លោក ប៉ុល ហំម ប្រធានគណៈកម្មការផ្នែកកសិកម្មនៃរដ្ឋសភា បានធ្វើដំណើរតាមឧទ្ធម្ភាគចក្រពីខេត្តកោះកុងចូលទៅក្នុងតំបន់ជ្រលងអារ៉ែងដ៏ជ្រៅកាលពីថ្ងៃច័ន្ទដើម្បីពិនិត្យកន្លែងគម្រោងសាងសង់ទំនប់វារីអគ្គិសនីដ៏ចម្រូងចម្រាស។
សមាជិកសភាគណបក្សសង្គ្រោះជាតិរូបនេះបានធ្វើដំណើរទៅតំបន់នោះមុនពេលគម្រោងចូលមកបំភ្លឺរបស់រដ្ឋមន្ត្រីក្រសួងបរិស្ថាន និងរដ្ឋមន្ត្រីក្រសួងកសិកម្មនៅរដ្ឋសភានៅសប្តាហ៍ក្រោយ។
លោកបានមានប្រសាសន៍កាលពីម្សិលមិញថា ដំណើរទៅទីនោះបានធ្វើឲ្យលោកដឹងថា ជនជាតិដើមភាគតិចជងជាច្រើនគ្រួសាររស់នៅក្នុងជ្រលងនោះ បានជំទាស់ដាច់ខាតទៅនឹងគម្រោងសាងសង់ទំនប់វារីអគ្គិសនីស្ទឹងឆាយអារ៉ែងដែលមានកម្លាំង១០៨មេហ្គាវ៉ាត់ នេះ ដែលនឹងបង្ខំឲ្យពួកគាត់ចាកចេញពីដីដូនតារបស់ខ្លួន ប្រសិនបើទំនប់នេះត្រូវបានសាងសង់មែននោះ។
លោកបានមានប្រសាសន៍ថា “អ្នកភូមិជាច្រើនលើកឡើងថា ពួកគាត់មិនចង់…ឲ្យមានការសាងសង់ទំនប់វារីអគ្គិសនីនោះឡើយ ដែលនឹងធ្វើឲ្យប៉ះពាល់ដល់វប្បធម៌ និងជីវភាពរស់នៅរបស់ជនជាតិដើមភាគតិចជងរបស់ខ្លួន។ ពួកគាត់បានស្នើដល់រដ្ឋាភិបាលកុំឲ្យសាងសង់ទំនប់វារីអគ្គិសនីនេះ”។
លោក ប៉ុល ហំម បានមានប្រសាសន៍ថា ដំណើរចុះទៅពិនិត្យមើលនោះក៏បានធ្វើឲ្យលោកជឿជាក់ផងដែរថា អគ្គិសនីដែលផលិតដោយទំនប់នេះមិនស្មើនឹងការប៉ះពាល់ដល់សហគមន៍ជនជាតិដើមភាគតិចជង និងព្រៃការពារដែលពួកគាត់រស់នៅនោះឡើយ។
ប្រធានគណៈកម្មការរូបនេះបានពន្យល់ថា “តាមយោបល់របស់ខ្ញុំ លទ្ធផលនៃអគ្គិសនីកម្លាំង១០៨មេហ្គាវ៉ាត់នោះជាថ្នូរនឹងការធ្វើឲ្យប៉ះពាល់ដល់ធនធានធម្មជាតិ និងវប្បធម៌ ឧទាហរណ៍ដូចជាការទិញទំនិញដែលមានតម្លៃថ្លៃអ៊ីចឹង”។ លោកបានបន្ថែមថា “នៅពេលខ្ញុំធ្វើដំណើរតាមឧទ្ធម្ភាគចក្រ ខ្ញុំបានឃើញព្រៃក្រាស់ ហើយខ្ញុំចង់រក្សាទុកព្រៃនោះ”។
យោងតាមលោក ម៉ៅ មុន្នីវណ្ណ សមាជិកសភាគណបក្សសង្គ្រោះជាតិដែលបានចូលរួមក្នុងការធ្វើដំណើរទៅដែរនោះបានឲ្យដឹងថា ឧទ្ធម្ភាគច្រកនេះត្រូវបានផ្តល់ដោយអង្គការសម្ព័ន្ធសត្វព្រៃជាអង្គការមិនមែនរដ្ឋាភិបាល។
រូបភាពវីដេអូដែលបានដាក់តាមប្រព័ន្ធអុីនធើណិតដោយលោក សម រង្ស៊ី ប្រធានគណបក្សសង្គ្រោះជាតិបង្ហាញវេទិកាសាធារណៈមួយនៅក្នុងជ្រលងភ្នំនោះដែលរៀបចំដោយលោក ប៉ុល ហំម ដែលក្នុងនោះសមាជិកសហគមន៍មូលដ្ឋានបានជំទាស់ចំពោះគម្រោងសាងសង់ទំនប់វារីអគ្គិសនីនេះ។
បុរសម្នាក់បានលើកឡើងថា “យើងរស់នៅទីនេះពឹងផ្អែកលើធនធានធម្មជាតិ។ ប្រសិនបើពួកគេកាប់ដើមឈើ យើងមិនដឹងថា ទៅរស់នៅឯណា ឬរកការងារអ្វីធ្វើឡើយក្នុងនាមជាជនជាតិដើមភាគតិចនោះ។ ខ្ញុំនឹងផ្ញើសារទៅលោកនាយករដ្ឋមន្ត្រី ហ៊ុន សែន ឲ្យលុបចោលគម្រោងសាងសង់ទំនប់វារីអគ្គិសនីនេះ ហើយធ្វើជាតំបន់ទេសចរណ៍ធម្មជាតិដើម្បីរកចំណូលសម្រាប់រដ្ឋាភិបាលជំនួសវិញ”។
លោក សាយ សំអាល់ រដ្ឋមន្ត្រីក្រសួងបរិស្ថានបានបញ្ជាក់ថា ក្រុមមន្ត្រីមកពីក្រសួងរបស់លោកបានអមដំណើរលោក ប៉ុល ហំម អំឡុងការធ្វើដំណើរនោះដែរ ប៉ុន្តែបានបង្វែរសំណួរបន្ថែមទៅលោក សៅ សុភាព អ្នកនាំពាក្យក្រសួងវិញ ដែលគេមិនអាចទាក់ទងបាន។
នៅថ្ងៃច័ន្ទ សមាជិកសភានឹងមានឱកាសសួរសំណួរលោក សាយ សំអាល់ នៅរដ្ឋសភាអំពីបញ្ហាមួយចំនួនរួមទាំងទំនប់វារីអគ្គិសនីស្ទឹងឆាយអារ៉ែងដែលរដ្ឋាភិបាលលើកឡើងថា នឹងត្រូវសាងសង់ប្រសិនបើមានការវាយតម្លៃផលប៉ះពាល់បរិស្ថាន និងសង្គមច្បាស់លាស់តែប៉ុណ្ណោះ។
អ្នកភូមិជនជាតិដើមភាគតិចជង និងអង្គការមិនមែនរដ្ឋាភិបាលដែលជួយពួកគាត់បារម្ភថា រដ្ឋាភិបាលនឹងអនុម័តឲ្យសាងសង់ទំនប់នេះ ដោយមិនគិតដល់លទ្ធផលនៃការវាយតម្លៃទៅជាយ៉ាងណានោះឡើយ។ ថ្មីៗនេះក្រុមហ៊ុនសំណង់របស់ចិនបានប្រកាសថា ខ្លួនបានចុះហត្ថលេខាលើកិច្ចសន្យាជាមួយក្រុមហ៊ុនដែលគាំទ្រដល់ការសាងសង់ទំនប់វារីអគ្គិសនីនេះហើយ៕សារុន