37 C
Phnom Penh

ក្រុម​ការងារ​ប្រព័ន្ធ​ផ្សព្វផ្សាយ​សង្គម​ថ្មី​នឹង​តាមដាន​វិបសាយ

ដោយ ឌឹ ខេមបូឌា ដេលី

បទវិភាគ

យោងតាម​សេចក្តី​ប្រកាស​ក្នុង​សៀវភៅរាជកិច្ច​បាន​ឲ្យ​ដឹង​ថា អង្គភាព​ព័ត៌មាន​និង​ប្រតិកម្ម​រហ័ស​របស់​ទីស្តីការ​គណៈ​រដ្ឋ​មន្ត្រី​បាន​បង្កើត “ក្រុម​ការងារ​ប្រព័ន្ធ​ផ្សព្វផ្សាយ​សង្គម” មួយ​ ដើម្បីតាមដាន​និង​ប្រមូល​ប្រព័ត៌មាន​ពី​ហ្វេសប៊ុក និង​វិបសាយ​ផ្សេង​ទៀត ក្នុង​បំណង​ “ការពារ​ជំហរ​និង​កិត្យានុភាព​របស់​រដ្ឋាភិបាល”។

ឯកសារ ដែល​ចុះហត្ថលេខា​ដោយ​ឧបនាយក​រដ្ឋមន្ត្រី សុខ អាន និង​ផ្សព្វផ្សាយ​កាលពី​ថ្ងៃ​ទី១៥​ខែ​តុលា មាន​ខ្លឹមសារ​ថា ក្រុម​ការងារ​ប្រព័ន្ធ​ផ្សព្វផ្សាយ​សង្គម (CWT) នឹង​ពិនិត្យ​និង​ផ្សព្វផ្សាយ​ពី​”វិបសាយ ហ្វេសប៊ុក ទ្វិធឺ ហ្គូហ្គល-ផ្លាស ប្លុក យូធូប និងបណ្តាញ​ព័ត៌មាន​ផ្សេង​ទៀត”។

ឯកសារ​ឲ្យ​ដឹង​ទៀត​ថា “បេសកកម្ម តួនាទី​និង​ភារកិច្ច​របស់​ CWT មាន​ដូច​តទៅ​ស្រាវជ្រាវ ប្រមូល វិភាគ និង​ចងក្រង​ព័ត៌មាន​ជាតិ​និង​អន្តរជាតិ​គ្រប់​រូបភាព ដើម្បី​ជា​មូលដ្ឋាន​ក្នុង​ការ​បកស្រាយ​និង​បំភ្លឺ​ជូន​សាធារណជន​ សំដៅ​ការពារ​ជំហរ​និង​កិត្យានុភាព​របស់​រដ្ឋាភិបាល”។

ឯកសារ​ដដែល​ឲ្យ​ដឹង​ថា អង្គភាព​ថ្មី​នេះ​នឹង”ប្រើ​យុទ្ធសាស្ត្រ ដើម្បី​ផ្សព្វផ្សាយ ទប់ស្កាត់ បកស្រាយ​បំភ្លឺ​និង​ការពារ​រាល់​សកម្មភាព​និង​សមិទ្ធផល​របស់​រដ្ឋាភិបាល”។

ការ​បង្កើត CWT ធ្វើ​ឡើង ខណៈ​ដែល​អង្គការ​មិនមែន​រដ្ឋាភិបាល​នានា​និង​អ្នក​សង្កេត​ការណ៍​បន្ត​អំពាវនាវ​ឲ្យ​មាន​ការ​ចាប់​អារម្មណ៍​ចំពោះ​សេចក្តី​ព្រាង​ច្បាប់​ឧក្រិដ្ឋ​កម្ម​អិុនធើណិត​របស់​ប្រទេស​កម្ពុជា ដែល​បាន​លេច​ឮ​ដល់​ប្រព័ន្ធ​ព័ត៌មាន​កាលពី​ខែ​មេសា និង​ដឹង​ថា​មាន​ផ្នែក​ជាច្រើន​ដែល​ដកស្រង់​ដោយ​ផ្ទាល់​ពី​សន្ធិសញ្ញា​អឺរ៉ុប​ស្តីពី​ឧក្រិដ្ឋកម្ម​អិុនធើណិត។

ក៏ប៉ុន្តែ ផ្នែក​មួយ​ដែល​មិន​បាន​ចម្លងតាម​និង​ដែល​បាន​ទទួល​ការ​រិះគន់​ច្រើន​នោះ គឺ​មាត្រា​២៨ ដែល​អនុញ្ញាត​ឲ្យ​មាន​ការ​ដាក់​ទណ្ឌកម្ម​បុគ្គល​ទាំងឡាយណា ដែល​ផ្សព្វផ្សាយ​ខ្លឹមសារ​តាម​អិុនធើណិត ដែល​បង្កាច់​បង្ខូច ឬបំផ្លាញ​ភាព​ត្រឹម​ត្រូវ​របស់​រដ្ឋាភិបាល ឬ​ទីភ្នាក់ងារ​រដ្ឋាភិបាល។

ច្បាប់​ស្នើ​ឡើង​នេះ​ក៏បង្ហាញ​ត្រួសៗ​នូវ​ការ​បង្កើត​អង្គភាព​មួយ​មាន​សមាជិក​១៤​រូប ឈ្មោះ​ថា “គណៈ​កម្មការ​ជាតិ​ប្រឆាំង​ឧក្រិដ្ឋកម្ម​អិុនធើណិត ដែល​មាន​លោក​នាយក​រដ្ឋមន្ត្រី ហ៊ុន សែន ជា​ប្រធាន និង លោក​ឧបនាយក​រដ្ឋ​មន្ត្រី ​សុខ អាន ត្រួត​ពិនិត្យ​ការ​អនុវត្ត​ច្បាប់។

គេ​នៅ​មិន​ទាន់​ច្បាស់​ថា​ គណៈកម្មការ​នេះ ច្បាប់​ឧក្រិដ្ឋកម្ម​អិុនធើណិត និង CWT នឹង​មាន​ការ​ទាក់​ទង​គ្នា​ដោយ​របៀបណា​នោះ​ទេ។

នៅពេល​ទាក់ទង​កាលពី​ថ្ងៃ​ពុធ លោក ផៃ ស៊ីផាន អ្នក​នាំពាក្យ​ទីស្តីការ​គណៈរដ្ឋ​មន្ត្រី បាន​មាន​ប្រសាសន៍​ថា លោក​មិន​បាន​ដឹងអំពី CWT ទេ ហើយ​បាន​បង្វែរ​សំណួរ​ទៅ​លោក ទិត សុធា អ្នក​នាំពាក្យ​អង្គភាព​ព័ត៌មាន​និង​ប្រតិកម្ម​រហ័ស ដែល​មិន​ឆ្លើយ​ទូរស័ព្ទ។

លោក ភូ លីវ៉ូដ ទីប្រឹក្សា​រដ្ឋាភិបាល​ផ្នែក​បច្ចេក​វិទ្យា​ព័ត៌មាន ក៏​បាន​និយាយ​ដែរថា លោក​មិន​បាន​ដឹង​អំពី​ CWT ទេ និង​មាន​ចម្ងល់​ចំពោះ​អត្ថិភាព​និង​ការ​អនុវត្ត​ទៅរួច។ លោក​បាន​និយាយ​ថា “ខ្ញុំ​មិន​គិត​ថា មាន​រឿង​នេះ​ទេ ឬ​ថា រដ្ឋាភិបាល​មាន​សមត្ថភាព​ធ្វើ​វា​ឡើយ”។

លោក លីវ៉ូដ ដែល​កាលពី​ខែ​មេសា​បាន​ឲ្យ​ដឹង​ថា ច្បាប់​ឧក្រិដ្ឋកម្ម​អិុនធើណិត​ទំនង​ត្រូវ​ព្រាង​ដោយ​អ្នក​មាន​ចំណេះ​បច្ចេក​វិទ្យា​ព័ត៌មាន​តិចតួច​នោះ បាន​និយាយ​ថា ប្រទេស​កម្ពុជា​តាម​មិន​ទាន់​ប្រទេស​នានា​ដែល​ដាក់​ឲ្យ​ប្រើ​រួច​ទៅ​ហើយ​នូវ​ការត្រួត​ពិនិត្យ​និង​បទប្បញ្ញត្តិ​អិុនធើណិត​យ៉ាង​តឹងរ៉ឹង។

កាលពី​ថ្ងៃ​ពុធ​ លោក​បាន​និយាយ​ថា “នៅ​ប្រទេស​ចិន ពួកគេ​តាមដាន​គ្រប់​យ៉ាង។ នៅ​ទីនេះ ប្រហែល​ពួកគេ​មាន​ឆន្ទៈ ប៉ុន្តែ ពួកគេ​មិន​ទាន់​មាន​ធនធាន​គ្រប់គ្រាន់​ទេ”។

ឯកសារ​មាន​១៦​ប្រការ​ក្នុង​សៀវភៅ​រាជកិច្ច ដែល​បោះផ្សាយ​មិន​ទៀងទាត់​នូវ​ឯកសារ​នានា​មាន​ឡាយ​ព្រះហស្ត​ដោយ​ព្រះ​មហាក្សត្រ ឲ្យ​ដឹង​ថា CWT ដែល​ឈ្មោះ​ជា​ភាសា​ខ្មែរ​ប្រែ​ថា “ក្រុម​ការងារ​ប្រព័ន្ធ​ផ្សព្វផ្សាយ​សង្គម​ថ្មី” នឹង​មាន​ការិយាល័យ​មួយ​ដែល​មាន​៦​ផ្នែក គឺ ​ផ្នែក​តាមដាន ផ្នែក​ផ្តួចផ្តើម​គំនិត ផ្នែក​ត្រួត​ពិនិត្យ ផ្នែក​ផ្សព្វផ្សាយ​និង​កសាង​បណ្តាញ ផ្នែក​បច្ចេកទេស និង​ផ្នែក​ចងក្រង​ទិន្នន័យ។

ឯកសារ​ឲ្យ​ដឹង​ថា ផ្នែក​តាមដាន​នឹង”ពិនិត្យ​តាមដាន​ព័ត៌មាន​គ្រប់​ប្រភព​និង​គ្រប់​វិស័យ​ដែល​ផ្សព្វផ្សាយ​ដោយ​ប្រភព​ផ្សេង​ទៀត” ហើយ “កំណត់​ប្រធានបទ​ដែល​ត្រូវ​រាយការណ៍​និង​ដែល​ត្រូវ​ឆ្លើយ​តប”។

ផ្នែក​ផ្សព្វផ្សាយ​និង​កសាង​បណ្តាញ​នឹង ​”បង្ហោះ​និងផ្សព្វផ្សាយ​ព័ត៌មាន​ដែល​បាន​ផលិត​និង​សម្រេច​រួច​ហើយ ទៅកាន់​បណ្តាញ​ផ្សព្វ​ផ្សាយ​ព័ត៌មាន​ដទៃ​ទៀត”។

លោក​ស្រី ណាលី ពីឡូក នាយិកា​អង្គការ​សិទ្ធិ​មនុស្ស​លីកាដូ ដែល​បាន​រិះគន់​សេចក្តី​ព្រាង​ច្បាប់​ឧក្រិដ្ឋកម្ម​អិុនធើណិត​យ៉ាង​ខ្លាំង​នោះ បាន​មាន​ប្រសាសន៍​ថា ប្រសិនបើ​ក្រុម​ការងារ​ប្រព័ន្ធ​ផ្សព្វផ្សាយ​សង្គម​ថ្មី​នេះ ត្រូវ​បាន​បង្កើត​ឡើង​គ្រាន់តែ​ដើម្បី​ផ្សព្វផ្សាយ​ព័ត៌មាន​គាំទ្រ​រដ្ឋាភិបាល​នោះ គឺ “មិន​មាន​មូលហេតុ​ត្រូវ​បារម្ភ​ទេ”។

លោក​ស្រី​បាន​មាន​ប្រសាសន៍​តាម​រយៈ​អីុម៉េល​ថា “ទោះយ៉ាងណា​ក៏ដោយ គោលការណ៍​ណែនាំ​ស្រពិច​ស្រពិល​ ដែល ‘ក្រុម​ការងារ​ប្រព័ន្ធ​ផ្សព្វផ្សាយ​សង្គម​ថ្មី​’ នឹង​ធ្វើ​ប្រតិបត្តិការ​​ក្រោម​គោលការណ៍​ណែនាំ​នេះ គឺ​ជា​ការ​ព្រួយ​បារម្ភ​ដូច​ឈ្មោះ​របស់​ក្រុមនេះ​ដូច្នេះ​ដែរ”។ “ជា​ពិសេស លទ្ធភាព​នៃ​ការ​តាមដាន​និង​ការ​ប្រមូល​សកម្មភាព​ព័ត៌មាន​សង្គម ដែល​អាច​ជា​ជំហាន​ដំបូង​ក្នុង​ការ​ចាប់​ពិរុទ្ធ​និង​ការ​ដាក់​ទណ្ឌកម្ម​លើ​ទស្សន​ប្រឆាំង​លើ​អិុនធើណិត”៕មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស