30 C
Phnom Penh

គណបក្ស​សង្គ្រោះជាតិ​ចង់​ឲ្យ​ការ​លក់​សំបុត្រ​ចូលទស្សនា​អង្គរ​វត្ត​នៅ​ក្រោម​ក្រសួង​ទេសចរណ៍

ដោយ ឌឹ ខេមបូឌា ដេលី

បទវិភាគ

លោក យ៉ែម បុញ្ញឫទ្ធិ អ្នក​នាំាពាក្យ​គណបក្ស​សង្គ្រោះ​ជាតិ បាន​និយាយ​កាលពី​ថ្ងៃ​ពុធថា គណបក្ស​ប្រឆាំង​នឹង​ស្នើ​ឲ្យ​រដ្ឋាភិបាល​ដក​ហូត​សិទ្ធិ​ក្រុមហ៊ុន​សូគីម៉ិច ក្នុង​ការ​ប្រមូល​ចំណូល​ពី​ការ​លក់​សំបុត្រ​នៅ​ឧទ្យានបុរាណ​អង្គរ។channa03

ការ​លក់​សំបុត្រ​ចូល​បរិវេណ​ប្រាសាទ​អង្គរ​វត្ត​ចាត់ចែង​ដោយ​ក្រុមហ៊ុន​សូគីម៉ិច ដែល​គ្រប់គ្រង​ដោយ​លោក​ សុខ គង់ ពាណិជ្ជករ​ដ៏មាន​ឥ​ទ្ធិ​ពល​ ប៉ុន្តែ​លោក បុញ្ញឫទ្ធិ បាន​និយាយ​ថា លោក​ចង់​ឃើញ​ក្រសួង​ទេសចរណ៍​គ្រប់គ្រង​ការងារ​នេះ​វិញ។

លោក បុញ្ញឫទ្ធិ បាន​និយាយ​បន្ទាប់ពី​កិច្ច​ប្រជុំ​ជាមួយ​លោក ថោង ខុន រដ្ឋមន្ត្រី​ក្រសួង​ទេសចរណ៍​ថា “យើង​នឹង​ស្នើ​ថា ការ​លក់​សំបុត្រ​ត្រូវតែ​ប្រគល់​ឲ្យ​ក្រសួង​ទេសចរណ៍​គ្រប់គ្រង​វិញ ពីព្រោះ​យើង​ចំណាយ​ប្រាក់​ដើម្បី​ទាក់ទាញ​ភ្ញៀវ​ទេសចរណ៍”។​ លោក​បាន​និយាយ​ថា “យើង​មិន​គួរ​អនុញ្ញាត​ឲ្យ​អ្នក​ផ្សេង​យក​ចំណេញ​ពី​ការ​លក់​សំបុត្រ​ដោយ​មិន​ធ្វើ​អ្វី​នោះ​ទេ”។

អំឡុង​យុទ្ធនាការ​បោះ​ឆ្នោតជាតិ​កាលពី​ឆ្នាំ​មុន លោក កឹម សុខា អនុប្រធាន​គណបក្ស​សង្គ្រោះ​ជាតិ​បាន​អះអាង​ថា ការ​លក់​សំបុត្រ​ចូល​ទស្សនា​អង្គរវត្ត​នៅ​ឆ្នាំ​២០១២ បាន​ប្រាក់​ចំណូល២០០​លាន​ដុល្លារ ដោយ​ផ្អែក​លើ​ការ​ប៉ាន់​ប្រមាណ​ថា​មាន​ភ្ញៀវ​ទេសចរណ៍​៣,៥៨​លាន​នាក់​ដែល​បាន​មក​លេង​ប្រទេស​កម្ពុជា​នៅ​ឆ្នាំ​នោះ។

ជា​ការ​ឆ្លើយ​តប អាជ្ញាធរ​អប្សរា ដែល​ថែរក្សា​បរិវេណ​អង្គរ និង​ធ្វើ​របាយការណ៍​ផ្ទាល់​ជូន​ឧបនាយក​រដ្ឋ​មន្ត្រី សុខ​ អាន បាន​ចេញ​សេចក្តី​ថ្លែងការណ៍​មួយ​រិះគន់​ការ​អះអាង​របស់​លោក​ កឹម សុខា ដោយ​ពន្យល់​ថា មាន​សំបុត្រ​តែ​១,៨​លាន​សន្លឹក​ប៉ុណ្ណោះ​បាន​លក់​នៅ​ឆ្នាំ​២០១២។

ផ្អែក​លើ​តួ​លេខ​នោះ ជា​មធ្យម ការ​លក់​សំបុត្រ​ថោក​បំផុត​គឺ​២០​ដុល្លារ​​សម្រាប់​ការ​ចូលទស្សនា​​មួយ​ថ្ងៃ​ ប្រាក់​ចំណូល​ពី​ការ​លក់​សំបុត្រ​​បាន៣៦,១៧​លាន​ដុល្លារ។

លោក បុញ្ញឫទ្ធិ ប្រធាន​គណៈកម្មការ​សភា​ជាតិ​ទទួល​ខុស​ត្រូវ​វិស័យ​ទេសចរណ៍ បាន​ស្នើ​លោក ថោង ខុន នៅ​ចំពោះ​មុខ​គណៈកម្មការ​នៅ​សភា​កាលពី​ថ្ងៃ​ពុធ។

បន្ទាប់ពី​ការ​ប្រជុំ​ជាមួយ​គណៈកម្មការ​របស់​លោក បុញ្ញឫទ្ធិ នោះ លោក ថោង ខុន បាន​និយាយ​ថា លោក​មិន​ដឹង​ថា ការ​លក់​សំបុត្រ​នោះ​ប្រមូល​ប្រាក់​បាន​ប៉ុន្មានក្នុង​មួយ​ឆ្នាំៗ​នោះ​ទេ ពីព្រោះ​ក្រសួង​របស់​លោក​មិន​ទទួល​ខុស​ត្រូវ​ឧទ្យាន​អង្គរ​ឡើយ។

លោក​បាន​ប្រាប់​អ្នកកាសែត​នៅ​ពេល​ចាកចេញ​ពី​សភា​ថា “ខ្ញុំ​មិន​ដឹង​អំពី​បញ្ហា​នេះ​ទេ។ ខ្ញុំ​អាច​ឆ្លើយ​តែ​សំណួរ​ដែល​ស្ថិត​នៅ​ក្រោម​អាជ្ញាធរ​របស់​ខ្ញុំ​ប៉ុណ្ណោះ។ រឿង​នេះ​មិន​ស្ថិត​នៅ​ក្រោម​សមត្ថកិច្ច​របស់​ខ្ញុំ​ទេ”។

លោក ប៊ុន ណារិទ្ធ អគ្គនាយក​អាជ្ញាធរ​អប្សរា បាន​បដិសេធ​មិន​ធ្វើ​អត្ថាធិប្បាយ​អំពី​ថាតើ​លោក​គិត​ថា ក្រសួង​ទេសចរណ៍​គួរ​ទទួល​ភារ​កិច្ច​លក់​សំបុត្រ​ពី​ក្រុមហ៊ុន​សូគីម៉ិច​វិញ​ឬ​យ៉ាងណា​នោះ​ទេ៕មានិត​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស