តាមការរំពឹងទុកថា ផ្សារមូលប័ត្រដ៏ក្មេងខ្ចីរបស់កម្ពុជា នឹងពង្រីកខ្លួនលើសទ្វេដងនៅរយៈពេលពីរឆ្នាំក្រោយ ដោយមានក្រុមហ៊ុនចំនួនបីកំពុងដំណើរការចុះបញ្ជីនៅឆ្នាំក្រោយ នេះបើយោងតាមអ្នកនាំពាក្យផ្សារមូលប័ត្រកម្ពុជាបានលើកឡើងកាលពីម្សិលមិញ។
លោក ឡាមុន សូឡេល (Lamun Soleil) អនុប្រធានផ្នែកប្រតិបត្តិការទីផ្សារនៅផ្សារមូលប័ត្រកម្ពុជា បានមានប្រសាសន៍ថា រោងចក្រកាត់ដេរ Ty Fashion របស់តៃវ៉ាន់ និងកំពង់ផែស្វយ័តភ្នំពេញ សុទ្ធតែបានចាប់ផ្តើមដំណើរការនីតិវិធីនៃការធ្វើសវនកម្មរបាយការណ៍ហិរញ្ញវត្ថុរបស់ខ្លួន ដើម្បីធ្វើសំណើផ្លូវការចុះបញ្ជីអំឡុងពេលណាមួយនៅឆ្នាំក្រោយ។
លោកមានប្រសាសន៍ថា “នៅពេលពួកគេបញ្ចប់ឯកសារទាំងនោះរួចរាល់ ពួកគេត្រូវរង់ចាំការអនុម័តសំណើរបស់ពួកគេដើម្បីចុះបញ្ជី ដែលត្រូវការពេលវេលាប្រហែលមួយខែប៉ុណ្ណោះ”។ លោកបានលើកឡើងបន្ថែមថា ក្រុមហ៊ុនទី៣មួយទៀតក៏មានគម្រោងចុះបញ្ជីនៅឆ្នាំក្រោយដែរ ប៉ុន្តែ បានមានប្រសាសន៍ថា លោកមិនអាចប្រាប់ឈ្មោះក្រុមហ៊ុននោះបានទេ ព្រោះវាជាការសម្ងាត់។
លោក អីុនស៊ូ លី (Ihnsoo Lee) ប្រធានផ្នែកប្រតិបត្តិការនៅផ្សារមូលប័ត្រកម្ពុជា បានមានប្រសាសន៍ថា គម្រោងចុះបញ្ជីនៅឆ្នាំក្រោយនឹងធ្វើឲ្យមានការចាប់អារម្មណ៍ឡើងវិញចំពោះមូលប័ត្រមិនសូវមានសកម្មភាព ដែលរហូតមកទល់ពេលនេះមានក្រុមហ៊ុនចុះបញ្ជីតែពីរនៅឡើយ។ លោកមានប្រសាសន៍បន្តថា ”រហូតមកទល់ពេលនេះ ខ្ញុំអាចនិយាយបានថា យើងធ្វើមិនសូវបានល្អប៉ុន្មានទេ ប៉ុន្តែ វានឹងកាន់តែប្រសើរឡើងជាមួយនឹងការចុះបញ្ជីបន្ថែម”។
ទោះជាយ៉ាងណា លោក ហីុ បាវី អគ្គនាយកកំពង់ផែស្វយ័តភ្នំពេញ បានមានប្រសាសន៍ថា ទោះជាកំពង់ផែសង្ឃឹមថានឹងចុះបញ្ជីក្តី ក៏គម្រោងពេលវេលារបស់ផ្សារមូលប័ត្រកម្ពុជាមានមហិច្ឆតាធំពេក។ លោកមានប្រសាសន៍ទៀតថា កំពង់ផែកំពុងស្ថិតក្នុងដំណើរការផ្លាស់ប្តូរប្រព័ន្ធគណនីរបស់ខ្លួន ដែលនឹងធ្វើឲ្យដំណើរការចុះបញ្ជីត្រូវពន្យារពេល។
លោកបានលើកឡើងបន្តថា “យើងកំពុងត្រៀមចុះបញ្ជី ប៉ុន្តែ វាទំនងជាត្រូវការពេលវេលាបីឆ្នាំទើបត្រៀមរួចរាល់”។
កាលពីខែកក្កដា រោងចក្រផលិតស្បែកជើង Grand Twins International (GTI) បានក្លាយជាក្រុមហ៊ុនទី២ដែលបានចុះបញ្ជីនៅលើផ្សារមូលប័ត្រ រួមជាមួយនឹងរដ្ឋាករទឹកស្វយ័តក្រុងភ្នំពេញ ដែលគ្រប់គ្រងដោយរដ្ឋ។
ទោះបីជាមានក្តីសង្ឃឹមថា ក្រមហ៊ុន Grand Twins International នឹងទទួលបានជោគជ័យជាថ្មីផ្នែកពាណិជ្ជកម្មក្តី ក៏តម្លៃមូលប័ត្ររបស់ខ្លួនមិនបានឡើងថ្លៃលើសពី៩.៧០០រៀល ឬប្រហែល២,៤២ដុល្លារដែលខ្លួនបានទិញចូលកាលពីដំបូងឡើយ។
ក្រោយពីមានកូដកម្មនៅរោងចក្រ Grand Twins International ទាមទារដំឡើងប្រាក់ខែ និងលក្ខខណ្ឌការងារ ដែលបានបញ្ចប់កាលពីសប្តាហ៍មុន លោក វិចិត្រ វណ្ណារ័ត្ន ប្រធានផ្នែកធនាគារវិនិយោគនៅក្រុមហ៊ុនមូលប័ត្រកាណា (Cana Securities Ltd.,) បានលើកឡើងតាមអីុម៉េលថា ក្តីរំពឹងនៃការចុះបញ្ជីរោងចក្រកាត់ដេរមួយទៀត មិនអាចទាក់ទាញវិនិយោគិនបានឡើយ។
លោកមានប្រសាសន៍ទៀតថា “កូដកម្មពិតជាបានធ្វើឲ្យប៉ះពាល់ភាពគួរឲ្យជឿជាក់របស់ GTI ក្នុងចំណោមបញ្ហាយុទ្ធសាស្ត្រផ្សេងៗទេៀត។ ដំណើរមូលប័ត្រចាប់តាំងពី IPO [តម្លៃបើកលក់ជាសាធារណៈជាលើកបំបូង] ឆ្លុះបញ្ចាំងពីការទំនុកចិត្តទាបរបស់វិនិយោគិន ពោលគឺនៅមុនកើតមានកូដកម្មទៅទៀត TY នឹងពិបាកលក់”៕សុខុម (រាយការណ៍បន្ថែមដោយ ហ៊ុល រស្មី)