេជគុណ កែវ សុម៉ាលី ​ព្រះជន្ម​៣៤​វស្សា​ ជា​សមាជិក​បណ្ដាញ​ព្រះ​សង្ឃ​ឯករាជ្យ​ដើម្បី​យុត្តិធម៌សង្គម​ត្រូវ​បាន​បង្គាប់​ឲ្យ​និមន្ត​ចេញនៅ​​ពាក់​កណ្ដាល​យប់​ថ្ងៃ​សៅរ៍ ដែលតាមចោទថា បាន​​ដាល់​និង​ធាក់​​​ព្រះសង្ឃ ឡុង ឆេងហ៊ី ​ព្រះជន្ម​២៩​វស្សា​។

ព្រះតេជគុណ កែវ សុម៉ាលី អះអាង​ថា ព្រះ​អង្គ​មិន​បានវាយ​​​ព្រះ​តេជគុណ ឡុង ឆេងហ៊ី ទេ ហើយ​បាន​ចោទ​​ព្រះគ្រូ​ចៅអធិការ​ថា បាន​ប្រើ​ប្រាស់​ការ​វាយ​នេះ​ជា​លេស​ដើម្បី​ដាក់​ទោស​​ព្រះ​​អង្គ​ចំពោះការ​​សាក​សួរ​ពី​ការដឹនាំរបស់​ព្រះ​តេជគុណ ងិន ឃីម និង​ការ​​ចូល​រួម​នៅ​ក្នុង​ការ​តវ៉ា​នៅ​ខាង​ក្រៅ​វត្ត​។

ព្រះតេជគុណ​ កែវ សុម៉ាលី ដែល​ត្រូវ​បាន​អនុញ្ញាត​ឲ្យ​គង់​នៅ​វត្ត​នាគវ័ន្តវិ​ញ ​បន្ទាប់ពី​​ជួបប្រជុំជាមួយ​ព្រះតេជគុណ ងិន ឃីម កាលពី​ថ្ងៃ​សៅរ៍ ហើយ​បាន​សូម​ខមា​ទោស​ចំពោះ​​អធិករណ៍​​កន្លង​មកនោះបាន​មាន​សង្ឃដីកា​ថា “ព្រះគ្រូចៅអធិការ​បាន​ព្រមាន​អាត្មា​ប្រាំប្រាំមួយ​ដង​មក​ហើយកុំ​ឲ្យ​ចូលរួម​ធ្វើ​ការ​តវ៉ា​”។

ព្រះអង្គ​បាន​មាន​សង្ឃដីកា​ថា “អាត្មា​បាន​សូមខមា​ទោស​ ប៉ុន្តែ​មិន​មែន​​មាន​ន័យ​ថា អាត្មា​​​​បាន​ធ្វើ​ខុស​ឡើយ។ អាត្មា​សូម​ខមា​ទោស​ព្រះគ្រូចៅអធិការចំពោះការ​ប្រើ​​ពាក្យ​សម្ដី​មិន​សម​រម្យ​ ដែល​អាត្មា​ធ្លាប់​បានធ្វើលើសលោះមកលើ​ព្រះ​​អង្គ​ពី​មុន​មក​”។

យោង​តាម​ព្រះតេជគុណ កែវ សុម៉ាលី បាន​ឲ្យ​ដឹង​ថា ព្រះ​អង្គ​ត្រូវ​បាន​​ព្រះ​តេជគុណ ងិន ឃីម ហៅ​មក​​ជួប​កាលពី​ថ្ងៃ​ព្រហស្បតិ៍​ឲ្យ​ពន្យល់​ពី​ការ​សម្រេច​​​បណ្ដេញ​​ព្រះ​តេជ​គុណ ឡុង ឆេងហ៊ី ចេញពី​កុដិ​ដែល​ព្រះ​អង្គ​គ្រប់​គ្រង​។

​ព្រះ​អង្គ​បាន​មាន​សង្ឃដីកា​ថា នៅ​ពេល​នោះព្រះតេជគុណ ឡុង ឆេងហ៊ី ​បាន​បង្ហាញ​ខ្លួន​នៅ​កន្លែង​​ប្រជុំនោះ​ជាមួយ​និស្សិត​ម្នាក់​ដែល​បាន​ចាប់​ផ្ដើម​យក​ iPad ថត​យក​ការ​សន្ទនា​នោះ ព្រះ​អង្គ​មាន​កំហឹង​ ហើយ​បាន​ប្រាប់​និស្សិត​រូប​នោះ​ឲ្យ​យក​ iPad នោះ​ចេញ​។ ព្រះតេជគុណ កែវ សុម៉ាលី បាន​មាន​សង្ឃដីកាថា នៅ​ពេល​ព្រះអង្គ​ទៅ​ជិត​និស្សិត​រូប​នោះ ព្រះ​តេជគុណ ឡុង ឆេងហ៊ី ​​បាន​​​វាយ​ព្រះអង្គ ហើយពេលនោះបាន​​បុក​ព្រះកេស​ជាមួយ​​​ iPad ​នោះ​។

ព្រះតេជគុណ ស៊ឹម សន ​គ្រូសូត្រ​ឆ្វេង​បាន​មាន​សង្ឃដីកា​ថា ការ​​ដាក់​វិធាន​ការ​វិន័យ​លើ​ព្រះតេជគុណ កែវ សុម៉ាលី មិន​ទាក់​ទង​នឹង​សកម្ម​ភាព​សង្គម​របស់​ព្រះអង្គ​ទេ​។

ព្រះអង្គ​បាន​មាន​សង្ឃដីកា​ថា “យើង​បាន​ដក​តួនាទី​ព្រះអង្គ​ជា​មេកុដិ​ចេញ ពីព្រោះ​​ព្រះ​អង្គ​មិន​មាន​សាមគ្គីភាព​​ជាមួយ​ព្រះ​សង្ឃដទៃទៀត​” ដោយ​ព្រះអង្គបញ្ជាក់ថា ព្រះតេជគុណ កែវ សុមា៉ាលី​​ ត្រូវបាន​អនុញ្ញាត​ឲ្យ​គង់​នៅ​វត្ត​នេះ ដោយសារ​ការ​សូមខមាទោស​រយៈពេល​១១ម៉ោង​។ ព្រះគ្រូចៅអធិការ​ ងិន ឃីម មិន​អាច​ទាក់​បាន​ទេ​៕ សារុន​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស