មន្ត្រីនគរបាលម្នាក់បាននិយាយកាលពីម្សិលមិញថា ក្រុមគ្រួសារជនរងគ្រោះបីនាក់ក្នុងចំណោមជនរងគ្រោះប្រាំនាក់ដែលបានស្លាប់ក្នុងអគ្គិភ័យ ដែលបានឆាបឆេះក្លឹបកម្សាន្តមួយក្នុងក្រុងសៀមរាប កាលពីរំលងអធ្រាត្រថ្ងៃអង្គារនោះ បានទាមទារសំណងក្នុងម្នាក់ៗពី៣.០០០ដុល្លារទៅ៤.០០០ដុល្លារពីម្ចាស់ក្លឹប។
យោងតាមលោក ថោង សាគុណ ស្នងការរងនគរបាលខេត្តសៀមរាបបានឲ្យដឹងថា នៅម៉ោងមុន៣រំលងអធ្រាត្រថ្ងៃអង្គារ អគ្គិភ័យបានឆាបឆេះភោជនីដ្ឋាន និងក្លឹបកម្សាន្តហ៊ីបហប់ ដោយបណ្តាលឲ្យជនជាតិខ្មែរបួននាក់ស្លាប់គឺមានឈ្មោះ ព្រំ ភិរុណ និង សឿន សាវូន អ្នកទាំងពីរមានអាយុ៣១ឆ្នាំដូចគ្នា ចេង សាវៀន អាយុ៣៣ឆ្នាំ ជា ស្រីនី អាយុ៣៦ឆ្នាំ និងជនជាតិអូស្ត្រាលីម្នាក់ឈ្មោះ Tom Ricketson អាយុ៣២ឆ្នាំ។
លោកបានមានប្រសាសន៍កាលពីម្សិលមិញថា “សាច់ញាតិ ចេង សាវៀន ជា ស្រីនី និង សឿន សាវូន បានដាក់ពាក្យបណ្ដឹងទៅសាលាដំបូងខេត្ត ហើយបានទាមទារសំណងពី៣.០០០ដុល្លារទៅ៤.០០០ដុល្លារ”។ លោកបានបន្ថែមថា ក្រុមគ្រួសាររបស់ ព្រំ ភិរុណ មិនបានដាក់ពាក្យបណ្ដឹងទេ ពីព្រោះពួកគាត់ជាប់រវល់រៀបចំបុណ្យសព។
លោក សាគុណ បានមានប្រសាសន៍ថា ក្រុមគ្រួសារ Tom Ricketson ក៏មិនបានដាក់ពាក្យបណ្ដឹងដែរ ប៉ុន្តែថាសាកសពរបស់គាត់ត្រូវបានបញ្ជូនទៅស្ថានទូតអូស្ត្រាលី។ លោកបានមានប្រសាសន៍ថា “សាកសពរបស់ជនរងគ្រោះអូស្ត្រាលីរូបនេះត្រូវបានប្រគល់ទៅតំណាងស្ថានទូតអូស្ត្រាលី ហើយគាត់បានដឹកសាកសពមករាជធានីភ្នំពេញនៅថ្ងៃនេះតាមរថយន្តរបស់ស្ថានទូត”។
ស្នងការរងរូបនេះបានបង្ហាញឈ្មោះស្ត្រីពីរនាក់ដែលបានរងរបួសនៅក្នុងអគ្គិភ័យនោះគឺឈ្មោះ អាត សារ៉ាត់ អាយុ២៤ឆ្នាំ និង យ៉ាត ស្រីម៉ៅ អាយុ៣៣ឆ្នាំ ដែលអ្នកទាំងពីរបម្រើការនៅក្លឹបកម្សាន្តនេះ ហើយលោកបានមានប្រសាសន៍ថា ពួកគេនឹងមិនដាក់ពាក្យបណ្ដឹងទេ ពីព្រោះម្ចាស់ក្លឹបគឺលោក លី ម៉េងស្រុិន បាន”ទៅមើលពួកគេនៅមន្ទីរពេទ្យ”។
លោក សាគុណ បានមានប្រសាសន៍ថា នគរបាលមិនទាន់បានសាកសួរលោក ម៉េងស្រុិន ម្ចាស់ក្លឹបកម្សាន្តនេះនៅឡើយទេ ដែលទំនងជាបានបញ្ជូនមេធាវីម្នាក់ឲ្យទៅចរចាជាមួយជនរងគ្រោះ។
លោកបានមានប្រសាសន៍ថា “ខ្ញុំបានទទួលព័ត៌មានថា ម្ចាស់ក្លឹបកម្សាន្តហ៊ីបហប់នេះបានបញ្ជូនមេធាវីឲ្យទៅទាក់ទងជាមួយក្រុមគ្រួសារជនរងគ្រោះ ហើយបានជួយរៀបចំបុណ្យសពរបស់ពួកគេ”។ លោក ម៉េងស្រុិន មិនអាចទាក់ទងបានទេកាលពីម្សិលមិញ។ លោក សាគុណ ក៏បានមានប្រសាសន៍កាលពីម្សិលមិញដែរថា ក្រុមស៊ើបអង្កេតបានសន្និដ្ឋានថា អគ្គិភ័យនេះបណ្ដាលមកពីទុស្សេខ្សែភ្លើងនៅលើពិដាន។ លោកបានមានប្រសាសន៍ថា យើងបានយកខ្សែភ្លើង និងប្រអប់ហ្វុ៊យស៊ីប ជាភ័ស្តុតាង ហើយបានធ្វើការស៊ើបអង្កេត”។
នៅជាប់ខ្លោងទ្វារមុខក្លឹបកម្សាន្តនេះកាលពីម្សិលមិញ គឺមានទង់ជាតិអូស្ត្រាលីតូចមួយ ផ្កាពណ៌លឿងជាច្រើនបាច់ រូបថតលោក Tom Rocketson និងការសរសេរពាក្យឧទ្ទិសដល់គាត់ដែលមានខ្លឹមសារថា ” សូមឲ្យវិញ្ញាណក្ខន្ធរបស់គាត់បានទៅកាន់សុគតិភព”៕ សារុន