ជាថ្មីម្ដងទៀត លោកនាយករដ្ឋមន្ត្រី ហ៊ុន សែន បាននិយាយការពារសេចក្ដីសម្រេចរបស់រដ្ឋាភិបាលក្នុងការតាំងទីលំនៅថ្មីដល់អ្នកស្វែងរកសិទ្ធិជ្រកកោន ដែលត្រូវបានស្ទាក់ចាប់ដោយអាជ្ញាធរអូស្ត្រាលី ហើយបានឃុំខ្លួននៅលើប្រទេសដែនកោះណូរូ នៅពេលនេះនៅក្នុងលិខិតមួយច្បាប់ផ្ញើជូនលោក ហេង សំរិន ប្រធានរដ្ឋសភា។
នៅក្នុងលិខិតចុះថ្ងៃទី១៧ ខែវិច្ឆិកា ហើយទទួលបានកាលពីម្សិលមិញ លោក ហ៊ុន សែន បានមានប្រសាសន៍ថា កិច្ចព្រមព្រៀងកាលពីថ្ងៃទី២៩ ខែកញ្ញា ដែលបានចុះហត្ថលេខាដោយលោក ស ខេង រដ្ឋមន្ត្រីក្រសួងមហាផ្ទៃ និងលោក ស្កុត ម៉ូរីសុន រដ្ឋមន្ត្រីក្រសួងអន្តោប្រវេសន៍អូស្ត្រាលីធ្វើតាមបទដ្ឋានអន្តរជាតិ និងមនុស្សធម៌។
លិខិតនោះធ្វើឡើងជាការឆ្លើយតបទៅនឹងលិខិតសាកសួរ ដែលផ្ញើដោយលោក កឹម សុខា អនុប្រធានរដ្ឋសភា តាមរយៈលោក ហេង សំរិន កាលពីចុងខែតុលា។
លោក ហ៊ុន សែន បានសរសេរថា “ការផ្ដល់កន្លែងជ្រកកោនដល់ជនភៀសខ្លួននៅក្នុងប្រទេសកម្ពុជា គឺផ្អែកតាមមូលដ្ឋានស្ម័គ្រចិត្ត និងមូលដ្ឋានមនុស្សធម៌។ ហេតុដូច្នេះហើយ ជនភៀសខ្លួនដែលមកប្រទេសកម្ពុជាត្រូវតែព្រមព្រៀងតាមរយៈឯកសារជាលាយលក្ខណ៍អក្សរ ដោយគ្មានការបង្ខិតបង្ខំឡើយ”។
លោក ហ៊ុន សែន បានលើកឡើងនៅក្នុងលិខិតនោះថា បច្ចុប្បន្ននេះ ប្រទេសកម្ពុជាផ្ដល់កន្លែងស្នាក់នៅដល់ជនភៀសខ្លួន៨៥នាក់ រួមមានប្រជាជនមកពីប្រទេសវៀតណាម ថៃ ភូមា ស្រីលង្កា ប៉ាឡេស្ទីន អីុរ៉ាក់ ស៊ូដង់ កុងហ្គោ និងប្រទេសសូម៉ាលី និងជនភៀសខ្លួនណាដែលយល់ព្រម មកពីប្រទេសណូរូ នឹងត្រូវគាំទ្រដោយរដ្ឋាភិបាលប្រទេសអូស្ត្រាលី។
លោក ហ៊ុន សែន បានសរសេរថា “ក្នុងការទទួលយកជនភៀសខ្លួន ភាគីអូស្ត្រាលីនឹងទទួលខុសត្រូវចំពោះការចំណាយផ្សេងៗ រួមទាំងការបញ្ជូនជនភៀសខ្លួនមកប្រទេសកម្ពុជា ការផ្ដល់ជម្រកបណ្ដោះអាសន្ន អាហារ សម្លៀកបំពាក់ប្រចាំថ្ងៃ សេវាបកប្រែភាសា ការធានារ៉ាប់រងសុខភាពក្នុងរយៈពេល៥ឆ្នាំ និងការផ្ដល់ការគាំទ្ររយៈពេលមួយឆ្នាំ អំឡុងការធ្វើសមាហរណកម្មរបស់ពួកគេចូលមកក្នុងសហគមន៍កម្ពុជា” ។
លោកនាយករដ្ឋមន្ត្រីបានសរសេរទៀតថា “ប្រសិនបើជនភៀសខ្លួនណាចង់ត្រឡប់ទៅប្រទេសកំណើតរបស់ខ្លួនវិញ ឬចង់តាំងទីលំនៅក្នុងប្រទេសណាមួយបន្ទាប់ពីពួកគេបានចាកចេញពីកន្លែងជ្រកកោនក្នុងរយៈពេល១ឆ្នាំនោះ ប្រទេសអូស្ត្រាលីនឹងផ្ដល់ការគាំទ្រចំពោះការធ្វើដំណើរទៅប្រទេសកំណើតរបស់ខ្លួនវិញ ឬប្រទេសណាមួយដែលជនភៀសខ្លួនទាំងនោះចង់តាំងទីលំនៅ”។
លិខិតនេះបញ្ចប់ដោយការលើកឡើងថា ជនជាតិខ្មែរមួយចំនួនធំធ្លាប់ត្រូវបានផ្តល់ការតាំងទីលំនៅក្នុងនាមជាជនភៀសខ្លួនពីសំណាក់ប្រទេសផ្សេងៗទៀតនៅទូទាំងពិភពលោក រួមមានប្រទេសអូស្ត្រាលីជាដើម ហើយថា ឥឡូវនេះប្រទេសកម្ពុជាស្ថិតនៅក្នុងគោលជំហរសមរម្យក្នុងការតបស្នងដោយការគួរសមផងដែរ៕ សារុន