មន្ត្រីមួយរូបនៅការិយាល័យអាំងទែប៉ូលរបស់កម្ពុជា បានបញ្ជាក់កាលពីម្សិលមិញថា អាជ្ញាធរថៃ បានទាក់ទងមកការិយាល័យរបស់លោកដើម្បីសុំជំនួយតាមស្វែងរកជនជាតិអាមេរិកពីរនាក់ ដែលជាប់ចោទថាបានប៉ុនប៉ងដឹកជញ្ជូនបំណែកសរីរាង្គមនុស្ស ដែលពួកគេបានលួចពីក្រុងបាងកក ឆ្ពោះទៅប្រទេសកំណើតរបស់ពួកគេ។
លោក លីម សុខារស្មី ដែលជាប្រធានស្ដីទីនៃការិយាល័យនគរបាលអាំងទែប៉ូល បានមានប្រសាសន៍ថា លោកបានទាក់ទងទៅអាជ្ញាធរថៃ ហើយបានប្រគល់ឯកសារពាក់ព័ន្ធជនសង្ស័យឈ្មោះ រ៉ាយអែន អេដវើដ ម៉ាកភើសុន (Ryan Edward McPherson) និង ដានីញែល ធែនណឺ (Daniel Tanner) ទៅផ្នែកមួយផ្សេងទៀតរួចហើយ។
លោកបានមានប្រសាសន៍ទៀតថា ” នគរបាលអាំងទែប៉ូលថៃ បានទាក់ទងមកយើងកាលពីម្សិលមិញ ហើយខ្ញុំបានបញ្ជូនឯកសារទាំងអស់ទៅថ្នាក់លើរួចហើយ ហើយខ្ញុំមិនដឹងថាផ្នែកណាមួយនឹងទទួលការចាត់តាំងឲ្យដោះស្រាយករណីនេះទេ” មុនពេលលោកបដិសេធមិនឆ្លើយសំណួរបន្ថែមទៀត ហើយបានបង្វែរសំណួរទៅលោក គៀត ច័ន្ទថារិទ្ធ អ្នកនាំពាក្យនគរបាលជាតិ។
លោក គៀត ច័ន្ទថារិទ្ធ បានមានប្រសាសន៍ថា លោក លីម សុខារស្មី មិនបានផ្ដល់ព័ត៌មានបច្ចុប្បន្នភាពស្ដីអំពីករណីនេះដល់រូបលោកទេ។ លោកបានមានប្រសាសន៍ទៀតថា “ខ្ញុំមិនទាន់ដឹងទេ។ ខ្ញុំបានទូរស័ព្ទ [ទៅលោក សុខា រស្មី] ដើម្បីសុំព័ត៌មានបច្ចុប្បន្នភាពស្ដីពីករណីនេះ [កាលពីថ្ងៃពុធ] ហើយគាត់និយាយថា គាត់គ្មានព័ត៌មានទេ ប៉ុន្តែគាត់និយាយថា គាត់នឹងទាក់ទងមកខ្ញុំឲ្យបានឆាប់តាមដែលអាចធ្វើទៅបាន”។
ជនសង្ស័យទាំងពីរដែលកាលពីមួយទសវត្សរ៍មុនល្បីឈ្មោះចំពោះការពាក់ព័ន្ធរបស់ពួកគេក្នុងការផលិតភាពយន្ត Bumfights ជាខ្សែភាពយន្តដែលពាក់ព័ន្ធនឹងការជួលជនអនាថាឲ្យរ៉ៃតប់គ្នា និងសម្ដែងឈុតគួរឲ្យអាម៉ាស់ផ្សេងៗ ត្រូវគេជឿថាបានភៀសខ្លួនមកកាន់កម្ពុជាកាលពីថ្ងៃអាទិត្យ បន្ទាប់ពីត្រូវសមត្ថកិច្ចសាកសួរជុំវិញបំណែកសរីរាង្គទាំងនេះ ដែលគេរកឃើញនៅសាខាមួយកន្លែងរបស់ក្រុមហ៊ុនដឹកជញ្ជូនទំនិញ DHL។
កាសែតបាងកកប៉ុស្តិ៍បានចុះផ្សាយថា ដំបូងឡើយជនទាំងពីរនេះត្រូវនគរបាលថៃឃាត់ខ្លួន បន្ទាប់ពីបំណែកសរីរាង្គដែលរួមមានស្បែកមានរូបសាក់ ក្បាលទារក បេះដូងមនុស្សពេញវ័យ និងប្រអប់ជើងទារកដែលត្រូវបានកាត់ជាបីកង់ ត្រូវបានប្រទះឃើញពេលស្គែនកាំរស្មីអុិចនៅក្រុមហ៊ុន DHL ប៉ុន្តែត្រូវបានដោះលែងវិញ បន្ទាប់ពីពួកគេអះអាងថា ខ្លួនបានទិញបំណែកសរីរាង្គទាំងនោះនៅផ្សារលក់ទំនិញជជុះមួយកន្លែងក្នុងក្រុងបាងកក ប្រទេសថៃ។
កាសែតដដែលបានលើកឡើងទៀតថា ក្រោយមកអាជ្ញាធរបានចេញដីកាចាប់ខ្លួនពួកគេនៅពេលមានភ័ស្តុតាងបង្ហាញថា ពួកគេទាំងពីរប្រហែលជាបានលួចបំណែកសាកសពទាំងនេះចេញពីសារមន្ទីរវេជ្ជសាស្ត្រស៊ីរីរ៉ាច (Siriraj Medical Museum) ក្នុងក្រុងបាងកក។ រូបភាពទូរទស្សន៍ CCTV ដែលបង្ហាញពីសកម្មភាពបុរសពីរនាក់ដែលគេជឿថា រ៉ាយអែន អេដវើដ ម៉ាកភើសុន និង ដានីញែល ធែនណឺ ដើរចូលទៅសារមន្ទីរនេះ ត្រូវបានបែកធ្លាយតាមបណ្ដាញអុីនធើណិតកាលពីថ្ងៃពុធ៕ សុខុម