កាលពីម្សិលមិញ លោកនាយករដ្ឋមន្ត្រី ហ៊ុន សែន បានព្រមានអ្នកដែលអះអាងថា ការចាប់ខ្លួនមនុស្សយ៉ាងច្រើនក្នុងពេលថ្មីៗនេះជារឿងនយោបាយឲ្យ “ប្រយ័ត្នប្រយ៉ែង” ចំពោះពាក្យសម្ដីរបស់ខ្លួន ហើយបានលើកឡើងថា តំណាងរាស្ត្រប្រាំពីររូបរបស់គណបក្សសង្គ្រោះជាតិ ដែលត្រូវបានដោះលែងពីពន្ធនាគារកាលពីថ្ងៃទី២២ ខែកក្កដា នៅតែអាចទទួលការផ្ដន្ទាទោសដដែល។
លោក ហ៊ុន សែន បានថ្លែងក្នុងពិធីប្រគល់សញ្ញាបត្រមួយនៅក្នុងរាជធានីភ្នំពេញថា កិច្ចព្រមព្រៀងនយោបាយថ្ងៃ២២ កក្កដា ជាមួយលោក សម រង្ស៊ី ប្រធានគណបក្សសង្គ្រោះជាតិ ដែលបានដឹកនាំគណបក្សប្រឆាំងបញ្ចប់ការធ្វើពហិការមិនចូលសភារយៈពេល១០ខែរបស់ខ្លួននោះ មិនបានបញ្ចប់ករណីព្រហ្មទណ្ឌឡើយ។
លោកបានមានប្រសាសន៍ទៀតថា “សូមឲ្យអ្នកដទៃមានការប្រយ័ត្នប្រយែ៉ងទៅលើពាក្យសម្ដី។ កិច្ចព្រមព្រៀងរវាងគណបក្សនយោបាយទាំងពីរនៅថ្ងៃទី២២ ខែកក្កដា ឆ្នាំ២០១៤កន្លងទៅ មិនមែនជាកិច្ចព្រមព្រៀងបញ្ចប់នូវដំណើរការរបស់តុលាការទៅលើរឿងក្ដីទាក់ទងនឹងរឿងព្រហ្មទណ្ឌទេ សូមបញ្ជាក់ជូន”។
លោកបានលើកឡើងថា អំឡុងជំនួបមួយជាលក្ខណៈឯកជនកាលពីពេលថ្មីៗនេះនៅឯរដ្ឋសភា លោកបានប្រាប់ទៅលោក សម រង្ស៊ី ថា ករណី “កុបកម្ម” ប្រឆាំងតំណាងរាស្ត្រប្រាំពីររូបរបស់គណបក្សសង្គ្រោះជាតិ និងមន្ត្រីគណបក្សនេះដែលត្រូវបានដោះលែងពីពន្ធនាគារនៅយប់ថ្ងៃទី២២ ខែកក្កដា មិនត្រូវបានទាត់ចោលទេ នៅពេលចុះកិច្ចព្រមព្រៀងនេះ។ លោកបានបន្តថា “កិច្ចព្រមព្រៀងថ្ងៃ២២ កក្កដា មិនបានបញ្ចប់រឿងក្ដីនៅតុលាការទេ រួមទាំងអ្វីដែលខ្ញុំបានប្រាប់ឯកឧត្តម សម រង្ស៊ី ផងថា គ្មានអ្នកណាអាចបញ្ចប់បណ្ដឹងអាជ្ញានេះបានទេ។ ពេលនេះតំណាងរាស្ត្រមានអភ័យឯកសិទ្ធិ [ប៉ុន្តែពួកគេ] នឹងត្រូវនាំខ្លួនមកកាត់ទោស ពេលអស់អភ័យឯកសិទ្ធិ”។
បទចោទប្រកាន់លើតំណាងរាស្ត្រទាំងប្រាំពីររូប រួមមានទាំង “ការដឹកនាំកុបកម្ម” ផង ដែលត្រូវមានទោសជាប់ពន្ធនាគាររហូតដល់៣០ឆ្នាំ។
លោក មាជ សុវណ្ណរ៉ា មន្ត្រីដ៏សំខាន់មួយរូបនៅក្នុងគណបក្សសង្គ្រោះជាតិ ត្រូវបានចាប់ខ្លួនដាក់ពន្ធនាគារកាលពីព្រឹកថ្ងៃអង្គារសប្ដាហ៍មុន បន្ទាប់ពីជុំចរចាមួយទៀតរវាងគណបក្សទាំងពីរជុំវិញការបង្កើតគណៈកម្មាធិការជាតិរៀបចំការបោះឆ្នោតថ្មី ដែលមានគណបក្សទាំងពីរចូលរួមបានបរាជ័យ។
សកម្មជននយោបាយមួយចំនួនផ្សេងទៀតក៏ត្រូវបានចាប់ខ្លួនដែរកាលពីសប្ដាហ៍មុន រួមមានទាំងស្ត្រីចំនួនប្រាំពីរនាក់មកពីសហគមន៍បឹងកក់ ដែលត្រូវបានតុលាការកាត់ទោសឲ្យជាប់ពន្ធនាគាររយៈពេល១ឆ្នាំ បន្ទាប់ពីពួកគេបានបិទផ្លូវដោយមានទាំងគ្រែផង អំឡុងការតវា៉មួយ។
លោក ហ៊ុន សែន បានមានប្រសាសន៍កាលពីម្សិលមិញថា ករណីបែបនេះ គឺជាការបំពានច្បាប់យ៉ាងច្បាស់ក្រឡែត ហើយត្រូវផ្ដន្ទាទោសទៅតាមច្បាប់។លោកមានប្រសាសន៍បន្ថែមទៀតថា “មិនអាចអត់ឱនឲ្យបានទេ វាដល់ពេលអាជ្ញាធរចាត់វិធានការហើយ។ ឲ្យតែមានរឿងអីអាងបិទផ្លូវ ចុះបើអ្នកជំងឺ [ដែលបញ្ជូនទៅមន្ទីរពេទ្យ] ម៉េចៗទៅ? ហើយកាឡៃករណីព្រហ្មទណ្ឌទៅជារឿងនយោបាយ?”។
លោក មាជ សុវណ្ណរា៉ា ដែលជាមន្ត្រីរបស់គណបក្សសង្គ្រោះជាតិ ក៏ត្រូវបានចាប់ខ្លួនពាក់ព័ន្ធនឹងការតវ៉ាហិង្សារបស់គណបក្សប្រឆាំងកាលពីថ្ងៃទី១៥ ខែកក្កដាដែរ ដែលនាំឲ្យនគរបាលឃុំខ្លួនតំណាងរាស្ត្រប្រាំពីររូបរបស់គណបក្សសង្គ្រោះជាតិ និងមន្ត្រីគណបក្សនេះមួយរូបទៀតនៅរយៈពេលប៉ុន្មានថ្ងៃមុនមានកិច្ចព្រមព្រៀងភ្លាមៗរវាងគណបក្សប្រជាជនកម្ពុជា និងគណបក្សសង្គ្រោះជាតិ។
លោកនាយករដ្ឋមន្ត្រីបានលើកឡើងកាលពីម្សិលមិញថា អ្នកទាំងប្រាំបីនាក់នោះត្រូវបានដោះលែងឲ្យនៅក្រៅឃុំកាលពីថ្ងៃទី២២ ខែកក្កដា ដោយសារគណបក្សសង្គ្រោះជាតិយល់ព្រមធ្វើការដើម្បីដោះស្រាយបណ្ដឹងរដ្ឋប្បវេណីមួយចំនួនប្តឹងសមាជិកសភាពីសំណាក់សន្តិសុខ ដែលរងរបួសនៅក្នុងការតវ៉ាដែលជាចំណុចស្នូលនៃការចាប់ខ្លួនអ្នកទាំងប្រាំបីនាក់នោះ។
លោក ហ៊ុន សែន បានមានប្រសាសន៍ថា “ខ្ញុំជាអ្នកចរចា ហើយវាមានសំណើសុំឲ្យមានអន្តរាគមន៍នៅថ្ងៃចរចានឹង។ ខ្ញុំបានប្រាប់ឯកឧត្តម សម រង្ស៊ី និងគណៈប្រតិភូរបស់គាត់សូមឲ្យពន្លឿនករណីបណ្តឹងរដ្ឋប្បវេណីដើម្បីបង្អាក់ករណីព្រហ្មទណ្ឌ”។
លោក ហ៊ុន សែន បានមានប្រសាសន៍បន្ថែមថា “ហេតុអ្វីបានខ្ញុំនិយាយអ៊ីចឹង? ដោយសារយើងបាននិយាយរួចហើយថា ត្រូវចូលសភា អ៊ីចឹងសូមចូលសភាទៅ បើត្រូវចូលសភាដើម្បីបានអភ័យឯកសិទ្ធិនោះ។វាហៅថា នីតិវិធីរដ្ឋប្បវេណី ដើម្បីបង្កាក់នីតិវិធីព្រហ្មទណ្ឌ”។
លោក ហ៊ុន សែន ក៏បានអះអាងកាលពីម្សិលមិញផងដែរថា ប្រសិនបើលោកមានអំណាចធ្វើអន្តរាគមន៍លោកនឹងចេញបទបញ្ជាឲ្យមានការដោះលែងលោក សុវណ្ណារ៉ា និងសកម្មជននយោបាយផ្សេងៗទៀត ដែលត្រូវបានចាប់ខ្លួននិងបញ្ជូនទៅពន្ធនាគារកាលពីសប្តាហ៍មុន។
លោក ហ៊ុន សែន បានមានប្រសាសន៍ថា “ឥឡូវនេះគេចាប់ផ្តើមចោទប្រកាន់រដ្ឋាភិបាលថា ប្រើឧបករណ៍ដើម្បីបង្ក្រាបក្រុមប្រឆាំង ឬចាប់ខ្លួនអ្នកផ្សេងទៀតធ្វើជាចំណាប់ខ្មាំង។ ខ្ញុំចង់ផ្ញើសារត្រឡប់ទៅវិញថា ករណីនេះកើតឡើងដោយសារនាយករដ្ឋមន្ត្រី និងរដ្ឋាភិបាលគ្មានសិទ្ធិលើតុលាការ”។
លោកបានមានប្រសាសន៍បន្តថា “ប្រសិនបើខ្ញុំអាចនិយាយបាននោះ ខ្ញុំនឹងឲ្យតុលាការដោះលែង វាគឺជារឿងងាយស្រួលទេ។ ខ្ញុំនឹងបញ្ជាឲ្យតុលាការដោះលែងនៅថ្ងៃេនះ ប្រសិនបើខ្ញុំមានសិទ្ធិនោះ ប៉ុន្តែ ខ្ញុំអត់មានសិទ្ធិទេ”។
លោក សម រង្ស៊ី បានលើកឡើងម្តងហើយម្តងទៀតនៅប៉ុន្មានសប្តាហ៍បន្ទាប់ពីមានកិច្ចព្រមព្រៀងថា អត្ថប្រយោជន៍មួយក្នុងចំណោមអត្ថប្រយោជន៍ដ៏សំខាន់ៗរបស់ខ្លួនគឺថានឹងគ្មានការចាប់ខ្លួនសកម្មជន និងការប៉ះទង្គិចគ្នារវាងអ្នកតវ៉ា និងនគរបាលឡើយ។
នៅពេលនេះ គ្មានរណាម្នាក់នៅក្នុងគណបក្សប្រជាជននិយាយថា រឿងក្តីព្រហ្មទណ្ឌពាក់ព័ន្ធនឹងការតវ៉ាកាលពីថ្ងៃទី១៥ ខែកក្កដា ឬការតវ៉ាផ្សេងៗទៀតនឹងបញ្ចប់នោះទេ ប៉ុន្តែ គណបក្សទាំងពីរបានលើកឡើងថា កិច្ចព្រមព្រៀង រួមមានទាំងការសន្យាធ្វើឲ្យបរិយាកាសនយោបាយវិលទៅរកសភាពធម្មតាវិញ បន្ទាប់ពីមានការបង្ក្រាបលើកការតវ៉ា និងការចាប់ខ្លួនអ្នកតវ៉ាក្នុងរយៈពេលប៉ុន្មានខែនេះផងដែរ។
សមាជិកសភាចំនួនប្រាំពីររូបរបស់គណបក្សសង្គ្រោះជាតិបានស្បថចូលកាន់តំណែងកាលពីខែសីហា ដោយទទួលបានអភ័យឯកសិទ្ធិពីការផ្តន្ទាទោស។ ប្រសិនបើចង់ដកអភ័យឯកសិទ្ធិរបស់សមាជិករដ្ឋសភាវិញនោះ គឺចាំបាច់ត្រូវតែមានសំឡេងពីរភាគបីនៃសមាជិកចំនួន១២៣រូបនៅក្នុងរដ្ឋសភា។
លោកនាយករដ្ឋមន្ត្រី ហ៊ុន សែន បានច្រានចោលការអះអាងរបស់គណបក្សសង្គ្រោះជាតិ និងអង្គការសង្គមស៊ីវិលមួយចំនួននាសប្ដាហ៍មកនេះ ដែលថា ការចាប់ខ្លួនកាលពីសប្ដាហ៍មុនត្រូវបានធ្វើឡើង ដើម្បីដាក់សម្ពាធលើគណបក្សសង្គ្រោះជាតិឲ្យដោះស្រាយការចរចាដែលជាប់គាំង ដើម្បីបង្កើតគណៈកម្មាធិការរៀបចំការបោះឆ្នោតថ្មី។
លោក ហ៊ុន សែន បានមានប្រសាសន៍ថា “វាអត់មានអីរាំងស្ទះដល់ការចរចា ដើម្បីធ្វើច្បាប់ស្តីពីការរៀបចំ និងប្រព្រឹត្តិទៅនៃគណៈកម្មាធិការជាតិរៀបចំការបោះឆ្នោត និងការធ្វើវិសោធនកម្មបទបញ្ជាផ្ទៃក្នុងឡើយ”។ លោកបានមានប្រសាសន៍បន្តថា “ខ្ញុំគិតថា កុំយកសាំងមកស្រោចលើភ្លើង អ្វីៗវាត្រូវតែអាស្រ័យលើច្បាប់”៕សុខុម និង ស៊ុយឈាង