កាលពីម្សិលមិញ សាលាក្តីខ្មែរក្រហមបានផ្ដល់ឱសានវាទដល់ ខៀវ សំផន ដោយប្រាប់ឲ្យមេធាវីរបស់គាត់បញ្ចប់ការធ្វើពហិការសវនាការជំនុំជម្រះក្តីគាត់ ប្រសិនបើមិនដូច្នេះទេ ចៅក្រមនឹងចាត់វិធានការពន្លឿននីតិវិធី ដែលអាចរួមមានការតែងតាំងក្រុមមេធាវីការពារក្តីថ្មីមួយក្រុមផងដែរ។
មេធាវីការពារ ខៀវ សំផន មិនបានចូលរួមសវនាការតាមការគ្រោងទុកទេកាលពីម្សិលមិញ តាមការណែនាំរបស់អតីតប្រធានរដ្ឋសម័យខ្មែរក្រហមរូបនេះដែលនិយាយថា គាត់ចង់ឲ្យពួកគេផ្តោតលើការត្រៀមបណ្ដឹងសាទុក្ខប្រឆាំងសាលក្រមផ្តន្ទាទោសគាត់នៅក្នុងសវនាការដំណាក់កាលទី១។
សវនាការលើអង្គសេចក្តីនៅក្នុងសវនាការដំណាក់កាលទី២ បានចាប់ផ្តើមកាលពីថ្ងៃទី១៧ ខែតុលា ប៉ុន្តែ ត្រូវបានផ្អាកនៅក្នុងថ្ងៃដដែល បន្ទាប់ពី ខៀវ សំផន និងសហចុងចោទ នួន ជា បានបញ្ជាឲ្យមេធាវីរបស់ខ្លួនដើរចេញពីសាលសវនាការរហូតដល់នីតិវិធីសាទុក្ខត្រូវបានដោះស្រាយ។
ទោះជាយ៉ាងណា ក្រុមមេធាវីការពារក្តីរបស់ នួន ជា បានមានវត្តមាននៅសាលសវនាការកាលពីម្សិលមិញ បន្ទាប់ពីការដាក់ពាក្យរបស់គាត់សុំដកចៅក្រមបួនរូបចេញត្រូវបានបើកសវនាការ និងត្រូវបានច្រានចោលជាក្រោយ។
ក្រោយពីផ្អាកអស់រយៈពេលបួនម៉ោងនៅក្នុងនីតិវិធីកាលពីម្សិលមិញ ខណៈអង្គចៅក្រមពិចារណារកវិធីដោះស្រាយការបន្តជាប់គាំាងនេះ លោក និល ណន់ ប្រធានអង្គជំនុំជម្រះបានផ្តល់ជម្រើសពីរឲ្យ ខៀវ សំផន គឺត្រូវបញ្ឈប់ការធ្វើពហិការត្រឹមម៉ោង៤និង៣០នាទីនៅថ្ងៃនេះ ប្រសិនបើមិនដូច្នេះទេ តុលាការ “នឹងចាត់វិធានការបន្ថែមទៀតដែលខ្លួនគិតថា ចាំបាច់ ដើម្បីធានាបាននូវនីតិវិធីយុត្តិធម៌ និងឆាប់រហ័ស”។
លោក និល ណន់ បានមានប្រសាសន៍ថា វិធានការទាំងនេះអាចនឹងរួមមានទាំងការតែងតាំងក្រុមមេធាវីការពារក្តីឡើងវិញជាមេធាវីតែងតាំងដោយតុលាការ ដែលនឹងដកកាតព្វកិច្ចផ្លូវច្បាប់របស់ពួកគេដែលត្រូវធ្វើតាមការណែនាំរបស់ ខៀវ សំផន មិនឲ្យចូលរួម ការតែងតាំងមេធាវីថ្មី ការអនុវត្តជម្រើសទាំងពីរ ឬ “ការចាត់វិធានការផ្សេងទៀតដែលតុលាការយល់ថា សមស្រប” ផងដែរ។
លោកបានមានប្រសាសន៍ទៀតថា “ការប្រព្រឹត្តខុសឆ្គង”របស់ក្រុមមេធាវីការពារក្តី អាចនឹងទទួលរងនៅការបង្គាប់ដាច់ដោយឡែកមួយ។ លោកបានប្រាប់ចុងចោទថា “អង្គជំនុំជម្រះសូមរំឭកលោកថា ជាការពិតលោកមានសិទ្ធិទទួលបានការជួយពីមេធាវីដែលលោកជ្រើសរើសផ្ទាល់ខ្លួន ប៉ុន្តែ នោះមិនមែនជាសិទ្ធិផ្តាច់មុខនោះទេ។វាត្រូវបានដាក់កំហិតជាក់លាក់មួយចំនួននៅក្នុងការស្វែងរកយុត្តិធម៌”។
កាលពីម្សិលមិញ សហព្រះរាជអាជ្ញាអន្តរជាតិ នីកូឡាស គូមចៀន (Nicholas Koumjian) បានបញ្ជាក់ជាថ្មីអំពីការអំពាវនាវមុននេះរបស់ក្រុមលោកដែលសុំឲ្យតែងតាំងអ្នកជំនាញបច្ចេកទេសអមតុលាការ ជាមេធាវីឯករាជ្យម្នាក់ ដែលតំណាងឲ្យផលប្រយោជន៍របស់ចុងចោទ ប៉ុន្តែ មិនមែនជំនួសក្រុមមេធាវីការពារក្តី នោះទេ។
លោកបានមានប្រសាសន៍ទៀតថា “គោលបំណងគឺមិនមែនឲ្យចុងចោទគ្រប់គ្រងលើសាលសវនាការឡើយ។ នៅក្នុងប្រព័ន្ធតុលាការណាក៏ដោយនៅជុំវិញពិភពលោក ជនជាប់ចោទមិនអាចធ្វើឲ្យនីតិវិធីផ្អាកដោយការនិយាយថា ‘ខ្ញុំមិនចង់ឲ្យមេធាវីរបស់ខ្ញុំមកកាន់តុលាការ’ បានឡើយ”។ សវនាការជំនុំជម្រះគ្រោងនឹងធ្វើបន្តនៅថ្ងៃទី២៤ ខែវិច្ឆិកា បន្ទាប់ពីផ្អាកអស់រយៈពេលមួយសប្តាហ៍៕សុខុម