កាលពីម្សិលមិញ លោកនាយករដ្ឋមន្ត្រី ហ៊ុន សែន បានចូលរួមជាអធិបតីក្នុងពិធីសម្ពោធមន្ទីរពេទ្យរ៉ូយ៉ាល់ភ្នំពេញ ដោយបានលើកសរសើរសហស្ថាបនិក គឺលោក ប្រាសឺត ប្រាសាទទុង ឱសថ សេដ្ឋីជនជាតិថៃដែលបានជួយដល់រដ្ឋាភិបាលកម្ពុជានៅចុងទសវត្សរ៍ឆ្នាំ១៩៨០ និងអំឡុងការប្រយុទ្ធគ្នានៅក្នុងក្រុងភ្នំពេញកាលពីឆ្នាំ១៩៩៧។
លោក ហ៊ុន សែន បានថ្លែងអំណរគុណលោក ប្រាសឺត ប្រធានក្រុមហ៊ុនអាកាសចរណ៍បាងកកអ៊ែរវ៉េ និងក្រុមហ៊ុន Bangkok Dusit Medical Service ក្នុងពិធីសម្ពោធ មន្ទីរពេទ្យថ្មីនេះ ដែលចំណាយទឹកប្រាក់អស់៥០លានដុល្លារ និងបានរៀបរាប់ពីទំនាក់ទំនងរបស់លោកទាំងពីរតាំងពីឆ្នាំ១៩៩០ នៅពេលក្រុងភ្នំពេញមានស្ថានភាពមិនល្អ ហើយត្រូវបានហាមឃាត់សម្រាប់ជើងហោះហើរពាណិជ្ជកម្មពីសំណាក់ប្រទេសជាច្រើន។
លោក ហ៊ុន សែន បានមានប្រសាសន៍ថា “ការចាប់ផ្ដើមរបស់យើង គឺការហោះហើរផ្ទាល់របស់ក្រុមហ៊ុនអាកាសចរណ៍បាងកកអ៊ែរវ៉េមកកាន់ប្រទេសកម្ពុជានៅពេលកម្ពុជាពឹងផ្អែកទៅលើការទូត នយោបាយ និងសេដ្ឋកិច្ចរបស់ខ្លួន។ នៅពេលនោះការហោះហើរផ្ទាល់របស់ក្រុមហ៊ុនអាកាសចរណ៍បាងកកអ៊ែរវ៉េមកកាន់រាជធានីភ្នំពេញ គឺជាជំហានដ៏សំខាន់ចំពោះកិច្ចព្រមព្រៀងសន្តិភាពក្រុងបារីស”។
ទោះជាយ៉ាងណា លោក ហ៊ុន សែន បានមានប្រសាសន៍កោតសរសើរពីភក្តីភាពរបស់លោក ប្រាសឺត អំឡុងការប្រយុទ្ធគ្នាកាលពីថ្ងៃទី៥ និងទី៦ ខែកក្កដា នៅក្នុងក្រុងភ្នំពេញ រវាងកងកម្លាំងប្រដាប់អាវុធដែលស្មោះត្រង់នឹងលោក ហ៊ុន សែន ដែលពេលនោះជានាយករដ្ឋមន្ត្រីទី២ និងកងកម្លាំងដែលស្មោះត្រង់នឹងព្រះអង្គម្ចាស់ នរោត្តម រណឫទ្ធិ ជានាយករដ្ឋមន្ត្រីទី១ដែលត្រូវបានបណ្តេញចេញ។
លោកបានមានប្រសាសន៍ថា អំឡុងពេលនោះក្រុមហ៊ុនអាកាសចរណ៍របស់លោក ប្រាសឺត ប្រឈមនឹងការលំបាកផ្នែកហិរញ្ញវត្ថុ ប៉ុន្តែបានបន្តហោះហើរមករាជធានីភ្នំពេញ ដដែលបើទោះជានៅពេលនោះក្រុមហ៊ុនអាកាសចរណ៍មួយចំនួនទៀតបានបញ្ឈប់សេវាកម្មរបស់ខ្លួនក៏ដោយ។ លោកបានបន្ថែមថា “មិនថាចំណេញឬក៏ខាតឡើយ លោក ប្រាសឺត នៅតែបន្តហោះហើរផ្ទាល់មកកាន់រាជធានីភ្នំពេញដដែល។ នេះគឺជាការសំខាន់ណាស់សម្រាប់ខ្ញុំក្នុងនាមជាមេដឹកនាំនៅពេលនោះ”។
រយៈពេលពីរបីខែក្រោយមក បន្ទាប់ពីការប្រយុទ្ធគ្នាកាលពីខែកក្កដា ឆ្នាំ១៩៩៧ លោក ហ៊ុន សែន បានផ្ដល់សិទ្ធិផ្ដាច់មុខដល់ក្រុមហ៊ុនអាកាសចរណ៍បាងកកអ៊ែរវ៉េធ្វើការហោះហើរពីក្រុងបាងកកមកកាន់ខេត្តសៀមរាប។
សិទ្ធិផ្ដាច់មុខស្របច្បាប់របស់ក្រុមហ៊ុនអាកាសចរណ៍បាងកកអ៊ែរវ៉េបានដំណើរការរហូតដល់ខែតុលា ឆ្នាំ២០១៣ នៅពេលក្រុមហ៊ុនអាកាសចរណ៍ប្រកួតប្រជែង រួមមានក្រុមហ៊ុនអាកាសចរណ៍ Air Asia ដែលទីបំផុតក៏ទទួលបានអាជ្ញាប័ណ្ណបម្រើសេវាកម្មនេះផងដែរ៕ សារុន