35 C
Phnom Penh

ការ​បន្លំ​ក្លែង​ឯកសារ​បង្ហាញ​អំពី​ការ​រត់ពន្ធឈើ​ប្រណីត​ទៅ​ក្រៅ​ប្រទេស

ដោយ ឌឹ ខេមបូឌា ដេលី

បទវិភាគ

នៅពេល ហុង ម៉ុងហេង ម្ចាស់​ក្រុមហ៊ុន​កែច្នៃ​ឈើ Brightway Furniture បាន​ដាក់​ពាក្យ​បន្ត​អាជ្ញាប័ណ្ណ​របស់​លោក​នាំ​ឈើ​ចេញ​កាលពី​ខែ​កុម្ភៈ គាត់​គ្មាន​ហេតុ​ផល​សង្ស័យ​ថា ​អាជ្ញា​ប័ណ្ណ​នោះ​ត្រូវ​បានទាត់​ចោល​នោះ​ទេ។

ដូច្នេះ​នៅ​ពេល​ក្រសួង​ពាណិជ្ជកម្ម​បដិសេធ​ឯកសារ ដែល​លាត​ត្រដាង​ថា ក្រុមហ៊ុន​របស់​លោក​កំពុង​ត្រូវ​គេ​តាមដាន​ពី​បទ​សង្ស័យ​ក្លែង​បន្លំ​ឯកសារ ដើម្បី​នាំ​ឈើ​ប្រណីត​ចេញ ទើប​លោក ហុងម៉េង ភ្ញាក់​ផ្អើល​យ៉ាង​ខ្លាំង។ លោក​បាន​និយាយ​ថា “ខ្ញុំ​បាន​ដាក់​ពាក្យ​បណ្តឹង​ភ្លាម​ទៅ​ការិយាល័យ​ប៉ូលិស​ព្រហ្មទណ្ឌ​ក្រសួង​មហា​ផ្ទៃ ដើម្បី​ចាប់​ខ្លួន​ជន​ក្លែង​បន្លំ”។

លោក ម៉េងហុង នៅ​ពេល​នោះ​មិន​បាន​ដឹង​ថា ឈ្មោះ​ក្រុមហ៊ុន​របស់​លោក​ត្រូវ​បាន​គេ​ប្រើ​ក្នុង​ការ​រត់ពន្ធឈើ​ដែល​នាំ​ចេញ​ដោយ​ខុស​ច្បាប់​នូវ​ឈើ​ប្រណិត​ជាង​៣០០.០០០​ម៉ែត្រ​គូប ពី​ប្រទេស​កម្ពុជា​ចូល​ប្រទេស​វៀតណាម មុនពេល​រដ្ឋាភិបាលបាន​ដឹង​រឿង​នេះ​ទេ។

ចំណុច​សំខាន់ មាន​អ្នក​ការទូត​ខ្មែរ​ម្នាក់ គឺ​លោក តាំង សុខងី អតីត​អគ្គ​កុងស៊ុល​រង​ប្រចាំ​ក្រុង​ហូជីមិញ ដែល​ជាប់​ចោទ​ថា​បាន​​ចេញ​ឯកសារ​ក្លែងក្លាយ ដែល​គេ​អះអាង​ថា អនុញ្ញាត​ឲ្យ​មាន​ការ​នាំ​ចេញ​ឈើ​ទៅ​ប្រទេស​វៀតណាម។

យោងតាម​ឯកសារ​ដាក់​ទៅ​តុលាការ​ក្រុង​ភ្នំពេញ​បាន​ឲ្យ​ដឹង​ថា រឿងក្តី​នេះបាន​ទាក់ទាញ​ការ​ចាប់​អារម្មណ៍​ពី​ក្រុម​មន្ត្រី​រដ្ឋាភិបាល​ថ្នាក់​ខ្ពស់​បំផុត ដោយ​មាន​អន្តរាគមន៍​ពី​លោក​ ស៊ុន ចាន់ថុល រដ្ឋមន្ត្រី​ក្រសួង​ពាណិជ្ជកម្ម លោក ហោ ណាំហុង រដ្ឋមន្ត្រី​ក្រសួង​ការបរទេស និង​មាន​ទាំង​លោក​នាយក​រដ្ឋមន្ត្រី ហ៊ុន សែន ផងដែរ។

បន្ទាប់ពី​មាន​ការ​ចាប់​ខ្លួន​លោក សុខងី នៅ​ភោជនីយដ្ឋាន​មួយ​កន្លែង​កាលពី​ថ្ងៃ​ទី​១៩​ខែ​មិថុនា ជន​សង្ស័យ​អាយុ​៣៦​ឆ្នាំ​រូប​នេះ​ត្រូវ​បាន​ចោទ​ពីបទ​ក្លែង​បន្លំ​ឯកសារ​សាធារណៈ ហើយ​ជាប់​ឃុំ​បណ្តោះ​អាសន្ន​រង់ចាំ​ការកាត់ក្តី។ នៅ​ពេល​នោះ ប៉ូលិស​មិន​បាន​បញ្ចេញ​សេចក្តី​លម្អិត​នៃ​រឿងក្តី​នេះ ឬ​ឈ្មោះ​ក្រុមហ៊ុន​ដែល​ពាក់ព័ន្ធ​ទេ។

ប៉ុន្តែ​មាន​ការ​ចាប់​ខ្លួន​ថែមទៀត​កាលពី​ដើម​ខែ​កញ្ញា បន្ទាប់ពី​មាន​ការ​ឆ្មក់​ចូល​ឆែកឆេរ​ផ្ទះ​២​កន្លែង​ក្នុង​ក្រុង​ភ្នំពេញ ដែល​បាន​រក​ឃើញ​ត្រា​និង​ឯកសារ​ក្លែងក្លាយ​របស់​រដ្ឋា​ភិបាល​យ៉ាង​ច្រើន ក្នុង​នោះ​រួម​មាន​ត្រា​ជាង​១.០០០ ក្នុង​ចំណោម​ត្រា​ផ្សេងទៀត មាន​ត្រា​ក្រសួង​ហិរញ្ញ​វត្ថុ ក្រសួង​ការបរទេស និង​ក្រសួង​យុត្តិធម៌។

ម្ចាស់​ផ្ទះ​ម្នាក់ ឈ្មោះ នៅ សាខន អាយុ​៥២​ឆ្នាំ ​រួម​ជាមួយ​ ចាប វណ្ណា អាយុ​៥១​ឆ្នាំ និង សួន ឧត្តម​រស្មី អាយុ​២៤​ឆ្នាំ ជាប់​ចោទ​ពីបទ​ក្លែងបន្លំ​ឯកសារ​សាធារណៈ។

ក្នុង​បទ​សម្ភាសន៍​មួយ​កាលពី​ចុង​ខែ​មុន ឧត្តមសេនីយ៍​ឯក ម៉ក់ ជីតូ ប្រធាន​នាយក​ដ្ឋាន​កណ្ដាល​នគរ​បាលយុត​្តិធម៌​ក្រសួង​មហាផ្ទៃ ដែល​មើល​ខុសត្រូវ​ការ​ស៊ើប​អង្កេតលើ​ក្រុម​ក្លែង​បន្លំ​នេះ បាន​និយាយ​ថា លោក​ សាខន “អាច​ក្លែង​អ្វី​គ្រប់យ៉ាង”។

ឧត្តមសេនីយ៍​ឯក ម៉ក់ ជីតូ បាន​និយាយ​ថា “ឯកសារ​ណាមួយ​ដែល​ពាក់ព័ន្ធ​នឹងការ​ជូន​ដំណឹង​ជា​ផ្លូវ​ការ គាត់​អាច​ធ្វើ​បាន”។

ក្នុង​ចំណោម​ឯកសារ​ដែល​រឹបអូស​យក​បាន​ពី​ផ្ទះ​របស់​លោក សាខន មាន​ឯកសារ​ក្លែងក្លាយ​ប្រើ​ដើម្បី​ដឹក​ឈើ​ប្រណីត​ដោយខុស​ច្បាប់​ចេញពី​ប្រទេស​កម្ពុជា ដោយ​ប្រើ​ឈ្មោះ​ក្រុមហ៊ុន​មួយ​ចំនួន ដែល​បើក​ស្រាប់​នៅ​ប្រទេស​កម្ពុជា។

