28 C
Phnom Penh

មេ​ដឹក​នាំ​សហជីព​ម្នាក់​អំពាវនាវ​ឲ្យ​ទុក​សន្ធិសញ្ញាបំពេញ​បន្ថែមជា​មោឃៈ​

ដោយ ឌឹ ខេមបូឌា ដេលី

បទវិភាគ

បន្ទាប់់​ពីការ​ធ្វើ​ដំណើរ​ទៅ​កាន់​ព្រំដែន​វៀតណាម​ក្នុង​ខេត្ត​ស្វាយរៀង​ជាមួយ​និស្សិត​ប្រហែល​១០០​នាក់​កាលពី​ថ្ងៃ​​អាទិត្យ លោក រ៉ុង ឈុន មេដឹកនាំ​សហជីព​ដ៏ឆ្នើម​​ម្នាក់​កាលពី​ម្សិល​មិញ​បាន​ធ្វើ​សន្និសីទ​កាសែត​មួយ​អំពាវ​នាវ​ឲ្យ​រដ្ឋសភា​ទុក​ជាមោឃៈនូវ​សន្ធិសញ្ញា​បំពេញ​​បន្ថែម​ដ៏ចម្រូង​ចម្រាស​ជាមួយ​វៀតណាម​។

ការ​អំពាវ​នាវ​នេះ​​ត្រូវ​បាន​ច្រាន​ចោល​ភ្លាមៗ​ដោយ​មន្ត្រី​កិច្ច​ការ​ព្រំដែន​ជាន់​ខ្ពស់​របស់​រដ្ឋាភិបាល​​ គឺ​លោក វ៉ា គឹមហុង ​ប្រធាន​គណៈកម្មការ​ព្រំដែន​រួម​កម្ពុជា ដែល​បាន​មាន​ប្រសាសន៍​ថា សន្ធិសញ្ញារយៈពេល​៩ឆ្នាំ​​នេះ​គឺជា​កិច្ច​ព្រមព្រៀង​​ស្រប​ច្បាប់​ ហើយ​មិន​អាច​ផ្លាស់​ប្ដូរ​បាន​​ឡើយ​។

នៅ​​ភោជនីយដ្ឋាន​មួយ​ក្នុង​រាជ​ធានី​ភ្នំពេញ លោក រ៉ុង ឈុន ដែល​​ជា​ប្រធាន​សមា​គម​​គ្រូ​បង្រៀន​កម្ពុជា​ឯករាជ្យ​ បាន​មាន​ប្រសាសន៍​​​ថា ​សន្ធិសញ្ញា​ជាមួយ​វៀតណាម​​​ដែល​ផ្អែក​លើ​កិច្ច​ព្រមព្រៀង​ឆ្នាំ​១៩៨៥​ ដែល​បាន​ចុះ​ហត្ថលេខា​អំឡុង​ការ​កាន់​កាប់​ប្រទេស​កម្ពុជា​របស់​វៀតណាម​នោះ បាន​បណ្ដាល​ឲ្យ​មាន​ការ​បាត់​បង់​ទឹកដី​ជាច្រើន​។

លោក រ៉ុង ឈុន បាន​ប្រាប់​អ្នក​យក​ព័ត៌​មាន​​ពី​ដំណើរ​របស់​លោក​ទៅ​កាន់​​ព្រំដែន​នៅ​ក្នុង​ស្រុក​រំដួល ខេត្ត​ស្វាយ​រៀង​ថា ” យើង​ឃើញ​ថា បង្គោល​ព្រំដែន​ជា​ច្រើន​ត្រូវ​បាន​បោះ​ក្នុង​ទឹក​ដី​កម្ពុជាយើង​”។

នៅ​ពេល​ធ្វើ​ដំណើរ​ទៅនោះ កសិករ​​បាន​បង្ហាញ​​លោក រ៉ុង ឈុន អំពី​បង្គោល​ព្រំដែន​ដែល​ពួក​គាត់​អះ​អាង​ថា ​បង្គោល​ព្រំដែន​​ត្រូវបាន​រំកិល​រាប់​រយ​ម៉ែត្រ​ចូល​ក្នុង​ដី​​របស់​ពួកគាត់​ ហើយ​មេដឹកនាំ​សហជីព​រូប​នេះ​បាន​សន្យា​​ពាំនាំ​កង្វល់​របស់​ពួកគាត់​មក​រាជ​ធានី​ភ្នំពេញ។

លោក រ៉ុង ឈុន បាន​មាន​ប្រសាសន៍​នៅ​សន្និសីទ​កាសែត​កាលពី​ម្សិលមិញ​ថា ” សមាជិក​សភា​ទាំង​១២៣​រូប​ក្នុង​សភា​​ត្រូវ​​លើក​ឡើង​អំពី​​​សន្ធិសញ្ញា​បំពេញ​បន្ថែម​នេះ​ ហើយ​បញ្ជូន​ទៅ​ក្រុម​ប្រឹក្សា​ធម្មនុញ្ញ​ឲ្យ​ដក​ចេញ​”។

លោក វ៉ា គឹមហុង បាន​​មាន​ប្រសាសន៍​ថា សំណើ​របស់​លោក រ៉ុង ឈុន មិន​អាច​ធ្វើ​​បាន​ទេ​។ លោក​បាន​​​មាន​ប្រសាសន៍​ថា ” សូម​ឲ្យ​គាត់​ផ្ដល់​ហេតុផល​មក ហេតុ​អ្វី​បាន​ជា​គាត់​ចង់​ទុក​ជាមោឃៈនូវ​សន្ធិសញ្ញានេះ​។ រដ្ឋសភា​បាន​អនុម័ត​សន្ធិសញ្ញា​នេះ​ ​ក្រុម​ប្រឹក្សា​ធម្មនុញ្ញ​បាន​ផ្តល់ការ​យល់​​ព្រម ហើយ​ព្រះមហាក្សត្រ​បាន​ឡាយព្រះហស្តលេខា​”។

លោក​បាន​មាន​ប្រសាសន៍​ថា ” តើ​អាចទុកជា​មោឃៈ​ដូច​ម្ដេចកើត? នរណា​អាច​ទុក​ជា​មោឃៈ បាន​​? វា​មិន​​មែន​លោក រ៉ុង ឈុន ដែល​គ្រាន់​តែ​ជា​មនុស្ស​តូច​តាច​ម្នាក់ប៉ុណ្ណោះ​​ដែល​អាច​ទុក​ជាមោឃៈបាននោះឡើយ។ កុំ​ចេះ​តែ​​ធ្វើ​ការ​ចោទ​ប្រកាន់​។ អ្វី​ដែល​ពួកគេ​កំពុង​តែ​ធ្វើ​នេះ​គឺ​គ្រាន់​តែ​ដើម្បី​ទាក់​ទាញ​ប្រជា​ប្រិយភាព និង​ទទួល​បាន​ផល​ប្រយោជន៍​នយោ​បាយ​តែ​ប៉ុណ្ណោះ​”។

លោក រ៉ុង ឈុន ស្ថិត​ក្នុង​ចំណោម​​មេដឹកនាំ​សង្គម​ស៊ីវិល​បួន​នាក់​ដែល​ត្រូវ​បាន​​ជាប់​ពន្ធនាគារ​កាលពីចុងឆ្នាំ​២០០៥ ពីបទ​រិះគន់​លោក​នាយក​រដ្ឋមន្ត្រី ហ៊ុន សែន ចំពោះ​ការ​អនុម័ត​​សន្ធិ​សញ្ញា​ព្រំដែន​នេះ​ឲ្យ​ទៅ​ជា​ច្បាប់​នៅ​ឆ្នាំ​នោះ​៕ សារុន​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស