40.3 C
Phnom Penh

ថៃ​ស្នើ​ឲ្យ​កម្ពុជា​ជួយ​រក​ចាប់​ជនរត់ពន្ធ​សរីរាង្គ​មនុស្ស

ដោយ ឌឹ ខេមបូឌា ដេលី

បទវិភាគ

មន្ត្រី​ថៃ​បាន​និយាយ​កាលពី​ថ្ងៃ​អង្គារ​ថា អាជ្ញាធរ​ថៃ​បាន​ស្នើ​ការិយាល័យ​អាំងទែប៉ូល​កម្ពុជា​ឲ្យ​ជួយ​​ចាប់​ជនជាតិ​អាមេរិក​ពីរ​នាក់ ដែល​គេ​គិត​ថា​បាន​ចូល​ប្រទេស​កម្ពុជា​ បន្ទាប់ពី​ព្យាយាម​បញ្ជូន​សរីរាង្គ​មនុស្ស​ទៅ​ប្រទេស​កំណើត​របស់​ខ្លួន។

ឧត្តម​សេនីយ៍​ឯក ប្រាវុត ថាវ៉នស៊ីរិ អ្នក​នាំ​ពាក្យ​នគរបាល​ភូមិន្ទ​ថៃ បាន​និយាយ​ថា ការិយាល័យ​អាំងទែប៉ូល​កម្ពុជា​បាន​ព្រម​ធ្វើ​សហ​ប្រតិបត្តិការ​ក្នុង​ការ​ស្វែងរក រ៉ាយអិន អិដវើដ ម៉ាកហ្វេសិន និង ដានីញ៉ែល ថានឺ ដែល​គេ​ចង់​ចាប់​ខ្លួន​ពី​បទ​ប៉ុនប៉ង​បញ្ជូន​សរីរាង្គ​មនុស្ស ក្នុង​នោះ​មាន​ទាំង​ក្បាល​ទារក​មួយ​ផង ទៅ​ក្រុង​ឡាស វេហ្គាស។

ឧត្តម​សេនីយ៍​ឯក ប្រាវុត បាន​និយាយ​ថា “យើង​មាន​ព័ត៌មាន​មួយ​ចំនួន​ពី​ព្រំដែន​ថា ពួកគេ​បាន​ឆ្លង​ចូល​ប្រទេស​កម្ពុជា។ មែន យើង​បាន​ព្យាយាម​ទាក់ទង​ជាមួយ​​អាំងទែប៉ូល​កម្ពុជា និង​បាន​ទទួល​ហើយ ប៉ុន្តែ ពួកគេ​មិន​ទាន់​រកឃើញ​ទេ”។

លោក​បាន​បន្ថែម​ថា “ឥឡូវ​នេះ យើង​មិន​ដឹង​ពួកគេ​នៅទីណាទេ​ក្នុង​ប្រទេស​កម្ពុជា ពីព្រោះ [ជន​សង្ស័យ] ដឹងអំពី​ករណី​នេះ​ហើយ ដូច្នេះ​ពួកគេ​ត្រូវ​ពួន​សម្ងំ។​ ខ្ញុំ​ជឿជាក់​សឹងតែ​មួយ​រយ​ភាគ​រយ​ថា ពួកគេ​នៅ​ក្នុង​ប្រទេស​កម្ពុជា”។

កាសែត​បាងកក ប៉ុស្តិ៍ បាន​រាយការណ៍​កាលពី​ថ្ងៃ​អង្គារ​ថា លោក ម៉ាកហ្វេសិន អាយុ​៣១​ឆ្នាំ និង​លោក ថានឺ អាយុ​៣៣​ឆ្នាំ ត្រូវ​គេ​តាម​ចាប់​ពី​បទ​ចោទ​ជាច្រើន​ រួមមាន​​ការ​ប៉ុនប៉ង​រត់ពន្ធ​សរីរាង្គ​មនុស្ស​ចេញពី​ប្រទេស​ថៃ​ ដោយ​ប្រើ​ឯកសារ​ដឹក​ជញ្ជូន​ក្លែងក្លាយ។ គេ​គិត​ថា ពួកគេ​ទាំងពីរ​បាន​ភៀស​ខ្លួន​ឆ្លង​ព្រំដែន​ទៅ​ប្រទេស​កម្ពុជា​កាលពី​ថ្ងៃ​អាទិត្យ។

យោងតាម​បាងកក ប៉ុស្តិ៍​ឲ្យ​ដឹង​ថា ជនជាតិ​អាមេរិក​ទាំង​ពីរ​នាក់​នេះ ដំបូង​ឡើយ​បាន​អះអាង​ថា បាន​ទិញ​សរីរាង្គ​មនុស្ស ដែល​ត្រូវ​បាន​រកឃើញ​នៅ​ការិយាល័យ​ប្រៃសណីយ៍ ឌីអេចអិល DHL នោះ នៅ​ផ្សារ​រាត្រី​មួយ​កន្លែង​ក្នុង​ក្រុង​បាងកក ហើយ​អ្នក​ទាំងពីរ​ត្រូវ​បាន​ដោះ​លែង​បន្ទាប់ពី​សាកសួរ មុនពេល​ភៀស​ខ្លួន​ចូល​ប្រទេស​កម្ពុជា។ កាសែត​ដដែល​បាន​រាយការណ៍​ថា អាជ្ញាធរ​ថៃ​បាន​ចេញ​ដីកា​ចាប់​ខ្លួន​ពួកគេ នៅ​ពេល​ដែល​មាន​ភ័ស្តុតាងបញ្ជាក់​ថា អ្នក​ទាំងពីរ​តាម​ពិត​បាន​លួច​សរីរាង្គ​មនុស្ស​ពី​សារមន្ទីរ​វេជ្ជសាស្ត្រ​សេរីរាជ ក្រុង​បាងកក។