ឯកសារ​តុលាការ​ដែល​ទទួល​បាន​កាលពី​ខែ​មុន​បង្ហាញ​ថា ពីរ​ខែ​មុន​លោក ម៉ុង​ហេង ឲ្យ​ក្រសួង​មហាផ្ទៃ​ដឹង​នោះ លោក ចាន់ថុល បាន​ទាក់ទង​លោក ហ៊ុន​ សែន​ សុំ​យោបល់ បន្ទាប់​ពី​ដឹង​ថា ឯកសារ​ទាំង​នោះ​ត្រូវ​គេ​ក្លែង​បន្លំ​ក្នុង​នាម​ក្រសួង​របស់​លោក ដើម្បី​សម្រប​សម្រួល​ការ​នាំ​ឈើ​ចេញ​ពី​ប្រទេស​កម្ពុជា​ទៅ​ប្រទេស​វៀតណាម។

លោក ហ៊ុន សែន បាន​សរសេរ​តប​សំណើ​របស់​លោក ចាន់ថុល កាលពី​ថ្ងៃ​ទី​២៤​ធ្នូ មួយ​ថ្ងៃ​បន្ទាប់ពី​ការ​ទទួល​បានលិខិត។

ឯកសារ​បង្ហាញ​ថា លោក ចាន់ថុល ក៏​បាន​ស្នើ​សុំ​អន្តរាគមន៍​ពី​លោក ហោ ណាំហុង រដ្ឋ​មន្ត្រី​ក្រសួង​ការបរទេស ដោយ​សុំ​ឲ្យ​លោក ជូន​ដំណឹង​ដល់​សមភាគី​វៀតណាម​របស់​លោក​ចំពោះ​ការ​ក្លែង​បន្លំ ដែល​គេ​ចោទ​ថា ផ្តល់​ការ​អនុញ្ញាត​ដល់​ក្រុមហ៊ុន អង្គរ ប្លាយវ៉ូដ ​នាំ​ចេញ​ឈើ​១៩.១៤៤​ម៉ែត្រគូប​ឆ្លង​ព្រំដែន។ នេះ​ជា​លើក​ដំបូង​ហើយ​ដែល​ក្រុមហ៊ុន Brightway Furniture ក៏​បាន​ធ្លាក់​ក្នុង​ការ​សង្ស័យ​របស់​រដ្ឋាភិបាល​ដែរ។

ក្រោយពី​ការ​រក​ឃើញ​ឯកសារ​ក្លែងក្លាយ​ចំនួន​បី​ទៀត​ដែល​សង្ស័យ​ថា សរសេរ​ដោយ​លោក សុខងី ដែល​ផ្តល់ការ​អនុញ្ញាត​ឲ្យ​ក្រុមហ៊ុននានា​ដឹក​ឈើ​ដ៏​ច្រើន​ចូល​ប្រទេស​វៀតណាម​នោះ លោក ហោ ណាំហុង ក៏​បាន​បែរ​ទៅ​រក​លោក​នាយក​រដ្ឋមន្ត្រី​ ដើម្បី​សុំ​ការ​ណែនាំ​ដែរ។

លោក ហ៊ុន សែន បាន​សរសេរ​តប​នឹង​សេចក្តី​រាយការណ៍​របស់​លោក ហោ ណាំហុង ថា “ក្នុង​សំណុំ​រឿង​អគ្គកុងស៊ុល​ ដូច​ដែល​បាន​លើកឡើង​ក្នុង​សេចក្តី​រាយការណ៍ បាន​ចេញ​ឯកសារ​ជាច្រើន​នោះ ​ត្រូវ​តែ​ទុក​ជា​មោឃៈ ហើយ​អគ្គកុងស៊ុល​រូបនេះ​ត្រូវ​តែ​កោះហៅ​មក​ប្រទេស​វិញ បន្ទាប់​មក​ដាក់​វិន័យ​​រដ្ឋបាល ឬ​ដាក់​បណ្តឹង​ទៅ​តុលាការ”។

ការ​ក្លែងបន្លំ ហាក់ដូចជា ប៉ុនប៉ង​គេចវេស​ចេញពី​កិច្ចព្រមព្រៀង​ទ្វេភាគី​រវាង​ប្រទេស​ទាំងពីរ ដែល​ចុះ​ហត្ថលេខា​កាលពី​ខែ​ធ្នូ​ឆ្នាំ​២០១៣​នៅ​ទីក្រុង​ហាណូយ ដើម្បី​ដោះស្រាយ​ការ​នាំ​ចេញ​អនុផល​ព្រៃឈើ​ដោយ​ខុស​ច្បាប់។ ក្នុង​ក្របខណ្ឌ​អនុវត្ត កិច្ចព្រមព្រៀង​នោះ​មាន​ន័យ​ថា រាល់​ការ​ដឹក​ជញ្ជូន​ឈើ​កែច្នៃ​ហើយ​ទៅ​ប្រទេស​វៀតណាម ឥឡូវ​នេះ​តម្រូវ​ឲ្យ​មាន​ការ​ជូន​ដំណឹង​ជាមុន​ពី​ក្រសួង​ពាណិជ្ជកម្ម​កម្ពុជា​ និង​ក្រសួង​ឧស្សាហកម្ម​និង​ពាណិជ្ជកម្ម​វៀតណាម។

លោក ណាំហុង បាន​សរសេរ​កាលពី​ថ្ងៃ​ទី​១៩​ខែ​កុម្ភៈ​ទៅ​លោក ហ៊ុន សែន ដែល​បន្ទាប់​មក​បាន​ស្នើ​ឲ្យ​ចាត់​វិធាន​ការ​ច្បាប់​ថា “ក្នុង​ករណី​កុងស៊ុល តាំង សុខងី បាន​រំលោភ​ច្បាប់​យ៉ាង​បំពាន​និង​ធ្ងន់ធ្ងរ ក្រសួង​ការបរទេស​និង​សហប្រតិបត្តិការ​អន្តរជាតិ​នឹង​បញ្ជូន​សំណុំ​រឿង​នេះ​ទៅ​តុលាការ ដើម្បី​ផ្តន្ទាទោស​រូបគាត់​ស្របតាម​ច្បាប់”។

លោក កុយ គួង អ្នកនាំពាក្យ​ក្រសួង​ការបរទេស​បាន​បដិសេធ​មិន​អធិប្បាយ​អំពី​រឿង​ក្តី​នេះ​ទេ។ លោក ស៊ុន ចាន់ថុល រដ្ឋមន្ត្រី​ក្រសួង​ពាណិជ្ជកម្ម មិន​បាន​ឆ្លើយ​តប​ទៅ​នឹង​សំណើ​សុំ​ពន្យល់​ឡើយ។

ឯកសារ​តុលាការ​បង្ហាញ​ថា ក្រុម​អ្នក​ស៊ើប​អង្កេត​ក្រសួង​មហាផ្ទៃ​បាន​រក​ឃើញ​ឯកសារ​ក្លែងក្លាយ​ដែល​អនុញ្ញាត​ឲ្យ​ក្រុមហ៊ុន​ចំនួន​១៤​នាំ​ចេញ​ឈើ​ប្រណីត​សរុប​២០៩.៧០៣​ម៉ែត្រគូប​ពី​ប្រទេស​កម្ពុជា​ចូល​ប្រទេស​វៀតណាម។

លោក ឡុង ណូរិន មេធាវី​​តំណាង​ក្រសួង​ពាណិជ្ជកម្ម នៅ​ពេល​នោះ​បាន​ធ្វើ​ដំណើរ​ជាមួយ​មនុស្ស​មួយ​ក្រុម​ក្នុង​ក្រសួង​នេះ​ទៅ​ប្រទេស​វៀតណាម​កាលពី​ដើម​ឆ្នាំ​២០១៤ ដើម្បី​ធ្វើការ​ស៊ើប​អង្កេត​បន្ថែម និង​បាន​រកឃើញ​ឯកសារ​ក្លែងក្លាយ​ប្រាំពីរ​បន្ថែម​ទៀត​នៅ​ការិយាល័យ​កុងស៊ុល​កម្ពុជា​ក្នុង​ទីក្រុង​ហូជីមិញ ដែល​អនុញ្ញាត​ឲ្យ​មាន​ការ​ដឹកឈើ​ចេញ​ជាង១៣០.០០០​ម៉ែត្រគូប។

មាន​ក្រុមហ៊ុន​ឬ​បុគ្គល​សរុប​ចំនួន​២៣ ក្នុង​នោះ​មាន​ទាំង​ក្រុមហ៊ុន Brightway Furniture ផង ចុះ​ក្នុង​ឯកសារ​តុលាការ​ដែល​មាន​ឈ្មោះ​នៅ​ក្នុង​ឯកសារ​ក្លែងក្លាយ មាន​នៅ​ចន្លោះ​ឆ្នាំ​២០១៣​និង​ដើម​ឆ្នាំ​២០១៤ ​ដែល​បញ្ជាក់​ថា​ផ្តល់​ឲ្យ​ពួកគេ​នូវ​សិទ្ធិ​នាំ​ចេញ​ឈើ​ប្រណីត​ជាង​៣៣៩.៧០០​ម៉ែត្រគូប​ទៅ​ប្រទេស​វៀតណាម។

យោងតាម​ប៉ូលិស​បាន​ឲ្យ​ដឹង​ថា បច្ចុប្បន្ន គ្មាន​ម្ចាស់​ក្រុមហ៊ុន​ណា​ម្នាក់​ប្រឈម​នឹង​ការ​ចោទ​ប្រកាន់​ព្រហ្មទណ្ឌ​ទាក់ទិន​នឹង​រឿងក្តី​នេះ​ទេ។

ការ​ព្យាយាម​ទាក់ទង​ក្រុមហ៊ុន​មិន​បានសម្រេច​ទេ ចំណែកឯ លោក ណូរិន មេធាវី​របស់​ក្រសួង​ពាណិជ្ជកម្ម បាន​បដិសេធ​មិន​ពិភាក្សា​ថាតើ​ប្រភេទ​ឈើ​អ្វី​ដែល​ធ្លាប់​បាន​នាំ​ទៅ​ប្រទេស​វៀតណាម តាម​រយៈ​ឯកសារ​ក្លែងក្លាយ​នោះ។

លោក ប៉ាល់ សុធី អនុ​ប្រធាន​ការិយាល័យ​នៅ​នាយកដ្ឋាន​ព្រហ្មទណ្ឌ​កម្រិត​ស្រាល​ក្រសួង​មហា​ផ្ទៃ បាន​និយាយ​កាលពី​ខែ​មុន​ថា លោក​បាន​សាកសួរ​ពាណិជ្ជករ​មួយ​ចំនួន​ដែល​មាន​ឈ្មោះ​ក្នុង​ឯកសារ​ក្លែងក្លាយ ប៉ុន្តែ​បាន​បដិសេធ​មិនបញ្ចេញ​ឲ្យ​ដឹង​លទ្ធផល​ទេ។

លោក សុធី បាន​និយាយ​ថា រហូត​ដល់​ពេល​នេះ ក្រុមហ៊ុន​ដែល​ពាក់ព័ន្ធ​ក្នុង​រឿង​នេះ ដែល​រក​បាន​ប្រាក់​រាប់​លាន​ពី​ការ​ដឹក​ជញ្ជូន​ឈើ គ្រាន់​តែ​ជាប់​ឈ្មោះ​ជា​ជន​រងគ្រោះ​នៃ​ការ​ក្លែង​បន្លំ​ក្នុង​ក្រុម​រត់ពន្ធ​ឈើ​ប៉ុណ្ណោះ។ លោក​បាន​និយាយ​ថា “យើង​មិន​ទាន់​មាន​ការ​សន្និដ្ឋាន​ណាមួយ​នៅឡើយ​ទេអំពី​ក្រុមហ៊ុន​ទាំង​នោះ”៕មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស