យោងតាមព្រះរាជក្រឹត្យបានឲ្យដឹងថា លោកស្រី សម មុន្នីកា រដ្ឋលេខាធិការក្រសួងទេសចរណ៍ ដែលរងការរិះគន់តាមបណ្ដាញទំនាក់ទំនងសង្គមប៉ុន្មានសប្ដាហ៍ថ្មីនេះ ដោយសារការទាមទារប្រាក់សំណងជំងឺចិត្តហួសហេតុចំពោះរបួសស្នាមបន្តិចបន្តួចអំឡុងគ្រោះថ្នាក់ចរាចរណ៍មួយបានលាលែងពីតំណែងកាលពីសប្ដាហ៍មុន។
ពេលទាក់ទងកាលពីម្សិលមិញ លោកស្រី មុន្នីកា បានលើកឡើងថា លោកស្រីមិនត្រូវបានគេដាក់សម្ពាធឲ្យចុះចេញពីតំណែងឡើយ ហើយលោកស្រីបានបន្តការពារការសម្រេចចិត្តរបស់ខ្លួនក្នុងការទាមទារប្រាក់សំណងជំងឺចិត្ត៤.០០០ដុល្លារ ចំពោះរបួសស្នាមដែលលោកស្រីបានលើកឡើងថា បានត្រូវត្រង់ក្បាល ទ្រូង និងស្មា នៅពេលរថយន្តតាក់ស៊ីដែលលោកស្រីជិះបានរអិលធ្លាក់ផ្លូវចូលប្រឡាយក្នុងខេត្តរតនគិរី។ លោកស្រីបាននិយាយថា ” ខ្ញុំលាលែងពីតំណែងដោយស្ម័គ្រចិត្ត ហើយគ្មាននរណាម្នាក់បង្ខំខ្ញុំឡើយ”។
បន្ទាប់ពីហេតុការណ៍គ្រោះថ្នាក់ចរាចរណ៍ លោកស្រី មុន្នីកា បានទាមទារប្រាក់សំណងជំងឺចិត្ត១.០០០ដុល្លារសម្រាប់ខ្លួនលោកស្រី និងមន្ត្រីរដ្ឋាភិបាលបីនាក់ផ្សេងទៀត ដែលក៏នៅក្នុងរថយន្តរបស់លោក កឹម ពិសិដ្ឋ ដែរនោះ។
នៅពេលលោក ពិសិដ្ឋ មិនមានលទ្ធភាពរកប្រាក់មកបង់សំណងជំងឺចិត្តបាន ដោយលោកបានអះអាងថា លោកបានបញ្ចាំផ្ទះរបស់ខ្លួនរួចហើយដើម្បីទិញរថយន្តនេះ លោក ផេង វណ្ណៈ មន្ត្រីនគរបាលមួយរូបបានអំពាវនាវតាមហ្វេសប៊ុកដើម្បីរៃអង្គាសប្រាក់យកទៅជួយម្ចាស់រថយន្តតាក់ស៊ីរូបនេះ។
លោក ខៀវ កាញ៉ាឫទ្ធិ រដ្ឋមន្ត្រីក្រសួងព័ត៌មាន គឺស្ថិតនៅក្នុងមនុស្សប្រមាណ៤០នាក់ដែលបានជួយលោក ពិសិដ្ឋ ហើយលោក វណ្ណៈ បានរៃអង្គាសប្រាក់ដោយជោគជ័យ។ បន្ទាប់ពីទទួលបានប្រាក់សំណងជំងឺចិត្តនៅដើមខែនេះ លោកស្រី មុន្នីកា បានលើកឡើងថា លោកស្រីនឹងយកប្រាក់ទាំងនេះទៅបរិច្ចាគដល់កាកបាទក្រហមកម្ពុជា។ ទោះជាយ៉ាងណា កាកបាទក្រហមកម្ពុជាបានច្រានចោលការសន្យារបស់លោកស្រីដោយគ្មានពន្យល់អ្វីឡើយ នៅក្នុងសេចក្ដីថ្លែងការណ៍មួយ។
អ្នកលេងហ្វេសប៊ុកជាច្រើននាក់ក៏បានរិះគន់លោកស្រី មុន្នីកា ចំពោះការទាមទារនេះដែរ ដោយពួកគេបាននិយាយថា វាគឺជាការទាមទារប្រាក់សំណងជំងឺចិត្តមិនសមហេតុសមផលពីម្ចាស់រថយន្តតាក់ស៊ីដែលក្រីក្រម្នាក់។ ហើយវាជាប្រតិកម្មមួយដែលលោកស្រីបានលើកឡើងកាលពីម្សិលមិញថា បានធ្វើឲ្យខូចកេរ្តិ៍ឈ្មោះរបស់លោកស្រី។
លោកស្រីបាននិយាយថា “វាមិនយុត្តិធម៌ទេ។ ខ្ញុំជាជនរងគ្រោះ ប៉ុន្តែពួកគេបែរជាជេរប្រមាថខ្ញុំទៅវិញ”។ លោកស្រីបានបន្ថែមថា លោកស្រីបានសន្លប់ប្រហែល៣០នាទីក្រោយពេលកើតហេតុ។ លោកស្រីបាននិយាយបន្តទៀតថា ” ប្រសិនបើរថយន្តផ្ទុះឆេះ ឬធ្លាក់ចូលក្នុងទឹក ម្លេ៉ះខ្ញុំស្លាប់បាត់ទៅហើយ ព្រោះខ្ញុំជាប់នៅក្នុងរថយន្តនោះ”។
លោក ពិសិដ្ឋ បានបដិសេធមិននិយាយរៀបរាប់អំពីករណីនេះទេកាលពីម្សិលមិញ។ លោកបាននិយាយថា “រឿងទាំងអស់ត្រូវបានដោះស្រាយរួចហើយ ហេតុដូច្នេះហើយខ្ញុំគ្មានអ្វីត្រូវនិយាយច្រើនទៀតទេចំពោះករណីនេះ”៕ ស៊ុយឈាង