ប៉ុន្តែ បើទោះជា​មាន​ការ​អះអាង​ពី​ឧត្តម​សេនីយ៍​ឯក ប្រាវុត ក៏​ដោយ ក៏​មន្ត្រី​កម្ពុជា​ជាច្រើន​នាក់ រួមទាំង​មន្ត្រី​ម្នាក់​នៅ​ការិយាល័យ​អាំងទែ​ប៉ូល​កម្ពុជា​ផង បាន​និយាយ​ថា ពួកគេ​មិន​បាន​ទទួល​ការ​ជូន​ដំណឹង​ពី​សំណាក់​អាជ្ញាធរ​ថៃ អំពី​ជន​រត់​គេច​ខ្លួន​ទាំង​នេះ​ទេ។

លោក លឹម សុខារស្មី នាយក​ស្តីទី​ការិយាល័យ​អាំងទែប៉ូល លោក សុខផល ប្រធាន​អន្តោ​ប្រវេសន៍​ក្រសួង​មហាផ្ទៃ និង​លោក គៀត ច័ន្ទថារិទ្ធ អ្នក​នាំពាក្យ​អគ្គស្នង​ការដ្ឋាន​នគរ​បាល​ជាតិ​​ សុទ្ធតែ​បាន​អះអាង​ថា មិន​បាន​ដឹង​អំពី​ករណី​នេះ​ទេ​កាលពី​ថ្ងៃ​អង្គារ។

លោក ឆៃ ប៊ុនណា ប្រធាន​ប៉ូលិស​ព្រំដែន ក៏​បាន​អះអាង​ថា​មិន​ដឹងរឿងនេះ​ដែរ។​ លោក​បាន​និយាយ​ថា “មកដល់​ពេល​នេះ អាជ្ញាធរ​ថៃ​មិន​ទាន់​បាន​ទាក់ទង​យើង​ទេ ប៉ុន្តែ​ប្រសិនបើ ពួកគេ​ទាក់ទង​យើង​ឲ្យ​ជួយ យើង​នឹង​ធ្វើ​សហប្រតិបត្តិការ ពីព្រោះ​រដ្ឋាភិបាល​ទាំងពីរ​មាន​កិច្ច​ព្រមព្រៀង”។

លោក ចេ រ៉ាម៉ាន អ្នក​នាំពាក្យ​ស្ថានទូត​អាមេរិក​បាន​និយាយ​ថា លោក​បាន​ដឹងអំពី​ករណី​នេះ ប៉ុន្តែ​បាន​បដិសេធ​មិន​អធិប្បាយ​បន្ថែម​ឡើយ។

លោក​បាន​និយាយ​ថា “យើង​ដឹង​សេចក្តី​រាយការណ៍​ដែល​ចោទ​ថា ពលរដ្ឋ​អាមេរិក​ម្នាក់​ប្រហែល​ជាប់​ពាក់ព័ន្ធ​ក្នុង​ការ​ប៉ុនប៉ង​បញ្ជូន​របស់​ពី​ប្រទេស​ថៃ ដែល​ធ្វើ​ឲ្យ​អាជ្ញាធរ​ថៃ​បារម្ភ ប៉ុន្តែខ្ញុំ​បាន​ប្រាប់​អ្នក​ឲ្យ​សួរ​អាជ្ញាធរ​ថៃ ពីព្រោះ​យើង​មិន​អាច​អធិប្បាយ​អំពី​ករណី​បុគ្គល​បាន​ទេ”។

លោក ម៉ាកហ្វេសិន និង​លោក ថានឺ បាន​ប្រឈម​នឹង​ការ​ចោទ​មុនៗ​នៅ​អាមេរិក ក្នុង​នោះ​មាន​ទាំង​ការ​បំពាន​ខាង​រាងកាយ​នៅ​ឆ្នាំ​២០០៣​ផង ដែល​ទាក់ទង​នឹង​ការ​ផលិត​វីដេអូ “Bumfights” ជា​វីដេអូ​ចម្រូងចម្រាស​មួយ ដែល​ក្នុង​វីដេអូ​នោះ ផលិតករ​ភាពយន្ត​បាន​ផ្តល់​ប្រាក់​ឲ្យ​ជន​គ្មាន​ផ្ទះ​សំបែង ឲ្យ​វាយ​គ្នា និង​សំដែង​យ៉ាង​គ្រោះថ្នាក់៕មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស