30 C
Phnom Penh

សហជីព​ និង​ថៅកែរោងចក្រ​ចុះ​កិច្ច​ព្រមព្រៀង​បញ្ចប់​​វិវាទ​នៅ​​រោងចក្រ​ SL

ដោយ ឌឹ ខេមបូឌា ដេលី

បទវិភាគ

រយៈ​ពេល​មួយ​ឆ្នាំ​ក្រោយ​ពី​​ការ​ប៉ះទង្គិច​​ហិង្សា​បាន​ផ្ទុះ​ឡើង​​រវាង​កម្មករ​មកពី​រោងចក្រ​កាត់​ដេរ SL និង​កង​កម្លាំង​សន្តិសុខ​ប្រដាប់​អាវុធ​​​ ដែល​បាន​បណ្ដាល​ឲ្យ​​អ្នក​ឈរ​មើល​ម្នាក់​ត្រូវ​គ្រាប់​ស្លាប់​​មក​នោះ​ តំណាង​កម្មករ និង​គណៈគ្រប់គ្រង​នៅ​​​រោងចក្រ​នេះ​បាន​ចុះ​ហត្ថ​លេខា​លើ​កិច្ច​ព្រមព្រៀង​មួយ​ចំនួន​នៅ​​សប្ដាហ៍​នេះ​ដើម្បី​បញ្ចប់​វិវាទ។

​កិច្ច​ព្រមព្រៀង​​ដែល​ធ្វើ​ឡើង​កាលពី​ថ្ងៃ​ច័ន្ទ​នេះ​​ មាន​​​ចំនួន​​ប្រាំពីរប្រការ​ដែល​បាន​ព្រម​ព្រៀង​គ្នា​អំឡុង​ជំនួប​ចរចា​​​រវាង​តំណាង​រោងចក្រ និង​​សម្ព័ន្ធ​សហជីព​ប្រជា​ធិបតេយ្យ​កម្មករ​កាត់​ដេរ (ស៊ីខៅឌូ) នៅ​ក្រសួង​ការ​ងារ​។

ក្នុង​ចំណោម​​​ចំណុច​ទាំង​នោះ​បញ្ជាក់​ថា លោក មាស សុថា ដែល​មាន​ភាគហ៊ុន​នៅ​រោងចក្រ​ SL និង​ដែល​បាន​កាន់​ការ​ជា​អ្នក​គ្រប់​គ្រង​នៅ​រោងចក្រ​នេះ​​អស់​រយៈពេល​ជិត​២​ឆ្នាំ​មក​នេះ នឹង​​លែងពាក់​ព័ន្ធ​​ក្នុង​ប្រតិបត្តិការ​ប្រចាំ​ថ្ងៃ​នៅ​រោងចក្រ​នេះ​ទៀត​ហើយ។ ក្រុម​ហ៊ុន​ក៏​បាន​យល់​ព្រម​បើក​ប្រាក់​សរុប​ចំនួន​៣០០.០០០ដុល្លារ​ឲ្យ​ទៅ​​កម្មករ​ដែល​បាន​ធ្វើ​ការ​តវ៉ា​នៅ​ខាង​មុខ​​ខ្លោង​ទ្វារ​ចូល​រោងចក្រ​អស់រយៈ​ពេល​រាប់​ខែ​កាលពី​ឆ្នាំ​មុន​ផង​ដែរ​ ដែល​​មាន​ចំនួន​ប្រហែល​ពាក់​កណ្ដាល​នៃ​ប្រាក់​ឈ្នួល​ដែល​ពួកគេ​បាន​បាត់​បង់​អំឡុង​ពេល​ធ្វើ​កូដកម្ម​។

​សហជីព​ស៊ីខៅឌូ​​បាន​ចោទ​ប្រកាន់​លោក មាស​ សុថា ថា​បាន​ប៉ុន​ប៉ង​​បញ្ឈប់​ការ​រៀបចំ​របស់​ខ្លួន​នៅ​រោងចក្រ​​​​របស់​ពាណិជ្ជករ​ម្នាក់​ឈ្មោះ រ៉ាយម៉ុន វ៉ុង (Raymond Wong) ដែល​កើន​នៅ​ហុង​កុង​នេះ​។

ក្រុម​ហ៊ុន​របស់​​លោក រ៉ាយម៉ុន វ៉ុង បាន​យល់​ព្រម​​បើក​ប្រាក់​ចំនួន​១៥០.០០០ដុល្លារ​ដល់​កម្មករ​នៅ​រយៈ​ពេលពីរ​​សប្ដាហ៍​ក្រោយ ហើយ​ចំនួន​​ដែល​នៅ​សេស​សល់​នឹង​បើក​ឲ្យ​​នៅ​រយៈ​ពេល​១៦០​ថ្ងៃ​ក្រោយ​។ ក្រុម​ហ៊ុន​នេះ​ក៏​បាន​ព្រមព្រៀង​ដក​ពាក្យ​បណ្ដឹង​ទាំង​អស់​ប្រឆាំង​មេដឹកនាំ​សហជីព​​ស៊ីខៅឌូ​ សកម្មជន និង​បុគ្គលិកនៅ​រោងចក្រ​ SL ផងដែរ​។

លោក អាត់ ធន់ ប្រធាន​សហជីព​ស៊ីខៅឌូ ​ដែល​បាន​​ចូល​ខ្លួនទៅ​សាលា​ដំបូង​រាជ​ធានី​ភ្នំពេញ​កាលពី​ដើម​ឆ្នាំ​នេះ​សម្រាប់​ការ​សាក​សួរ​ជុំវិញ​ការ​ចោទ​ប្រកាន់​ពី​បទ​ញុះញង់​ឲ្យ​មាន​អំពើ​ហិង្សា​អំឡុង​ពេល​តវ៉ា​នៅ​រោងចក្រ​ SL បាន​មាន​ប្រសាសន៍កាលពី​ម្សិលមិញ​ថា លោក​សង្ឃឹម​ថា លោក មាស សុថា នឹង​ប្រកាន់​ខ្ជាប់​តាម​កិច្ច​ព្រមព្រៀង​នេះ​។

លោក​បាន​​មាន​ប្រសាសន៍​ទៀត​ថា “ខ្ញុំ​មិន​ចង់​និយាយ​អំពី​ឥរិយាបថ​កន្លង​មក​ [របស់​លោក សុថា] នោះ​ទេ​។ គាត់​បាន​សន្យា​ឈប់​ពាក់​ព័ន្ធ​​ក្នុង​វិវាទ​រវាង​រោងចក្រ និង​កម្មករ​​ទៅ​​ថ្ងៃ​ក្រោយ ដូច្នេះ​យើង​សង្ឃឹម​ថា បញ្ហា​នេះ​នឹង​មិន​កើត​ឡើង​ទៀត​ឡើយ​”។

លោក មាស សុថា បាន​​មាន​ប្រតិកម្ម​​យ៉ាង​ខ្លាំង​តប​ទៅ​នឹង​ឥទ្ធិពល​​នៃ​វិវាទ​​ឧស្សាហកម្ម​ដ៏​ធំបំផុត​នៅ​ក្នុង​វិស័យ​កាត់​ដេរ ដោយ​មាន​ការ​ចោទ​ប្រកាន់​ថា លោក​ជា​អ្នក​ទទួល​​ខុស​ត្រូវ​ចំពោះ​ការ​បាញ់​​ប្រហារ​មេដឹកនាំ​សហជីព​ចំនួន​១៩​រូប​​ និង​ការ​​ហៅ​​កង​រាជ​អាវុធ​ហត្ថ​ឲ្យ​ទៅ​ល្បាត​នៅ​ជុំវិញ​បរិវេណ​រោងចក្រ​។

ការ​តវ៉ា​​​​​ដែល​ដឹកនាំ​ដោយ​សហជីព​ស៊ីខៅឌូ ​បាន​ពុះ​កញ្ជ្រោល​ខ្លាំង​ឡើងៗ​កាលពី​ខែ​វិច្ឆិកា​ឆ្នាំ​មុន ដែល​ពេល​នោះ​​កម្មករ​​ត្រូវ​បាន​រារាំង​មិន​ឲ្យ​​ហែក្បួន​​មក​កាន់​ភូមិគ្រឹះ​របស់​លោក​នាយក​រដ្ឋមន្ត្រី ហ៊ុន សែន នៅ​ក្នុង​រាជ​ធានី​ភ្នំពេញ​ ដោយ​​​ឈាន​ទៅ​ដល់​ការ​ប៉ះទង្គិច​គ្នា​​ ធ្វើ​ឲ្យ​នគរ​បាល​​បាញ់​ប្រហារ​ទៅ​លើ​ក្រុម​អ្នក​តវ៉ា​បណ្ដាល​ឲ្យ​ស្ត្រី​លក់​បាយ​ម្នាក់ ឈ្មោះ អេង សុខុំ អាយុ​៤៩​ឆ្នាំ ដែល​កំពុង​ឈរ​​នៅ​កន្លែង​លក់​របស់​គាត់​ជិត​កន្លែង​ប៉ះ​ទង្គិច​គ្នា ​បាត់​បង់ជីវិត​។

កិច្ច​ព្រមព្រៀង​នៅ​សប្ដាហ៍​នេះកើត​មាន​ឡើង​ជិត​មួយ​ឆ្នាំ​បន្ទាប់ពី​កម្មករ​រោងចក្រ​ SL វិល​ត្រឡប់​ចូល​ធ្វើ​ការវិញ ក្រោយ​ពី​មាន​កិច្ច​ព្រមព្រៀង​មួយកាលពី​លើក​មុន​ដើម្បី​ដក​លោក មាស សុថា ​ចេញ​កុំ​ឲ្យពាក់​ព័ន្ធ​នឹង​ប្រតិបត្តិការ​ប្រចាំ​ថ្ងៃ​នៅ​រោងចក្រ​នេះ​។

កាលពី​ម្សិលមិញ កម្មការិនី​​ម្នាក់​ឈ្មោះ វិន ដាវីន អាយុ​២៣​ឆ្នាំ ដែល​ធ្វើ​ការ​នៅ​រោងចក្រ​ SL អស់​រយៈ​ពេល​ជិត​៥ឆ្នាំ​ មាន​សង្ឃឹម​តិច​តួច​ណាស់​ដែល​ថា ក្រុម​ហ៊ុន​នឹង​ប្រកាន់​ខ្ជាប់​តាម​កិច្ច​ព្រមព្រៀងនេះ​​​។ នាង​និយាយ​ថា ” កិច្ចព្រមព្រៀង​​នេះ​ធ្វើ​ឲ្យ​ខ្ញុំ​មាន​សង្ឃឹម​តិច​តួច​ណាស់ ពីព្រោះ​ពួកគេ​តែង​តែ​សន្យា ហើយ​ចេញ​សេចក្ដី​ថ្លែង​ការណ៍​ទាំង​នេះ ប៉ុន្តែ​មិន​ដែល​ធ្វើ​តាម​​ឡើយ​”។

កម្មករ​ម្នាក់​ទៀត​ឈ្មោះ ឃួន ផាត អាយុ​២៦​ឆ្នាំ​បាន​និយាយ​ថា ប្រហែល​ជា​មាន​ការ​តវ៉ា​ទៀត​ ប្រសិន​បើ​​ក្រុម​ហ៊ុន​មិន​បើក​ប្រាក់​ខែ​ពេញ​តាម​ការ​សន្យា​ទេ​នោះ។ យុវជន​រូប​នេះ​និយាយ​ទៀត​ថា “យើង​នឹង​រង់ចាំ​មើល ប៉ុន្តែ​​​បើ​អត់​មាន​ទេ​ យើង​នឹង​តវ៉ា​។ កន្លង​មក​រោងចក្រ​ធ្លាប់​បាន​សន្យា​ច្រើនណាស់​​ជាមួយ​ពួកយើង”៕ សុខុម​​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស